|
|
| [1]ܒܲܫܢܲܬ̣ ܥܸܣܪܝܼܢ ܘܲܫܒܲܥ ܫܢ̈ܝܼܢ ܠܝܘܿܪܲܒ̣ܥܲܡ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܥܘܿܙܝܼܵܐ ܒܲܪ ܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ. |
[No book] |
| [2]ܒܲܪ ܫܸܬ̇ܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ ܟܲܕ݂ ܐܲܡ̣ܠܸܟ݂: ܘܚܲܡܫܝܼܢ ܘܬܲܪܬܹ̇ܝܢ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܐ ܕܐܸܡܹܗ ܝܑܼܟܲܢܝܵܐ ܡ̣ܢ ܐܘܿܪܸܫܠܸܡ. |
[No book] |
| [3]ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟ݂ ܐܵܡܘܿܨܝܼܵܐ ܐܲܒ̣ܘܼܗܝ. |
[No book] |
| [4]ܒܪܲܡ ܕܹܝܢ ܥ̈ܠܵܘܵܬ̣ܵܐ ܠܵܐ ܐܲܥ̣ܒܲܪ ܘܲܥܕܲܟܹ̇ܝܠ ܥܲܡܵܐ ܡܕܲܒ̇ܚܝܼܢ ܗ̄ܘ̣ܵܘ: ܘܣܵܝ̇ܡܝܼܢ ܒܸܣܡܹ̈ܐ ܥܲܠ ܥܠܵـ̈ـܘܵܬ̣ܵܐ. |
[No book] |
| [5]ܘܲܡܚܵܝܗܝ ܡܵܪܝܵܐ ܠܡܲܠܟܵܐ: ܘܲܗܘ̤ܵܐ ܓܲܪܒܵܐ ܥܕܲܡܵܐ ܠܝܵܘܡܵܐ ܕܡܝܼܬ̣. ܘܝܼܬܸܒ̣ ܒܒܲܝܬܵܐ ܡܲܛܫܝܵܐܝܼܬ̣. ܘܝܘܿܬ̣ܵܡ ܒܲܪ ܡܲܠܟܵܐ ܪܲܒ̇ܒܲܝܬܵܐ ܕܵܐܹ̇ܢ ܗ̄ܘ̣ܵܐ ܠܥܲܡܵܐ ܕܐܲܪܥܵܐ. |
[No book] |
| [6]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܥܘܿܙܝܼܵܐ: ܘܟ݂ܠܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. |
[No book] |
| [7]ܘܲܫܟܸܒ̣ ܥܘܿܙܝܼܵܐ ܐܲܒ̣ܵܗܵܘ̈ܗܝ: ܘܩܲܒ̣ܪܘܼܗܝ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܐܲܡ̣ܠܸܟ݂ ܝܘܿܬ̣ܵܡ ܒܪܹܗ ܒܵܬ̣ܪܹܗ. |
[No book] |
| [8]ܒܲܫܢܲܬ̣ ܬܠܵܬ̣ܝܼܢ ܘܲܬ̣ܡܵܢܹܐ ܫܢ̈ܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܙܟܲܪܝܵܐ ܒܲܪ ܝܘܿܪܲܒ̣ܥܲܡ ܥܲܠ ܝܼܣܪܵܝܹܠ: ܒܫܵܡܪܹܝܢ ܫܬܵܐ ܝܲܪ̈ܚܝܼܢ. |
[No book] |
| [9]ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ ܐܲܒ̣ܘܼܗܝ. ܘܠܵܐ ܣܛ̣ܵܐ ܡ̣ܢ ܟܠܗܘܿܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܕܐܲܚܛܝܼ ܠܝܼܣܪܵܝܹܠ. |
[No book] |
| [10]ܘܲܡܪܲܕ ܥܠܵܘܗܝ ܫܵܠܘܿܡ ܒܲܪ ܝܵܒ̣ܝܼܫ. ܘܲܡܚܵܝܗܝ ܠܘܼܩܒܲܠ ܥܲܡܵܐ: ܘܩܲܛܠܹܗ. ܘܐܲܡ̣ܠܸܟ݂ ܒܵܬ̣ܪܹܗ. |
[No book] |
| [11]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܙܟܲܪܝܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. |
[No book] |
| [12]ܘܫܸܠܡܲܬ̤ ܡܸܠܬܹܗ ܕܡܵܪܝܵܐ ܕܐܸܡܲܪ ܠܝܵܗܘܿ: ܕܲܒ̣ـ̈ـܢܲܝܵܐ ܪ̈ܒ̣ܝܼܥܵܝܹܐ ܢܸܬ̇ܒ̣ܘܼܢ ܠܵܟ݂ ܥܲܠ ܟܘܼܪܣܝܵܐ ܕܝܼܣܪܵܝܹܠ. ܘܲܗܘ̤ܵܐ ܗܵܟܲܢܵܐ. |
[No book] |
| [13]ܘܫܵܠܘܿܡ ܒܲܪ ܝܵܒ̣ܝܼܫ ܐܲܡ̣ܠܸܟ݂: ܒܲܫܢܲܬ̣ ܬܠܵܬ̣ܝܼܢ ܘܲܬ̣ܫܲܥ ܫܢ̈ܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ. ܘܐܲܡ̣ܠܸܟ݂ ܝܼܪܲܚ ܝܵܘ̈ܡܝܼܢ ܒܫܵܡܪܹܝܢ. |
[No book] |
| [14]ܘܲܣܠܸܩ ܡܲܚܢܝܼܡ ܒܲܪ ܓܲܕ̇ܝܼ ܡ̣ܢ ܬܲܪܨܵܐ ܘܥܲܠ̣ ܠܫܵܡܪܹܝܢ: ܘܲܡܚܵܝܗܝ ܠܫܵܠܘܿܡ ܒܲܪ ܝܵܒ̣ܝܼܫ ܒܫܵܡܪܹܝܢ. ܘܩܲܛܠܹܗ: ܘܐܲܡܠܸܟ݂ ܒܵܬ̣ܪܹܗ. |
[No book] |
| [15]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܫܵܠܘܿܡ. ܘܡܸܪܕܵܐ ܕܲܡܪܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. |
[No book] |
| [16]ܗܵܝܕܹ̇ܝܢ ܡ̣ܚܵܐ ܡܲܚܢܝܼܡ ܠܬܲܦ̮ܣܲܚ ܘܲܠܟ݂ܠ ܕܐܝܼܬ̣ ܒܵܗ̇: ܘܠܲܬ̣ܚܘܼܡܹ̈ܝܗ̇ ܡ̣ܢ ܬܲܪܨܵܐ: ܥܲܠ ܕܠܵܐ ܦܬܲܚܘ ܠܹܗ ܬܲܪܥܵܐ. ܘܚܲܪܒܵܗ̇. ܘܲܠܟ݂ܠܗܹܝܢ ܒܲܛ̈ܢܵܬ̣ܵܗ̇ ܦܲܪܸܬ̣. |
[No book] |
| [17]ܒܲܫܢܲܬ̣ ܬܠܵܬ̣ܝܼܢ ܘܲܬ̣ܫܲܥ ܫܢ̈ܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܸܡܠܸܟ݂ ܡܚܲܢܝܼܡ ܒܲܪ ܓܲܕ̇ܝܼ ܥܲܠ ܝܼܣܪܵܝܹܠ: ܒܫܵܡܪܹܝܢ: ܥܣܲܪ ܫܢ̈ܝܼܢ. |
[No book] |
| [18]ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܠܵܐ ܣ̣ܛܵܐ ܡ̣ܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܟܠܗܘܿܢ ܝܵܘܡܵܘ̈ܗܝ. |
[No book] |
| [19]ܘܐܸܬ̣ܵܐ ܦܘܿܠ ܡܲܠܟܵܐ ܕܐܵܬ̣ܘܿܪ ܥܲܠ ܐܲܪܥܵܐ. ܘܝܲܗ̄ܒ̣ ܡܲܚܢܝܼܡ ܠܦܘܿܠ: ܐܵܠܹܦ ܟܲܟ̇ܪ̈ܝܼܢ ܕܟܸܣܦܵܐ. ܕܬܸܗܘܹܐ ܐܝܼܕܹܗ ܥܲܡܹܗ: ܘܢܹܐܚܘܿܕ݂ ܡܲܠܟ̇ܘܼܬ̣ܵܐ ܒܐܝܼܕܹܗ. |
[No book] |
| [20]ܘܐܲܪܡܝܼ ܡܲܚܢܝܼܡ ܥܲܠ ܝܼܣܪܵܝܹܠ: ܟܸܣܦܵܐ ܥܲܠ ܟܠܗܘܿܢ ܥܲܬ̇ܝܼܪܹ̈ܐ ܕܐܲܪܥܵܐ: ܕܢܸܬܸ̇ܠ ܠܡܲܠܟܵܐ ܕܐܵܬ̣ܘܿܪ: ܚܲܡܫܝܼܢ ܡܲܬ̣ܩܵـ̈ـܠܝܼܢ ܕܟܸܣܦܵܐ ܥܲܠ ܓܲܒ̣ܪܵܐ ܚܲܕ݂. ܘܲܗܦܲܟ݂ ܡܲܠܟܵܐ ܕܐܵܬ̣ܘܿܪ: ܘܠܵܐ ܩܵܡ̣ ܬܲܡܵܢ ܒܐܲܪܥܵܐ. |
[No book] |
| [21]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܡܲܚܢܝܼܡ: ܘܟܸܠܡܸܕܸ̇ܡ ܕܲܥܒܲܕ݂: ܗܵܐ ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. |
[No book] |
| [22]ܘܲܫܟܸܒ̣ ܡܲܚܢܝܼܡ ܥܲܡ ܐܲܒ̣ܵܗܵܘ̈ܗܝ ܘܐܲܡ̣ܠܸܟ݂ ܦܩܲܚܝܵܐ ܒܪܹܗ ܒܵܬ̣ܪܹܗ. |
[No book] |
| [23]ܒܲܫܢܲܬ̣ ܚܲܡܫܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܦܩܲܚܝܵܐ ܒܲܪ ܡܲܚܢܝܼܡ ܥܲܠ ܝܼܣܪܵܝܹܠ: ܒܫܵܡܪܹܝܢ ܬܲܪܬܹ̇ܝܢ ܫܢ̈ܝܼܢ. |
[No book] |
| [24]ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ. ܘܠܵܐ ܣܛܵܐ ܡ̣ܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ. |
[No book] |
| [25]ܘܲܡܪܲܕ݂ ܥܠܵܘܗܝ ܦܩܲܚ ܒܲܪ ܪܘܿܡܲܠܝܵܐ ܓܲܢ̄ܒܵܪܹܗ: ܘܩܲܛܠܹܗ ܒܫܵܡܪܹܝܢ ܒܣܵܚܲܪܬܵܐ ܕܒܹܝܬ̣ ܡܲܠܟܵܐ. ܘܲܕ݂ܒܲܪ ܠܐܲܪܓ̣ܵܐܘܼܒ̣ ܘܠܲܐܢܝܼ: ܘܥܲܡܹܗ ܚܲܡܫܝܼܢ ܓܲܒ̣ܪ̈ܝܼܢ ܡ̣ܢ ܒܢܲܝ̈ ܓܸܠܥܵܕ݂. ܘܩܲܛܠܹܗ: ܘܐܲܡ̣ܠܸܟ݂ ܒܵܬ̣ܪܹܗ. |
[No book] |
| [26]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܦܩܲܚܝܵܐ: ܘܟ݂ܠܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. |
[No book] |
| [27]ܒܲܫܢܲܬ̣ ܚܲܡܫܝܼܢ ܘܬܲܪܬܹ̇ܝܢ ܫܢ̈ܝܼܢ ܠܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܦܩܲܚ ܒܲܪ ܪܘܿܡܲܠܝܵܐ ܥܲܠ ܝܼܣܪܵܝܹܠ: ܒܫܵܡܪܹܝܢ ܥܸܣܪܝܼܢ ܫܢ̈ܝܼܢ. |
[No book] |
| [28]ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܠܵܐ ܣܛ̣ܵܐ ܡ̣ܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ. |
[No book] |
| [29]ܘܲܒ̣ܝܵܘܡܵܘ̈ܗܝ ܕܲܦܩܲܚ ܡܲܠܟܵܐ ܕܝܼܣܪܵܝܹܠ: ܐܸܬ̣ܵܐ ܬܲܓ̣ܠܲܬ̣ ܦܲܠܣܲܪ ܡܲܠܟܵܐ ܕܐܵܬ̣ܘܿܪ. ܘܲܕ݂ܒܲܪ ܠܥܝܼܘܿܢ ܘܠܲܐܒܸܠ ܡܚܘܿܠܵܐ: ܘܲܠܟ݂ܠ ܒܹܝܬ̣ ܡܲܥܟܵܐ: ܘܠܲܢܝܵܚ ܘܠܲܩܕܸܫ: ܘܠܚܵܨܘܿܪ: ܘܲܠܓܸܠܥܵܕ݂: ܘܠܲܓܠܝܼܠܵܐ: ܘܲܠܟ݂ܠܵܗ̇ ܐܲܪܥܵܐ ܕܢܲܦ̮ܬܵܠܝܼ. ܘܓܲܠܝܼ ܐܸܢܘܿܢ ܠܐܵܬ̣ܘܿܪ. |
[No book] |
| [30]ܘܲܡܪܲܕ݂ ܡܸܪܕܵܐ ܗܘܿܫܵܥ ܒܲܪ ܐܲܠܵܐ ܥܲܠ ܦܩܲܚ ܒܲܪ ܪܘܿܡܲܠܝܵܐ. ܘܲܡܚܵܝܗܝ: ܘܩܲܛܠܹܗ: ܘܐܲܡ̣ܠܸܟ݂ ܒܵܬ̣ܪܹܗ: ܒܲܫܢܲܬ̣ ܬܲܪܬܹ̇ܝܢ ܠܝܘܿܬ̣ܵܡ ܒܲܪ ܥܘܿܙܝܼܵܐ. |
[No book] |
| [31]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܦܩܲܚ: ܘܟ݂ܠ ܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. |
[No book] |
| [32]ܒܲܫܢܲܬ̣ ܬܲܪܬܹ̇ܝܢ ܕܲܦܩܲܚ ܒܲܪ ܪܘܿܡܲܠܝܵܐ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܝܘܿܬ̣ܵܡ ܒܲܪ ܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ. |
[No book] |
| [33]ܒܲܪ ܥܸܣܪܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܟܲܕ݂ ܐܲܡ̣ܠܸܟ݂. ܘܫܸܬ̇ܬܲܥܸܣܪܹ̈ܐ ܫܢ̈ܝܼܢ ܐܲܡܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ ܝܑܼܪܘܿܫܵܐ ܒܲܪܬ̣ ܨܵܕ݂ܘܿܩ. |
[No book] |
| [34]ܘܲܥ̣ܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥ̣ܒܲܕ݂ ܥܘܿܙܝܼܵܐ ܐܲܒ̣ܘܼܗܝ. |
[No book] |
| [35]ܒܪܲܡ ܥܠܵـ̈ـܘܵܬ̣ܵܐ ܠܵܐ ܐܲܥܒܲܪ ܘܲܥܕܲܟܹ̇ܝܠ ܥܲܡܵܐ ܡܕܲܒ̇ܚܝܼܢ ܗ̄ܘ̣ܵܘ: ܘܣܵܝܡܝܼܢ ܗ̄ܘ̣ܵܘ ܒܸܣܡܹ̈ܐ ܥܲܠ ܥܠܵـ̈ـܘܵܬ̣ܵܐ: ܘܗ̤ܘ ܒܢ̣ܵܐ ܬܲܪܥܵܐ ܥܸܠܵܝܵܐ ܕܒܲܝܬܹ̇ܗ ܕܡܵܪܝܵܐ. |
[No book] |
| [36]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܬ̣ܵܡ ܘܟ݂ܠ ܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. |
[No book] |
| [37]ܒܝܵܘ̈ܡܵܬ̣ܵܐ ܗܵܢܘܿܢ: ܫܲܪܝܼ ܡܵܪܝܵܐ ܠܲܡܓܲܪܵܝܘܼ ܒܲܝܗܘܼܕ݂ܵܐ: ܠܪܵܨܵܢ ܡܲܠܟܵܐ ܕܐܵܪܵܡ: ܘܠܲܦܩܲܚ ܒܲܪ ܪܘܿܡܲܠܝܵܐ ܡܲܠܟܵܐ ܕܝܼܣܪܵܝܹܠ. |
[No book] |
| [38]ܘܲܫܟܸܒ̣ ܝܘܿܬ̣ܵܡ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂: ܘܐܲܡ̣ܠܸܟ݂ ܐܵܚܵܙ ܒܪܹܗ ܒܵܬ̣ܪܹܗ. |
[No book] |