➖ »
«
➖ ➕
Aleppo Codex (~920)
Alep
Epistle to the Laodiceans (Latin)
Lao[LA]
←
2 Kings
2Kg
5
→
[1]ונעמן שר צבא מלך ארם היה איש גדול לפני אדניו ונשא פנים־כי בו נתן יהוה תשועה לארם והאיש היה גבור חיל־מצרע [No book]
[2]וארם יצאו גדודים וישבו מארץ ישראל נערה קטנה ותהי לפני אשת נעמן [No book]
[3]ותאמר אל גברתה אחלי אדני לפני הנביא אשר בשמרון אז יאסף אתו מצרעתו [No book]
[4]ויבא ויגד לאדניו לאמר כזאת וכזאת דברה הנערה אשר מארץ ישראל [No book]
[5]ויאמר מלך ארם לך בא ואשלחה ספר אל מלך ישראל וילך ויקח בידו עשר ככרי כסף וששת אלפים זהב ועשר חליפות בגדים [No book]
[6]ויבא הספר אל מלך ישראל לאמר ועתה כבוא הספר הזה אליך הנה שלחתי אליך את נעמן עבדי ואספתו מצרעתו [No book]
[7]ויהי כקרא מלך ישראל את הספר ויקרע בגדיו ויאמר האלהים אני להמית ולהחיות כי זה שלח אלי לאסף איש מצרעתו כי אך דעו נא וראו כי מתאנה הוא לי [No book]
[8]ויהי כשמע אלישע איש האלהים כי קרע מלך ישראל את בגדיו וישלח אל המלך לאמר למה קרעת בגדיך יבא נא אלי־וידע כי יש נביא בישראל [No book]
[9]ויבא נעמן בסוסו וברכבו ויעמד פתח הבית לאלישע [No book]
[10]וישלח אליו אלישע מלאך לאמר הלוך ורחצת שבע פעמים בירדן וישב בשרך לך וטהר [No book]
[11]ויקצף נעמן וילך ויאמר הנה אמרתי אלי יצא יצוא ועמד וקרא בשם יהוה אלהיו והניף ידו אל המקום ואסף המצרע [No book]
[12]הלא טוב אבנה [Q: אמנה] ופרפר נהרות דמשק מכל מימי ישראל־הלא ארחץ בהם וטהרתי ויפן וילך בחמה [No book]
[13]ויגשו עבדיו וידברו אליו ויאמרו אבי דבר גדול הנביא דבר אליך הלוא תעשה ואף כי אמר אליך רחץ וטהר [No book]
[14]וירד ויטבל בירדן שבע פעמים כדבר איש האלהים וישב בשרו כבשר נער קטן־ויטהר [No book]
[15]וישב אל איש האלהים הוא וכל מחנהו ויבא ויעמד לפניו ויאמר הנה נא ידעתי כי אין אלהים בכל הארץ כי אם בישראל ועתה קח נא ברכה מאת עבדך [No book]
[16]ויאמר חי יהוה אשר עמדתי לפניו אם אקח ויפצר בו לקחת וימאן [No book]
[17]ויאמר נעמן ולא יתן נא לעבדך משא צמד פרדים אדמה כי לוא יעשה עוד עבדך עלה וזבח לאלהים אחרים־כי אם ליהוה [No book]
[18]לדבר הזה יסלח יהוה לעבדך־בבוא אדני בית רמון להשתחות שמה והוא נשען על ידי והשתחויתי בית רמן בהשתחויתי בית רמן יסלח נא יהוה לעבדך בדבר הזה [No book]
[19]ויאמר לו לך לשלום וילך מאתו כברת ארץ [No book]
[20]ויאמר גיחזי נער אלישע איש האלהים הנה חשך אדני את נעמן הארמי הזה מקחת מידו את אשר הביא חי יהוה כי אם רצתי אחריו ולקחתי מאתו מאומה [No book]
[21]וירדף גיחזי אחרי נעמן ויראה נעמן רץ אחריו ויפל מעל המרכבה לקראתו ויאמר השלום [No book]
[22]ויאמר שלום אדני שלחני לאמר הנה עתה זה באו אלי שני נערים מהר אפרים מבני הנביאים תנה נא להם ככר כסף ושתי חלפות בגדים [No book]
[23]ויאמר נעמן הואל קח ככרים ויפרץ בו ויצר ככרים כסף בשני חרטים ושתי חלפות בגדים ויתן אל שני נעריו וישאו לפניו [No book]
[24]ויבא אל העפל ויקח מידם ויפקד בבית וישלח את האנשים וילכו [No book]
[25]והוא בא ויעמד אל אדניו ויאמר אליו אלישע מאן [Q: מאין] גחזי ויאמר לא הלך עבדך אנה ואנה [No book]
[26]ויאמר אליו לא לבי הלך כאשר הפך איש מעל מרכבתו לקראתך העת לקחת את הכסף ולקחת בגדים וזיתים וכרמים וצאן ובקר ועבדים ושפחות [No book]
[27]וצרעת נעמן תדבק בך ובזרעך לעולם ויצא מלפניו מצרע כשלג [No book]
Source: unbound.biola.edu
Top