|
|
| [1]ܘܐܹܠܝܼܫܲܥ ܢܒ̣ܝܼܵܐ ܩ̣ܪܵܐ ܠܚܲܕ݂ ܡ̣ܢ ܒܢܲܝ̈ ܢܒ̣ܝܹ̈ܐ: ܘܐܸܡܲܪ ܠܹܗ: ܐܲܣܘܿܪ ܚܲܨܲܝ̈ܟ: ܘܣܲܒ̣ ܩܲܪܢܵܐ ܕܡܸܫܚܵܐ ܒܐܝܼܕ݂ܵܟ݂: ܘܙܸܠ ܠܪܵܡܲܬ̣ ܓܸܠܥܵܕ݂. |
[No book] |
| [2]ܘܥܘܿܠ ܠܬܲܡܵܢ: ܘܲܚܙܝܼ ܬܲܡܵܢ ܠܝܵܗܘܿ ܒܲܪܝܲܡܫܝܼ. ܥܘܿܠ ܘܐܲܩܝܼܡܲܝܗܝ ܡ̣ܢ ܒܲܝܢܵܬ̣ ܐܲܚܵܘ̈ܗܝ. ܘܐܲܥܠܲܝܗܝ ܬܵܘܵܢ ܒܓ̣ܵܘ ܬܵܘܵܢ. |
[No book] |
| [3]ܘܣܲܒ̣ ܩܲܪܢܵܐ ܕܡܸܫܚܵܐ: ܘܣܘܿܟ݂ ܒܪܹܫܹܗ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܡܫܲܚܬܵܟ݂ ܕܬܸܗܘܹܐ ܡܲܠܟܵܐ ܥܲܠ ܥܲܡܝ ܝܼܣܪܵܝܹܠ ܘܲܦܬܲܚ̣ ܬܲܪܥܵܐ ܘܲܥܪܘܿܩ: ܘܠܵܐ ܬܟܲܬܲܪ. |
[No book] |
| [4]ܘܐܸܙܲܠ̣ ܥܠܲܝܡܵܐ ܢܒ̣ܝܼܵܐ ܠܪܵܡܲܬ̣ ܓܸܠܥܵܕ݂. |
[No book] |
| [5]ܘܥܲܠ ܘܲܚܙܵܐ ܪ̈ܲܒܲܝ ܚܲܝ̈ܠܹܐ ܟܲܕ݂ ܝܵܬ̣ܒ̇ܝܼܢ. ܘܐܸܡܲܪ: ܦܸܬ̣ܓ̣ܵܡܵܐ ܐܝܼܬ̣ ܠܝܼ ܕܐܸܡܲܪ ܠܵܟ݂ ܪܲܒܵܐ. ܘܐܸܡܲܪ ܝܵܗܘܿ ܠܡ̇ܢ ܟܠܲܢ: ܘܐܸܡܲܪ ܠܹܗ ܠܵܟ݂ ܪܲܒܵܐ. |
[No book] |
| [6]ܘܩܵܡ ܘܥܲܠ ܠܬ̣ܵܘܵܢܵܐ: ܘܲܢܣܲܟ݂ ܡܸܫܚܵܐ ܒܪܹܫܹܗ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡܫܲܚܬܵܟ݂ ܕܬܲܡܠܸܟ݂ ܥܲܠ ܥܲܡܹܗ ܕܡܵܪܝܵܐ ܥܲܠ ܝܼܣܪܵܝܹܠ. |
[No book] |
| [7]ܘܬܸܡܚܸܐ ܠܲܕ݂ܒܹܝܬ̣ ܐܵܚܵܒ̣ ܡܵܪܵܟ݂ ܘܐܸܬ̣ܢܲܩܲܡ ܕܡܵܐ ܕܥܲܒ̣̈ܕܲܝ ܢܒ̣ܝܹ̈ܐ: ܘܲܕ݂ܡܵܐ ܕܟ݂ܠܗܘܿܢ ܥܲܒ̣ܕܵܘ̈ܗܝ ܕܡܵܪܝܵܐ ܡܢ ܐܝܼܕ݂ܵܐ ܕܐܝܼܙܒܸܠ. |
[No book] |
| [8]ܘܐܵܘܒܸ̇ܕ݂ ܟܠܹܗ ܒܲܝܬܹ̇ܗ ܕܐܵܚܵܒ̣. ܘܐܵܘܒܸ̇ܕ݂ ܠܐܵܚܵܒ̣ ܕܬ̣ܵܐܹ̇ܢ ܒܐܸܣܬ̣ܵܐ: ܘܕ݂ܵܐܣܲܪ ܘܫܵܪܹܐ ܒܝܣܪܵܝܹܠ. |
[No book] |
| [9]ܘܐܸܥܒ̇ܕ݂ܝܼܘܗܝ ܠܒܲܝܬܹ̇ܗ ܕܐܵܚܵܒ̣: ܐܲܝܟ݂ ܒܹܝܬ̣ ܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܘܐܲܝܟ݂ ܒܹܝܬ̣ ܒܲܥܫܵܐ ܒܲܪ ܐܲܚܝܼܵܐ. |
[No book] |
| [10]ܘܠܐܝܼܙܒܸܠ ܢܹܐܟ݂ܠܘܼܢ ܟܲܠ̈ܒܹ̇ܐ ܒܝܵܪܬ̇ܘܼܬ̣ܵܐ ܕܐܝܼܙܲܪܥܹܝܠ: ܘܠܲܝܬ̇ ܕܩܵܒܲܪ ܘܲܦܬܲܚ ܬܲܪܥܵܐ: ܘܲܥ̣ܪܩ. |
[No book] |
| [11]ܘܝܵܗܘ̇ ܢܦܲܩ̣ ܠܘܵܬ̣ ܥܲܒ̣̈ܕܹ̇ܐ ܕܡܵܪܹܗ: ܘܐܵܡ̇ܪܝܼܢ ܠܹܗ ܫܠܵܡ. ܡܵܢܵܐ ܐܸܬ̣ܵܐ ܫܵܛܝܵܐ ܗܵܢܵܐ ܠܘܵܬ̣ܵܟ݂. ܐܵܡܲܪ ܠܗܘܿܢ: ܐܲܢ̄ܬ̇ܘܿܢ ܝܵܕ݂ܥܝܼܢ ܠܓܲܒ̣ܪܵܐ ܘܲܠܫܵܛܝܼܘܼܬܹܗ. |
[No book] |
| [12]ܘܐܵܡ̇ܪܝܼܢ ܠܹܗ ܡܕܲܓܸ̇ܠ ܐܲܢ̄ܬ̇: ܚܵܘܵܢ. ܐܵܡܲܪ ܠܗܘܿܢ: ܗܵܟܲܢܵܐ ܐܸܡܲܪ ܠܝܼ: ܗܵܟܲܢܵܐ ܐܵܡܲܪ ܡܵܪܝܵܐ: ܡܫܲܚܬܵܟ݂ ܕܬܲܡܠܸܟ݂ ܥܲܠ ܝܼܣܪܵܝܹܠ. |
[No book] |
| [13]ܘܐܸܣܬܲܪܗܲܒ̣ܘ ܘܲܢܣܲܒ̣ܘ ܓܒܲܪ ܠܒ̣ܵܫܹܗ: ܘܣܵܡܘ ܬܚܘܿܬ̣ܵܘܗܝ ܥܲܠ ܡܵܘܬ̇ܒ̣ܵܐ ܕܕܲܪ̈ܓܹܐ: ܘܲܩ̣ܪܵܘ ܒܫܝܼܦܘܿܪܵܐ: ܘܐܸܡܲܪܘ ܐܲܡܠܸܟ݂ ܝܵܗܘܿ. |
[No book] |
| [14]ܘܲܡܪܲܕ݂ ܝܵܗܘ̇ ܒܲܪ ܝܲܡܫܝܼ ܥܲܡ ܝܘܿܪܵܡ. ܘܝܘܿܪܵܡ ܢܵܛܲܪ ܗ̄ܘ̣ܵܐ ܒܪܵܡܲܬ̣ ܓܸܠܥܵܕ݂: ܗ̤ܘ ܘܟ݂ܠܹܗ ܝܼܣܪܵܝܹܠ ܥܲܡܹܗ: ܡ̣ܢ ܩܕ݂ܵܡ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ. |
[No book] |
| [15]ܘܲܗܦܲܟ݂ ܝܘܿܪܵܡ ܡܲܠܟܵܐ ܠܡܸܬ̣ܐܲܣܵܝܘܼ ܒܐܝܼܙܲܪܥܹܝܠ ܡ̣ܢ ܡܚܘܿܬ̣ܵܐ ܕܲܡܚܵܐܘܼܗܝ ܐܲܕ݂ܘܿܡܵܝܹ̈ܐ: ܟܲܕ݂ ܡܸܬ̣ܟܲܬܲܫ ܡܲܠܟܵܐ ܕܐܲܕ݂ܘܿܡ. ܘܐܸܡܲܪ ܝܵܗܘ̇: ܐܸܢ ܨܵܒ̣̈ܝܵܢ ܢܲܦ̮̈ܫܵܬ̣ܟ݂ܘܿܢ: ܠܵܐ ܢܸܦܘܿܩ ܕܡܸܬ̣ܦܲܠܲܛ ܡ̣ܢ ܩܪܝܼܬ̣ܵܐ: ܕܢܹܐܙܲܠ ܘܲܢܚܵܘܹܐ ܒܐܝܼܙܲܪܥܹܝܠ. |
[No book] |
| [16]ܘܲܪܟܸܒ̣ ܝܵܗܘܿ ܘܐܸܙܲܠ̣ ܠܬܲܡܵܢ: ܡܸܛܠ ܕܝܘܿܪܵܡ ܪܡܸܐ ܗ̄ܘ̣ܵܐ ܬܲܡܵܢ. ܘܐܹܚܲܙܝܵܐ ܡܲܠܟܵܐ ܕܲܝܗܘܼܕ݂ܵܐ ܢܚܸܬ̣ ܠܡܸܚܙܵܐ ܠܝܘܿܪܵܡ. |
[No book] |
| [17]ܘܕ݂ܵܘܩܵܐ ܩܵܐܹ̇ܡ ܥܲܠ ܡܲܓ̣ܕ̇ܠܵܐ ܕܐܝܼܙܲܪܥܹܝܠ. ܘܲܚܙܵܐ ܪܟ݂ܘܿܒ̣ܵܐ ܕܝܵܗܘ̇ ܟܲܕ݂ ܐܵܬܹܐ. ܘܐܸܡܲܪ ܕܵܘܩܵܐ ܪ̈ܲܟܵܒܹܐ ܚܵܙܹ̇ܐ ܐ̄ܢܵܐ. ܘܐܸܡܲܪ ܝܘܿܪܵܡ: ܕܒܲܪ ܡܲܪܟܲܒ̣ܬ̣ܵܐ: ܘܫܲܕܲܪ ܠܐܘܼܪܥ̱ܗܘܿܢ ܘܢܹܐܡܲܪ ܫܠܵܡ. |
[No book] |
| [18]ܘܐܸܙܲܠ ܪܵܟܹܒ̣ ܣܘܼܣܝܵܐ ܠܐܘܼܪܥܹܗ ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܲܠܟܵܐ ܫܠܵܡ. ܘܐܸܡܲܪ ܝܵܗܘ̇: ܡܵܐ ܠܵܟ݂ ܘܠܲܫܠܵܡܵܐ. ܗܦܘܿܟ݂ ܒܵܬܲܪܝ ܘܚܵܘܝܼ ܕܵܘܩܵܐ: ܘܐܸܡܲܪ: ܡ̣ܛܵܐ ܐܝܼܙܓܲܕܵܐ ܥܕܲܡܵܐ ܠܘܵܬ̣ܗܘܿܢ: ܘܠܵܐ ܗܦܲܟ݂. |
[No book] |
| [19]ܘܫܲܕܲܪ ܦܲܪܵܫܵܐ ܐ̄ܚܪܹܢܵܐ ܠܘܵܬ̣ܗܘܿܢ: ܘܐܸܡܲܪ: ܗܵܟܲܢܵܐ ܐܵܡܲܪ ܡܲܠܟܵܐ ܫܠܵܡ. ܘܐܸܡܲܪ ܝܵܗܘ̇: ܡܵܐ ܠܵܟ݂ ܘܠܲܫܠܵܡܵܐ: ܗܦܘܿܟ݂ ܒܵܬܲܪܝ. |
[No book] |
| [20]ܘܚܵܘܝܼ ܕܵܘܩܵܐ ܘܐܸܡܲܪ: ܡܛ̣ܵܐ ܐܝܼܙܓܲܕܵܐ ܥܕܲܡܵܐ ܠܘܵܬ̣ܗܘܿܢ: ܘܠܵܐ ܗ̣ܦܲܟ݂ ܘܲܕ݂ܒ̣ܵܪܵܐ ܐܲܝܟ݂ ܕܒ̣ܵܪܵܐ ܕܝܵܗܘ̇ ܒܲܪ ܝܲܡܫܝܼ: ܡܸܛܠ ܕܲܡܣܲܪ̱ܗܒ̣ܵܐܝܼܬ̣ ܕܵܒܲܪ ܗ̄ܘ̣ܵܐ. |
[No book] |
| [21]ܘܐܸܡܲܪ ܝܘܿܪܵܡ ܦܲܓܸ̇ܕ݂ܘ ܘܦܲܓܸ̇ܕ݂ܘ ܡܲܪ̈ܟ̇ܒ̣ܵܬ̣ܵܐ. ܘܲܢܦܲܩ ܝܘܿܪܵܡ ܡܲܠܟܵܐ ܕܝܼܣܪܵܝܹܠ. ܘܐܹܚܲܙܝܵܐ ܡܲܠܟܵܐ ܕܲܝܗܘܼܕ݂ܵܐ: ܓܒܲܪ ܒܡܲܪܟܲܒ̣ܬܹܗ. ܘܲܢܦܲܩܘ ܠܐܘܼܪܥܹܗ ܕܝܵܗܘ̇: ܘܐܸܫܟ̇ܚܘܼܗܝ ܒܝܵܪܬ̇ܘܼܬ̣ܵܐ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ. |
[No book] |
| [22]ܘܟܲܕ݂ ܚܙܵܝܗܝ ܝܘܿܪܵܡ ܠܝܵܗܘ̇: ܐܸܡܲܪ ܠܹܗ ܫܠܵܡ ܝܵܗܘ̇. ܐܵܡܲܪ ܠܹܗ ܝܵܗܘ̇: ܡܵܢܵܘ ܫܠܵܡܵܐ: ܕܙܵܢܝܘܼܬ̣ܵܐ ܕܐܝܼܙܒܸܠ ܐܸܡܵܟ݂: ܐܵܘ ܕܚܲܪ̈ܵܫܹܝܗ̇ ܣܲܓ̇ܝܼ̈ܐܹܐ. |
[No book] |
| [23]ܘܲܗ̣ܦܲܟ݂ ܝܘܿܪܵܡ ܘܲܥܪܲܩ̣. ܘܐܸܡܲܪ ܠܐܹܚܲܙܝܵܐ ܢܸܟ݂ܠܵܐ ܐܹܚܲܙܝܵܐ. |
[No book] |
| [24]ܘܝܵܗܘ̇ ܡܠܵܐ ܐܝܼܕܹܗ ܒܩܸܫܬܵܐ: ܘܲܡܚܵܝܗܝ ܠܝܘܿܪܵܡ ܒܹܝܬ̣ ܕܪ̈ܵܥܵܘܗܝ ܘܲܢܦܲܩ̣ ܓܹܐܪܵܐ ܡ̣ܢ ܠܸܒܹ̇ܗ: ܘܲܒ̣ܪܲܟ݂ ܒܡܲܪܟܲܒ̣ܬܹܗ. |
[No book] |
| [25]ܘܐܸܡܲܪ ܝܵܗܘ̇ ܠܒܲܪ ܕܩܲܪ ܓܲܢ̄ܒܵܪܹܗ: ܫܩܘܿܠ ܐܲܪܡܵܝܗܝ ܒܝܵܪܬ̇ܘܼܬܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ. ܡܸܛܠ ܕܲܕ݂ܟ݂ܝܼܪ ܐ̄ܢܵܐ ܟܲܕ݂ ܪܟ݂ܝܼܒ̣ܝܼܢ ܗ̄ܘܲܝܢ ܐܸܢܵܐ ܘܐܲܢ̄ܬ̇: ܘܕ݂ܵܒ̣ܪܝܼܢ ܒܵܬܲܪ ܐܵܚܵܒ̣ ܐܲܒ̣ܘܼܗܝ: ܘܡܵܪܝܵܐ ܐܸܡܲܪ ܥܠܵܘܗܝ ܦܸܬ̣ܓ̣ܵܡܵܐ ܗܵܢܵܐ. |
[No book] |
| [26]ܐܸܠܵܐ ܕܡܹܗ ܕܢܵܒ̣ܘܿܬ̣ ܘܲܕ݂ܡܵܐ ܕܲܒ̣ܢܵܘ̈ܗܝ. ܚܙܹ̇ܝܬ̣ ܒܪܲܡܫܵܐ: ܐܵܡܲܪ ܡܵܪܝܵܐ: ܘܐܸܦ̱ܪܥܵܟ݂ ܒܝܵܪܬ̇ܘܼܬ̣ܵܐ ܗܵܕܹܐ ܐܵܡܲܪ ܡܵܪܝܵܐ. ܘܗܵܫܵܐ ܣܲܒ̣ ܫܕ݂ܝܼܘܗܝ ܒܝܵܪܬ̇ܘܼܬ̣ܵܐ ܗܵܕܹܐ ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ. ܘܲܫܕ݂ܵܐܘܼܗܝ ܒܝܵܪܬ̇ܘܼܬܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ. |
[No book] |
| [27]ܘܐܹܚܲܙܝܵܐ ܡܲܠܟܵܐ ܕܲܝܗܘܼܕ݂ܵܐ: ܚܙܵܐ ܘܲܥܪܲܩ̣ ܒܐܘܼܪܚܵܐ ܕܒܹܝܬ̣ ܓܲܢܹ̈ܐ. ܘܲܪܕܲܦ ܒܵܬ̣ܪܹܗ ܝܵܗܘ̇: ܘܐܸܡܲܪ: ܐܵܦ ܠܹܗ ܩܘܼܛܠܘܼܗܝ ܘܩܲܛܠܘܼܗܝ ܒܡܲܪܟܲܒ̣ܬܹܗ: ܒܡܲܣܩܵܢܵܐ ܕܓ̣ܘܿܕ݂ ܕܥܲܠ ܓܹܢ̄ܒ̣ ܢܒܸܠܥܲܡ: ܘܲܥܪܲܩ ܠܡܲܓܕܘܿ: ܘܡܝܼܬ̣ ܬܲܡܵܢ. |
[No book] |
| [28]ܘܫܲܩܠܘܼܗܝ ܥܲܒ̣ܕܵܘ̈ܗܝ: ܘܐܵܘܒ̇ܠܘܼܗܝ ܠܐܘܿܪܸܫܠܸܡ: ܘܩܲܒ̣ܪܘܼܗܝ ܒܩܲܒ̣ܪܹܗ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂. |
[No book] |
| [29]ܘܒܲܫܢܲܬ̣ ܚܕܲܥܸܣܪܹ̈ܐ ܠܝܘܿܪܵܡ ܒܲܪ ܐܵܚܵܒ̣: ܐܲܡܠܸܟ݂ ܐܹܚܲܙܝܵܐ ܥܲܠ ܝܼܗܘܼܕ݂ܵܐ. |
[No book] |
| [30]ܘܐܸܬ̣ܵܐ ܝܵܗܘ̇ ܠܐܝܼܙܲܪܥܹܝܠ. ܘܐܝܼܙܒܸܠ ܫܸܡܥܲܬ̤: ܘܟܸܚܠܲܬ̤ ܒܲܨܕ݂ܝܼܕ݂ܵܐ ܥܲܝܢܹ̈ܝܗ̇: ܘܐܸܣܪܲܬ̤ ܪܹܫܵܗ̇: ܘܐܲܕ݂ܝܼܩܲܬ̣ ܡ̣ܢ ܟܵܘܬܵܐ. |
[No book] |
| [31]ܘܝܵܗܘ̇ ܥܵܐܹ̇ܠ ܒܬܲܪܥܵܐ. ܘܐܸܡܪܲܬ̤ ܫܠܵܡ ܙܲܡܪܝܼ ܩܵܛܹ̇ܠ ܡܵܪܹܗ. |
[No book] |
| [32]ܘܐܲܪܝܼܡ ܐܲܦܵܘ̈ܗܝ ܠܟ݂ܵܘܬ̣ܵܐ: ܘܐܸܡܲܪ ܡ̇ܢ ܥܡܝ ܘܐܸܬ̣ܚ̄ܙܝܼܘ ܠܹܗ ܬܪܹܝܢ ܬܠܵܬ̣ܵܐ ܡܗܲܝܡܢ̈ܝܼܢ. |
[No book] |
| [33]ܘܐܸܡܲܪ ܦܘܼܫܚܘܼܗ̇ ܘܦܲܫܚܘܼܗ̇ ܘܪܲܣܘ ܡ̣ܢ ܕܡܵܗ̇ ܥܲܠ ܐܸܣܬ̣ܵܐ. ܘܥܲܠܘ ܪ̈ܲܟ݂ܫܵܐ ܘܕ݂ܵܫܘܼܗ̇. |
[No book] |
| [34]ܘܥܲܠ ܠܡܸܠܥܲܣ ܘܲܠܡܸܫܬܵܐ ܘܐܸܡܲܪ ܦܘܼܩܕܘܼܗ̇ ܠܠܝܼܛܬܵܐ ܗܵܝ̇: ܘܩܘܼܒ̣ܪܘܼܗ̇: ܡܸܛܠ ܕܒܲܪܬ̣ ܡܲܠܟܵܐ ܗ̄ܝ̣. |
[No book] |
| [35]ܘܐܸܙܲܠ̣ܘ ܠܡܸܩܒ̇ܪܵܗ̇: ܘܠܵܐ ܐܸܫܟܲܚܘ ܒܵܗ̇: ܐܸܠܵܐ ܐܸܢ ܪܹܫܵܗ̇ ܘܪܸ̈ܓ̣ܠܹܝܗ̇ ܘܦܲܣܹ̈ܐ ܕܐܝܼܕܹܝ̈ܗ̇. |
[No book] |
| [36]ܘܲܗܦܲܟ݂ܘ ܘܚܵܘܝܼܘܗܝ ܘܐܸܡܲܪ: ܦܸܬ̣ܓ̣ܵܡܵܐ ܗ̄ܘ̣ ܕܡܵܪܝܵܐ ܕܡܲܠܸܠ̣ ܒܐܝܼܕ݂ܵܐ ܕܥܲܒ̣ܕܹ̇ܗ ܐܹܠܝܼܵܐ ܕܡ̣ܢ ܬܲܫܒ̇ܝܼ: ܕܲܒ̣ܝܵܪܬܵܘܼܬ̣ܵܐ ܕܐܝܼܙܲܪܥܹܝܠ ܢܹܐܟ݂ܠܘܼܢ ܟܲܠ̈ܒܹ̇ܐ ܒܸܣܪܵܗ̇ ܕܐܝܼܙܒܸܠ. |
[No book] |
| [37]ܘܬܸܗܘܹܐ ܫܠܲܕܵܗ̇ ܕܐܝܼܙܒܸܠ: ܐܲܝܟ݂ ܙܸܒ̣ܠܵܐ ܥܲܠ ܐܲܦܲܝ̈ ܐܲܪܥܵܐ: ܒܝܵܪܬ̇ܘܼܬ̣ܵܐ ܕܐܝܼܙܲܪܥܹܝܠ: ܘܠܲܝܬ̇ ܕܩܵܒܲܪ: ܕܠܵܐ ܢܹܐܡܪܘܼܢ ܗܵܕܲܐ ܗ̄ܝ̣ ܐܝܼܙܒܸܠ. |
[No book] |