|
|
| [No book] |
[1]ܘܲܠܡܘܼܫܹܐ ܐܸܡܲܪ ܡܵܪܝܵܐ: ܣܲܩ ܠܘܵܬ݂ ܡܵܪܝܵܐ: ܐܲܢ̄ܬ ܘܐܲܗܪܘܿܢ: ܘܢܵܕ݂ܵܒ݂ ܘܐܲܒ݂ܝܼܗܘܿ: ܘܫܲܒ݂ܥܝܼܢ ܓܲܒ݂ܪܹ̈ܐ ܡܼܢ ܣܵܒܹ̈ܐ ܕܝܼܣܪܵܝܹܠ: ܘܬܸܣܓܿܕ݂ܘܼܢ ܡܼܢ ܪܘܼܚܩܵܐ. |
| [No book] |
[2]ܘܢܸܩܪܘܿܒ݂ ܡܘܼܫܹܐ ܒܲܠܚܘܿܕ݂ܵܘܗܝ ܩܕ݂ܵܡ ܡܵܪܝܵܐ: ܘܗܸܢܘܿܢ ܠܵܐ ܢܩܲܪܒ݂ܘܼܢ: ܘܥܲܡܵܐ ܠܵܐ ܢܸܣܩܘܼܢ ܥܲܡܹܗ. |
| [No book] |
[3]ܘܐܸܬ݂ܵܐ ܡܘܼܫܹܐ ܘܐܸܫܬܲܥܝܼ ܠܥܲܡܵܐ ܟܠܗܘܿܢ ܦܸܬ݂ܓ݂ܵܡܵܘܗܝ ܕܡܵܪܝܵܐ: ܘܟ݂ܠܗܘܿܢ ܕܝܼܢܹ̈ܐ: ܘܲܩܥܵܐ ܟܠܹܗ ܥܲܡܵܐ ܒܩܵܠܵܐ ܚܲܕ݂: ܘܐܸܡܲܪܘ: ܟܠ ܡܸܕܸܿܡ ܕܐܵܡܲܪ ܡܵܪܝܵܐ ܢܸܥܒܸܿܕ݂. |
| [No book] |
[4]ܘܲܟ݂ܬܲܒ݂ ܡܘܼܫܹܐ ܟܠܗܘܿܢ ܦܸܬ݂ܓ݂ܵܡܵܘܗܝ ܕܡܵܪܝܵܐ: ܘܩܲܕܸܿܡ ܒܨܲܦܪܵܐ: ܘܲܒ݂ܢܵܐ ܡܲܕ݂ܒܚܵܐ ܒܲܫܦܘܿܠܲܝ ܛܘܼܪܵܐ: ܘܬܲܪܬܲܥܸܣܪܹܐ ܩܵܝܡܵܬ݂ܵܐ ܠܲܬ݂ܪܸܥܣܲܪ ܫܲܒ݂ܛܹ̈ܐ ܕܝܼܣܪܵܝܹܠ. |
| [No book] |
[5]ܘܫܲܕܲܪ ܠܲܥܠܲܝܡܹ̈ܐ ܕܲܒ݂ܢܲܝ ܝܼܣܪܵܝܹܠ: ܘܐܲܣܸܩܘ ܝܲܩܕܹ̈ܐ ܫܲܠܡܹ̈ܐ: ܘܕܲܒܲܚܘ ܕܸܒ݂ܚܹ̈ܐ ܫܲܠܡܹ̈ܐ ܬܵܘܪܹ̈ܐ ܠܡܵܪܝܵܐ. |
| [No book] |
[6]ܘܲܢܣܲܒ݂ ܡܘܼܫܹܐ ܦܸܠܓܹܿܗ ܕܲܕ݂ܡܵܐ: ܘܐܲܪܡܝܼ ܒܠܲܩܢܵܐ: ܘܦܸܠܓܹܿܗ ܕܲܕ݂ܡܵܐ ܐܸܫܲܕ݂ ܥܲܠ ܡܲܕ݂ܒܚܵܐ. |
| [No book] |
[7]ܘܲܢܣܲܒ݂ ܣܸܦܪܵܐ ܕܲܩܝܵܡܵܐ: ܘܲܩܪܵܐ ܩܕ݂ܵܡ ܥܲܡܵܐ: ܘܐܸܡܲܪܘ: ܟܠ ܡܸܕܸܿܡ ܕܐܸܡܲܪ ܡܵܪܝܵܐ ܢܸܫܡܲܥ ܘܢܸܥܒܸܿܕ݂. |
| [No book] |
[8]ܘܲܢܣܲܒ݂ ܡܘܼܫܹܐ ܕܡܵܐ: ܘܲܪܙܲܦ ܥܲܠ ܥܲܡܵܐ: ܘܐܸܡܲܪ: ܗܵܢܵܘ ܕܡܵܐ ܕܲܩܝܵܡܵܐ ܕܐܲܩܝܼܡ ܡܵܪܝܵܐ ܥܲܡܟ݂ܘܿܢ: ܥܲܠ ܟܠܗܘܿܢ ܦܸܬ݂ܓ݂ܵܡܹ̈ܐ ܗܵܠܹܝܢ. |
| [No book] |
[9]ܘܲܣܠܸܩܘ ܡܘܼܫܹܐ ܘܐܲܗܪܘܿܢ: ܘܢܵܕ݂ܵܒ݂ ܘܐܲܒ݂ܝܼܗܘܿ: ܘܫܲܒ݂ܥܝܼܢ ܡܼܢ ܣܵܒܹ̈ܐ ܕܝܼܣܪܵܝܹܠ. |
| [No book] |
[10]ܘܲܚܙܵܘ ܠܐܲܠܵܗܵܐ ܕܝܼܣܪܵܝܹܠ: ܘܲܬ݂ܚܹܝܬ݂ ܪܸܓ݂ܠܵܘܗܝ ܐܲܝܟ݂ ܥܒ݂ܵܕ݂ܵܐ ܕܲܠܒܸܬܵܐ ܕܣܲܦܝܼܠܵܐ: ܘܐܲܝܟ݂ ܟܪܘܿܡܵܐ ܕܲܫܡܲܝܵܐ ܒܕܲܟ݂ܝܘܼܬ݂ܵܐ. |
| [No book] |
[11]ܘܥܲܠ ܣܵܒܹ̈ܐ ܕܲܒ݂ܢܲܝ ܝܼܣܪܵܝܹܠ ܠܵܐ ܐܵܘܫܸܒ݂ ܐܝܼܕܹܗ: ܘܲܚܙܵܘ ܠܐܲܠܵܗܵܐ ܘܐܸܟܲܠܘ ܘܐܸܫܬܿܝܼܘ. |
| [No book] |
[12]ܘܐܸܡܲܪ ܡܵܪܝܵܐ ܠܡܘܼܫܹܐ: ܣܲܩ ܠܘܵܬ݂ܝ ܠܛܘܼܪܵܐ: ܘܲܗܘܝܼ ܬܲܡܵܢ: ܘܐܸܬܸܿܠ ܠܵܟ݂ ܠܘܼܚܹ̈ܐ ܕܟܹܐܦܵܐ: ܘܢܵܡܘܿܣܹ̈ܐ ܘܦܘܼܩܕܵܢܹ̈ܐ ܕܟܸܬ݂ܒܹܿܬ݂: ܠܡܲܠܵܦܘܼ ܐܸܢܘܿܢ. |
| [No book] |
[13]ܘܩܵܡ ܡܘܼܫܹܐ: ܘܗܘܿܫܲܥ ܡܫܲܡܫܵܢܹܗ: ܘܲܣܠܸܩ ܡܘܼܫܹܐ ܠܛܘܼܪܹܗ ܕܐܲܠܵܗܵܐ. |
| [No book] |
[14]ܘܲܠܣܵܒܹ̈ܐ ܐܸܡܲܪ: ܟܲܬܲܪܘ ܠܲܢ ܗܵܪܟܵܐ ܥܕܲܡܵܐ ܕܢܸܗܦܘܿܟ݂ ܠܘܵܬ݂ܟ݂ܘܿܢ: ܘܗܵܐ ܐܲܗܪܘܿܢ ܘܚܘܿܪ ܥܲܡܟ݂ܘܿܢ: ܡܿܢ ܕܐܝܼܬ݂ ܠܹܗ ܡܸܠܬ݂ܵܐ: ܢܸܬ݂ܩܲܪܲܒ݂ ܩܕ݂ܵܡܲܝܗܘܿܢ. |
| [No book] |
[15]ܘܲܣܠܸܩ ܡܘܼܫܹܐ ܠܛܘܼܪܵܐ: ܘܟܲܣܝܵܬܹܗ ܥܢܵܢܵܐ. |
| [No book] |
[16]ܘܲܫܪܵܐ ܫܘܼܒ݂ܚܹܗ ܕܡܵܪܝܵܐ ܥܲܠ ܛܘܼܪܵܐ ܕܣܝܼܢܲܝ: ܘܟܲܣܝܵܬܹܗ ܥܢܵܢܵܐ ܫܬܵܐ ܝܵܘܡܝܼܢ: ܘܲܩܪܵܐ ܡܵܪܝܵܐ ܠܡܘܼܫܹܐ ܒܝܵܘܡܵܐ ܫܒ݂ܝܼܥܵܝܵܐ ܡܼܢ ܓܵܘ ܥܢܵܢܵܐ. |
| [No book] |
[17]ܘܲܚܙܵܐ ܫܘܼܒ݂ܚܹܗ ܕܡܵܪܝܵܐ: ܐܲܝܟ݂ ܢܘܼܪܵܐ ܕܝܵܩܕܵܐ ܒܪܹܫܹܗ ܕܛܘܼܪܵܐ: ܠܥܹܝܢ ܟܠܗܘܿܢ ܕܒܹܝܬ݂ ܝܼܣܪܵܝܹܠ. |
| [No book] |
[18]ܘܥܲܠ ܡܘܼܫܹܐ ܒܓ݂ܵܘ ܥܢܵܢܵܐ: ܘܲܣܠܸܩ ܠܛܘܼܪܵܐ: ܘܲܗܘܵܐ ܡܘܼܫܹܐ ܒܛܘܼܪܵܐ ܐܲܪܒܿܥܝܼܢ ܐܝܼܡܵܡܝܼܢ: ܘܐܲܪܒܿܥܝܼܢ ܠܲܝܠܵܘܵܢ. |