➖ »
«
➖ ➕
Peshitta OT
PesOT
The Acts of Thomas
ActThom
←
Exodus
Exo
26
→
[1]ܘܲܠܡܲܫܟܢܵܐ ܬܸܥܒܸܕ ܥܣܲܪ ܝܵܪܝܼܥܵܢ ܕܒ݂ܘܼܨܵܐ ܥܙܝܼܠܵܐ: ܘܬܸܟ݂ܠܬ݂ܵܐ ܘܐܲܪܓܿܘܵܢܵܐ ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܟܪܘܼܒ݂ܵܐ ܥܒ݂ܵܕ݂ܵܐ ܕܐܘܼܡܵܢܵܐ ܬܸܥܒܸܕ ܐܸܢܹܝܢ. [No book]
[2]ܐܘܼܪܟܿܗܵ ܕܝܵܪܝܼܥܬܵܐ ܚܕ݂ܵܐ: ܥܸܣܪܝܼܢ ܘܲܬ݂ܡܵܢܹܐ ܐܲܡܝܼܢ: ܘܲܦܬ݂ܵܝܵܗ ܐܲܪܒܲܥ ܐܲܡܝܼܢ: ܕܝܵܪܝܼܥܬܵܐ ܚܕ݂ܵܐ: ܡܫܘܼܚܬܵܐ ܚܕ݂ܵܐ ܠܟ݂ܠܗܹܝܢ ܝܵܪܝܼܥܵܬ݂ܵܐ. [No book]
[3]ܚܲܡܸܫ ܝܵܪܝܼܥܵܢ ܢܸܗܘܝܵܢ ܡܕܲܒܿܩܵܢ ܚܕ݂ܵܐ ܒܲܚܕ݂ܵܐ: ܘܚܲܡܸܫ ܝܵܪܝܼܥܵܢ ܢܸܗܘܝܵܢ ܡܕܲܒܿܩܵܢ ܚܕ݂ܵܐ ܒܲܚܕ݂ܵܐ. [No book]
[4]ܘܲܥܒܸܕ ܬܵܢܐܵܬ݂ܵܐ ܕܬܸܟ݂ܠܬ݂ܵܐ ܥܲܠ ܣܸܦܬ݂ܵܗ ܕܝܵܪܝܼܥܬܵܐ ܚܕ݂ܵܐ ܒܣܸܛܪܵܗ ܕܕܸܒ݂ܩܵܐ: ܘܗܵܟܲܢܵܐ ܬܸܥܒܸܕ ܠܣܸܦܬ݂ܵܗ ܕܝܵܪܝܼܥܬܵܐ ܡܼܢ ܣܸܛܪܵܐ ܕܕܸܒ݂ܩܵܐ ܐ̄ܚܪܹܢܵܐ. [No book]
[5]ܚܲܡܫܝܼܢ ܬܵܢܵܐܢ ܬܸܥܒܸܕ ܒܣܸܦܬ݂ܵܗ ܕܝܵܪܝܼܥܬܵܐ ܚܕ݂ܵܐ: ܘܚܲܡܫܝܼܢ ܬܵܢܵܐܢ ܬܸܥܒܸܕ ܒܣܸܦܬ݂ܵܗ ܕܝܵܪܝܼܥܬܵܐ ܐ̄ܚܪܹܬ݂ܵܐ ܒܕܸܒ݂ܩܵܐ ܐ̄ܚܪܹܢܵܐ: ܘܢܸܗܘܝܵܢ ܬܪܝܼܨܵܢ ܬܵܢܐܵܬ݂ܵܐ ܚܕ݂ܵܐ ܠܘܼܩܒܲܠ ܚܕ݂ܵܐ. [No book]
[6]ܘܲܥܒܸܕ ܚܲܡܫܝܼܢ ܩܘܼܪܩܣܝܼܢ ܕܕܲܗܒ݂ܵܐ: ܘܕܲܒܸܿܩ ܝܵܪܝܼܥܬܵܐ ܚܕ݂ܵܐ ܒܲܚܕ݂ܵܐ ܒܩܘܼܪ̈ܩܣܹܐ: ܘܢܸܗܘܸܐ ܡܲܫܟܢܵܐ ܚܼܲܕ. [No book]
[7]ܘܲܥܒܸܕ ܝܵܪܝܼܥܵܬ݂ܵܐ ܕܣܲܥܪܵܐ ܠܲܦܪܵܣܵܐ ܕܡܲܫܟܢܵܐ: ܚܕܲܥܸܣܪܹ̈ܐ ܝܵܪܝܼܥܵܢ ܬܸܥܒܸܕ ܐܸܢܹܝܢ. [No book]
[8]ܐܘܼܪܟܵܗ ܕܝܵܪܝܼܥܬܵܐ ܚܕ݂ܵܐ ܡܸܢܗܹܝܢ ܬܠܵܬ݂ܝܼܢ ܐܲܡܝܼܢ: ܘܲܦܬ݂ܵܝܵܗ ܐܲܪܒܲܥ ܐܲܡܝܼܢ ܕܝܵܪܝܼܥܬܵܐ ܚܕ݂ܵܐ: ܡܫܘܼܚܬܵܐ ܚܕ݂ܵܐ ܠܟ݂ܠܗܹܝܢ ܝܵܪܝܼܥܵܬ݂ܵܐ ܗܵܠܹܝܢ ܚܕܲܥܸܣܪܹ̈ܐ. [No book]
[9]ܘܕܲܒܸܿܩ ܚܲܡܸܫ ܝܵܪܝܼܥܵܢ ܐܲܟ݂ܚ̄ܕ݂ܵܐ: ܘܫܸܬ݂ ܝܵܪܝܼܥܵܢ ܐܲܟ݂ܚ̄ܕ݂ܵܐ: ܘܐܲܥܸܦ ܝܵܪܝܼܥܬܵܐ ܫܬܿܝܼܬܲܝܬܵܐ ܠܘܼܩܒܲܠ ܐܲܦܲܝ ܡܲܫܟܢܵܐ. [No book]
[10]ܘܲܥܒܸܕ ܚܲܡܫܝܼܢ ܬܵܢܵܐܢ ܥܲܠ ܣܸܦܬ݂ܵܗ ܕܝܵܪܝܼܥܬܵܐ ܚܕ݂ܵܐ: ܡܼܢ ܣܸܛܪܵܗ ܕܕܸܒ݂ܩܵܐ: ܘܚܲܡܫܝܼܢ ܬܵܢܵܐܢ ܥܲܠ ܣܸܦܬ݂ܵܗ ܕܝܵܪܝܼܥܬܵܐ ܐ̄ܚܪܹܬܵܐ ܒܕܸܒ݂ܩܵܐ ܐ̄ܚܪܹܢܵܐ. [No book]
[11]ܘܲܥܒܸܕ ܩܘܼܪ̈ܩܣܹܐ ܕܲܢܚܵܫܵܐ ܚܲܡܫܝܼܢ: ܘܐܲܥܸܠ ܩܘܼܪ̈ܩܣܹܐ ܒܬܵܢܐܵܬ݂ܵܐ ܘܕܲܒܸܩܲܝܗܝ ܠܡܲܫܟܢܵܐ: ܘܢܸܗܘܸܐ ܚܲܕ݂. [No book]
[12]ܘܡܸܕܸܿܡ ܕܝܵܬܲܪ ܡܼܢ ܝܵܪ̈ܝܼܥܵܬ݂ܵܐ ܕܡܲܫܟܢܵܐ: ܦܸܠܓܵܗܿ ܕܝܵܪܝܼܥܬܵܐ ܕܝܵܬ݂ܵܪ: ܬܲܪܡܸܐ ܠܒܸܣܬܿܪܹܗ ܕܡܲܫܟܢܵܐ. [No book]
[13]ܘܐܲܡܬ݂ܵܐ ܡܼܢ ܚܲܕ݂ ܓܲܒܵܐ: ܘܐܲܡܬ݂ܵܐ ܡܼܢ ܓܲܒܵܐ ܐ̄ܚܪܹܢܵܐ: ܕܝܵܬ݂ܵܪ ܒܐܘܼܪܟܵܐ ܕܝܵܪܝܼܥܬܵܐ ܕܡܲܫܟܢܵܐ: ܢܸܗܘܸܐ ܪܡܹܐ ܥܲܠ ܣܸܛܪܵܘܗܝ ܕܡܲܫܟܢܵܐ: ܡܼܢ ܗܵܢܵܐ ܓܲܒܵܐ ܘܡܼܢ ܗܵܢܵܐ ܓܲܒܵܐ ܠܲܡܟܲܣܵܝܘܼܬܹܗ. [No book]
[14]ܘܲܥܒܸܕ ܦܪܵܣܵܐ ܠܡܲܫܟܢܵܐ ܡܸܫܟܵܐ ܕܕܸܟ݂ܪܹ̈ܐ ܕܐܸܣܦܲܝܢܝܼܩܵܐ: ܘܡܸܫܟܵܐ ܕܕܸܟ݂ܪܹ̈ܐ ܕܣܵܣܵܓܿܘܿܢܵܐ: ܡܼܢ ܠܥܸܠ. [No book]
[15]ܘܲܥܒܸܕ ܕܲܦܹ̈ܐ ܠܡܲܫܟܢܵܐ ܕܩܲܝܣܵܐ ܕܐܸܫܟܵܪܥܵܐ ܩܵܝܡܹ̈ܐ. [No book]
[16]ܥܣܲܪ ܐܲܡܝܼܢ ܐܘܼܪܟܹܗ ܕܕܲܦܵܐ ܚܲܕ݂: ܘܐܲܡܵܐ ܘܲܦܠܸܓ ܦܬ݂ܵܝܹܗ ܕܕܲܦܵܐ ܚܲܕ݂. [No book]
[17]ܘܬܲܪܬܹܿܝܢ ܨܵܝܪܵܬ݂ܵܐ ܠܕܲܦܵܐ ܚܲܕ݂: ܬܪܝܼܨܵܢ ܠܘܼܩܒܲܠ ܚܕ݂ܵܐ: ܗܵܟܲܢܵܐ ܬܸܥܒܸܕ ܠܟ݂ܠܗܘܿܢ ܕܲܦܵܘܗܝ ܕܡܲܫܟܢܵܐ. [No book]
[18]ܘܲܥܒܸܕ ܕܲܦܵܐ ܠܡܲܫܟܢܵܐ: ܥܸܣܪܝܼܢ ܕܲܦܝܼܢ ܠܣܸܛܪܵܐ ܕܪܘܼܚܵܐ ܕܬܲܝܡܢܵܐ. [No book]
[19]ܘܐܲܪܒܿܥܝܼܢ ܣܵܡܟܹ̈ܐ ܕܣܹܐܡܵܐ ܬܸܥܒܸܕ ܬܚܹܝܬ݂ ܥܸܣܪܝܼܢ ܕܲܦܝܼܢ: ܬܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ݂ ܠܬܲܪܬܹܿܝܢ ܨܵܝܪܵܬܹܗ: ܘܲܬ݂ܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܐ̄ܚܪܹܢܵܐ ܠܬܲܪܬܹܿܝܢ ܨܵܝܪܵܬܹܗ. [No book]
[20]ܘܲܠܣܸܛܪܵܐ ܐ̄ܚܪܹܢܵܐ ܕܡܲܫܟܢܵܐ ܡܼܢ ܪܘܼܚܵܐ ܕܓܲܪܒܿܝܵܐ ܥܸܣܪܝܼܢ ܕܲܦܝܼܢ. [No book]
[21]ܘܐܲܪܒܿܥܝܼܢ ܣܵܡܟ݂ܝܼܢ ܕܣܹܐܡܵܐ: ܬܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ݂: ܘܲܬ݂ܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܐ̄ܚܪܹܢܵܐ. [No book]
[22]ܡܼܢ ܫܦܘܿܠܵܘܗܝ ܕܡܲܫܟܢܵܐ ܡܼܢ ܡܲܥܪܒ݂ܵܐ ܥܒܸܕ ܫܬܵܐ ܕܲܦܝܼܢ. [No book]
[23]ܘܲܬ݂ܪܹܝܢ ܕܲܦܝܼܢ ܬܸܥܒܸܕ ܠܙܵܘܝܵܬ݂ܵܐ ܕܡܲܫܟܢܵܐ ܡܼܢ ܫܦܘܿܠܲܝܗܘܿܢ. [No book]
[24]ܘܢܸܗܘܘܿܢ ܫܘܹܝܢ ܡܼܢ ܠܬܲܚܬ: ܘܐܲܟ݂ܚ̄ܕ݂ܵܐ ܢܸܗܘܘܿܢ ܓܵܦܝܼܢ ܡܼܢ ܪܹܫܵܗ ܥܲܠ ܙܲܩܙܲܩܬ݂ܵܐ ܚܕ݂ܵܐ: ܗܵܟܲܢܵܐ ܠܲܬܪܲܝܗܘܿܢ ܣܵܡܟܹ̈ܐ: ܠܬܲܪܬܹܿܝܢ ܙܵܘܝܵܬ݂ܵܐ ܢܸܗܘܘܿܢ. [No book]
[25]ܘܢܸܗܘܘܿܢ ܬܡܵܢܝܵܐ ܕܲܦܝܼܢ: ܘܣܵܡܟܲܝܗܘܿܢ ܕܣܹܐܡܵܐ ܫܸܬܿܬܲܥܣܲܪ: ܬܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ: ܘܲܬ݂ܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܐ̄ܚܪܹܢܵܐ. [No book]
[26]ܘܲܥܒܸܕ ܡܘܼܟ݂ܠܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܚܲܡܫܵܐ ܠܕܲܦܵܐ ܕܣܸܛܪܹܗ ܚܲܕ݂ ܕܡܲܫܟܢܵܐ. [No book]
[27]ܘܚܲܡܫܵܐ ܡܘܼܟ݂ܠܝܼܢ ܠܕܲܦܵܘܗܝ ܕܣܸܛܪܵܐ ܐ̄ܚܪܹܢܵܐ ܕܡܲܫܟܢܵܐ: ܘܚܲܡܫܵܐ ܡܘܼܟ݂ܠܝܼܢ ܠܕܲܦܵܘܗܝ ܕܣܸܛܪܵܐ ܐ̄ܚܪܹܢܵܐ ܡܼܢ ܫܦܘܿܠܵܘܗܝ ܕܡܲܫܟܢܵܐ ܡܼܢ ܡܲܥܪܒ݂ܵܐ. [No book]
[28]ܘܡܘܼܟ݂ܠܵܐ ܡܸܨܥܵܝܵܐ ܒܓ݂ܵܘ ܕܲܦܵܐ ܡܲܥܒܲܪ ܡܼܢ ܗܵܢܵܐ ܓܲܒܵܐ ܠܗܵܢܵܐ. [No book]
[29]ܘܕܲܦܹ̈ܐ ܩܪܘܿܡ ܕܲܗܒ݂ܵܐ: ܘܙܲܩܙܩܵܬ݂ܵܐ ܥܒܸܕ ܕܕܲܗܒ݂ܵܐ ܕܘܼܟܿܬ݂ܵܐ ܠܡܘܼܟ݂ܠܹ̈ܐ: ܘܲܩܪܘܿܡ ܠܡܘܼܟ݂ܠܹ̈ܐ ܕܲܗܒ݂ܵܐ. [No book]
[30]ܘܐܲܩܝܼܡܲܝܗܝ ܠܡܲܫܟܢܵܐ ܒܙܸܕ݂ܩܹܗ ܐܲܝܟ݂ ܕܚܵܘܝܼܬܵܟ݂ ܒܛܘܼܪܵܐ. [No book]
[31]ܘܲܥܒܸܕ ܦܪܵܣܵܐ ܬܸܟ݂ܠܬ݂ܵܐ ܘܐܲܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܒ݂ܵܕ݂ܵܐ ܕܐܘܼܡܵܢܵܐ ܥܒܸܕܲܝܗܝ ܟܪܘܼܒ݂ܵܐ. [No book]
[32]ܘܣܝܼܡܲܝܗܝ ܥܲܠ ܐܲܪܒܥܵܐ ܥܲܡܘܼܕܹ̈ܐ ܕܐܸܫܟܵܪܥܵܐ ܕܲܩܪܝܼܡܝܼܢ ܕܲܗܒ݂ܵܐ ܘܩܘܼܒ݂ܥܲܝܗܘܿܢ ܕܲܗܒ݂ܵܐ: ܥܲܠ ܐܲܪܒܿܥܵܐ ܣܵܡܟܹ̈ܐ ܕܣܹܐܡܵܐ. [No book]
[33]ܘܗܲܒ݂ ܦܪܵܣܵܐ ܬܚܹܝܬ݂ ܕܲܦܵܐ: ܘܐܲܥܸܠ ܠܬܲܡܵܢ ܠܓ݂ܵܘ ܡܼܢ ܦܪܵܣܵܐ ܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ: ܘܬܸܦܪܘܿܣ ܠܟ݂ܘܿܢ ܦܪܵܣܵܐ ܒܹܝܬ݂ ܩܘܼܕ݂ܫܵܐ: ܘܒܹܝܬ݂ ܩܕ݂ܘܿܫ ܩܘܼܕ݂ܫܹܐ. [No book]
[34]ܘܲܬ݂ܣܝܼܡ ܚܘܼܣܵܝܵܐ ܥܲܠ ܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ ܒܲܩܕ݂ܘܿܫ ܩܘܼܕܫܹܐ. [No book]
[35]ܘܲܬ݂ܣܝܼܡ ܦܵܬ݂ܘܿܪܵܐ ܠܒܲܪ ܡܼܢ ܦܪܵܣܵܐ: ܘܲܡܢܵܪܬܵܐ ܠܘܼܩܒܲܠ ܦܵܬ݂ܘܿܪܵܐ ܥܲܠ ܣܸܛܪܵܐ ܕܡܲܫܟܢܵܐ ܡܼܢ ܬܲܝܡܢܵܐ ܘܦܵܬ݂ܘܿܪܵܐ ܬܣܝܼܡ ܥܲܠ ܣܸܛܪܵܐ ܕܓܲܪܒܝܵܐ. [No book]
[36]ܘܲܥܒܸܕ ܦܪܵܣܵܐ ܠܬܲܪܥܵܐ ܕܡܲܫܟܢܵܐ: ܬܟܸܠܬ݂ܵܐ: ܘܐܲܪܓܿܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܒ݂ܵܕ݂ܵܐ ܕܨܘܼܪܬܵܐ. [No book]
[37]ܘܲܥܒܸܕ ܠܲܦܪܵܣܵܐ ܚܲܡܫܵܐ ܥܲܡܘܼܕܹ̈ܐ ܕܐܸܫܟܵܪܥܵܐ: ܘܲܩܪܘܿܡ ܐܸܢܘܿܢ ܕܲܗܒ݂ܵܐ: ܘܩܘܼܒ݂ܥܲܝܗܘܿܢ ܕܲܗܒ݂ܵܐ: ܘܲܥܒܸܕ݂ ܠܗܘܿܢ ܚܲܡܫܵܐ ܣܵܡܟܹ̈ܐ ܕܲܢܚܵܫܵܐ. [No book]
 
Top