➖ »
«
➖ ➕
Peshitta OT
PesOT
The Acts of Thomas
ActThom
←
Job
Job
19
→
[1]ܘܲܥܢ̣ܵܐ ܐܝܼܘܿܒ̣ ܘܐܸܡ̣ܲܪ. [No book]
[2]ܥܕܲܡܵܐ ܠܐܸܡܲܬ̣ܝ ܡܲܕ݂ܘܹܝܢ ܐܲܢ̄ܬ̇ܘܿܢ ܠܢܲܦ̮ܫܝ. ܘܡܲܟ݂ܐ̱ܒ̣ܝܼܢ ܐܲܢ̄ܬ̇ܘܿܢ ܠܝܼ ܒܡܸܠܹ̈ܐ. [No book]
[3]ܕܗܵܐ ܥܣܲܪ ܙܲܒ̣ܢ̈ܝܼܢ ܡܟ݂ܵܘܢܝܼܢ ܐܢ̄ܬ̇ܘܿܢ ܠܝܼ ܘܠܵܐ ܒܵܗ̇ܬ̇ܝܼܢ ܐܢ̄ܬ̇ܘܿܢ ܕܡܲܟ݂ܪܹܝܢ ܐܢ̄ܬ̇ܘܿܢ ܠܝܼ. [No book]
[4]ܘܐܸܢ ܫܲܪܝܼܪܵܐܝܼܬ̣ ܛܥܹ̇ܝܬ̣: ܠܘܵܬ̣ܝ ܬܸܗܘܹܐ ܛܵܥܝܘܼܬ̣ܝ. [No book]
[5]ܘܐܸܢ ܡ̣ܢ ܩܘܼܫܬܵܐ ܐܸܬ̣ܪܵܘܪܲܒ̣ܬܘܿܢ ܥܠܲܝ: ܘܐܲܟ݂ܣܬ̇ܘܿܢܵܢܝ ܘܚܲܣܸܕܲܬ̇ܘܿܢܵܢܝ. [No book]
[6]ܕܲܥܘ ܗܵܟܹܝܠ ܕܐܲܠܵܗܵܐ ܗ̄ܘܼ ܚܲܝܸܒܲܢܝ ܘܲܡܨܝܼܕ̇ܬܹ̇ܗ ܗ̄ܘܼ ܦܪܲܣ̣ ܥܠܲܝ. [No book]
[7]ܘܐܸܢ ܡܲܝܠܸܠ ܐ̄ܢܵܐ: ܐ̄ܢܵܫ ܠܵܐ ܥܵܢܹ̇ܐ ܠܝܼ. ܘܐܸܢ ܐܸܒܲܓܸ̇ܢ: ܠܲܝܬ̇ ܕܬ̣ܵܒܲܥ ܠܝܼ. [No book]
[8]ܐܘܼܪ̈ܚܵܬ̣ܝ ܣܵܓ̣ ܕܠܵܐ ܐܸܥܒܲܪ. ܘܣܵܡ ܚܸܫܘܿܟ݂ܵܐ ܫܒ̣̈ܝܼܠܲܝ. [No book]
[9]ܐܝܼܩܵܪܝ ܐܲܫܠܲܚ ܡܹܢܝ. ܘܐܲܥ̣ܒܲܪ ܟܠܝܼܠܵܐ ܕܪܹܫܝ. [No book]
[10]ܥܲܩ̣ܪܲܢܝ ܡ̣ܢ ܟܠ ܣܸܛܪ̈ܲܝ ܘܐܸܙܹ̇ܠ̄ܬ̣ ܘܲܫܩܲܠ ܐܲܝܟ݂ ܩܲܝܣܵܐ ܣܲܒ݂ܪܝ. [No book]
[11]ܘܲܬ̣ܩܸܦ ܥܠܲܝ ܪܘܼܓ̣ܙܹܗ ܘܚܲܫܸܒܲܢܝ ܠܹܗ ܐܲܝܟ݂ ܒܥܸܠܕ̇ܒ̣ܵܒ̣ܵܐ. [No book]
[12]ܘܐܲܟ݂ܚܕ݂ܵܐ ܐܹܬ̣ܵܘ ܥܠܲܝ ܫܠܝܼܚܵܘ̈ܗܝ. ܘܲܕ݂ܪܲܫ̣ܘ ܥܠܲܝ ܐܘܼܪ̈ܚܵܬ̣ܗܘܿܢ ܘܲܫ̣ܪܵܘ ܚܟ݂ܵܪ̈ܲܝ ܡܲܫܟܲܢܝ. [No book]
[13]ܐܲܚܲܝ̈ ܐܲܪܚܸܩ̣ܘ ܡܹܢܝ: ܘܝܵܕ݂ܥܲܝ ܥܸܒܲܪܘ. [No book]
[14]ܦܣܲܩ݂ܘ ܩܲܪ̈ܝܼܒܲܝ ܡ̣ܢ ܠܘܵܬ̣ܝ ܘܝܵܕ݂ܥܲܝ̈ ܐܸܬ̣ܢܲܫܝܘܼܢܝ. [No book]
[15]ܬܵܘܬܵܒܲܝ̈ ܒܲܝܬ̇ܝ ܘܐܲܡ̈ܗܵܬ̣ܝ: ܐܲܝܟ݂ ܢܘܼܟ݂ܪܵܝܵܐ ܚܲܫܒ̇ܘܼܢܝ ܘܢܘܼܟ݂ܪܵܝ ܗ̄ܘܹܿܝܬ̣ ܒܥܲܝܢܲܝ̈ܗܘܿܢ. [No book]
[16]ܠܥܲܒ̣ܕ̇ܝ ܩܪܹܝܬ̣: ܘܠܵܐ ܥܢܵܢܝ. ܘܐܸܬ̣ܟܲܫܦܹ̇ܬ̣ ܠܹܗ ܒܡܸـ̈ـܠܲܝ ܦܘܼܡܝ: ܘܐܸܬ̣ܚܲܢܢܹ̇ܬ̣ ܠܹܗ. [No book]
[17]ܢܘܼܟ݂ܪܵܝܵܐ ܗ̄ܘܹܿܝܬ̣ ܠܐܲܢ̄ܬܹܿܬ̣ܝ. ܘܐܸܬ̣ܚܲܢܢܹܬ̣ ܠܒܲܪ ܡܥܲܝ̈. [No book]
[18]ܘܐܵܦ ܥܵܘܿܠܹ̈ܐ ܐܲܣܠ̱ܝܘܼܢܝ ܩܵܡܹܿܬ̣ ܘܡܲܠܸܠ̣ܘ ܒܝܼ. [No book]
[19]ܐܲܣܠ̱ܝܘܼܢܝ ܟܠ ܡܵܠܟܲܝ̈ ܡܸܠܟܲܝ̈. ܘܐܵܦ ܪ̈ܵܚܡܲܝ ܐܸܬ̣ܗ̱ܦܸܟ݂ܘ ܥܠܲܝ. [No book]
[20]ܡܸܫܟܚ ܘܒܸܣܪܝ ܕܒܸܩܘ ܒܓܲܪ̈ܡܲܝ ܘܐܹܬ̣ܦܲܠܛܹ̇ܬ̣ ܒܡܸܫܟܵܐ ܕܫܹܢܲܝ̈. [No book]
[21]ܚܘܼܢܘܼܢܝ ܚܘܼܢܘܼܢܝ: ܐܲܢ̄ܬ̇ܘܿܢ ܪ̈ܵܚܡܲܝ ܡܸܛܠ ܕܐܝܼܕܹܗ ܗ̄ܘܼ ܕܐܲܠܵܗܵܐ ܩܸܪܒܲܬ̤ ܠܝܼ. [No book]
[22]ܠܡܵܢܵܐ ܬܸܪܕ̇ܦܘܼܢܵܢܝ ܐܵܦ ܐܲܢ̄ܬ̇ܘܿܢ ܐܲܝܟ݂ ܐܲܠܵܗܵܐ. ܘܡܼܢ ܒܸܣܪܝ ܠܵܐ ܬܸܣܒ̇ܥܘܼܢ. [No book]
[23]ܡ̇ܢ ܕܹܝܢ ܥ̣ܒܲܕ݂ ܕܡܸܬ̣ܟܲܬ݂̈ܒܵܢ ܗ̄ܘܲܝ̈ ܡܸـ̈ـܠܲܝ: ܘܡܸܬ̣ܪ̈ܲܫܡܵܢ ܗ̄ܘܲܝ̈ ܒܣܸܦܪܵܐ. [No book]
[24]ܘܲܒ̣ܩܲܢܝܵܐ ܕܦܲܪܙܠܵܐ: ܘܲܒ̣ܨܵܝܪܵܐ ܕܐܲܒ̣ܵܪܵܐ ܠܥܵܠܲܡ: ܘܥܲܠ ܟܹܐܦܵܐ ܢܸܬ̣ܪܲܫܡܵܢ. [No book]
[25]ܘܐܸܢܵܐ ܝܵܕܲܥ ܐ̄ܢܵܐ ܕܦܵܪܘܿܩܝ ܚܲܝ ܗ̄ܘܼ ܘܲܒ̣ܣܵܘܦܵܐ ܥܲܠ ܐܲܪܥܵܐ ܢܸܬ̣ܓ̇ܠܹܐ. [No book]
[26]ܘܥܲܠ ܡܸܫܟ̇ܝ ܗ̄ܘܼ ܐܸܬ̣ܟ̇ܪܸܟ݂ ܗܵܠܹܝܢ ܘܥܲܠ ܒܸܣܪܝ. [No book]
[27]ܐܸܢ ܬܸܚܙܹܐ ܠܐܲܠܵܗܵܐ ܥܲܝܢܝ: ܚܙܲܝ̈ ܢܘܼܗܪܵܐ ܟܘܿܠ̈ܝܵܬ̣ܝ: ܡܣܵܦ ܗ̄ܘܼ ܓܹܝܪ ܣܵܦܹ̇ܬ̣ ܡ̣ܢ ܩܝܵܡܝ. [No book]
[28]ܕܐܵܡ̇ܪܝܼܢ ܐܲܢ̄ܬ̇ܘܿܢ ܡܵܢܵܐ ܪܵܕ݂ܦܝܼܢ ܚ̄ܢܲܢ ܠܹܗ. ܛܵܒ̣ܵܐ ܓܹܝܪ ܡܸܠܬ̣ܵܐ ܐܸܫܟܲܚ ܒܵܬܲܪܝ. [No book]
[29]ܦܪܘܿܩܘ ܠܟ݂ܘܿܢ ܡ̣ܢ ܩܕ̣ܵܡ ܚܲܪܒܵܐ. ܡܸܛܠ ܕܚܸܡܬ̣ܵܐ ܕܲܚܛܵܗܹ̈ܐ ܚܲܪܒܵܐ ܗ̄ܝܼ ܡܸܛܠ ܕܬܸܕ̇ܥܘܼܢ ܕܐܝܼܬ̣ ܕܝܼܢܵܐ. [No book]
 
Top