➖ »
«
➖ ➕
Wycliffe's English Translation (1388)
Wyc
The Epistle of Polycarp to the Church at Phillipians
PolyPhl
←
Job
Job
32
→
[1]Forsothe these thre men leften of to answere Joob, for he semyde a iust man to hem. [No book]
[2]And Helyu, the sone of Barachel Buzites, of the kynrede of Ram, was wrooth, and hadde indignacioun; forsothe he was wrooth ayens Joob, for he seide hym silf to be iust bifor God. [No book]
[3]Sotheli Helyu hadde indignacioun ayens the thre frendis of hym, for thei hadden not founde resonable answere, but oneli hadde condempned Joob. [No book]
[4]Therfor Helyu abood Joob spekynge, for thei, that spaken, weren eldere men. [No book]
[5]But whanne he hadde seyn, that thre men myyten not answere, he was wrooth greetly. [No book]
[6]And Helyu, the sone of Barachel Buzites, answeride, and seyde, Y am yongere in tyme, sotheli ye ben eldere; therfor with heed holdun doun Y dredde to schewe to you my sentence. [No book]
[7]For Y hopide that lengere age schulde speke, and that the multitude of yeeris schulden teche wisdom. [No book]
[8]But as Y se, spirit is in men, and the enspiryng `ether reuelacioun, of Almyyti God yyueth vndurstondyng. [No book]
[9]Men of long lijf ben not wise, and elde men vndurstonden not doom. [No book]
[10]Therfor Y schal seie, Here ye me, and Y also schal schewe my kunnyng to you. [No book]
[11]For Y abood youre wordis, Y herde youre prudence, as long as ye dispuytiden in youre wordis. [No book]
[12]And as long as Y gesside you to seie ony thing, Y bihelde; but as Y se, `noon is of you, that may repreue Joob, and answere to hise wordis; [No book]
[13]lest perauenture ye seien, We han founde wisdom; God, and not man, hath cast hym awei. [No book]
[14]Joob spak no thing to me, and Y not bi youre wordis schal answere hym. [No book]
[15]Thei dredden, and answeriden no more, and token awei speche fro hem silf. [No book]
[16]Therfor for Y abood, and thei spaken not, thei stoden, and answeriden no more; also Y schal answere my part, [No book]
[17]and Y schal schewe my kunnyng. [No book]
[18]For Y am ful of wordis, and the spirit of my wombe, `that is, mynde, constreyneth me. [No book]
[19]Lo! my wombe is as must with out `spigot, ether a ventyng, that brekith newe vessels. [No book]
[20]Y schal speke, and brethe ayen a litil; Y schal opene my lippis, and Y schal answere. [No book]
[21]Y schal not take the persoone of man, and Y schal not make God euene to man. [No book]
[22]For Y woot not hou long Y schal abide, and if my Makere take me awei `after a litil tyme. [No book]
Author: John Wycliffe (1328 – 1384)
Top