➖ »
«
➖ ➕
Wycliffe's English Translation (1388)
Wyc
The Gospel of Nicodemus
GspNic
←
Luke
Luk
24
   
[1]But in o dai of the woke ful eerli thei camen to the graue, and brouyten swete smellynge spices, that thei hadden arayed. [No book]
[2]And thei founden the stoon turned awei fro the graue. [No book]
[3]And thei yeden in, and founden not the bodi of the Lord Jhesu. [No book]
[4]And it was don, the while thei weren astonyed in thouyt of this thing, lo! twei men stoden bisidis hem in schynynge cloth. [No book]
[5]And whanne thei dredden, and boweden her semblaunt in to the erthe, thei seiden to hem, What seken ye hym that lyueth with deed men? [No book]
[6]He is not here, but is risun. Haue ye mynde, hou he spak to you, whanne he was yit in Galile, [No book]
[7]and seide, For it bihoueth mannys sone to be bitakun in to the hondis of synful men, and to be crucified, and the thridde dai to rise ayen. [No book]
[8]And thei bithouyten on hise wordis. [No book]
[9]And thei yeden ayen fro the graue, and telden alle these thingis to the enleuene, and to alle othir. [No book]
[10]And ther was Marie Mawdeleyn, and Joone, and Marie of James, and other wymmen that weren with hem, that seiden to apostlis these thingis. [No book]
[11]And these wordis weren seyn bifor hem as madnesse, and thei bileueden not to hem. [No book]
[12]But Petir roos vp, and ran to the graue; and he bowide doun, and say the lynen clothis liynge aloone. And he wente bi him silf, wondrynge on that that was don. [No book]
[13]And lo! tweyne of hem wenten in that dai in to a castel, that was fro Jerusalem the space of sixti furlongis, bi name Emaws. [No book]
[14]And thei spaken togidir of alle these thingis that haddun bifallun. [No book]
[15]And it was don, the while thei talkiden, and souyten bi hem silf, Jhesus hym silf neiyede, and wente with hem. [No book]
[16]But her iyen weren holdun, that thei knewen him not. [No book]
[17]And he seide to hem, What ben these wordis, that ye speken togidir wandrynge, and ye ben sorewful? [No book]
[18]And oon, whos name was Cleofas, answerde, and seide, Thou thi silf art a pilgrym in Jerusalem, and hast thou not knowun, what thingis ben don in it in these daies? [No book]
[19]To whom he seide, What thingis? And thei seiden to hym, Of Jhesu of Nazareth, that was a man prophete, myyti in werk and word bifor God and al the puple; [No book]
[20]and hou the heiyest preestis of oure princis bitoken hym in to dampnacioun of deeth, and crucifieden hym. [No book]
[21]But we hopiden, that he schulde haue ayenbouyt Israel. And now on alle these thingis the thridde dai is to dai, that these thingis weren don. [No book]
[22]But also summe wymmen of ouris maden vs afered, whiche bifor dai weren at the graue; and whanne his bodi was not foundun, [No book]
[23]thei camen, and seiden, that thei syen also a siyt of aungels, whiche seien, that he lyueth. [No book]
[24]And summe of oure wenten to the graue, and thei founden so as the wymmen seiden, but thei founden not hym. [No book]
[25]And he seide to hem, A! foolis, and slowe of herte to bileue in alle thingis that the prophetis han spokun. [No book]
[26]Whethir it bihofte not Crist to suffre these thingis, and so to entre in to his glorie? [No book]
[27]And he bigan at Moises and at alle the prophetis, and declaride to hem in alle scripturis, that weren of hym. [No book]
[28]And thei camen nyy the castel, whidur thei wenten. And he made countenaunce that he wolde go ferthere. [No book]
[29]And thei constreyneden hym, and seiden, Dwelle with vs, for it drawith to nyyt, and the dai is now bowid doun. [No book]
[30]And he entride with hem. And it was don, while he sat at the mete with hem, he took breed, and blesside, and brak, and took to hem. [No book]
[31]And the iyen of hem weren openyd, and thei knewen hym; and he vanyschide fro her iyen. [No book]
[32]And thei seiden togidir, Whether oure herte was not brennynge in vs, while he spak in the weie, and openyde to vs scripturis? [No book]
[33]And thei risen vp in the same our, and wenten ayen in to Jerusalem, and founden the enleuene gaderid togidir, and hem that weren with hem, [No book]
[34]seiynge, That the Lord is risun verrili, and apperide to Symount. [No book]
[35]And thei tolden what thingis weren don in the weie, and hou thei knewen hym in brekyng of breed. [No book]
[36]And the while thei spaken these thingis, Jhesus stood in the myddil of hem, and seide to hem, Pees to you; Y am, nyle ye drede. [No book]
[37]But thei weren affraied and agast, and gessiden hem to se a spirit. [No book]
[38]And he seide to hem, What ben ye troblid, and thouytis comen vp in to youre hertis? [No book]
[39]Se ye my hoondis and my feet, for Y my silf am. Fele ye, and se ye; for a spirit hath not fleisch and boonys, as ye seen that Y haue. [No book]
[40]And whanne he hadde seid this thing, he schewide hoondis and feet to hem. [No book]
[41]And yit while thei bileueden not, and wondriden for ioye, he seide, Han ye here ony thing that schal be etun? [No book]
[42]And thei proferden hym a part of a fisch rostid, and an hony combe. [No book]
[43]And whanne he hadde etun bifore hem, he took that that lefte, and yaf to hem; [No book]
[44]and seide `to hem, These ben the wordis that Y spak to you, whanne Y was yit with you; for it is nede that alle thingis ben fulfillid, that ben writun in the lawe of Moises, and in prophetis, and in salmes, of me. [No book]
[45]Thanne he openyde to hem wit, that thei schulden vnderstonde scripturis. [No book]
[46]And he seide to hem, For thus it is writun, and thus it bihofte Crist to suffre, and ryse ayen fro deeth in the thridde dai; [No book]
[47]and penaunce and remyssioun of synnes to be prechid in his name `in to alle folkis, bigynnynge at Jerusalem. [No book]
[48]And ye ben witnessis of these thingis. [No book]
[49]And Y schal sende the biheest of my fadir in to you; but sitte ye in the citee, til that ye be clothid with vertu from an hiy. [No book]
[50]And he ledde hem forth in to Betanye, and whanne his hondis weren lift vp, he blesside hem. [No book]
[51]And it was don, the while he blesside hem, he departide fro hem, and was borun in to heuene. [No book]
[52]And thei worschipiden, and wenten ayen in to Jerusalem with greet ioye, [No book]
[53]and weren euermore in the temple, heriynge and blessynge God. [No book]
Author: John Wycliffe (1328 – 1384)
Top