➖ »
«
➖ ➕
Peshitta OT
PesOT
Peshitta NT (1905)
PesNT(1905)
←
Proverbs
Pro
15
→
[1]ܡܸܠܬ̣ܵܐ ܪܲܟ̇ܝܼܟ݂ܬ̣ܵܐ ܡܲܗ̄ܦܟ݂ܵܐ ܚܸܡܬ̣ܵܐ. ܘܡܸܠܬ̣ܵܐ ܩܫܝܼܬܵܐ ܡܥܝܼܪܵܐ ܪܘܼܓ̣ܙܵܐ. [No book]
[2]ܠܸܫܵܢܵܐ ܕܚܲܟ̇ܝܼܡܹ̈ܐ ܡܲܫܦܲܪ ܝܼܕܲܥܬ̣ܵܐ. ܘܦܘܼܡܵܐ ܕܣܲܟ݂ܠܹ̈ܐ ܓܵܣܹ̇ܐ ܠܵܘܛܬ̣ܵܐ. [No book]
[3]ܒܟ݂ܠ ܐܲܬܲܪ ܥܲܝܢܵܘ̈ܗܝ ܕܡܵܪܝܵܐ ܚܵܝ̇ܪܵܢ ܒܛܵܒܹ̈ܐ ܘܲܒ̣ܒ̣ܝܼܫܹ̈ܐ. [No book]
[4]ܐܵܣ̇ܝܘܼܬ̣ܵܐ ܕܠܸܫܵܢܵܐ: ܐܝܼܠܵܢܵܐ ܗ̄ܝܼ ܕܚܲܝܹ̈ܐ ܘܕ݂ܵܐܟܹ̇ܠ ܡ̣ܢ ܦܹܐܪ̈ܵܘܗܝ: ܢܸܣܒܲܥ ܡܸܢܹܗ. [No book]
[5]ܣܲܟ݂ܠܵܐ ܡܡܲܝܸܩ ܒܡܲܪܕ̇ܘܼܬ̣ܵܐ ܕܐܲܒ̣ܘܼܗܝ. ܘܕܲܥܪܝܼܡ ܢܵܛܲܪ ܡܲܟ̇ܣܵܢܘܼܬ̣ܵܐ. [No book]
[6]ܒܒܲܝܬܹ̇ܗ ܕܙܲܕ̇ܝܼܩܵܐ ܣܵܓܹ̇ܐ ܚܲܝܠܵܐ. ܘܥܲܠܠܵܬ̣̈ܗܘܿܢ ܕܥܵܘܿܠܹ̈ܐ ܢܸܐܒ̣̈ܕܵܢ. [No book]
[7]ܣܸܦ̈ܘܵܬ̣ܵܐ ܕܚܲܟ̇ܝܼܡܹ̈ܐ ܡܡܲܠ̈ܠܵܢ ܝܼܕܲܥܬ̣ܵܐ. ܘܠܸܒܵـ̈ـܘܵܬ̣ܵܐ ܕܣܲܟ݂̈ܠܹܐ ܠܵܐ ܟܹܐܢܝܼܢ. [No book]
[8]ܕܸܒ̣ܚܹ̈ܐ ܕܥܵܘܿܠܹ̈ܐ ܡܲܣܠܹܐ ܡܵܪܝܵܐ: ܘܒܲܨܠܘܿܬ̣ܵܐ ܕܲܬ̣ܪ̈ܝܼܨܵܐ ܨܸܒ̣ܝܵܢܹܗ. [No book]
[9]ܐܘܼܪܚܵܐ ܕܥܵܘܿܠܹ̈ܐ ܡܲܣܠܸܐ ܡܵܪܝܵܐ. ܘܪܵܚܹ̇ܡ ܠܐܲܝܢܵܐ ܕܥܵܒܹ̇ܕ݂ ܙܲܕ̇ܝܼܩܘܼܬ̣ܵܐ. [No book]
[10]ܡܲܪܕ̇ܘܼܬ̣ܵܐ ܕܐܲܝܠܹܝܢ ܝܵܕ̇ܥܝܼܢ ܒܝܼܫܬܵܐ ܓܲܠܝܵܐ ܗ̄ܝܼ. ܘܐܲܝܠܹܝܢ ܕܣܵܢܹ̇ܝܢ ܡܲܟ̇ܣܵܢܘܼܬ̣ܵܐ: ܢܡܘܼܬ̣ܘܼܢ. [No book]
[11]ܫܝܘܿܠ ܘܐܲܒ̣ܕܵܢܵܐ ܩܕ݂ܵܡ ܡܵܪܝܵܐ ܐܸܢܘܿܢ: ܘܐܵܦ ܠܸܒܵـ̈ـܘܵܬ̣ܵܐ ܕܲܒ̣ܢܲܝ̈ܢܵܫܵܐ. [No book]
[12]ܠܵܐ ܪܵܚܹ̇ܡ ܒܝܼܫܵܐ ܠܡ̇ܢ ܕܡܲܟܸ̇ܣ ܠܹܗ. ܘܥܲܡ ܚܲܟ̇ܝܼܡܹ̈ܐ ܠܵܐ ܡܗܲܠܸܟ݂. [No book]
[13]ܠܸܒܵܐ ܚܲܕܵܝܵܐ ܡܲܫܦܲܪ ܓܘܼܫܡܵܐ: ܘܠܸܒܵܐ ܟܵܝ̇ܒܵܐ ܡܲܟ݂ܐܸܒ̣ ܪܘܼܚܵܐ. [No book]
[14]ܠܸܒܵܐ ܕܟܹܐܢܹ̈ܐ ܒܵܥܹ̇ܐ ܝܼܕܲܥܬ̣ܵܐ. ܘܦܘܼܡܵܐ ܕܥܵܘܿܠܹ̈ܐ ܡܡܲܠܸܠ ܒܝܼ̈ܫܵܬ̣ܵܐ. [No book]
[15]ܟܠܗܘܿܢ ܝܵܘ̈ܡܵܬܹܗ ܕܡܸܣܟܹ̇ܢܵܐ ܒܝܼܫܝܼܢ. ܘܒܲܣܝܼܡܹ̈ܐ ܫܠܹܝܢ ܒܟ݂ܠܙܒܲܢ. [No book]
[16]ܛܵܒ̣ ܠܡܸܕܚܲܠ ܠܡܵܪܝܵܐ ܩܲܠܝܼܠ: ܛܵܒ̣ ܡ̣ܢ ܣܝܼ̈ܡܵܬ̣ܵܐ ܪܵܘ̱ܪ̈ܒ̣ܵܬ̣ܵܐ ܕܥܵܘܿܠܹ̈ܐ. [No book]
[17]ܛܵܒ̣ܵܐ ܗ̄ܝܼ ܫܵܪܘܼܬ̣ܵܐ ܕܝܲܪܩܵܐ: ܘܚܘܼܒܵܐ ܪܸܫܡܵܐ: ܛܵܒ̣ ܡ̣ܢ ܬܵܘܪܹ̈ܐ ܡܦܲܛܡܹ̈ܐ ܒܣܸܢ̱ܐܬ̣ܵܐ. [No book]
[18]ܓܲܒ̣ܪܵܐ ܚܸܡܬ̣ܵܢܵܐ ܡܓܲܕ̇ܓ̣ ܗܸܪܬ̣ܵܐ. ܘܓܲܒ̣ܪܵܐ ܢܲܓܝܼܪ ܪܘܼܚܵܐ: ܥܲܕ݂ܠܵܐ ܗܵܘܝܵܐ ܡܕܲܥܸܟ݂ ܠܵܗ̇. [No book]
[19]ܐܘܼܪ̈ܚܵܬ̣ܗܘܿܢ ܕܲܚܒܸܢܵܢܹ̈ܐ ܡܲܠ̈ܝܵܢ ܟܘܼ̈ܒܹ̇ܐ. ܘܐܘܼܪ̈ܚܵܬ̣ܗܘܿܢ ܕܲܬ̣ܪܝܼܨܹܐ ܫܲܦ̈ܝܵܢ. [No book]
[20]ܒܪܵܐ ܚܲܟ̇ܝܼܡܵܐ ܡܚܲܕܹ̇ܐ ܠܐܲܒ̣ܘܼܗܝ. ܘܲܒ̣ܪܵܐ ܣܲܟ݂ܠܵܐ ܒܸܗܬ̇ܬ̣ܵܐ ܗ̄ܘܼ ܕܐܸܡܹܗ. [No book]
[21]ܓܲܒ̣ܪܵܐ ܕܲܣܟܲܠ ܚܲܣܝܼܪ ܠܸܒܵܐ ܗ̄ܘܼ: ܘܓܲܒ̣ܪܵܐ ܣܲܟ̇ܘܼܠܬ̣ܵܢܵܐ ܬܪܝܼܨܵܐܝܼܬ̣ ܡܗܲܠܸܟ݂. [No book]
[22]ܡܲܥܒ̇ܪܝܼܢ ܡܲܚܫ̈ܒ̣ܵܬ̣ܵܐ ܐܲܝܠܹܝܢ ܕܲܡܝܲܩܪܝܼܢ ܟܢܘܼܫܬܵܐ. ܘܲܒ̣ܣܘܿܓ̣ܵܐܐ ܕܡܵܠܟܲܝ̈ ܡܸܠܟܵܐ ܬܸܬ̣ܩܲܝܲܡ. [No book]
[23]ܚܲܕ݂ܘܼܬ̣ܵܐ ܠܓܲܒ̣ܪܵܐ ܡܸܠܬ̣ܵܐ ܕܦܘܼܡܹܗ. ܘܕܲܡܡܲܠܸܠ ܒܙܲܒ̣ܢܹܗ: ܫܲܦܝܼܪ ܠܹܗ. [No book]
[24]ܐܘܼܪܚܵܐ ܕܚܲܝܹ̈ܐ ܡܲܣܩܵܢܵܐܗ̄ܝܼ ܠܣܲܟ̇ܘܼܠܬ̣ܵܢܵܐ: ܕܢܸܣܛܹܐ ܡ̣ܢ ܫܝܘܿܠ ܬܲܚܬܵܝܬܵܐ. [No book]
[25]ܒܲܝܬܵܐ ܕܫܲܒ̣ܗ̱ܪ̈ܵܢܹܐ ܥܵܩܲܪ ܡܵܪܝܵܐ. ܘܲܬ̣ܚܘܼܡܵܐ ܕܐܲܪ̈ܡ̱ܠܵܬ̣ܵܐ ܡܫܲܪܲܪ. [No book]
[26]ܡܲܣ̱ܠ̈ܝܵܢ ܐܸܢܹܝܢ ܩܕ݂ܵܡ ܡܵܪܝܵܐ ܡܲܚܫ̈ܒ̣ܵܬ̣ܵܐ ܒܝܼ̈ܫܵܬ̣ܵܐ. ܘܕܲܟ݂̈ܝܵܐ ܡܸܠܹ̈ܐ ܒܲܣܝܼ̈ܡܵܬ̣ܵܐ. [No book]
[27]ܡܵܘܒܸ̇ܕ݂ ܢܲܦ̮ܫܹܗ ܐܲܝܢܵܐ ܕܲܡܩܲܒܸ̇ܠ ܫܘܼܚܕܵܐ. ܘܲܕ݂ܣܵܢܹ̇ܐ ܠܡܸܣܲܒ̣ ܫܘܼܚܕܵܐ: ܚܵܝܹ̇ܐ. [No book]
[28]ܠܸܒܹ̇ܗ ܕܙܲܕ̇ܝܼܩܵܐ: ܪܵܢܹ̇ܐ ܒܗܲܝܡܵܢܘܼܬ̣ܵܐ ܘܦܘܼܡܵܐ ܕܥܵܘܿܠܹ̈ܐ ܡܡܲܠܸܠ ܒܝܼ̈ܫܵܬ̣ܵܐ. [No book]
[29]ܪܲܚܝܼܩ ܗ̄ܘܼ ܡܵܪܝܵܐ ܡ̣ܢ ܥܵܘܿܠܹ̈ܐ ܘܒܲܨܠܘܿܬ̣ܵܐ ܕܙܲܕ̇ܝܼܩܹ̈ܐ ܫܵܡܲܥ. [No book]
[30]ܢܘܼܗܪܵܐ ܕܥܲܝܢܹ̈ܐ ܡܒܲܣܸܡ ܠܸܒܵܐ. ܘܠܸܒܵܐ ܛܵܒ̣ܵܐ ܡܲܫܡܸܢ ܓܲܪ̈ܡܹܐ. [No book]
[31]ܐܸܕ݂ܢܵܐ ܕܫܵܡ̇ܥܵܐ ܡܲܟ̇ܣܵܢܘܼܬ̣ܵܐ ܕܚܲܝܹ̈ܐ: ܒܲܝܢܵܬ̣ ܚܲܟ̇ܝܼܡܹ̈ܐ ܬܒ̣ܘܼܬ̣. [No book]
[32]ܕܡܲܣܠܹܐ ܡܲܪܕ̇ܘܼܬ̣ܵܐ ܣܵܢܹ̇ܐ ܢܲܦ̮ܫܹܗ. ܘܲܕ݂ܫܵܡܲܥ ܡܲܟ̇ܣܵܢܘܼܬ̣ܵܐ ܩܵܢܹ̇ܐ ܚܸܟ݂ܡ̱ܬ̣ܵܐ. [No book]
[33]ܕܸܚ̱ܠܬܹܗ ܕܡܵܪܝܵܐ ܝܘܼܠܦܵܢܵܐ ܗ̄ܝܼ ܕܚܲܝܹ̈ܐ ܘܬܸܫܒ̇ܘܿܚܬܹ̇ܗ ܕܡܲܟ̇ܝܼܟ݂ܵܐ ܐܵܙܵܠ̄ܐ ܩܕ݂ܵܡܵܘܗܝ. [No book]
 
Top