➕
←
2 Samuel
2Sa
15
→
[1]ܘܡ̣ܢ ܝܵܬܲܪܟܸ̇ܢ ܥܒܲܕ݂ ܠܹܗ ܐܲܒ̣ܫܵܠܘܿܡ ܡܲܪ̈ܟ̇ܒ̣ܵܬ̣ܵܐ ܘܦܲܪ̈ܵܫܹܐ: ܘܚܲܡܫܝܼܢ ܛܒܸܠܵܘ̈ܝܼܢ ܕܪܵܗܛܝܼܢ ܗ̄ܘ̣ܵܘ ܩܕ݂ܵܡܵܘܗܝ. [2]ܘܲܡܩܲܕܸܡ ܗ̄ܘ̣ܵܐ ܠܲܒ̣ܫܵܠܘܿܡ: ܘܩܵܐܹܡ ܗ̄ܘ̣ܵܐ ܥܲܠ ܓܹܢ̄ܒ̣ ܬܲܪܥܵܐ ܕܡܲܠܟܵܐ. ܘܟ݂ܠ ܓܲܒ̣ܪܵܐ ܕܐܝܼܬ̣ ܗ̄ܘ̣ܵܐ ܠܹܗ ܕܝܼܢܵܐ ܩܕ݂ܵܡ ܡܲܠܟܵܐ: ܩܵܪܹܐ ܗ̄ܘ̣ܵܐ ܠܹܗ ܐܲܒ̣ܫܵܠܘܿܡ ܠܘܵܬܹܗ ܘܐܵܡܲܪ ܠܹܗ: ܡ̣ܢ ܐܲܝܕܵܐ ܐܲܢ̄ܬ̇ ܩܪܝܼܬ̣ܵܐ. ܐܵܡܲܪ ܠܹܗ: ܥܲܒ̣ܕܵܟ݂ ܐ̄ܢܵܐ ܡ̣ܢ ܚܲܕ݂ ܡ̣ܢ ܫܲܒ̣ܛܹ̈ܐ ܕܝܼܣܪܵܝܹܠ. [3]ܐܵܡܲܪ ܠܸܗ ܐܲܒ̣ܫܵܠܘܿܡ: ܗܵܐ ܚܵܙܹܐ ܐ̄ܢܵܐ ܕܡܸܠܲܝܟ ܫܲܦܝܼܪ̈ܵܢ ܘܲܬ̣ܪ̈ܝܼܨܵܢ: ܘܫܵܡܘܿܥܵܐ ܠܲܝܬ̇ ܠܵܟ݂ ܡ̣ܢ ܠܘܵܬ̣ ܡܲܠܟܵܐ. [4]ܘܐܸܡܲܪ ܐܲܒ̣ܫܵܠܘܿܡ: ܡ̇ܢ ܕܹܝܢ ܥܲܒ̣ܕܲܢܝ ܕܲܝܵܢܵܐ ܒܐܲܪܥܵܐ: ܘܲܠܘܵܬ̣ܝ ܕܹܝܢ ܐܸܬ̣ܵܐ ܟܠ ܓܲܒ̣ܪܵܐ ܕܐܝܼܬ̣ ܠܹܗ ܕܝܼܢܵܐ ܘܲܬ̣ܒܲܥܬ̣ܵܐ ܘܲܡܙܲܟܸ̇ܐ ܗ̄ܘܹܝܬ̣ ܠܹܗ. [5]ܘܡܵܐ ܕܩܵܐܸܡ ܗ̄ܘ̣ܵܐ ܓܲܒ̣ܪܵܐ ܠܡܸܣܓܲܕ݂ ܠܹܗ: ܐܵܚܲܕ݂ ܗ̄ܘ̣ܵܐ ܒܐܝܼܕܹܗ ܘܢܵܫܹܩ ܗ̄ܘ̣ܵܐ ܠܹܗ. [6]ܘܥܵܒܹܕ݂ ܗ̄ܘ̣ܵܐ ܐܲܒ̣ܫܵܠܘܿܡ ܗܵܟܲܢܵܐ ܠܟ݂ܠܹܗ ܝܼܣܪܵܝܹܠ: ܕܐܵܬ̣ܝܢ ܗ̄ܘ̣ܵܐ ܠܲܡܕ݂ܵܢ ܩܕ݂ܵܡ ܡܲܠܟܵܐ ܘܐܲܣܛܝܹܗ ܐܲܒ̣ܫܵܠܘܿܡ ܠܠܸܒܵܐ ܕܟ݂ܠܗܘܿܢ ܒ̈ܢܲܝ ܝܼܣܪܵܝܹܠ. [7]ܘܡ̣ܢ ܒܵܬܲܪ ܐܲܪܒܲܥ ܫܢ̈ܝܼܢ: ܐܸܡܲܪ ܐܲܒ̣ܫܵܠܘܿܡ ܠܡܲܠܟܑܵ: ܐܹܙܲܠ ܐܹܫܲܠܸܡ ܢܸܕ݂ܪ̈ܲܝ ܕܢܕ݂ܪܹܬ̣ ܠܡܵܪܝܵܐ ܒܚܸܒ̣ܪܘܿܢ. [8]ܢܸܕ݂ܪܵܐ ܓܹܝܪ ܢܕܲܪ ܥܲܒ̣ܕܵܟ݂: ܟܲܕ݂ ܝܵܬܹܒ̣ ܗ̄ܘܹܝܬ̣ ܒܓ̣ܵܫܘܿܪ ܒܐܲܕ݂ܘܿܡ: ܕܐܸܢ ܡܲܗܦܵܟ݂ܘ ܢܲܗܦܟܲܢܝ ܡܵܪܝܵܐ ܠܐܘܿܪܸܫܠܸܡ: ܐܸܦܠܘܿܚ ܠܡܵܪܝܵܐ. [9]ܐܵܡܲܪ ܠܹܗ ܡܲܠܟܵܐ ܙܸܠ ܒܲܫܠܵܡܵܐ. ܘܩܵܡ ܐܸܙܲܠ ܠܚܸܒ̣ܪܘܿܢ. [10]ܘܫܲܕܲܪ ܐܲܒ̣ܫܵܠܘܿܡ ܓܵܫܘܿܫܹ̈ܐ ܒܟ݂ܠܗܘܿܢ ܫܲܒ̣ܛܹ̈ܐ ܕܝܼܣܪܵܝܹܠ: ܘܦܩܸܕ݂ ܕܡܵܐ ܕܲܫܡܲܥܬ̇ܘܿܢ ܩܵܠܵܐ ܕܫܝܼܦܘܿܪܵܐ: ܐܸܡܪܘ ܕܐܲܡܠܸܟ݂ ܐܲܒ̣ܫܵܠܘܿܡ ܒܚܸܒ̣ܪܘܿܢ. [11]ܘܥܲܡ ܐܲܒ̣ܫܵܠܘܿܡ ܐܸܙܲܠ ܡܲܐܬܹܝܢ ܓܲܒ̣ܪ̈ܝܼܢ ܡ̣ܢ ܐܘܿܪܸܫܠܸܡ: ܘܐܸܙܲܠܘ ܬܲܡܝܼܡܵܐܝܬ̣ ܟܲܕ݂ ܠܵܐ ܝܵܕ݂ܥܝܼܢ ܡܸܕܸܡ. [12]ܘܫܲܕܲܪ ܐܲܒ̣ܫܵܠܘܿܡ ܥܲܠ ܐܲܚܝܼܬ̇ܘܿܦܹܝܠ ܓܲܠܝܘܿܢܵܝܵܐ: ܡܵܠܹܟ݂ ܡܸܠܟܹ̇ܗ ܕܕ݂ܵܘܝܼܕ݂. ܘܕܲܒ̣ܪܹܗ ܡ̣ܢ ܩܪܝܼܬܹܗ ܡ̣ܢ ܓܲܠܝܘܿ ܟܲܕ݂ ܕܵܒܲܚ ܕܸܒ̣ܚܬܵܐ: ܘܡܸܪܕܵܐ ܐܵܙܸܠ ܗ̄ܘ̣ܵܐ ܘܥܵܫܹܢ. ܘܥܲܡܵܐ ܛܵܒ̣ ܣܵܓܹܐ ܗ̄ܘ̣ܵܐ ܥܲܠ ܓܹܢ̄ܒ̣ ܐܲܒ̣ܫܵܠܘܿܡ. [13]ܘܐܸܬ̣ܵܐ ܡܣܲܒ̇ܪܵܢܵܐ ܠܘܵܬ̣ ܕܵܘܝܼܕ݂: ܘܐܸܡܲܪ ܠܹܗ: ܐܸܫܬ̇ܘܝܼ ܠܸܒ̇ܗܘܿܢ ܕܲܒ̣̈ܢܲܝ ܝܼܣܪܵܝܹܠ ܒܵܬܲܪ ܐܲܒ̣ܫܵܠܘܿܡ. [14]ܘܐܸܡܲܪ ܕܵܘܝܼܕ݂ ܠܟ݂ܠܗܘܿܢ ܥܲܒ̣ܕܵܘ̈ܗܝ ܕܥܲܡܹܗ ܒܐܘܿܪܸܫܠܸܡ: ܩܘܼܡܘ ܢܸܥܪܘܿܩ ܠܲܢ: ܕܲܠܡܵܐ ܠܵܐ ܢܸܫܟܲܚ ܠܡܸܬ̣ܦܲܠܵܛܘ ܡ̣ܢ ܩܕ݂ܵܡ ܐܲܒ̣ܫܵܠܘܿܡ. ܒܲܥܓܲܠ ܢܹܐܙܲܠ ܠܲܢ: ܕܲܠܡܵܐ ܢܸܣܬܲܪܗܲܒ̣ ܘܢܲܕ݂ܪ̱ܟܲܢ ܘܢܸܕ݂ܚܸܐ ܥܠܲܝܢ ܒܝܼܫܬܵܐ: ܘܢܸܡܚܹܗ̇ ܠܲܩܪܝܼܬ̣ܵܐ ܒܦܘܼܡܵܐ ܕܚܲܪܒܵܐ. [15]ܘܐܸܡܲܪܘ ܥܲܒ̣ܕܵܘ̈ܗܝ ܕܡܲܠܟܵܐ ܠܡܲܠܟܵܐ: ܟܠ ܡܸܕܸܡ ܕܨܵܒܹܐ ܐܲܢ̄ܬ̇ ܡܵܪܲܢ ܡܲܠܟܵܐ: ܗܵܟܲܢܵܐ ܥܵܒ̣ܕܲܝܼܢ ܥܲܒ̣ܕܲܝ̈ܟ. [16]ܘܲܢܦܲܩ ܡܲܠܟܵܐ: ܘܟ݂ܠܗܘܿܢ ܒ̈ܢܲܝ ܒܲܝܬܹ̇ܗ ܠܪܸܓ̣ܠܹܗ: ܘܲܫܒܲܩ ܡܲܠܟܵܐ ܥܣܲܪ ܢܸܫܹ̈ܐ ܕܪ̈ܘܼܟ݂ܵܬ̣ܵܐ ܕܢܸܛܪܵܢ ܒܲܝܬܹ̇ܗ. [17]ܘܲܢܦܲܩ ܡܲܠܟܵܐ ܘܟ݂ܠܹܗ ܥܲܡܵܐ ܠܪܸܓ̣ܠܹܗ: ܘܩܵܡܘ ܒܪܘܼܚܩܵܐ. [18]ܘܟ݂ܠܗܘܿܢ ܥܲܒ̣ܕܵܘ̈ܗܝ ܥܵܒ̣ܪܝܼܢ ܥܠܵܘܗܝ: ܘܟ݂ܠܗܘܿܢ ܚܹܐܪ̈ܵܘܗܝ: ܘܟ݂ܠܗܘܿܢ ܦܵܠܚܵܘ̈ܗܝ: ܘܟ݂ܠܗܘܿܢ ܓܵܬ̣ܵܝܹ̈ܐ ܕܐܸܬ̣ܵܘ ܠܪܸܓ̣ܠܹܗ ܡ̣ܢ ܓܵܬ̣ ܥܵܒ̣ܪܝܼܢ ܩܕ݂ܵܡ ܡܲܠܟܵܐ. [19]ܐܵܡܲܪ ܠܹܗ ܡܲܠܟܵܐ ܠܐܵܬ̣ܝܼ ܓܵܬ̣ܵܝܵܐ: ܠܡܵܢܵܐ ܐܵܙܸܠ ܐܲܢ̄ܬ̇ ܐܵܦ ܐܲܢ̄ܬ̇ ܥܲܡܲܢ. ܦܘܼܫ ܠܵܟ݂ ܡ̣ܢ ܡܲܠܟܵܐ: ܡܸܛܠ ܕܢܘܼܟ݂ܪܵܝܵܐ ܐܲܢ̄ܬ̇: ܐܵܦ ܡܓܲܠܵܝܘܼ ܓܲܠܝܼܬ̇ ܡ̣ܢ ܐܲܬ̣ܪܵܟ݂. [20]ܐܸܬ̣ܡܵܠܝ ܐܸܬ̇ܝܬ̇: ܘܝܵܘܡܵܢܵܐ ܢܙܝܼܥܵܢ ܕܬܹܐܙܲܠ ܥܲܡܲܢ: ܘܐܸܢܵܐ ܐܵܙܹܠ ܐ̄ܢܵܐ ܠܟܲܪ ܕܐܵܙܹܠ ܐ̄ܢܵܐ. ܦܘܼܫ ܘܐܵܘܬܸܒ̣ ܠܐܲܚܝ̈ܟ ܫܲܦܝܼܪ. [21]ܘܲܥܢܵܐ ܐܵܬ̣ܝܼ ܘܐܸܡܲܪ ܠܡܲܠܟܵܐ: ܚܲܝ ܗ̄ܘ̣ ܡܵܪܝܵܐ ܘܚܲܝܵܐ ܗ̄ܝܼ ܢܲܦ̮ܫܵܟ݂ ܡܲܠܟܵܐ: ܐܸܠܵܐ ܒܐܲܬ̣ܪܵܐ ܕܗܵܘܹܐ ܡܵܪܝ ܡܲܠܟܵܐ: ܐܵܘ ܠܡܵܘܬܵܐ ܐܵܘ ܠܚܲܝܹ̈ܐ: ܐܸܠܵܐ ܬܲܡܵܢ ܢܸܗܘܸܐ ܥܲܒ̣ܕܵܟ݂. [22]ܘܐܸܡܲܪ ܕܵܘܝܼܕ݂ ܠܐܵܬ̣ܝܼ: ܥܒܲܪ ܙܸܠ ܠܵܟ݂. ܘܲܥܒܲܪ ܐܵܬ̣ܝܼ ܓܵܬ̣ܵܝܵܐ ܘܟ݂ܠܗܘܿܢ ܐ̄ܢܵܫܵܘ̈ܗܝ: ܘܟ݂ܠܵܗ̇ ܝܼܩܲܪܬܵܐ ܕܥܲܡܹܗ. [23]ܘܟ݂ܠܵܗ̇ ܐܲܪܥܵܐ ܒܵܟܹܝܢ ܒܟ݂ܵܬ̣ܵܐ ܪܲܒ̇ܬ̣ܵܐ: ܘܟ݂ܠܹܗ ܥܲܡܵܐ ܥܵܒ̣ܪܝܼܢ. ܘܡܲܠܟܵܐ ܥܵܒܲܪ ܒܢܲܚܠܵܐ ܕܩܸܕ݂ܪܘܿܢ: ܘܟ݂ܠܹܗ ܥܲܡܵܐ ܥܵܒ̣ܪܝܼܢ: ܥܲܠ ܐܲܦܲܝ̈ ܐܘܼܪܚܵܐ ܕܡܲܕ݂ܒ̇ܪܵܐ. [24]ܘܗܵܐ ܐܵܦ ܨܵܕ݂ܘܿܩ ܟܵܗܢܵܐ: ܘܟ݂ܠܗܘܿܢ ܠܹܘܵܝܹ̈ܐ ܕܥܲܡܹܗ: ܫܩܝܼܠܝܼܢ ܠܩܹܒ̣ܘܿܬ̣ܵܐ ܕܐܲܠܵܗܵܐ. ܘܲܣܠܸܩ ܐܲܒ̣ܝܼܬܲܪ: ܥܕܲܡܵܐ ܕܲܫܠܸܡ ܟܠܹܗܬ ܥܲܡܵܐ ܠܡܸܥܒܲܪ ܡ̣ܢ ܩܪܝܼܬ̣ܵܐ. [25]ܘܐܸܡܲܪ ܡܲܠܟܵܐ ܠܨܵܕ݂ܘܿܩ: ܐܲܗܦܸܟܹܝܗ̇ ܠܩܹܒ̣ܘܿܬܹܗ ܕܐܲܠܵܗܵܐ ܠܲܩܪܝܼܬ̣ܵܐ: ܛܵܟ݂ ܐܸܫܟܲܚ ܪ̈ܲܚܡܹܐ ܒܥܲܝ̈ܢܲܝ ܡܵܪܝܵܐ: ܘܢܲܗܦܟܲܢܝ ܘܲܢܚܵܘܹܝܢܝ ܠܵܗܚ ܘܲܠܕܲܝܪܵܗ̇. [26]ܘܐܸܢ ܗܵܟܲܢܵܐ ܢܹܐܡܲܪ: ܠܵܐ ܨܵܒܹ̇ܐ ܐ̄ܢܵܐ ܒܵܟ݂: ܗܵܐ ܩܵܐܹܡ ܐ̄ܢܵܐ: ܢܸܥܒܸ̇ܕ݂ ܠܝܼ ܐܲܝܟ݂ ܕܫܲܦܝܼܪ ܒܥܲܝܢܵܘ̈ܗܝ. [27]ܘܐܸܡܲܪ ܡܲܠܟܵܐ ܠܨܵܕ݂ܘܿܩ ܟܵܗܢܵܐ: ܗܦܘܿܟ݂ ܙܸܠ ܠܲܩܪܝܼܬ̣ܵܐ ܒܲܫܠܵܡܑܵ: ܐܲܢ̄ܬ̇ ܘܐܲܚܝܼܡܥܸܨ ܒܪܵܟ݂: ܘܢܵܬ̣ܵܢ ܒܲܪ ܐܲܒ̣ܝܬܲܪ: ܬܪ̈ܲܝܗܘܿܢ ܒܢܲܝ̈ܟ̇ܘܿܢ ܥܲܡܟ݂ܘܿܢ. [28]ܘܲܚܙܵܘ ܗܵܐ ܐܸܢܵܐ ܡܸܫܬܵܘܚܲܪ ܐ̄ܢܵܐ: ܒܲܦܩܲܥܬ̣ܵܐ ܕܡܲܕ݂ܒ̇ܪܵܐ: ܥܕܲܡܵܐ ܕܐܵܬܹܐ ܐ̄ܢܵܐ ܡ̣ܢ ܠܘܵܬ̣ܟ݂ܘܿܢ ܘܲܡܚܵܘܸܐ ܠܝܼ. [29]ܘܐܲܗܦ̄ܟ݂ܘܼܗܝ ܨܵܕ݂ܘܿܩ ܘܐܲܒ̣ܝܼܬ̇ܪ ܟܵܗܢܹ̈ܐ ܠܐܵܪܘܿܢܹܗ ܕܐܲܠܵܗܵܐ ܠܐܘܿܪܸܫܠܸܡ: ܘܝܼܬܸܒ̣ܘ ܬܲܡܵܢ. [30]ܘܕ݂ܵܘܝܼܕ݂ ܣܵܠܹܩ ܒܡܲܣܩܵܢܵܐ ܕܙܲܝ̈ܬܹܐ: ܒܵܟܹܐ ܘܣܵܠܹܩ ܘܲܡܗܲܠܸܟ݂ ܘܪܹܫܹܗ ܡܚܲܦܲܝ. ܘܟ݂ܠܹܗ ܥܲܡܵܐ ܕܥܲܡܹܗ ܡܚܲܦܹܝܢ ܪܹ̈ܫܲܝܗܘܿܢ: ܘܒ̣ܵܟܹܝܢ ܘܣܵܠܩܝܼܢ. [31]ܘܚܵܘܼܝܼܘ ܠܕ݂ܵܘܝܼܕ݂: ܘܐܸܡܲܪܘ ܠܹܗ: ܕܲܡܪܲܕ݂ ܠܹܗ ܐܲܚܝܬ̇ܘܿܦܹܝܠ ܥܲܡ ܐܲܒ̣ܫܵܠܘܿܡ: ܘܐܸܡܲܪ ܕܵܘܝܼܕ݂: ܡܵܪܝܵܐ ܢܒܲܛܠܝܼܗ̇ ܬܲܪܥܝܼܬܹܗ ܕܐܲܚܝܼܬ̇ܘܿܦܹܝܠ. [32]ܘܕܵܘܝܼܕ݂ ܡܛܵܐ ܠܕ݂ܘܼܟ̇ܬ̣ܵܐ ܚܕ݂ܵܐ ܐܲܬܲܪ ܕܣܵܓܹܕ݂ ܗ̄ܘ̣ܵܐ ܠܐܲܠܵܗܵܐ. ܘܐܸܬ̣ܵܐ ܠܘܵܬܹܗ ܚܘܿܫܝܼ ܐܵܪܟܵܝܵܐ ܨܲܪܝܵܐ ܟܘܿܬܝܼܢܹܗ: ܘܥܲܦܪܵܐ ܪܡܸܐ ܒܪܹܫܹܗ. [33]ܐܵܡܲܪ ܠܹܗ ܕܵܘܝܼܕ݂: ܐܸܢ ܥܵܒܲܪ ܐܲܢ̄ܬ̇ ܥܲܡܝ: ܗܵܘܹܐ ܐܲܢ̄ܬ̇ ܠܝܼ ܛܲܥܢܵܐ. [34]ܐܸܠܵܐ ܗܦܘܿܟ݂ ܠܲܩܪܝܼܬ̣ܵܐ: ܘܐܸܡܲܪ ܠܐܲܒ̣ܫܵܠܘܿܡ: ܥܲܒ̣ܕܵܟ݂ ܐ̄ܢܵܐ ܡܲܠܟܵܐ: ܘܥܲܒ̣ܕܹܗ ܕܐܲܒ̣ܘܼܟ݂ ܡ̣ܢ ܩܕ݂ܝܼܡ. ܘܗܵܫܵܐ ܐܸܢܵܐ ܡܲܠܟܵܐ ܒܵܥܹܐ ܐ̄ܢܵܐ ܡܸܢܵܟ݂ ܙܸܠ ܒܲܟܸܠ ܬܲܪܥܝܼܬܹܗ ܕܐܲܚܝܼܬ̇ܘܿܦܹܠ. [35]ܗܵܐ ܐܝܼܬ̣ ܬܲܡܵܢ ܠܘܵܬ̣ܵܟ݂ ܨܵܕ݂ܘܿܩ ܘܐܲܒ̣ܝܼܬܲܪ ܟܵܗܢܹ̈ܐ: ܟܠ ܡܸܠܬ̣ܵܐ ܕܫܵܡܲܥ ܐܲܢ̄ܬ̇ ܡ̣ܢ ܒܹܝܬ̣ ܡܲܠܟܵܐ: ܚܵܘܵܐ ܠܨܵܕ݂ܘܿܩ ܘܠܐܲܒ̣ܝܼܬܲܪ ܟܵܗܢܹ̈ܐ. [36]ܗܵܐ ܐܝܼܬ̣ ܬܲܡܵܢ ܬܪ̈ܲܝܗܘܿܢ ܒ̈ܢܲܝܗܘܿܢ: ܐܲܚܝܼܡܥܸܨ ܒܪܹܗ ܕܨܵܕ݂ܘܿܩ: ܘܢܵܬ̣ܵܢ ܒܲܪ ܐܲܒ̣ܝܼܬܲܪ: ܫܠܘܿܚܘ ܠܝܼ ܒܐܝܼܕܲܝ̈ܗܘܿܢ ܟܠ ܡܸܕܸܡ ܕܫܵܡܥܝܼܢ ܐܲܢ̄ܬ̇ܘܿܢ. [37]ܘܐܸܙܲܠ ܚܘܿܫܝܼ ܪܵܚܡܹܗ ܕܕ݂ܵܘܝܼܕ݂ ܠܲܩܪܝܼܬ̣ܵܐ: ܘܐܲܒ̣ܫܵܠܘܿܡ ܥܲܠ ܠܐܘܿܪܸܫܠܸܡ.
 
Top