[1]ביום ההוא יושר השיר הזה בארץ יהודה עיר עז לנו ישועה ישית חומות וחל[2]פתחו שערים ויבא גוי צדיק שמר אמנים[3]יצר סמוך תצר שלום שלום כי בך בטוח[4]בטחו ביהוה עדי עד כי ביה יהוה צור עולמים[5]כי השח ישבי מרום קריה נשגבה ישפילנה ישפילה עד ארץ יגיענה עד עפר[6]תרמסנה רגל רגלי עני פעמי דלים[7]ארח לצדיק מישרים ישר מעגל צדיק תפלס[8]אף ארח משפטיך יהוה קוינוך־לשמך ולזכרך תאות נפש[9]נפשי אויתך בלילה אף רוחי בקרבי אשחרך כי כאשר משפטיך לארץ־צדק למדו ישבי תבל[10]יחן רשע בל למד צדק בארץ נכחות יעול ובל יראה גאות יהוה[11]יהוה רמה ידך בל יחזיון יחזו ויבשו קנאת עם אף אש צריך תאכלם[12]יהוה תשפת שלום לנו כי גם כל מעשינו פעלת לנו[13]יהוה אלהינו בעלונו אדנים זולתך לבד בך נזכיר שמך[14]מתים בל יחיו־רפאים בל יקמו לכן פקדת ותשמידם ותאבד כל זכר למו[15]יספת לגוי יהוה יספת לגוי נכבדת רחקת כל קצוי ארץ[16]יהוה בצר פקדוך צקון לחש מוסרך למו[17]כמו הרה תקריב ללדת תחיל תזעק בחבליה־כן היינו מפניך יהוה[18]הרינו חלנו כמו ילדנו רוח ישועת בל נעשה ארץ ובל יפלו ישבי תבל[19]יחיו מתיך נבלתי יקומון הקיצו ורננו שכני עפר כי טל אורת טלך וארץ רפאים תפיל[20]לך עמי בא בחדריך וסגר דלתיך [Q: דלתך] בעדך חבי כמעט רגע עד יעבור [Q: יעבר] זעם[21]כי הנה יהוה יצא ממקומו לפקד עון ישב הארץ עליו וגלתה הארץ את דמיה ולא תכסה עוד על הרוגיה