➕
←
1 Chronicles
1Ch
10
→
[1]ܘܲܦܠܸܫܬܵܝܹ̈ܐ ܡܸܬ̣ܟܲܬ̇ܫܝܼܢ ܗ̄ܘ̣ܵܘ ܥܲܡ ܝܼܣܪܵܝܹܠ. ܘܲܥܪܲܩ̣ܘ ܓܲܒ̣ܪܹ̈ܐ ܕܝܼܣܪܵܝܹܠ ܡ̣ܢ ܦܠܸܫܬܵܝܹ̈ܐ. ܘܢܲܦܲܠ̣ܘ ܩܛܝܼ̈ܠܹܐ ܣܲܓ̇ܝܼ̈ܐܹܐ ܒܛܘܼܪܵܐ ܕܲܓ̣ܠܲܒ̇ܘܿܥ. [2]ܘܐܲܕ݂ܪܸܟ݂ܘ ܦܠܸܫܬܵܝܹ̈ܐ ܠܫܵܐܘܿܠ ܘܠܲܒ̣ܢܵܘ̈ܗܝ. ܘܲܚܪܲܒ̣ܘ ܦܠܸܫܬܵܝܹ̈ܐ ܠܝܘܿܢܵܬ̣ܵܢ ܘܲܠܝܲܫܘܝܼ: ܘܲܠܡܲܠܟ̇ܝܼܫܘܿܥ ܒܢܵܘ̈ܗܝ ܕܫܵܐܘܿܠ. [3]ܘܲܥܫܸܢ ܩܪܵܒ̣ܵܐ ܥܲܠ ܫܵܐܘܿܠ: ܘܐܸܫ̣ܟ̇ܚܘܼܗ̄ܝ ܐ̄ܢܵܫܵܐ ܩܲܫܵܬܹ̈ܐ ܕܐܘܼܡܵܢ̈ܝܼܢ ܛܵܒ̣ ܠܡܸܫܕܵܐ ܒܩܸܫܬܵܐ. ܘܟܲܕ݂ ܚ̣ܙܵܐ ܫܵܐܘܿܠ: ܕܚܸܠ̣ ܛܵܒ̣ ܡ̣ܢ ܩܕ݂ܵܡܲܝ̈ܗܘܿܢ. [4]ܘܐܸܡܲܪ ܫܵܐܘܿܠ ܠܫܵܩܹ̇ܠ ܡܵܐܢܵܘ̈ܗܝ: ܫܡܘܿܛ ܚܲܪܒܵܟ݂ ܘܲܕ݂ܩܘܿܪܲܝܢܝ ܒܵܗ̇:ܥܲܕ݂ܠܵܐ ܢܹܐܬ̣ܘܿܢ ܥܘܼܪ̈ܠܵܐ ܗܵܠܹܝܢ: ܘܢܸܩܛܠܘܼܢܵܢܝ: ܘܢܸܫܬܲܢܕ݂ܘܼܢ ܒܝܼ. ܘܠܵܐ ܨܒ̣ܵܐ ܫܵܩܹ̇ܠ ܡܵܐܢܵܘ̈ܗܝ: ܡܸܛܠ ܕܲܕ݂ܚܸܠ ܛܵܒ̣. ܘܲܫܡܲܛ ܫܵܐܘܿܠ ܣܲܝܦܹܗ: ܘܲܢܦܲܠ̣ ܥܠܵܘܗܝ. [5]ܘܲܚܙ̣ܵܐ ܫܵܩܹ̇ܠ ܡܵܐܢܵܘܗܝ ܕܡ̣ܝܼܬ̣ ܠܹܗ ܫܵܐܘܿܠ: ܘܲܢܦܲܠ̣ ܐܵܦ ܗ̤ܘ ܥܲܠ ܣܲܝܦܹܗ: ܘܡ̣ܝܼܬ̣ ܥܲܡܹܗ. [6]ܘܡ̣ܝܼܬ̣ ܫܵܐܘܿܠ: ܘܲܬ̣ܠܵܬ̣ܵܐ ܒܢܵܘ̈ܗܝ: ܘܫܵܩܹ̇ܠ ܡܵܐܢܵܘ̈ܗܝ. ܘܟ݂ܠ ܓܲܢ̄ܒܵܪ̈ܵܘܗܝ ܡܝܼܬ̣ܘ ܒܝܵܘܡܵܐ ܗܵܘ̇ ܐܲܟ݂ܚ̄ܕ݂ܵܐ. [7]ܘܲܚܙ̣ܵܘ ܟܠ ܐ̄ܢܵܫܵܐ ܕܝܼܣܪܵܝܹܠ ܕܐܝܼܬ̣ ܒܥܸܒ̣ܪܵܐ ܕܒܲܦܩܲܥܬ̣ܵܐ: ܘܕ݂ܐܝܼܬ̣ ܒܥܸܒ̣ܪܵܐ ܕܝܘܿܪܕܢܵܢ: ܕܲܥܪܲܩ̣ ܠܹܗ ܥܲܡܵܐ ܕܝܼܣܪܵܝܹܠ: ܘܕܸܐܬ̣ܩܛܸܠ ܫܵܐܘܿܠ ܘܲܒ̣ܢܵܘ̈ܗܝ ܘܲܫܒܲܩܘ ܩܘܼܪ̈ܝܵܐ: ܘܲܥܪܲܩ̣ܘ ܘܐܸܬ̣ܵܘ ܦܠܸܫܬܵܝܹ̈ܐ: ܘܲܥܡܲܪܘ ܒܗܹܝܢ. [8]ܘܲܗܘ̤ܵܐ ܡ̣ܢ ܒܵܬܲܪ ܝܵܘܡܵܐ: ܘܐܸܬ̣ܵܘ ܦܠܸܫܬܵܝܹ̈ܐ ܠܲܡܚܲܠܵܨܘܼ ܩܛܝܼ̈ܠܹܐ. ܘܐܸܫܟܲܚܘ ܠܫܵܐܘܿܠ ܘܠܲܬ̣ܠܵܬ̣ܵܐ ܒܢܵܘ̈ܗܝ ܩܛܝܼܠܝܼܢ: ܘܲܪܡܹܝܢ ܒܛܘܼܪܵܐ ܕܲܓ̣ܠܲܒ̇ܘܿܥ. [9]ܘܲܫܩܲܠܘ ܪܹ̈ܫܲܝܗܘܿܢ: ܘܫܲܠܲܚ̣ܘ ܡܵܐܢܲܝ̈ܗܘܿܢ: ܘܫܲܕܲܪܘ ܠܐܲܪܥܵܐ ܕܲܦܠܸܫܬܵܝܹ̈ܐ: ܠܩܘܼܪ̈ܝܵܐ ܘܠܲܡܕ݂ܝܼ̈ܢܵܬ̣ܵܐ ܘܲܠܟܲܪ̈ܟܹܐ: ܠܲܡܣܲܒܵܪܘܼ ܒܹܝܬ̣ ܦܬܲܟ݂ܪ̈ܲܝܗܘܿܢ: ܘܲܠܥܲܡܗܘܿܢ. [10]ܘܣܵܡ̣ܘ ܡܵܐܢܲܝ̈ܗܘܿܢ ܘܙܲܝܢܗܘܿܢ ܒܹܝܬ̣ ܦܬܲܟ݂ܪ̈ܲܝܗܘܿܢ ܘܦܲܓ̣ܪ̈ܲܝܗܘܿܢ ܬܠܵܘ ܒܫܘܼܪܵܐ ܕܒܹܝܬ̣ ܝܵܫܵܢ. [11]ܘܲܫܡܲܥܘ ܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕ݂: ܡܸܕܸ̇ܡ ܕܲܥܒܲܕ݂ܘ ܦܠܸܫܬܵܝܹ̈ܐ ܠܫܵܐܘܿܠ. [12]ܘܩܵܡ̣ܘ ܟܠ ܓܒܲܪ ܡܵܪܹܐ ܚܲܝܠܵܐ. ܘܐܸܙܲܠ̣ܘ ܟܠܹܗ ܠܸܠܝܵܐ: ܘܲܢܣܲܒ̣ܘ ܦܲܓ̣ܪܹܗ ܕܫܵܐܘܿܠ ܘܦܲܓ̣ܪܹ̈ܐ ܕܲܒ̣ܢܵܘ̈ܗܝ ܡ̣ܢ ܫܘܼܪܵܐ ܕܒܹܝܬ̣ ܝܵܫܵܢ: ܘܐܲܝܬ̇ܝܼܘ ܠܝܵܒ̣ܝܼܫ: ܘܐܵܘܩܸܕ݂ܘ ܐܸܢܘܿܢ ܬܲܡܵܢ. ܘܲܢܣܲܒ̣ܘ ܓܲܪ̈ܡܲܝܗܘܿܢ: ܛܡܲܪܘ ܬܚܹܝܬ̣ ܒܸܛܡ̱ܬ̣ܵܐ ܕܲܒ̣ܝܵܒ̣ܝܼܫ ܘܨܵܡ̣ܘ ܫܲܒ̣ܥܵܐ ܝܵܘ̈ܡܝܼܢ. [13]ܘܡ̣ܝܼܬ̣ ܫܵܐܘܿܠ: ܥܲܠ ܕܟܲܕܸ̇ܒ̣ ܟܲܕܵܒ̣ܘܼܬ̣ܵܐ ܒܡܵܪܝܵܐ: ܘܡܸܕܸ̇ܡ ܕܦܲܩܕܹܗ ܠܵܐ ܢܛܲܪ. [14]ܘܐܵܦ ܫܐܸܠ ܒܙܲܟ̇ܘܼܪܹ̈ܐ: ܘܲܒ̣ܡܵܪܝܵܐ ܐܲܠܵܗܹܗ ܠܵܐ ܫܐܸܠ ܘܐܸܬ̣ܝܲܗ̄ܒܲܬ̤ ܡܲܠܟ̇ܘܼܬܹܗ ܠܕ݂ܵܘܝܼܕ݂ ܒܲܪ ܐܝܼܫܲܝ.
 
Top