➕
←
1 Chronicles
1Ch
28
→
[1]ܘܟܲܢܸܫ ܕܵܘܝܼܕ݂ ܟܠܗܘܿܢ ܪܵܘ̱ܪ̈ܒ̣ܵܢܹܐ ܕܝܼܣܪܵܝܹܠ: ܘܪܵܘ̱ܪ̈ܒ̣ܵܢܹܐ ܕܫܲܒ̣̈ܛܹܐ: ܘܪܵܘ̱ܪ̈ܒ̣ܵܢܹܐ ܕܦܵܠܓ̇ܘܵܬ̣ܵܐ ܕܲܡܫܲܡܫܝܼܢ ܠܡܲܠܟܵܐ: ܘܪܵܘ̱ܪ̈ܒ̣ܵܢܹܐ ܕܐܲܠܦܹ̈ܐ: ܕܡܲܐ̈ܘܵܬ̣ܵܐ ܘܕܲܡܫܲܠܛܝܼܢ ܥܲܠ ܩܸܢܝܵܢܵܐ ܘܥܲܠ ܚܲܝ̈ܘܵܬ̣ܵܐ ܕܡܲܠܟܵܐ ܘܕܲܒ̣ܢܵܘ̈ܗܝ ܡܗܲܝܡ̈ܢܹܐ: ܘܓܲܢ̄ܒܵܪ̈ܲܝ ܚܲܝܠܵܐ. ܘܐܸܬ̣ܵܘ ܟܠܗܘܿܢ ܠܐܘܿܪܸܫܠܸܡ. [2]ܘܐܸܡܲܪ ܠܗܘܿܢ: ܫܘܼܡܥܘܼܢܝ ܐܲܚܲܝ̈ ܘܥܲܡܝ: ܐܸܢܵܐ ܕܹܝܢ ܒܠܹܒ̇ܝ ܗܘ̤ܵܐ ܗ̄ܘ̣ܵܐ ܠܡܸܒ̣ܢܵܐ ܒܲܝܬܵܐ ܕܲܢܝܵܚܵܐ: ܠܩܹܒ̣ܘܿܬ̣ܵܐ ܕܲܕ݂ܝܵܬܹܩܵܐ ܕܡܵܪܝܵܐ: ܘܠܲܐܬ̣ܪܵܐ ܕܲܫܟ݂ܝܼܢܬܹ̇ܗ ܕܐܲܠܵܗܲܢ. ܘܟ݂ܠ ܡܸܕܸ̇ܡ ܛܲܝܒܹ̇ܬ̣ ܗ̄ܘܹ̇ܝܬ̣ ܠܡܸܒ̣ܢܵܐ ܒܲܝܬܵܐ. [3]ܘܡܵܪܝܵܐ ܐܸܡܲܪ ܠܝܼ: ܕܠܵܐ ܬܸܒ̣ܢܸܐ ܒܲܝܬܵܐ ܠܫܹܡܝ. ܡܸܛܠ ܕܓܲܒ̣ܪܵܐ ܐܲܢ̄ܬ̇ ܩܪܲܒ̣ܬ̣ܵܢܵܐ. ܘܡܸܛܠ ܕܓܲܒ̣ܪܵܐ ܐܲܢ̄ܬ̇: ܕܲܕ݂ܡܵܐ ܣܲܓܝܼܵܐܐ ܐܸܫܲܕ̇ܬ̇. [4]ܘܲܓ̣ܒ̣ܵܢܝ ܠܝܼ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡ̣ܢ ܟܠܹܗ ܒܹܝܬ̣ ܐܵܒ̣ܝ: ܕܐܸܗܘܹܐ ܡܲܠܟܵܐ ܥܲܠ ܝܼܣܪܵܝܹܠ ܠܥܵܠܲܡ. ܡܸܛܠ ܕܡ̣ܢ ܒܹܝܬ̣ ܝܼܗܘܼܕ݂ܵܐ ܓܒ̣ܵܐ ܠܹܗ ܡܲܠܟܵܐ. ܘܡ̣ܢ ܫܲܪܒ̇ܬ̣ܵܐ ܕܒܹܝܬ̣ ܝܼܗܘܼܕ݂ܵܐ ܓܒ̣ܵܐ ܠܹܗ ܒܹܝܬ̣ ܐܵܒ̣ܝ. ܘܡ̣ܢ ܒܹܝܬ̣ ܐܵܒ̣ܝ ܠܝܼ ܓܒ̣ܵܐ ܕܐܸܗܘܹܐ ܡܲܠܟܵܐ ܥܲܠ ܝܼܣܪܵܝܹܠ. [5]ܘܡ̣ܢ ܟܠܗܘܿܢ ܒܢܲܝ̈: ܕܣܲܓ̇ܝܼܐܝܼܢ ܒ̈ܢܲܝܵܐ ܕܝܲܗ̄ܒ̣ܠܝܼ ܡܵܪܝܵܐ: ܓܒ̣ܵܐ ܠܲܫܠܹܝܡܘܿܢ ܒܹܪܝ:ܠܡܸܬܲܒ̣ ܥܲܠ ܟܘܼܪܣܝܵܐ ܕܡܲܠܟ̇ܘܼܬ̣ܵܐ: ܪܵܡܬ̣ܵܐ ܕܝܼܣܪܵܝܹܠ. [6]ܘܐܸܡܲܪ ܠܝܼ:ܕܲܫܠܹܝܡܘܿܢ ܒܪܵܟ݂: ܗ̤ܘ ܢܸܒ̣ܢܸܐ ܒܲܝܬ̇ܝ ܘܕ݂ܵܪ̈ܵܬ̣ܝ: ܡܸܛܠ ܕܠܹܗ ܓܒܹܝܬ̣ ܕܢܸܗܘܹܐ ܠܝܼ ܒܪܵܐ:ܘܐܸܢܵܐ ܐܸܗܘܹܐ ܠܹܗ ܐܲܒ̣ܵܐ. [7]ܘܐܲܬ̣ܩܸܢ ܟܘܼܪܣܝܵܐ ܕܡܲܠܟ̇ܘܼܬܹܗ ܠܥܵܠܲܡ. ܘܐܸܢܗ̤ܘ ܕܠܵܐ ܢܸܨܒܸ̇ܐ ܠܡܸܥܒܲܕ݂ ܦܘܼܩ̈ܕܵܢܲܝ ܘܕ݂ܝܼܢܲܝ̈ ܐܲܝܟ݂ ܕܝܵܘܡܵܢܵܐ: ܐܸܦܩܘܿܕ݂ ܒܫܲܒ̣ܛܵܐ ܥܵܘܼܠܹܗ. [8]ܘܐܵܦ ܗܵܫܵܐ ܠܥܹܝܢ ܟܠܹܗ ܝܼܣܪܵܝܹܠ ܥܲܡܵܐ ܕܡܵܪܝܵܐ: ܘܲܩܕ݂ܵܡ ܡܵܪܝܵܐ ܐܲܠܵܗܲܢ: ܛܲܪܘ ܘܲܬ̣ܒܲܥܘ ܦܘܼܩܕܵܢܵܘ̈ܗܝ ܘܐܲܢ̄ܬ̇ܘܿܢ ܬܹܐܪܬ̇ܘܼܢ ܐܲܪܥܵܐ ܗܵܕܹܐ ܠܥܵܠܲܡ ܥܵܠܡܝܼܢ. ܘܬ̣ܵܘܪܬ̣ܘܼܢ ܠܲܒ̣ܢܲܝ̈ܟ̇ܘܿܢ ܠܥܵܠܲܡ ܥܵܠܡܝܼܢ: ܘܠܵܐ ܬܸܬ̣ܚܲܒܲܠ. [9]ܘܐܲܢ̄ܬ̇ ܫܠܹܝܡܘܿܢ ܒܹܪܝ:ܕܲܥ ܟܠܡܵܐ ܕܦܲܩ̣ܕܲܢ ܡܵܪܝܵܐ ܐܲܠܵܗܵܐ. ܘܲܦܠܘܿܚܲܝܗܝ ܒܠܸܒܵܐ ܫܲܠܡܵܐ: ܘܲܒ̣ܨܸܒ̣ܝܵܢܵܐ ܕܢܲܦ̮ܫܵܟ݂: ܕܠܵܐ ܡ̣ܢ ܐܘܼܠܨܵܢ ܡܸܛܠ ܕܟ݂ܠ ܕܐܝܼܬ̣ ܒܠܸܒܵܐ: ܝܵܕܲܥ ܡܵܪܝܵܐ. ܘܟ݂ܠ ܕܡܸܬ̣ܪܲܥܹܝܢ ܒܢܲܝ̈ܢܵܫܵܐ ܒܪܸ̈ܥܝܵܢܲܝܗܘܿܢ: ܡܸܣܬܲܟܲܠ ܐܸܢ ܬܸܒ̣ܥܹܝܘܗܝ: ܢܸܫܬ̇ܟܲܚ ܠܵܟ݂. ܘܐܸܢ ܬܸܫܒ̇ܩܝܼܘܗܝ: ܢܵܘܒ̇ܕ݂ܵܟ݂. [10]ܕܲܥ ܘܲܚܙܝܼ ܕܡܵܪܝܵܐ ܓܒ̣ܵܟ݂: ܠܡܸܒ̣ܢܵܐ ܒܲܝܬܵܐ ܠܲܫܡܵܐ ܕܩܘܼܕ݂ܫܹܗ ܕܡܵܪܝܵܐ. ܐܸܬ̣ܥܲܫܲܢ ܘܐܸܬ̣ܓܲܢ̄ܒܲܪ ܘܲܥܒܸܕ݂. [11]ܘܝܲܗ̄ܒ̣ ܕܵܘܝܼܕ݂ ܠܲܫܠܹܝܡܘܿܢ ܒܪܹܗ:ܕܡܘܼܬ̣ܵܐ ܕܲܦܪ̈ܘܼܣܬ̇ܕܹܐ: ܘܲܡܫܘܼܚܬ̣ܵܐ ܕܒܲܝܬܵܐ: ܘܕܲܟ݂ܣܘܼܣܛܪܘܿܢ: ܘܲܕ݂ܥܸܠ̈ܝܵܬ̣ܵܐ: ܘܕܸܐܣܛܘܹ̈ܐ ܓܵܘܵܝܹ̈ܐ: ܘܕܸܐܣܛܘܹ̈ܐ ܒܲܪ̈ܵܝܹܐ: ܘܲܕ݂ܥܸܠܵܝܹ̈ܐ ܘܲܕ̇ܬܲܚ̈ܬܵܝܹܐ. [12]ܘܲܕ݂ܒܹܝܬ̣ ܓܲܙܵܐ: ܘܲܕ݂ܒܹܝܬ̣ ܬܸܫܡܸܫܬܵܐ ܕܒܲܝܬܹ̇ܗ ܕܡܵܪܝܵܐ: ܘܲܕ݂ܒܹܝܬ̣ ܛܲܒܵܚܹ̈ܐ: ܘܲܕ݂ܒܹܝܬ̣ ܫܵܩ̈ܘܵܬ̣ܵܐ: ܘܲܕ݂ܒܹܝܬ̣ ܫܪ̈ܲܓ̣ܬ̣ܵܢܹܐ. [15]ܘܕ݂ܘܼܟ̇ܬ̣ܵܐ ܕܣܵܝܡܝܼܢ ܒܵܗ̇ ܡܢܵܪ̈ܵܬ̣ܵܐ ܕܕܲܗܒ̣ܵܐ: ܘܲܫܪ̈ܵܓܲܝܗܹܝܢ ܕܕܲܗܒ̣ܵܐ: ܘܒ̣ܘܿܨܝܼܢܲܝ̈ܗܹܝܢ: ܘܨܸܒ̣ܬ̇ܗܹܝܢ: ܘܡܵܐܢܲܝ̈ܗܹܝܢ ܕܡܸܫܚܵܐ ܟܠ ܡܸܕܸ̇ܡ ܟܬܲܒ̣ ܕܵܘܝܼܕ݂: ܘܝܲܗ̄ܒ̣ ܠܲܫܠܹܝܡܘܿܢ ܒܪܹܗ. [16]ܦܵܬ̣ܘܿܪܹ̈ܐ ܕܣܹܐܡܵܐ: ܘܦܵܬ̣ܘܿܪܹ̈ܐ ܕܕܲܗܒ̣ܵܐ: ܠܲܓܹ̇ـ̈ـܐ ܕܣܹܐܡܵܐ. ܘܠܲܓܹ̇ܐ ܕܕܲܗܒ̣ܵܐ. [17]ܐܲܪ̈ܬ̇ܠܵܝܹܐ: ܘܡܲܫ̈ܠܵܘܵܬ̣ܵܐ: ܘܫܵܚ̈ܠܹܐ ܕܣܹܐܡܵܐ. ܠܵܐ ܗܘ̤ܵܐ ܡܸܢܝܵܢܵܐ ܠܡܲܬ̣ܩܵܠܹܗ ܕܕܲܗܒ̣ܗܘܿܢ ܕܡܵܐܢܹ̈ܐ ܗܵܠܹܝܢ. [20]ܘܐܸܡܲܪ ܕܵܘܝܼܕ݂ ܠܲܫܠܹܝܡܘܿܢ ܒܪܹܗ:ܥܫܲܢ: ܘܐܸܬ̣ܓܲܢ̄ܒܲܪ: ܘܲܥܒܸܕ݂ ܘܠܵܐ ܬܸܕ݂ܚܲܠ: ܘܠܵܐ ܬܙܘܼܥ ܡܸܛܠ ܕܡܵܪܹܐ ܡܵܪ̈ܵܘܵܬ̣ܵܐ ܥܲܡܵܟ݂: ܠܵܐ ܢܲܪܦܹܝܟ݂ ܘܠܵܐ ܢܸܫܒ̇ܩܵܟ݂: ܥܕܲܡܵܐ ܠܐܲܝܟܵܐ ܕܲܬ̣ܓܲܡܲܪ ܠܡܸܒ̣ܢܵܐ ܟܠܗܹܝܢ ܥܒ̣ܝܼ̈ܕ݂ܵܬ̣ܵܐ ܕܒܲܝܬܹ̇ܗ ܕܡܵܪܝܵܐ. [21]ܘܗܵܐ ܦܵܠܓ̇ـ̈ـܘܵܬ̣ܵܐ ܕܟ݂ܵܗܢܹ̈ܐ ܘܲܕ݂ܠܹܘܵܝܹ̈ܐ: ܐܲܫ̱ܠܛܹܬ̣ ܐܸܢܘܿܢ ܥܲܠ ܟܠܗܹܝܢ ܥܒ̣̈ܝܼܕ݂ܵܬ̣ܵܐ ܕܒܲܝܬܹ̇ܗ ܕܡܵܪܝܵܐ: ܘܥܲܡܵܟ݂ ܐܸܢܘܿܢ. ܘܗܸܢܘܿܢ ܡܫܲܠܛܝܼܢ ܥܲܠ ܟܠܗܹܝܢ ܥܒ̣ܝܼ̈ܕ݂ܵܬ̣ܵܐ ܘܗܸܢܘܿܢ ܥܵܒ̣ܕ̇ܝܼܢ ܠܗܹܝܢ ܒܚܲܟ̇ܝܼܡܘܼܬ̣ܵܐ: ܟܠ ܥܒ̣ܝܼ̈ܕ݂ܵܬ̣ܵܐ ܕܡܸܬ̣ܒܲܥ̈ܝܵܢ ܠܲܥܒ̣ܝܼܕ݂ܵܬ̣ܵܐ ܕܒܲܝܬܹ̇ܗ ܕܡܵܪܝܵܐ. ܘܗܵܐ ܐܲܩܝܼܡܹ̇ܬ̣ ܥܠܲܝܗܹܝܢ ܫܲܠܝܼܛܵܢܹ̈ܐ ܘܪܵܘ̱ܪ̈ܒ̣ܵܢܹܐ. ܕܗܸܢܘܿܢ ܢܸܬ̣ܒ̇ܥܘܿܢ ܘܢܸܥܒ̇ܕ݂ܘܼܢ: ܟܠ ܥܒ̣̈ܝܼܕ݂ܵܬ̣ܵܐ ܕܡܸܬ̣ܒܲܥ̈ܝܵܢ.
 
Top