➖ »
«
➖ ➕
Peshitta OT
PesOT
The Second Book of Clement
2Clem
←
1 Kings
1Kg
14
→
[1]ܒܹܗ ܒܙܲܒ̣ܢܵܐ ܗܵܘ̇: ܐܸܬ̣ܟ̇ܪܲܗ ܐܲܒ̣ܝܼܵܐ ܒܪܹܗ ܕܝܘܿܪܲܒ̣ܥܲܡ. [No book]
[2]ܘܐܸܡܲܪ ܝܘܿܪܲܒ̣ܥܲܡ ܠܐܲܢ̄ܬ̇ܬܹܗ: ܩܘܼܡܝ ܐܸܫܬܲܓ̣ܢܵܝ. ܘܠܵܐ ܢܸܕ̇ܥܘܼܢ ܕܐܲܢ̄ܬ̇ܝ ܗ̄ܝ̣ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ ܘܙܸܠܝ ܠܹܟ݂ܝ ܠܫܝܼܠܘܿ ܗܵܐ ܐܝܼܬ̣ ܬܲܡܵܢ ܐܲܚܝܼܵܐ ܢܒ̣ܝܼܵܐ: ܕܗ̤ܘ ܐܸܡܲܪ ܠܝܼ ܕܐܲܡ̣ܠܸܟ݂ ܥܲܠ ܥܲܡܵܐ ܗܵܢܵܐ. [No book]
[3]ܘܣܲܒ̣ܝ ܒܐܝܼܕܲܝ̈ܟ̇ܝ ܥܣܲܪ ܕܠܲܚܡܵܐ: ܘܲܟ݂ܣܵܢܹ̈ܐ: ܘܒܲܓ̣ܒ̇ܘܼܓ̣ܵܐ ܕܕܸܒ̣ܫܵܐ. ܘܙܸܠܝ ܠܘܵܬܹܗ: ܘܗ̤ܘ ܡܚܵܘܹܐ ܠܹܟ݂ܝ ܡܵܢܵܐ ܗܵܘܹ̇ܐ ܠܹܗ ܠܛܲܠܝܵܐ. [No book]
[4]ܘܥܸܒ̣ܕܲܬ̤ ܗܵܟܲܢܵܐ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ. ܘܩܵܡܲܬ̤ ܘܐܸܙܲܠ̄ܬ̤ ܠܫܝܼܠܘܿ: ܘܥܸܠܲܬ̤ ܠܒܹܝܬ̣ ܐܲܚܝܼܵܐ: ܘܐܲܚܝܼܵܐ ܠܵܐ ܡܸܫܟܲܚ ܗ̄ܘ̣ܵܐ ܕܢܸܚܙܹܐ ܡܸܕܸ̇ܡ: ܡܸܛܠ ܕܝܼܩܲܪ ܥܲܝܢܵܘ̈ܗܝ ܡ̣ܢ ܣܲܝܒ̇ܘܼܬܹܗ. [No book]
[5]ܘܡܵܪܝܵܐ ܐܸܡܲܪ ܠܐܲܚܝܼܵܐ: ܗܵܐ ܐܸܢ̄ܬܲܬܹܗ ܕܝܘܿܪܲܒ̣ܥܲܡ ܐܵܬܝܵܐ ܠܘܵܬ̣ܵܟ݂: ܠܡܸܫܐܲܠ ܡܸܢܵܟ݂ ܡܸܠܬ̣ܵܐ ܥܲܠ ܒܪܵܗ̇ ܕܲܟ݂ܪܝܼܗ: ܗܵܟܲܢܵܐ ܘܗܵܟܲܢܵܐ ܐܸܡܲܪ ܠܵܗ̇. ܡܵܐ ܕܥܵܐܠܵܐ: ܗܵܐ ܡܸܫܬܲܓ̣ܢ̱ܝܵܐ. [No book]
[6]ܘܟܲܕ݂ ܫ̣ܡܲܥ ܐܲܚܝܼܵܐ ܩܵܠ ܪܸ̈ܓ̣ܠܹܝܗ̇ ܕܥܵܐܠܵܐ ܒܬܲܪܥܵܐ: ܐܸܡܲܪ ܠܵܗ̇: ܥܘܿܠܝ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ: ܠܡܵܢܵܐ ܡܸܫܬܲܓ̣ܢ̱ܝܵܐ ܐܲܢ̄ܬ̇ܝ. ܘܐܸܢܵܐ ܫܠܝܼܚ ܐ̄ܢܵܐ ܥܠܲܝܟ̇ܝ ܩܲܫ̈ܝܵܬ̣ܵܐ. [No book]
[7]ܙܸܠܝ ܐܸܡܲܪܝ ܠܝܘܿܪܲܒ̣ܥܲܡ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܸܢܵܐ ܐܲܪܝܼܡܬܵܟ݂ ܡ̣ܢ ܥܲܡܵܐ: ܘܲܥܒܲܕ̇ܬܵܟ݂ ܡܕ݂ܒ̇ܪܵܢܵܐ ܥܲܠ ܥܲܡܝ ܝܼܣܪܵܝܹܠ. [No book]
[8]ܘܲܨܪܹܝܬ̣ ܡܲܠܟ̇ܘܼܬ̣ܵܐ ܡ̣ܢ ܕܒܹܝܬ̣ ܕܵܘܝܼܕ݂: ܘܝܲܗ̄ܒ̣ܬܵܗ̇ ܠܵܟ݂. ܘܠܵܐ ܗ̤ܘܲܝܬ̇ ܐܲܝܟ݂ ܕܵܘܝܼܕ݂ ܥܲܒ̣ܕ̇ܝ: ܕܲܢܛܲܪ ܦܘܼܩ̈ܕܵܢܲܝ: ܘܗܲܠܸܟ݂ ܒܵܬܲܪܝ ܒܟ݂ܠܹܗ ܠܸܒܹ̇ܗ: ܠܡܸܥܒܲܕ݂ ܕܫܲܦܝܼܪ ܩܕ݂ܵܡܲܝ. [No book]
[9]ܘܐܲܢ̄ܬ̇ ܐܲܒ̣ܐܸܫܬ̇ ܠܡܸܥܒܲܕ݂ ܡ̣ܢ ܟܠ ܕܲܗܘ̤ܵܘ ܩܕ݂ܵܡܲܝܟ. ܘܐܸܙܲܠܬ̇ ܘܲܥܒܲܕ̇ܬ̇ ܠܵܟ݂ ܐܲܠܵܗܹ̈ܐ ܢܣܝܼܟܹ̈ܐ ܠܡܲܪܓܵܙܘܼܬܲܢܝ: ܘܠܝܼ ܫܕܲܝܬ̇ ܠܒܸܣܬܲܪ ܓܘܼܫܡܵܟ݂. [No book]
[10]ܡܸܛܠ ܗܵܢܵܐ ܗܵܐ ܡܲܝܬܹ̇ܐ ܐ̄ܢܵܐ ܒܝܼܫܬܵܐ ܥܲܠ ܒܹܝܬ̣ ܝܘܿܪܲܒ̣ܥܲܡ. ܘܐܵܘܒܸ̇ܕ݂ ܠܝܘܿܪܲܒ̣ܥܲܡ ܟܠ ܕܬ̣ܵܐܹ̇ܢ ܒܐܸܣܬ̣ܵܐ: ܘܕ݂ܵܐܣܲܪ ܘܫܵܪܹܐ ܒܝܼܣܪܵܝܹܠ ܘܐܹܒܲܥܲܪ ܒܵܬܲܪ ܒܹܝܬ̣ ܝܘܿܪܲܒ̣ܥܲܡ: ܐܲܝܟ݂ ܕܡܸܬ̣ܒܲܥܪ̈ܵܢ ܓܘܼ̈ܦܢܲܝ ܟܲܪܡܵܐ ܡܵܐ ܕܲܓ̣ܡܲܪ ܩܛܵܦܵܐ. [No book]
[11]ܕܲܢܡܘܼܬ̣ ܠܝܘܿܪܲܒ̣ܥܲܡ ܒܲܩܪܝܼܬ̣ܵܐ: ܢܹܐܟ݂ܠܘܼܢ ܟܲܠ̈ܒܹ̇ܐ ܘܕܲܢܡܘܼܬ̣ ܠܹܗ ܒܕܲܒ̣ܪܵܐ: ܬܹܐܟ݂ܘܿܠ ܦܵܪܲܚܬ̣ܵܐ ܕܲܫܡܲܝܵܐ: ܡܸܛܠ ܕܡܵܪܝܵܐ ܡܲܠܸܠ̣. [No book]
[12]ܘܐܲܢ̄ܬ̇ܝ ܩܘܼܡܝ ܘܙܸܠܝ ܠܒܲܝܬܹ̇ܟ݂ܝ. ܘܡܵܐ ܕܥܲܠ̣ ܪܸ̈ܓ̣ܠܲܝܟ̇ܝ ܠܲܩܪܝܼܬ̣ܵܐ: ܢܡܘܼܬ̣ ܛܲܠܝܵܐ. [No book]
[13]ܘܢܲܪܩܕ݂ܘܼܢ ܥܠܵܘܗܝ ܟܠܹܗ ܝܼܣܪܵܝܹܠ: ܘܢܸܩܒ̇ܪܘܼܢܹܗ. ܡܸܛܠ ܒܲܠܚܘܿܕ݂ܵܘܗܝ ܢܸܥܘܿܠ ܠܝܘܿܪܲܒ̣ܥܲܡ ܠܩܲܒ̣ܪܵܐ: ܚܠܵܦ ܕܐܸܫܬ̇ܟܲܚ ܒܹܗ ܦܸܬ̣ܓ̣ܵܡܵܐ ܛܵܒ̣ܵܐ: ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܒܒܲܝܬܹ̇ܗ ܕܝܘܿܪܲܒ̣ܥܲܡ. [No book]
[14]ܘܲܢܩܝܼܡ ܠܹܗ ܡܵܪܝܵܐ ܡܲܠܟܵܐ ܥܲܠ ܝܼܣܪܵܝܹܠ: ܘܢܵܘܒܸ̇ܕ݂ ܠܲܕ݂ܒܹܝܬ̣ ܝܘܿܪܲܒ̣ܥܲܡ ܡ̣ܢ ܝܵܘܡܵܢܵܐ. ܘܡܵܢܵܐ ܡܸܟܹ̇ܝܠ. [No book]
[15]ܘܢܸܡܚܸܐ ܡܵܪܝܵܐ ܠܝܼܣܪܵܝܹܠ: ܐܲܝܟ݂ ܕܢܵܐܹ̇ܕ݂ ܩܲܢܝܵܐ ܒܪܘܼܚܵܐ: ܘܢܸܥܩ̄ܪܝܼܘܗܝ ܠܝܼܣܪܵܝܹܠ ܡ̣ܢ ܐܲܪܥܵܐ ܛܵܒ̣ܬ̣ܵܐ: ܕܝܲܗ̄ܒ̣ ܠܐܲܒ̣ܵܗܲܝ̈ܗܘܿܢ: ܘܢܸܕ݂ܪܸܐ ܐܸܢܘܿܢ ܒܵܥܒ̣ܵܪ ܢܲܗܪܵܐ: ܚܠܵܦ ܕܲܥܒܲܕ݂ܘ ܠܗܘܿܢ ܕܸܚ̈ܠܵܬ̣ܵܐ: ܘܡܲܪܓ̇ܙܝܼܢ ܠܡܵܪܝܵܐ. [No book]
[16]ܘܢܲܫ̱ܠܡܝܼܘܗܝ ܠܝܼܣܪܵܝܹܠ: ܡܸܛܠ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܕܲܚܛܵܐ ܘܐܲܚܛܝܼ ܠܝܼܣܪܵܝܹܠ. [No book]
[17]ܘܩܵܡܲܬ̤ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ: ܘܐܸܙܲܠ̄ܬ̇ ܘܥܸܠܲܬ̤ ܠܬܲܪܨܵܐ. ܗ̤ܝ ܥܵܐܠܵܐ ܒܬܲܪܥܵܐ ܕܒܲܝܬܵܗ̇: ܘܛܲܠܝܵܐ ܡܝܼܬ̣. [No book]
[18]ܘܐܲܪܩܸܕ݂ܘ ܥܠܵܘܗܝ ܟܠܹܗ ܝܼܣܪܵܝܹܠ: ܘܩܲܒ̣ܪܘܼܗܝ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܡܲܠܸܠ̣ ܒܐܝܼܕ݂ܵܐ ܕܥܲܒ̣ܕܹ̇ܗ ܐܲܚܝܼܵܐ ܢܒ̣ܝܼܵܐ ܫܝܼܠܘܿܢܵܝܵܐ. [No book]
[19]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܪܲܒ̣ܥܲܡ ܘܕܸܐܬ̣ܟܲܬܲܫ ܘܕܲܐܡܠܸܟ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. [No book]
[20]ܘܝܵܘ̈ܡܵܬ̣ܵܐ ܕܐܲܡܠܸܟ݂ ܝܘܿܪܲܒ̣ܥܲܡ ܥܲܠ ܝܼܣܪܵܝܹܠ: ܥܸܣܪܝܼܢ ܘܬܲܪܬܹ̇ܝܢ ܫܢ̈ܝܼܢ ܘܲܫܟܸܒ̣ ܝܘܿܪܲܒ̣ܥܲܡ ܥܲܡ ܐܲܒ̣ܵܗܵܘ̈ܗܝ: ܘܐܲܡ̣ܠܸܟ݂ ܢܵܕ݂ܵܒ̣ ܒܪܹܗ ܒܵܬ̣ܪܹܗ. [No book]
[21]ܘܲܪܚܸܒ̣ܥܲܡ ܒܲܪ ܫܠܹܝܡܘܿܢ ܐܲܡ̣ܠܸܟ݂ ܥܲܠ ܝܼܗܘܼܕ݂ܵܐ. ܒܲܪ ܐܲܪܒ̇ܥܝܼܢ ܗ̄ܘ̣ܵܐ ܘܲܚܕ݂ܵܐ ܫܢ̈ܝܼܢ ܪܚܸܒ̣ܥܲܡ ܟܲܕ݂ ܐܲܡܠܸܟ݂. ܘܲܫܒܲܥܣܪܹ̈ܐ ܫܢ̈ܝܼܢ ܐܲܡܠܸܟ݂ ܒܐܘܿܪܸܫܠܸܡ ܩܪܝܼܬ̣ܵܐ: ܕܲܓ̣ܒ̣ܵܐ ܡܵܪܝܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ ܠܲܡܣܵܡ ܫܡܹܗ ܬܲܡܵܢ ܘܲܫܡܵܐ ܕܐܸܡܹܗ ܢܲܥܡܵܐ ܥܲܡܘܿܢܵܝܬܵܐ. [No book]
[22]ܘܲܥ̣ܒܲܕ݂ ܝܼܗܘܼܕ݂ܵܐ ܕܒ̣ܝܼܫ ܩܕ݂ܵܡ ܡܵܪܝܵܐ. ܘܐܲܛܢܘܼܗܝ ܒܟ݂ܠ ܡܸܕܸ̇ܡ ܕܲܥܒܲܕ݂ܘ ܐܲܒ̣ܵܗܲܝ̈ܗܘܿܢ: ܘܒܲܚܛܵܗܲܝ̈ܗܘܿܢ ܕܲܚܛܵܘ. [No book]
[23]ܘܲܒ̣ܢܵܘ ܠܗܘܿܢ ܐܵܦ ܗܸܢܘܿܢ ܥܠܵـ̈ـܘܵܬ̣ܵܐ ܘܩܵܝ̈ܡܵܬ̣ܵܐ ܘܕܸܚ̈ܠܵܬ̣ܵܐ: ܥܲܠ ܟܠ ܪܵܡܬ̣ܵܐ ܕܪܵܡܵܐ: ܘܲܬ̣ܚܹܝܬ̣ ܟܠ ܐܝܼܠܵܢ ܕܥܲܒ̇ܝܼܛ. [No book]
[24]ܘܐܵܦ ܙܵܢܝܘܼܬ̣ܵܐ ܗܘ̤ܵܬ̣ ܒܐܲܪܥܵܐ: ܘܲܥ̣ܒܲܕ݂ܘ ܐܲܝܟ݂ ܟܠܵܗ̇ ܛܲܢܦܘܼܬ̣ܵܐ ܕܥܲܡܡܹ̈ܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ. [No book]
[25]ܘܲܗܘ̤ܵܐ ܒܫܲܢ̄ܬܵܐ ܚܡܝܼܫܵܝܬܵܐ ܕܡܲܠܟܵܐ ܪܚܸܒ̣ܥܲܡ: ܣܠܸܩ ܫܝܼܫܲܩ ܡܲܠܟܵܐ ܕܡܸܨܪܹܝܢ ܥܲܠ ܐܘܿܪܸܫܠܸܡ. [No book]
[26]ܘܲܢܣܲܒ̣ ܓܙܵܐ ܕܒܲܝܬܹ̇ܗ ܕܡܵܪܝܵܐ: ܘܓܲܙܵܐ ܕܒܹܝܬ̣ ܡܲܠܟܵܐ. ܘܲܢܣܲܒ̣ ܟܠܗܹܝܢ ܣܲܟ̇ܪܹ̈ܐ ܕܕܲܗܒ̣ܵܐ ܕܲܥ̣ܒܲܕ݂ ܫܠܹܝܡܘܿܢ. [No book]
[27]ܘܲܥ̣ܒܲܕ݂ ܡܲܠܟܵܐ ܪܚܸܒ̣ܥܲܡ ܚܠܵܦܲܝܗܹܝܢ ܣܲܟ̇ܪܹ̈ܐ ܕܲܢܚܵܫܵܐ: ܘܐܲܫܠܸܡ ܐܸܢܹܝܢ ܒܐܝܼܕ݂ܵܐ ܕܪܵܘ̱ܪ̈ܒ̣ܵܢܹܐ ܘܲܕ݂ܪ̈ܲܗܵܛܹܐ ܕܢܵܛܪܝܼܢ ܒܬܲܪܥܵܐ ܕܒܹܝܬ̣ ܡܲܠܟܵܐ. [No book]
[28]ܘܲܒ̣ܙܲܒ̣ܢܵܐ ܕܥܵܐܹ̇ܠ ܡܲܠܟܵܐ ܠܒܲܝܬܹ̇ܗ ܕܡܵܪܝܵܐ: ܫܵܩܠܝܼܢ ܠܗܹܝܢ ܪ̈ܲܗܵܛܹܐ: ܘܡܲܝܬܹ̇ܝܢ ܠܗܹܝܢ ܠܒܹܝܬ̣ ܪ̈ܲܗܵܛܹܐ. [No book]
[29]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܪܚܸܒ̣ܥܲܡ ܘܟ݂ܠ ܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. [No book]
[30]ܘܲܩܪܵܒ̣ܵܐ ܗܘ̤ܵܐ ܒܹܝܬ̣ ܪܚܸܒ̣ܥܲܡ ܠܒܹܝܬ̣ ܝܘܿܪܲܒ̣ܥܲܡ ܟܠܗܘܿܢ ܝܵܘ̈ܡܵܬ̣ܵܐ. [No book]
[31]ܘܲܫܟ݂ܝܼܒ̣ ܪܚܸܒ̣ܥܲܡ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܐܲܡܠܸܟ݂ ܐܲܒ̣ܝܼܵܐ ܒܪܹܗ ܒܵܬ̣ܪܹܗ. [No book]
Translation: Charles H. Hoole (1885)
Source: www.earlychristianwritings.com
Top