|
|
| [1]Et rex Antiochus perambulabat superiores regiones, et audivit esse civitatem Elymaidem in Perside nobilissimam, et copiosam in argento et auro, |
[No book] |
| [2]templumque in ea locuples valde, et illic velamina aurea, et loricæ, et scuta, quæ reliquit Alexander Philippi rex Macedo, qui regnavit primus in Græcia. |
[No book] |
| [3]Et venit, et quærebat capere civitatem, et deprædari eam: et non potuit, quoniam innotuit sermo his qui erant in civitate: |
[No book] |
| [4]et insurrexerunt in prælium, et fugit inde, et abiit cum tristitia magna, et reversus est in Babyloniam. |
[No book] |
| [5]Et venit qui nuntiaret ei in Perside, quia fugata sunt castra quæ erant in terra Juda: |
[No book] |
| [6]et quia abiit Lysias cum virtute forti in primis, et fugatus est a facie Judæorum, et invaluerunt armis, et viribus, et spoliis multis, quæ ceperunt de castris, quæ exciderunt: |
[No book] |
| [7]et quia diruerunt abominationem, quam ædificaverat super altare quod erat in Jerusalem: et sanctificationem, sicut prius, circumdederunt muris excelsis, sed et Bethsuram civitatem suam. |
[No book] |
| [8]Et factum est ut audivit rex sermones istos, expavit, et commotus est valde: et decidit in lectum, et incidit in languorem præ tristitia, quia non factum est ei sicut cogitabat. |
[No book] |
| [9]Et erat illic per dies multos, quia renovata est in eo tristitia magna, et arbitratus est se mori. |
[No book] |
| [10]Et vocavit omnes amicos suos, et dixit illis: Recessit somnus ab oculis meis, et concidi, et corrui corde præ sollicitudine: |
[No book] |
| [11]et dixi in corde meo: In quantam tribulationem deveni, et in quos fluctus tristitiæ, in qua nunc sum: qui jucundus eram, et dilectus in potestate mea ! |
[No book] |
| [12]Nunc vero reminiscor malorum quæ feci in Jerusalem, unde et abstuli omnia spolia aurea et argentea quæ erant in ea, et misi auferre habitantes Judæam sine causa. |
[No book] |
| [13]Cognovi ergo quia propterea invenerunt me mala ista: et ecce pereo tristitia magna in terra aliena. |
[No book] |
| [14]Et vocavit Philippum, unum de amicis suis, et præposuit eum super universum regnum suum: |
[No book] |
| [15]et dedit ei diadema, et stolam suam, et annulum, ut adduceret Antiochum filium suum, et nutriret eum, et regnaret. |
[No book] |
| [16]Et mortuus est illic Antiochus rex anno centesimo quadragesimo nono. |
[No book] |
| [17]Et cognovit Lysias quoniam mortuus est rex, et constituit regnare Antiochum filium ejus, quem nutrivit adolescentem: et vocavit nomen ejus Eupator. |
[No book] |
| [18]Et hi qui erant in arce, concluserant Israël in circuitu sanctorum: et quærebant eis mala semper, et firmamentum gentium. |
[No book] |
| [19]Et cogitavit Judas disperdere eos: et convocavit universum populum, ut obsiderent eos. |
[No book] |
| [20]Et convenerunt simul, et obsederunt eos anno centesimo quinquagesimo, et fecerunt ballistas et machinas. |
[No book] |
| [21]Et exierunt quidam ex eis qui obsidebantur: et adjunxerunt se illis aliqui impii ex Israël, |
[No book] |
| [22]et abierunt ad regem, et dixerunt: Quousque non facis judicium, et vindicas fratres nostros? |
[No book] |
| [23]Nos decrevimus servire patri tuo, et ambulare in præceptis ejus, et obsequi edictis ejus: |
[No book] |
| [24]et filii populi nostri propter hoc alienabant se a nobis, et quicumque inveniebantur ex nobis, interficiebantur, et hæreditates nostræ diripiebantur. |
[No book] |
| [25]Et non ad nos tantum extenderunt manum, sed et in omnes fines nostros: |
[No book] |
| [26]et ecce applicuerunt hodie ad arcem Jerusalem occupare eam, et munitionem Bethsuram munierunt: |
[No book] |
| [27]et nisi præveneris eos velocius, majora quam hæc facient, et non poteris obtinere eos. |
[No book] |
| [28]Et iratus est rex, ut hæc audivit: et convocavit omnes amicos suos, et principes exercitus sui, et eos qui super equites erant: |
[No book] |
| [29]sed et de regnis aliis et de insulis maritimis venerunt ad eum exercitus conductitii. |
[No book] |
| [30]Et erat numerus exercitus ejus, centum millia peditum, et viginti millia equitum, et elephanti triginta duo, docti ad prælium. |
[No book] |
| [31]Et venerunt per Idumæam, et applicuerunt ad Bethsuram, et pugnaverunt dies multos: et fecerunt machinas, et exierunt, et succenderunt eas igni, et pugnaverunt viriliter. |
[No book] |
| [32]Et recessit Judas ab arce, et movit castra ad Bethzacharam contra castra regis. |
[No book] |
| [33]Et surrexit rex ante lucem, et concitavit exercitus in impetum contra viam Bethzacharam: et comparaverunt se exercitus in prælium, et tubis cecinerunt: |
[No book] |
| [34]et elephantis ostenderunt sanguinem uvæ et mori, ad acuendos eos in prælium: |
[No book] |
| [35]et diviserunt bestias per legiones, et astiterunt singulis elephantis mille viri in loricis concatenatis, et galeæ æreæ in capitibus eorum: et quingenti equites ordinati unicuique bestiæ electi erant. |
[No book] |
| [36]Hi ante tempus, ubicumque erat bestia, ibi erant: et quocumque ibat, ibant, et non discedebant ab ea. |
[No book] |
| [37]Sed et turres ligneæ super eos firmæ protegentes super singulas bestias: et super eas machinæ: et super singulas viri virtutis triginta duo, qui pugnabant desuper: et Indus magister bestiæ. |
[No book] |
| [38]Et residuum equitatum hinc et inde statuit in duas partes, tubis exercitum commovere, et perurgere constipatos in legionibus ejus. |
[No book] |
| [39]Et ut refulsit sol in clypeos aureos et æreos, resplenduerunt montes ab eis, et resplenduerunt sicut lampades ignis. |
[No book] |
| [40]Et distincta est pars exercitus regis per montes excelsos, et alia per loca humilia: et ibant caute et ordinate. |
[No book] |
| [41]Et commovebantur omnes inhabitantes terram a voce multitudinis, et incessu turbæ, et collisione armorum: erat enim exercitus magnus valde, et fortis. |
[No book] |
| [42]Et appropiavit Judas et exercitus ejus in prælium, et ceciderunt de exercitu regis sexcenti viri. |
[No book] |
| [43]Et vidit Eleazar filius Saura unam de bestiis loricatam loricis regis: et erat eminens super ceteras bestias, et visum est ei quod in ea esset rex: |
[No book] |
| [44]et dedit se ut liberaret populum suum, et acquireret sibi nomen æternum. |
[No book] |
| [45]Et cucurrit ad eam audacter in medio legionis, interficiens a dextris et a sinistris, et cadebant ab eo huc atque illuc. |
[No book] |
| [46]Et ivit sub pedes elephantis, et supposuit se ei, et occidit eum: et cecidit in terram super ipsum, et mortuus est illic. |
[No book] |
| [47]Et videntes virtutem regis, et impetum exercitus ejus, diverterunt se ab eis. |
[No book] |
| [48]Castra autem regis ascenderunt contra eos in Jerusalem, et applicuerunt castra regis ad Judæam, et montem Sion. |
[No book] |
| [49]Et fecit pacem cum his qui erant in Bethsura: et exierunt de civitate, quia non erant eis ibi alimenta conclusis, quia sabbata erant terræ. |
[No book] |
| [50]Et comprehendit rex Bethsuram: et constituit illic custodiam servare eam. |
[No book] |
| [51]Et convertit castra ad locum sanctificationis dies multos: et statuit illic ballistas, et machinas, et ignis jacula, et tormenta ad lapides jactandos, et spicula, et scorpios ad mittendas sagittas, et fundibula. |
[No book] |
| [52]Fecerunt autem et ipsi machinas adversus machinas eorum, et pugnaverunt dies multos. |
[No book] |
| [53]Escæ autem non erant in civitate, eo quod septimus annus esset: et qui remanserant in Judæa de gentibus, consumpserant reliquias eorum, quæ repositæ fuerant. |
[No book] |
| [54]Et remanserunt in sanctis viri pauci, quoniam obtinuerat eos fames: et dispersi sunt unusquisque in locum suum. |
[No book] |
| [55]Et audivit Lysias quod Philippus, quem constituerat rex Antiochus cum adhuc viveret, ut nutriret Antiochum filium suum, et regnaret, |
[No book] |
| [56]reversus esset a Perside et Media, et exercitus qui abierat cum ipso, et quia quærebat suscipere regni negotia: |
[No book] |
| [57]festinavit ire, et dicere ad regem, et duces exercitus: Deficimus quotidie, et esca nobis modica est; et locus, quem obsidemus, est munitus, et incumbit nobis ordinare de regno. |
[No book] |
| [58]Nunc itaque demus dextras hominibus istis, et faciamus cum illis pacem, et cum omni gente eorum: |
[No book] |
| [59]et constituamus illis ut ambulent in legitimis suis sicut prius: propter legitima enim ipsorum, quæ despeximus, irati sunt, et fecerunt omnia hæc. |
[No book] |
| [60]Et placuit sermo in conspectu regis et principum: et misit ad eos pacem facere, et receperunt illam. |
[No book] |
| [61]Et juravit illis rex et principes, et exierunt de munitione. |
[No book] |
| [62]Et intravit rex montem Sion, et vidit munitionem loci: et rupit citius juramentum quod juravit, et mandavit destruere murum in gyro. |
[No book] |
| [63]Et discessit festinanter, et reversus est Antiochiam, et invenit Philippum dominantem civitati: et pugnavit adversus eum, et occupavit civitatem. |
[No book] |