➖ »
«
➖ ➕
Peshitta OT
PesOT
The Biblical Antiquities of Philo (1917)
Philo
←
1 Samuel
1Sa
17
→
[1]ܘܟܲܢܸܫܘ ܦܠܸܫ̈ܬܵܝܹܐ ܡܲܫ̱ܪ̈ܝܵܬ̣ܗܘܿܢ ܠܲܩܪܵܒ̣ܵܐ: ܘܐܸܬ̣ܟܲܬܲܫܘ ܒܣܵܘܦܵܐ ܕܲܝܗܘܼܕ݂ܵܐ: ܘܲܫܪܵܘ ܒܹܝܬ̣ ܣܵܘܦܵܐ ܠܒܹܝܬ̣ ܥܲܪܩܵܐ ܒܐܲܦܲܪܣܡܝܼܢ. [No book]
[2]ܘܫܵܐܘܿܠ ܘܓܲܒ̣ܪܹ̈ܐ ܕܝܼܣܪܵܝܹܠ ܐܸܬ̣ܟܲܢܲܫܘ: ܘܲܫܪܵܘ ܒܥܘܼܡܩܵܐ ܕܒܸܛ̱ܡܬ̣ܵܐ. ܘܲܣܕܲܪܘ ܩܪܵܒ̣ܵܐ ܠܘܼܩܒܲܠ ܦܠܸܫ̈ܬܵܝܹܐ. [No book]
[3]ܘܲܦܠܸܫ̈ܬܵܝܹܐ ܩܵܝܡܝܼܢ ܛܘܼܪܵܐ ܡܸܟܵܐ: ܘܝܼܣܪܵܝܹܠ ܩܵܝܡܝܼܢ ܛܘܼܪܵܐ ܡܸܟܵܐ: ܘܢܲܚܠܵܐ ܒܲܝܢܵܬ̣ܗܘܿܢ. [No book]
[4]ܘܲܢܦܲܩ ܓܲܒ̣ܪܵܐ ܓܲܢ̄ܒܵܪܵܐ ܡ̣ܢ ܡܲܫܪܝܼܬ̣ܵܐ ܕܲܦܠܸܫ̈ܬܵܝܹܐ: ܓܘܼܠܝܵܕ݂ ܫܡܹܗ: ܡ̣ܢ ܓܵܬ̣: ܪܵܘܡܹܗ ܫܸܬ̣ ܐܲܡ̈ܝܼܢ ܘܲܙܪܸܬ̣. [No book]
[5]ܘܣܲܢܘܵܪܬܵܐ ܕܲܢܚܵܫܵܐ ܒܪܹܫܹܗ: ܘܫܸܪܝܵܢܵܐ ܕܛܲܣܵܐ ܠܒ̣ܝܼܫ: ܘܡܲܬ̣ܩܵܠܵܐ ܕܫܸܪܝܵܢܹܗ ܚܲܡܫܵܐ ܐܲܠܦ̈ܝܼܢ ܢܲܬ̣̈ܩܵܠܝܼܢ ܕܲܢܚܵܫܵܐ. [No book]
[6]ܘܒܲܪ̈ܙܵܢܩܹܐ ܕܲܢܚܵܫܵܐ ܒܪܸ̈ܓ̣ܠܵܘܗܝ: ܘܛܲܪܦܵܢܣܵܐ ܕܲܢܚܵܫܵܐ ܒܹܝܬ̣ ܟܲܬ̣ܦܵܬܹ̈ܗ. [No book]
[7]ܘܩܲܝܣܵܐ ܕܢܲܝܙܟܹܗ ܐܲܝܟ݂ ܢܵܘܠܵܐ ܕܓܲܪ̈ܕܝܵܝܹܐ: ܘܲܫܢܵܢܵܐ ܕܢܲܝܙܟܹܗ ܡ̣ܢ ܫܸܬܡܵܐܐ ܡܲܬ̣̈ܩܵܠܝܼܢ ܕܦܲܪܙܠܵܐ: ܘܫܵܩܹܠ ܣܲܟ̇ܪܵܐ ܐܵܙܹܠ ܩܕ݂ܵܡܵܘܗܝ. [No book]
[8]ܘܩܵܡ ܘܲܩܪܵܐ ܠܣܸܕ݂ܪܹ̈ܐ ܕܝܼܣܪܵܝܹܠ: ܘܐܸܡܲܪ ܠܗܘܿܢ: ܠܡܵܢܵܐ ܢܵܦܩܝܼܢ ܐ̄ܬ̇ܘܿܢ ܠܡܸܣܕܲܪ ܩܪܵܒ̣ܵܐ: ܗܵܐ ܐܸܢܵܐ ܦܠܸܫܬܵܝܵܐ: ܘܐܲܢ̄ܬ̇ܘܿܢ ܥܲܒ̣ܕܵܘ̈ܗܝ ܕܫܵܐܘܿܠ: ܓܒ̣ܵܘ ܠܟ݂ܘܿܢ ܓܲܒ̣ܪܵܐ ܕܢܸܦܘܿܩ ܥܠܲܝ. [No book]
[9]ܐܸܢ ܐܸܫܟܲܚ ܠܡܸܬ̣ܟܲܬܵܫܘܼ ܥܲܡܝ: ܘܢܸܩܛܠܲܢܝ: ܢܸܗܘܸܐ ܠܟ݂ܘܿܢ ܥܲܒ̣̈ܕܹܐ. ܘܐܸܢ ܐܸܢܵܐ ܐܸܙܟܹ̇ܝܘܗܝ ܘܐܸܩܛܠܝܼܘܗܝ: ܬܗܘܘܿܢ ܠܲܢ ܥܲܒ̣̈ܕܹܐ ܘܬܸܦ̱ܠܚܘܼܢܵܢ. [No book]
[10]ܘܐܸܡܲܪ ܦܠܸܫܬܵܝܵܐ: ܐܸܢܵܐ ܚܲܣܕܹܬ̣ ܠܣܸܕ݂ܪ̈ܵܘܗܝ ܕܝܼܣܪܵܝܹܠ ܝܵܘܡܵܢܵܐ: ܗܲܒ̣ܘ ܠܝܼ ܓܲܒ̣ܪܵܐ ܢܸܬ̣ܟܲܬܲܫ ܐܲܟ݂ܚ̄ܕ݂ܵܐ. [No book]
[11]ܘܲܫܡܲܥ ܫܵܐܘܿܠ ܘܟ݂ܠܹܗ ܝܼܣܪܵܝܹܠ ܡܸܠܵܘ̈ܗܝ ܕܲܦܠܸܫܬܵܝܵܐ. ܘܙܵܥܘ ܘܲܕ݂ܚܸܠܘ ܛܵܒ̣. [No book]
[12]ܘܕ݂ܵܘܝܼܕ݂ ܒܲܪ ܓܲܒ̣ܪܵܐ ܗ̄ܘ̣ܵܐ ܐܵܦܪܬ̣ܵܝܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕ݂ܵܐ: ܘܲܫܡܹܗ ܐܝܼܫܲܝ: ܘܠܹܗ ܬܡܵܢܝܵܐ ܒܢ̈ܝܼܢ. ܘܓܲܒ̣ܪܵܐ ܒܝܵܘܡܵܘ̈ܗܝ ܕܫܵܐܘܿܠ: ܣܐܸܒ̣ ܘܥܲܠ ܒܲܫ̈ܢܲܝܵܐ. [No book]
[13]ܘܐܸܙܲܠܘ ܬܠܵܬ̣ܵܐ ܒܢܵܘ̈ܗܝ ܕܐܝܼܫܲܝ ܪܵܘܪ̈ܒܹܐ ܒܵܬܲܪ ܫܵܐܘܿܠ ܠܲܩܪܵܒ̣ܵܐ: ܘܲܫܡܵܗܲܝ̈ܗܘܿܢ ܐܸܠܝܵܒ̣ ܒܘܼܟ݂ܪܹܗ: ܘܬܸܢܝܵܢܹܗ ܐܲܒ̣ܝܼܢܵܕ݂ܵܒ̣: ܘܲܬ̣ܠܝܼܬ̣ܵܝܵܐ ܫܲܡܵܐ. [No book]
[14]ܘܕ݂ܵܘܝܼܕ݂ ܗܘ̤ܵܐ ܙܥܘܿܪܵܐ. [No book]
[15]ܘܗ̤ܘ ܕܵܘܝܼܕ݂ ܗܦܲܟ݂ ܗ̄ܘ̣ܵܐ ܡ̣ܢ ܠܘܵܬ̣ ܫܵܐܘܿܠ: ܘܐܸܙܲܠ ܠܡܸܥܒܲܪ ܥܵܢܹ̈ܐ ܕܐܲܒ̣ܘܼܗܝ ܒܒܹܝܬ̣ ܠܚܸܡ. [No book]
[16]ܘܲܩܪܸܒ̣ ܦܠܸܫܬܵܝܵܐ ܡܩܲܕܸܡ ܘܲܡܚܲܫܸܟ݂: ܘܩܵܡ ܐܲܪܒܥܝܼܢ ܝܵܘ̈ܡܝܼܢ. [No book]
[17]ܘܐܸܡܲܪ ܐܝܼܫܲܝ ܠܕ݂ܵܘܝܼܕ݂ ܒܪܹܗ: ܐܵܘܒܸ̇ܠ ܠܐܲܚܲܝ̈ܟ ܣܐܵܐ ܩܲܠ̈ܝܵܬ̣ܵܐ: ܘܲܥܣܲܪ ܕܠܲܚܡܵܐ: ܘܐܲܪܗܸܛ ܠܡܲܫܪܝܼܬ̣ܵܐ ܠܐܲܚܲܝ̈ܟ. [No book]
[18]ܘܲܥܣܲܪ ܓܘܼܒ̣̈ܢܹܗ ܗܵܠܹܝܢ ܕܚܠܒ̣ܵܐ: ܐܵܘܒܸ̇ܠ ܠܪܲܒ̇ ܐܲܠܦܵܐ. ܘܐܲܚܲܝ̈ܟ ܦܩܘܿܕ݂ ܒܲܫܠܵܡܵܐ: ܘܲܣܒܲܪܬ̣ܗܘܿܢ ܐܲܝܬܵܐ ܠܝܼ. [No book]
[19]ܘܫܵܐܘܿܠ ܘܟ݂ܠܗܘܿܢ ܓܲܒ̣ܪܹ̈ܐ ܕܝܼܣܪܵܝܹܠ: ܒܥܘܼܡܩܵܐ ܕܒܸܛܡ̱ܬ̣ܵܐ ܡܸܬ̣ܟܲܬ̇ܫܝܼܢ ܥܲܡ ܦܠܸܫ̈ܬܵܝܹܐ. [No book]
[20]ܘܩܲܕܸܡ ܕܵܘܝܼܕ݂ ܒܨܲܦܪܵܐ: ܘܲܫܒܲܩ ܥܵـ̈ܢܵܐ ܥܲܠ ܢܵܛܘܿܪܵܐ: ܘܲܫܩܲܠ ܘܐܸܙܲܠ ܐܲܝܟ݂ ܕܦܲܩܕܹܗ ܐܝܼܫܲܝ. ܘܐܸܬ̣ܵܐ ܠܡܲܫܪܝܼܬ̣ܵܐ ܠܢܲܚܠܵܐ ܕܢܵܦܹܩ ܠܣܸܕ݂ܪܵܐ: ܘܝܲܒܸ̇ܒ̣ܘ ܠܲܩܪܵܒ̣ܵܐ. [No book]
[21]ܘܐܸܣܬ̇ܕ݂ܪܘ ܝܼܣܪܵܝܹܠ ܘܲܦܠܸܫ̈ܬܵܝܹܐ ܣܸܕܪܵܐ ܠܘܼܩܒܲܠ ܣܸܕܪܵܐ. [No book]
[22]ܘܐܲܢܝܼܚ ܕܵܘܝܼܕ݂ ܡܵܐܢܹ̈ܐ ܡܸܢܹܗ ܥܲܠ ܓܹܢ̄ܒ̣ ܡܵܐܢܹ̈ܐ: ܘܲܪܗܸܛ ܠܣܸܕܪܵܐ: ܘܲܫܐܸܠ ܒܲܫܠܵܡܵܐ ܕܐܲܚܵܘ̈ܗܝ. [No book]
[23]ܘܥܲܕ݂ ܗ̤ܘ ܡܡܲܠܸܠ ܥܲܡܗܘܿܢ: ܘܗܵܐ ܓܲܒ̣ܪܵܐ ܓܲܢ̄ܒܵܪܵܐ ܣܠܸܩ: ܓܘܼܠܝܵܕ݂ ܦܠܸܫܬܵܝܵܐ ܫܡܹܗ ܡ̣ܢ ܓܵܬ̣: ܡ̣ܢ ܣܸܕܪܵܐ ܕܲܦܠܸܫ̈ܬܵܝܹܐ: ܘܐܸܡܲܪ ܡܸܠܹ̈ܐ ܗܵܠܹܝܢ: ܘܲܫܡܲܥ ܕܵܘܝܼܕ݂. [No book]
[24]ܘܟ݂ܠܗܘܿܢ ܓܲܒ̣ܪܹ̈ܐ ܕܝܼܣܪܵܝܹܠ: ܟܲܕ݂ ܚܙܵܐܘܼܗܝ ܠܓܲܢ̄ܒܵܪܵܐ: ܕܚܸܠܘ ܘܲܥܪܲܩܘ ܡ̣ܢ ܩܕ݂ܵܡܵܘܗܝ. [No book]
[25]ܘܐܸܡܲܪ ܓܲܒ̣ܪܹ̈ܐ ܕܝܼܣܪܵܝܹܠ: ܚܙܲܝܬ̇ܘܿܢ ܓܲܒ̣ܪܵܐ ܗܵܢܵܐ ܕܠܲܡܚܲܣܵܕ݂ܘܼܬܹܗ ܠܝܼܣܪܵܝܹܠ ܣܠܸܩ. ܓܲܒ̣ܪܵܐ ܕܢܸܩܛܠܝܼܘܗܝ: ܢܲܥܬ̇ܪܝܼܘܗܝ ܡܲܠܟܵܐ ܥܘܼܬ̣ܪܵܐ ܪܲܒܵܐ: ܘܒܲܪܬܹܗ ܢܸܬ̇ܠ ܠܹܗ: ܘܲܠܒܹܝܬ̣ ܐܲܒ̣ܘܼܗܝ ܢܸܥܒ̇ܕ݂ ܡܚܲܪܪܵܐ ܒܝܼܣܪܵܝܹܠ. [No book]
[26]ܘܐܸܡܲܪ ܕܵܘܝܼܕ݂ ܠܓܲܒ̣ܪܹ̈ܐ ܕܩܵܝܡܝܼܢ ܠܘܵܬܹܗ: ܡܵܢܵܐ ܢܸܬ̣ܥ̱ܒܸܕ݂ ܠܓܲܒ̣ܪܵܐ ܕܢܸܩܛܠܝܼܘܗܝ ܠܲܦܠܸܫܬܵܝܵܐ ܗܵܢܵܐ ܥܘܼܪܠܵܐ: ܘܢܲܥܒܲܪ ܚܸܣܕܵܐ ܡ̣ܢ ܝܼܣܪܵܝܹܠ: ܡܸܛܠ ܕܡܵܢܵܐ ܗ̄ܘ̣ ܦܠܸܫܬܵܝܵܐ ܗܵܢܵܐ ܥܘܼܪܠܵܐ: ܕܲܡܚܲܣܸܕ݂ ܠܣܸܕ݂ܪ̈ܵܘܗܝ ܕܐܲܠܵܗܵܐ ܚܲܝܵܐ. [No book]
[27]ܘܐܸܡܲܪ ܠܹܗ ܥܲܡܵܐ ܐܲܝܟ݂ ܡܸܠܬ̣ܵܐ ܗܵܕܹܐ: ܕܗܵܟܲܢܵܐ ܢܸܬ̣ܥ̱ܒܸܕ݂ ܠܓܲܒ̣ܪܵܐ ܕܢܸܩܛܠܝܼܘܗܝ. [No book]
[28]ܘܲܫܡܲܥ ܐܸܠܝܵܒ̣ ܐܲܚܘܼܗܝ ܩܲܫܝܼܫܵܐ ܟܲܕ݂ ܐܵܡܲܪ ܠܗܘܿܢ ܠܓܲܒ̣ܪܹ̈ܐ: ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܐܸܠܝܵܒ̣ ܥܲܠ ܕܵܘܝܼܕ݂: ܘܐܸܡܲܪ ܠܹܗ: ܡܵܢܵܐ ܢܸܚܬ̇ܬ̇: ܘܥܲܠ ܡ̇ܢ ܫܒܲܩܬ̇ ܥܵـ̈ܢܵܐ ܗܵܠܹܝܢ ܩܲܠܝܼܠ ܕܲܒ̣ܡܲܕ݂ܒ̇ܪܵܐ. ܐܸܢܵܐ ܝܵܕ݂ܥ ܐ̄ܢܵܐ ܡܲܪܵܚܘܿܬ̣ܵܟ݂ ܘܒ̣ܝܼܫܘܼܬ̣ ܠܸܒܵܟ݂: ܕܲܠܡܸܚܙܵܐ ܗ̄ܘ̣ ܩܪܵܒ̣ܵܐ ܢܸܚܬ̇ܬ̇. [No book]
[29]ܘܐܸܡܲܪ ܕܵܘܝܼܕ݂ ܡܵܢܵܐ ܥܸܒ̣ܕܹܬ̣: ܗܵܫܵܐ ܗܵܐ ܡܸܠܬ̣ܵܐ ܗ̄ܝ̣. [No book]
[30]ܘܐܸܬ̣ܦܢܝܼ ܡ̣ܢ ܠܘܵܬ̣ ܠܓܲܒܵܐ ܐ̄ܚܪܹܢܵܐ: ܘܐܸܡܲܪ ܐܲܝܟ݂ ܡܸܠܬ̣ܵܐ ܗܵܕܹܐ: ܘܐܲܬ̣ܝܼܒ̣ܘܼܗܝ ܥܲܡܵܐ ܦܸܬ̣ܓ̣ܵܡܵܐ ܐܲܝܟ݂ ܦܸܬ̣ܓ̣ܵܡܵܐ ܩܲܕ݂ܡܵܝܵܐ. [No book]
[31]ܘܐܸܫܬ̇ܡܲܥ ܡܸܠܹ̈ܐ ܕܡܲܠܸܠ ܕܵܘܝܼܕ݂ ܩܕ݂ܵܡ ܫܵܐܘܿܠ: ܘܕܲܒ̣ܪܹܗ. [No book]
[32]ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܠܵܐ ܢܸܦܸܠ ܠܸܒܹ̇ܗ ܕܐܵܕ݂ܵܡ ܥܠܵܘܗܝ: ܥܲܒ̣ܕܵܟ݂ ܐܵܙܹܠ ܘܡܸܬ̣ܟܲܬܲܫ ܥܲܡ ܦܠܸܫܬܵܝܵܐ ܗܵܢܵܐ. [No book]
[33]ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܠܵܐ ܡܸܫܟܲܚ ܐܲܢ̄ܬ̇ ܠܡܹܐܙܲܠ ܥܲܠ ܦܠܸܫܬܵܝܵܐ ܗܵܢܵܐ ܠܡܸܬ̣ܟܲܬܵܫܘܼ ܥܲܡܹܗ: ܡܸܛܠ ܕܛܲܠܝܵܐ ܐܲܢ̄ܬ̇: ܘܗ̤ܘ ܓܲܒ̣ܪܵܐ ܗ̄ܘ̣ ܩܪܲܒ̣ܬܵܢܵܐ ܡ̣ܢ ܛܲܠܝܘܼܬܹܗ. [No book]
[34]ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܪܵܥܹܐ ܗ̄ܘ̣ܵܐ ܥܲܒ̣ܕܵܟ݂ ܠܐܵܒ̣ܝ ܥܵـ̈ܢܵܐ: ܘܐܸܬ̣ܵܐ ܐܲܪܝܵܐ ܘܕܹܒ̣ܵܐ: ܘܲܫܩܲܠܘ ܐܸܡܪܵܐ ܡ̣ܢ ܓܵܙܵܪܵܐ. [No book]
[35]ܘܢܸܦܩܹܬ̣ ܒܵܬ̣ܪܹܗ ܘܲܡܚܹܝܬܹܗ: ܘܐܲܥܕܲܝܼܬܹܗ ܡ̣ܢ ܦܘܼܡܹܗ. ܘܐܸܬ̣ܡܲܪܡܲܪ ܥܠܲܝ: ܘܐܸܚܲܕܬܹ̇ܗ ܒܕܲܩܢܹܗ ܘܲܡܚܹܝܬܹܗ: ܘܲܩܠܹܝܬܹܗ. [No book]
[36]ܘܐܵܦ ܐܲܪܝܵܐ ܘܐܵܦ ܕܸܐܒ̣ܵܐ ܩܛܲܠ ܥܲܒ̣ܕܵܟ݂: ܢܸܗܘܸܐ ܦܠܸܫܬܵܝܵܐ ܗܵܢܵܐ ܥܘܼܪܠܵܐ ܐܲܝܟ݂ ܚܲܕ݂ ܡܸܢܗܘܿܢ. ܡܸܛܠ ܕܚܲܣܸܕ݂ ܠܣܸܕ݂ܪ̈ܵܘܗܝ ܕܐܲܠܵܗܵܐ ܚܲܝܵܐ. [No book]
[37]ܘܐܸܡܲܪ ܕܵܘܝܼܕ݂: ܡܵܪܝܵܐ ܕܦܲܨܣܲܢܝ ܡ̣ܢ ܐܝܼܕ݂ܵܐ ܕܐܲܪܝܵܐ ܘܡ̣ܢ ܐܝܼܕ݂ܵܐ ܕܕܹܐܒ̣ܵܐ: ܗ̤ܘ ܢܦܲܨܹܝܢܝ ܡ̣ܢ ܐܝܼܕ݂ܵܘ̈ܗܝ ܕܲܦܠܸܫܬܵܝܵܐ ܗܵܢܵܐ ܥܘܼܪܠܵܐ. ܘܐܸܡܲܪ ܫܵܐܘܿܠ ܠܕܵܘܝܼܕ݂. ܙܸܠ ܘܡܵܪܝܵܐ ܢܸܗܘܸܐ ܥܲܡܵܟ݂. [No book]
[38]ܘܐܲܠܒܸ̇ܫ ܫܵܐܘܿܠ ܠܕ݂ܵܘܝܼܕ݂ ܡܵܐܢܵܘ̈ܗܝ: ܘܣܵܡ ܣܲܢܘܵܪܬܵܐ ܕܲܢܚܵܫܵܐ ܒܪܹܫܹܗ: ܘܐܲܠܒ̇ܫܹܗ ܫܸܪܝܵܢܵܐ. [No book]
[39]ܘܐܸܣܲܪ ܕܵܘܝܼܕ݂ ܣܲܝܦܹܗ ܠܥܸܠ ܡ̣ܢ ܡܵܐܢܵܘ̈ܗܝ. ܘܠܵܐ ܨܒ̣ܵܐ ܠܡܹܐܙܲܠ ܡܸܛܠ ܕܠܑܵ ܢܲܣܝܼ ܐܸܢܘܿܢ: ܘܐܲܥܒܲܪ ܐܸܢܘܿܢ ܕܵܘܝܼܕ݂ ܡܸܢܹܗ. [No book]
[40]ܘܲܢܣܲܒ̣ ܚܘܼܛܪܹܗ ܒܐܝܼܕܹܗ. ܘܲܓ̣ܒ̣ܵܐ ܠܹܗ ܚܲܡܫܵܐ ܫܥܵܥ̈ܝܼܢ ܕܟܹܐܦܵܐ ܡ̣ܢ ܚܵܠܵܐ: ܘܣܵܡ ܐܸܢܘܿܢ ܒܡܵܐܢܵܐ ܕܝܼܠܹܗ ܕܪ̈ܵܥܵܘܵܬ̣ܵܐ: ܒܬܲܪܡܵܠܹܗ: ܘܩܸܠܥܹܗ ܒܐܝܼܕܹܗ. ܘܲܩܪܒ̣ ܠܘܵܬ̣ ܦܠܸܫܬܵܝܵܐ. [No book]
[41]ܘܗܵܐ ܦܠܸܫܬܵܝܵܐ ܐܸܬ̣ܵܐ ܘܲܩܪܸܒ̣ ܠܘܵܬ̣ ܕܵܘܝܼܕ݂. ܘܓܲܒ̣ܪܵܐ ܫܵܩܹܠ ܣܲܟ̇ܪܵܐ ܩܕ݂ܵܡܵܘܗܝ. [No book]
[42]ܘܐܵܕ݂ܝܼܩ ܦܠܸܫܬܵܝܵܐ ܘܲܚܙܵܐ ܠܕ݂ܵܘܝܼܕ݂ ܘܒܲܣܲܪ ܥܠܵܘܗܝ: ܡܸܛܠ ܕܛܲܠܝܵܐ ܗ̄ܘ̣ܵܐ ܘܲܣܡܲܩܪܵܝ: ܘܫܲܦܝܼܪ ܚܹܙܘܵܐ. [No book]
[43]ܘܐܸܡܲܪ ܦܠܸܫܬܵܝܵܐ ܠܕ݂ܵܘܝܼܕ݂: ܟܲܠܒܵܐ ܐ̄ܢܵܐ ܕܐܵܬܹܐ ܐܲܢ̄ܬ̇ ܥܠܲܝ ܒܚܘܼܛܪܵܐ: ܘܨܲܚܝܼ ܦܠܸܫܬܵܝܵܐ ܠܕ݂ܵܘܝܼܕ݂ ܒܐܲܠܵܗܵܘ̈ܗܝ. [No book]
[44]ܘܐܸܡܲܪ ܦܠܸܫܬܵܝܵܐ ܠܕ݂ܵܘܝܼܕ݂: ܬܵܐ ܠܘܵܬ̣ܝ: ܘܐܸܬ̇ܠܝܼܘܗܝ ܒܸܣܪܵܟ݂ ܠܥܵܘܦܵܐ ܕܲܫܡܲܝܵܐ: ܘܲܠܚܲܝ̄ܘܬ̣ܵܐ ܕܕܲܒ̣ܪܵܐ. [No book]
[45]ܘܐܸܡܲܪ ܕܵܘܝܼܕ݂ ܠܲܦܠܸܫܬܵܝܵܐ: ܐܲܢ̄ܬܹܐ ܐܲܢ̄ܬ̇ ܥܠܲܝ ܒܣܲܝܦܵܐ ܕܲܒ̣ܢܲܝܙܟ݂ܵܐ: ܘܲܒ̣ܣܲܟ̇ܪܵܐ: ܘܐܸܢܵܐ ܐܵܬܹܐ ܐ̄ܢܵܐ ܥܠܲܝܟ ܒܲܫܡܹܗ ܕܡܵܪܝܵܐ ܐܲܠܵܗܵܐ ܨܒ̣ܵܐܘܼܬ̣. ܕܣܸܕܪܹ̈ܐ ܕܝܼܣܪܵܝܹܠ ܚܲܣܸܕܬ̇. [No book]
[46]ܝܵܘܡܵܢܵܐ ܢܲܫ̱ܠܡܵܟ݂ ܡܵܪܝܵܐ ܒܐܝܼܕܲܝ̈: ܘܐܸܩܛܠܵܟ݂ ܘܐܸܣܲܒ̣ ܪܹܫܵܟ݂ ܡܸܢܵܟ݂: ܘܐܸܬܸܠ ܫܠܲـ̈ܕܹܐ ܕܡܲܫ̱ܪ̈ܝܵܬ̣ܵܐ ܕܲܦܠܸܫ̈ܬܵܝܹܐ ܝܵܘܡܵܢܵܐ: ܠܚܲܝ̄ܘܬ̣ܵܐ ܕܕܲܒ̣ܪܵܐ: ܘܲܠܥܵܘܦܵܐ ܕܲܫܡܲܝܵܐ. [No book]
[47]ܘܢܸܕܲܥܘܼܢ ܟܠܵܗ̇ ܐܲܪܥܵܐ: ܕܐܝܼܬ̣ ܐܲܠܵܗܵܐ ܒܝܼܣܪܵܝܹܠ. ܘܢܸܕܲܥܘܼܢ ܟܠܹܗ ܟܸܢܫܵܐ ܗܵܢܵܐ: ܕܠܵܐ ܗ̄ܘ̣ܵܐ ܒܣܲܝܦܵܐ ܘܲܒ̣ܢܲܝܙܟ݂ܵܐ ܦܵܪܹܩ ܡܵܪܝܵܐ: ܡܸܛܠ ܕܲܕ݂ܡܵܪܝܵܐ ܗ̄ܘ̣ ܩܪܵܒ̣ܵܐ: ܘܢܲܫܠܸܡܟ݂ܘܿܢ ܒܐܝܼܕܲܝ̈ܢ. [No book]
[48]ܘܗܵܐ ܦܠܸܫܬܵܝܵܐ ܐܸܬ̣ܵܐ ܘܲܩܪܸܒ̣ ܠܐܘܼܥܹܗ ܕܕ݂ܵܘܝܼܕ݂. ܘܐܸܣܬܲܪܗܲܒ̣ ܕܵܘܝܼܕ݂: ܘܲܪܗܸܛ ܠܣܸܕ݂ܪܵܐ ܠܐܘܼܪܥܹܗ ܕܲܦܠܸܫܬܵܝܵܐ. [No book]
[49]ܘܐܵܘܫܸܛ ܕܵܘܝܼܕ݂ ܐܝܼܕܹܗ ܠܡܵܐܢܹܗ: ܘܲܢܣܲܒ̣ ܡ̣ܢ ܬܲܡܵܢ ܟܹܐܦܵܐ: ܘܐܲܟ݂ܪܸܟ݂ ܘܲܡܚܵܝܗܝ ܠܲܦܠܫܬܵܝܵܐ ܒܹܝܬ̣ ܥܲܝܢܵܘ̈ܗܝ: ܘܛܸܒ̣ܥܲܬ̤ ܟܹܐܦܵܐ ܒܹܝܬ̣ ܥܲܝܢܵܘ̈ܗܝ: ܘܲܢܦܲܠ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ. [No book]
[50]ܘܲܥܫܸܢ ܕܵܘܝܼܕ݂ ܡ̣ܢ ܦܠܸܫܬܵܝܵܐ ܒܩܸܠܥܵܐ ܘܲܒ̣ܟܹܐܦܵܐ: ܘܲܡܚܵܝܗܝ ܠܲܦܠܸܫܬܵܝܵܐ ܘܩܲܛܠܹܗ. ܘܣܲܝܦܵܐ ܠܲܝܬ̇ ܒܐܝܼܕܹܗ ܕܕ݂ܵܘܝܼܕ݂. [No book]
[51]ܘܲܪܗܸܛ ܕܵܘܝܼܕ݂ ܘܩܵܡ ܥܲܠ ܦܠܸܫܬܵܝܵܐ: ܘܲܢܣܲܒ̣ ܣܲܝܦܹܗ ܘܫܲܡܛܹܗ ܡ̣ܢ ܚܸܠܬܹܗ: ܘܩܲܛܠܹܗ: ܘܲܦܣܲܩ ܪܹܫܹܗ. ܘܲܚܙܵܘ ܦܠܸܫ̈ܬܵܝܹܐ ܕܡܝܼܬ̣ ܓܲܢ̄ܒܵܪܗܘܿܢ ܘܲܥܪܲܩܘ. [No book]
[52]ܘܩܵܡܘ ܐ̄ܢܵܫܵܐ ܕܝܼܣܪܵܝܹܠ: ܘܕܲܝܗܘܼܕ݂ܵܐ: ܘܐܸܬ̣ܠܲܒܲܒ̣ܘ ܘܲܪܕܲܦܘ ܠܲܦܠܸܫ̈ܬܵܝܹܐ: ܥܕܲܡܵܐ ܠܡܲܥܠܵܢܵܐ ܕܢܲܚܠܵܐ: ܘܲܥܕܲܡܵܐ ܠܢܲܚܠܵܐ ܕܥܸܩܪܘܿܢ. ܘܲܢܦܲܠܘ ܩܛܝܼ̈ܠܹܐ ܕܲܦܠܸܫ̈ܬܵܝܹܐ ܒܐܘܼܪܚܵܐ ܕܲܫܪܝܼܢ: ܘܲܥܕܲܡܵܐ ܠܓ̣ܵܬ̣: ܘܲܥܕܲܡܵܐ ܠܥܸܩܪܘܿܢ. [No book]
[53]ܘܲܗܦܲܟ݂ܘ ܒ̈ܢܲܝ ܝܼܣܪܵܝܹܠ ܕܪܵܕ݂ܦܝܼܢ ܗ̄ܘ̣ܵܘ ܒܵܬܲܪ ܦܠܸܫ̈ܬܵܝܹܐ: ܘܒܲܙܘ ܡܲܫܪ̈ܝܵܬ̣ܗܘܿܢ. [No book]
[54]ܘܲܢܣܲܒ̣ ܕܵܘܝܼܕ݂ ܪܹܫܹܗ ܕܲܦܠܸܫܬܵܝܵܐ ܘܐܲܝـܬ̇ܝܹܗ ܠܐܘܿܪܸܫܠܸܡ: ܘܡܵܐܢܵܘ̈ܗܝ ܣܵܡ ܒܡܲܫܟ̇ܢܹܗ. [No book]
[55]ܘܟܲܕ݂ ܚܙܵܝܗܝ ܫܵܐܘܿܠ ܠܕ݂ܵܘܝܼܕ݂ ܕܲܢܦܲܩ ܠܐܘܼܪܥܹܗ ܕܲܦܠܸܫܬܵܝܵܐ: ܐܸܡܲܪ ܠܐܲܒ̣ܢܝܼܪ ܪܲܒ ܚܲܝܠܹܗ: ܒܲܪ ܡܲܢܘܼ ܛܲܠܝܵܐ ܗܵܢܵܐ. [No book]
[56]ܘܐܸܡܲܪ ܐܲܒ̣ܢܝܼܪ: ܚܲܝܵܐ ܗ̄ܝ̣ ܢܲܦ̮ܫܵܟ݂ ܡܲܠܟܵܐ ܕܠܵܐ ܝܵܕܲܥ ܐ̄ܢܵܐ. ܘܐܸܡܲܪ ܡܲܠܟܵܐ: ܫܲܐܸܠ ܐܲܢ̄ܬ̇ ܒܲܪ ܡܲܢܘܼ ܥܠܲܝܡܵܐ ܗܵܢܵܐ. [No book]
[57]ܘܟܲܕ݂ ܗܦܲܟ݂ ܕܵܘܝܼܕ݂ ܟܲܕ݂ ܩܲܛܠܹܗ ܠܲܦܠܸܫܬܵܝܵܐ: ܕܲܒ̣ܪܹܗ ܐܲܒ̣ܢܝܼܪ: ܘܐܲܥܠܹܗ ܩܕ݂ܵܡ ܫܵܐܘܿܠ: ܘܪܸܫܹܗ ܕܲܦܠܸܫܬܵܝܵܐ ܒܐܝܼܕܹܗ. [No book]
[58]ܘܐܸܡܲܪ ܠܹܗ ܫܵܐܘܿܠ: ܒܲܪ ܡ̇ܢ ܐܲܢ̄ܬ̇ ܛܲܠܝܵܐ. ܘܐܸܡܲܪ ܠܹܗ ܕܵܘܝܼܕ݂: ܒܲܪ ܥܲܒ̣ܕܵܟ݂ ܐܝܼܫܲܝ ܕܡ̣ܢ ܒܹܝܬ̣ ܠܚܸܡ. [No book]
Author: Philo
Translation: M. R. James (1917)
Source: www.sacred-texts.com

See information...
Top