|
|
| [1]ܘܟܲܕ݂ ܫܲܠܸܡ ܕܵܘܝܼܕ݂ ܠܡܹܐܡܲܪ ܠܫܵܐܘܿܠ: ܢܲܦ̮ܫܹܗ ܕܝܘܿܢܵܬ̣ܵܢ ܢܸܩܦܲܬ̤ ܠܢܲܦ̮ܫܹܗ ܕܕ݂ܵܘܝܼܕ݂: ܘܪܲܚܡܹܗ ܝܘܿܢܵܬ̣ܵܢ ܐܲܝܟ݂ ܢܲܦ̮ܫܹܗ. |
[No book] |
| [2]ܘܕܲܒ̣ܪܹܗ ܫܵܐܘܿܠ ܒܝܵܘܡܵܐ ܗܵܘ̇: ܘܠܵܐ ܫܲܒ̣ܩܹܗ ܠܡܸܗܦܲܟ݂ ܠܒܹܝܬ̣ ܐܒ̣ܘܼܗܝ. |
[No book] |
| [3]ܘܐܲܩܝܼܡܘ ܝܘܿܢܵܬ̣ܵܢ ܘܕ݂ܵܘܝܼܕ݂ ܩܝܵܡܵܐ: ܡܸܛܠ ܕܲܪܚܸܡ ܗ̄ܘ̣ܵܐ ܝܘܿܢܵܬ̣ܵܢ ܠܕ݂ܵܘܝܼܕ݂ ܐܲܝܟ݂ ܢܲܦ̮ܫܹܗ. |
[No book] |
| [4]ܘܲܫܠܲܚ ܝܘܿܢܵܬ̣ܵܢ ܦܪܝܼܣܵܐ ܕܲܥܠܵܘܗܝ ܘܝܲܗ̄ܒܹ̇ܗ ܠܕ݂ܵܘܝܼܕ݂: ܘܡܵܐܢܹ̈ܐ ܕܲܥܠܵܘܗܝ: ܥܕܲܡܵܐ ܠܣܲܝܦܹܗ: ܘܩܸܫܬܹ̇ܗ: ܘܗܸܡܝܵܢܹܗ. |
[No book] |
| [5]ܘܢܵܦܹܩ ܗ̄ܘ̣ܵܐ ܕܵܘܝܼܕ݂ ܠܐܲܝܟܵܐ ܕܲܡܫܲܕܲܪ ܗ̄ܘ̣ܵܐ ܠܹܗ ܫܵܐܘܿܠ: ܘܙܵܟܹ̇ܐ ܗ̄ܘ̣ܵܐ. ܘܐܲܩܝܼܡܹܗ ܫܵܐܘܿܠ ܥܲܠ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ. ܘܲܫܦܲܪ ܒܥܲܝ̈ܢܲܝ ܥܲܡܵܐ: ܘܐܵܦ ܒܥܲܝ̈ܢܲܝ ܥܲܒ̣ܕܵܘ̈ܗܝ ܕܫܵܐܘܿܠ. |
[No book] |
| [6]ܘܲܗܘ̤ܵܐ ܕܟܲܕ݂ ܐܸܬ̣ܵܘ: ܟܲܕ݂ ܗܦܲܟ݂ ܕܵܘܝܼܕ݂ ܟܲܕ݂ ܫܲܩܠܹܗ ܠܲܦܠܸܫܬܵܝܵܐ: ܢܦܲܩ ܢܸܫܹ̈ܐ ܡ̣ܢ ܟܠܗܹܝܢ ܩܘܼܪ̈ܝܵܐ ܕܝܼܣܪܵܝܹܠ: ܠܲܡܫܲܒܵܚܘ ܒܲܪ̈ܒ̣ܝܼܥܵܐ ܠܐܘܼܪܥܹܗ ܕܫܵܐܘܿܠ ܡܲܠܟܵܐ: ܒܲܦ̈ܠܲܓܹܐ: ܘܲܒ̣ܨܸܨ̈ܠܹܐ: ܘܲܒ̣ܚܲܕ݂ܘܼܬ̣ܵܐ.: |
[No book] |
| [7]ܘܲܡܥܲܢ̈ܝܵܢ ܗ̄ܘܲܝ̈ ܢܸܫܹܐ: ܘܓ̣ܵܚ̈ܟܵܢ: ܘܐܵܡܪܵܢ: ܩܛܲܠ ܫܵܐܘܿܠ ܒܐܲܠܦܹ̈ܐ: ܘܕ݂ܵܘܝܼܕ݂ ܒܪܸ̈ܒ̇ܘܵܬ̣ܵܐ. |
[No book] |
| [8]ܘܐܸܬ̣ܚܲܡܲܬ̣ ܫܵܐܘܿܠ ܛܵܒ̣: ܘܐܸܬ̣ܒ̇ܐܸܫ ܒܥܲܝܢܵܘ̈ܗܝ ܦܸܬ̣ܓ̣ܵܡܵܐ ܗܵܢܵܐ: ܘܐܸܡܲܪ ܝܲܗ̄ܒ̣ ܠܕ݂ܵܘܝܼܕ݂ ܪܸ̈ܒ̇ܘܵܬ̣ܵܐ: ܘܠܝܼ ܝܲܗ̄ܒ̣ ܐܲܠܦܹ̈ܐ: ܘܬ̣ܘܼܒ̣ ܕܝܼܠܹܗ ܗ̄ܝ̣ ܡܲܠܟ̇ܘܼܬ̣ܵܐ. |
[No book] |
| [9]ܘܫܲܪܝܼ ܫܵܐܘܿܠ ܠܡܸܣܩܪܹܗ ܠܕ݂ܵܘܝܼܕ݂ ܡ̣ܢ ܗܵܘ̇ ܝܵܘܡܵܐ. |
[No book] |
| [10]ܘܲܗܘ̤ܵܐ ܡ̣ܢ ܒܵܬܲܪ ܝܵܘ̈ܡܵܬ̣ܵܐ: ܘܐܲܨܠ̱ܚܲܬ̤ ܪܘܼܚܹܗ ܕܐܲܠܵܗܵܐ ܒܝܼܫܬܵܐ ܥܲܠ ܫܵܐܘܿܠ: ܘܐܸܬ̣ܢܲܒ̇ܝܼ ܒܓܘ ܒܲܝܬܹ̇ܗ: ܘܕ݂ܵܘܝܼܕ݂ ܢܵܩܹܫ ܩܕ݂ܵܡܵܘܗܝ ܐܲܝܟ݂ ܕܟ݂ܠܝܘܿܡ: ܘܡܘܿܪܵܢܝܼܬ̣ܵܐ ܒܐܝܼܕܹܗ ܕܫܵܐܘܿܠ. |
[No book] |
| [11]ܘܲܫܕ݂ܵܐ ܫܵܐܘܿܠ ܡܘܿܪܵܢܝܼܬ̣ܵܐ ܘܐܸܡܲܪ: ܐܸܡܚܸܐ ܒܕ݂ܵܘܝܼܕ݂: ܘܒܸܐܣܬ̣ܵܐ. ܘܐܸܬ̣ܟܲܪܲܟ݂ ܕܵܘܝܼܕ݂ ܡ̣̤ܢ ܩܕ݂ܵܡܵܘܗܝ ܬܲܪܬܹ̇ܝܢ ܙܲܒ̣ܢ̈ܝܼܢ |
[No book] |
| [12]ܘܲܕ݂ܚܸܠ ܫܵܐܘܿܠ ܡ̣ܢ ܩܕ݂ܵܡ ܕܵܘܝܼܕ݂: ܡܸܛܠ ܕܡܵܪܝܵܐ ܗ̄ܘ̣ܵܐ ܥܲܡܹܗ: ܘܡ̣ܢ ܫܵܐܘܿܠ ܥܒܲܪ. |
[No book] |
| [13]ܘܐܲܦܪ̱ܩܹܗ ܫܵܐܘܿܠ ܡ̣ܢ ܠܘܵܬܹܗ: ܘܥܲܒ̣ܕܹܗ ܠܹܗ ܪܲܒ̇ ܐܲܠܦܵܐ: ܘܲܗܘ̤ܐ ܢܵܦܹܩ ܘܥܵܐܹܠ ܩܕ݂ܵܡ ܥܲܡܵܐ. |
[No book] |
| [14]ܘܲܗܘ̤ܵܐ ܕܵܘܝܼܕ݂ ܒܟ݂ܠܗܹܝܢ ܐܘܼܪ̈ܚܵܬܹܗ ܣܲܟ̇ܘܼܠܬ̣ܵܢ: ܘܡܵܪܝܵܐ ܥܲܡܹܗ. |
[No book] |
| [15]ܘܲܚܙܵܐ ܫܵܐܘܿܠ ܕܣܲܟ̇ܘܼܠܬ̣ܵܢ ܗ̄ܘ̣ ܛܵܒ̣: ܘܲܕ݂ܚܸܠ ܡ̣ܢ ܩܕ݂ܵܡܵܘܗܝ. |
[No book] |
| [16]ܘܟ݂ܠܹܗ ܝܼܣܪܵܝܹܠ ܘܲܝܗܘܼܕ݂ܵܐ ܪܚܸܡ̣ܘ ܠܕ݂ܵܘܝܼܕ݂: ܡܸܛܠ ܕܗ̤ܘ ܢܵܦܹܩ ܗ̄ܘ̣ܵܐ ܘܥܵܐܹܠ ܩܕ݂ܵܡܲܝܗܘܿܢ. |
[No book] |
| [17]ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂. ܗܵܐ ܒܪܲܬ̣ܝ ܩܲܫܝܼܫܬܵܐ ܢܵܕ݂ܵܒ̣: ܐܸܬ̇ܠܝܼܗ̇ ܠܵܟ݂ ܐܲܢ̄ܬ̇ܬ̣ܵܐ: ܒܪܲܡ ܗܘ̤ܝܼ ܠܝܼ ܪܲܒ̇ ܚܲܝܠܵܐ: ܘܐܸܬ̣ܟܲܬܲܫ ܒܲܩܪ̈ܵܒ̣ܵܘܗܝ ܕܡܵܪܝܵܐ. ܘܫܵܐܘܿܠ ܐܸܡܲܪ: ܠܵܐ ܬܸܗܘܸܐ ܒܹܗ ܐܝܼܕ݂ܵܝ: ܐܸܠܵܐ ܬܸܗܘܸܐ ܒܹܗ ܐܝܼܕ݂ܵܐ ܕܲܦܠܸܫ̈ܬܵܝܹܐ. |
[No book] |
| [18]ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܡ̇ܢ ܐܸܢܵܐ: ܘܡܵܢܵܐ ܥܸܒ̣ܕܹܬ̣: ܘܡܵܢܑܵ ܐܸܢܘܿܢ ܚܲܝܲܝ̈: ܘܫܲܪܒ̇ܬܹܗ ܕܐܵܒ̣ܝ ܒܝܼܣܪܵܝܹܠ: ܕܒܲܪܬܹܗ ܕܡܲܠܟܵܐ ܐܸܣܲܒ̣. |
[No book] |
| [19]ܘܲܗܘ̤ܵܐ ܙܲܒ̣ܢܵܐ ܠܡܸܬܲܠ ܠܢܵܕ݂ܵܒ̣ ܒܪܬ ܫܵܐܘܿܠ ܠܕ݂ܵܘܝܼܕ݂: ܘܗ̤ܝ ܐܸܬ̣ܝܲܗ̄ܒܲܬ̤ ܠܥܲܙܪܵܐܹܝܠ ܕܡܢ ܡܚܘܿܠܵܐ ܐܲܢ̄ܬ̇ܬ̣ܵܐ. |
[No book] |
| [20]ܘܪܸܚܡܲܬ̣ ܡܲܠܟܸ̇ܠ ܒܲܪܬ̣ ܫܵܐܘܿܠ ܠܕ݂ܵܘܝܼܕ݂: ܘܚܵܘܝܼܘ ܠܫܵܐܘܿܠ: ܘܲܫܦܲܪ ܦܸܬ̣ܓ̣ܵܡܵܐ ܒܥܲܝܢܵܘ̈ܗܝ. |
[No book] |
| [21]ܘܐܸܡܲܪ ܫܵܐܘܿܠ: ܐܸܬ̇ܠܝܼܗ̇ ܠܹܗ: ܘܬܸܗܘܸܐ ܠܹܗ ܬܘܼܩ̱ܠܬ̣ܵܐ: ܘܬܸܗܘܸܐ ܒܹܗ ܐܝܼܕ݂ܵܐ ܕܲܦܠܸܫ̈ܬܵܝܹܐ. ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܒܬܲܪ̈ܬܲܝܗܹܝܢ ܬܸܗܘܸܐ ܠܝܼ ܚܲܬ̣ܢܵܐ ܝܵܘܡܵܢܵܐ. |
[No book] |
| [22]ܘܦܲܩܸܕ݂ ܫܵܐܘܿܠ ܠܥܲܒ̣ܕܵܘ̈ܗܝ: ܕܐܸܡܲܪܘ ܠܕ݂ܵܘܝܼܕ݂ ܒܲܪ ܐܝܼܫܲܝ: ܗܵܐ ܨܒ̣ܵܐ ܒܵܟ݂ ܡܲܠܟܵܐ: ܘܟ݂ܠܗܘܿܢ ܥܲܒ̣ܕܵܘ̈ܗܝ ܪܲܚܡܘܼܟ݂: ܗܵܫܵܐ ܗܘ̤ܝܼ ܚܲܬ̣ܢܵܐ ܠܡܲܠܟܵܐ. |
[No book] |
| [23]ܘܐܸܡܲܪܘ ܥܲܒ̣ܕܵܘ̈ܗܝ ܕܫܵܐܘܿܠ ܠܕ݂ܵܘܝܼܕ݂ ܡܸܠܹ̈ܐ ܗܵܠܹܝܢ: ܘܐܸܡܲܪ ܕܵܘܝܼܕ݂: ܒܨܝܼܪܵܐ ܗ̄ܝܼ ܗܵܕܹܐ ܒܥܲܝܢܲܝ̈ܟ̇ܘܿܢ: ܕܐܸܗܘܸܐ ܚܬ̣ܢܵܐ ܠܡܲܠܟܵܐ: ܘܐܸܢܵܐ ܓܲܒ̣ܪܵܐ ܐ̄ܢܵܐ ܡܸܣܟܹ̇ܢܵܐ ܘܲܡܨܲܥܪܵܐ. |
[No book] |
| [24]ܘܚܵܘܝܘܼܗܝ ܥܲܒ̣ܕܵܘ̈ܗܝ ܠܫܵܐܘܿܠ: ܘܐܸܡܲܪܘ ܠܹܗ ܡܸܠܹ̈ܐ ܗܵܠܹܝܢ ܕܐܸܡܲܪ ܕܵܘܝܼܕ݂. |
[No book] |
| [25]ܘܐܸܡܲܪ ܫܵܐܘܿܠ: ܗܵܟܲܢܵܐ ܐܹܡܪܘܼܢ ܠܕ݂ܵܘܝܼܕ݂: ܠܵܐ ܨܵܒܹܐ ܡܲܠܟܵܐ ܒܡܲܗܪܵܐ: ܐܸܠܵܐ ܒܡܲܐܬܹ̇ܝܢ ܥܘܼܪ̈ܠܵܘܵܬ̣ܵܐ ܕܲܦܠܸܫ̈ܬܵܝܹܐ: ܠܡܸܬ̣ܦܪܵܥܘ ܡ̣ܢ ܒܥܸܠܕܒ̣ܵܒ̣ܵܘ̈ܗܝ. ܘܡܲܠܟܵܐ ܫܵܐܘܿܠ ܐܸܬ̣ܚܲܫܲܒ̣ ܠܡܲܪܡܵܝܘܼܬܹܗ ܠܕ݂ܵܘܝܼܕ݂ ܒܐܝܼܕ݂ܵܐ ܕܲܦܠܸܫ̈ܬܵܝܹܐ. |
[No book] |
| [26]ܘܚܵܘܝܘܼܗܝ ܥܲܒ̣ܕܵܘ̈ܗܝ ܕܫܵܐܘܿܠ ܠܕ݂ܵܘܝܼܕ݂ ܡܸܠܹ̈ܐ ܗܵܠܹܝܢ: ܘܲܫܦܲܪ ܦܸܬ̣ܓ̣ܵܡܵܐ ܒܥܲܝܢܵܘ̈ܗܝ ܕܕܲܘܝܼܕ݂ ܠܡܸܗܘܵܐ ܚܲܬ̣ܢܵܐ ܠܡܲܠܟܵܐ. ܘܠܵܐ ܫܠܸܡܘ ܝܵܘ̈ܡܵܬ̣ܵܐ. |
[No book] |
| [27]ܘܩܵܡ ܕܵܘܝܼܕ݂ ܘܐܸܙܲܠ ܗ̤ܘ ܘܓܲܒ̣ܪ̈ܵܘܗܝ: ܘܩܲܛܸܠ ܡ̣ܢ ܦܠܸܫ̈ܬܵܝܹܐ ܡܲܐܬܹ̇ܝܢ ܓܲܒ̣ܪ̈ܝܼܢ: ܘܐܲܝܬ̇ܝܼ ܕܵܘܝܼܕ݂ ܥܘܼܪ̈ܠܵܘܵܬ̣ܗܘܿܢ: ܘܩܲܪܸܒ̣ ܐܸܢܹܝܢ ܠܡܲܠܟܵܐ ܕܢܸܗܘܸܐ ܚܲܬ̣ܢܵܐ ܠܡܲܠܟܵܐ. ܘܝܲܗ̄ܒ̣ ܠܹܗ ܫܵܐܘܿܠ ܠܡܲܠܟܸ̇ܠ ܒܲܪܬܹܗ ܐܲܢ̄ܬ̇ܬ̣ܵܐ. |
[No book] |
| [28]ܘܲܚܙܵܬ ܫܵܐܘܿܠ ܘܝܼܕܲܥ ܕܡܵܪܝܵܐ ܗܘ̤ܵܐ ܥܲܡ ܕܵܘܝܼܕ݂. ܘܡܲܠܟܸ̇ܠ ܒܲܪܬ̣ ܫܵܐܘܿܠ ܪܚܸܡܸܬܹܗ ܠܕ݂ܵܘܝܼܕ݂ ܛܵܒ̣. |
[No book] |
| [29]ܘܐܵܘܣܸܦ ܬܘܼܒ̣ ܫܵܐܘܿܠ ܠܡܸܕ݂ܚܲܠ ܡ̣ܢ ܩܕ݂ܵܡ ܕܵܘܝܼܕ݂: ܘܲܗܘ̤ܵܐ ܫܵܐܘܿܠ ܠܕ݂ܵܘܝܼܕ݂ ܒܥܸܠܕܒ݂ܵܒ݂ܵܐ ܟܠܗܘܿܢ ܝܵܘ̈ܡܵܬ̣ܵܐ. |
[No book] |
| [30]ܘܲܢܦܲܩܘ ܪܵܘܪ̈ܒ̣ܵܢܹܐ ܕܲܦܠܸܫ̈ܬܵܝܹܐ: ܘܲܗܘ̤ܵܐ ܒܙܲܒ̣ܢܵܐ ܕܲܢܦܲܩܘ: ܐܲܨܠܲܚ ܕܵܘܝܼܕ݂ ܡ̣ܢ ܟܠܗܘܿܢ ܥܲܒ̣ܕܵܘ̈ܗܝ ܕܫܵܐܘܿܠ: ܘܐܸܬ̣ܝܲܩܲܪ ܫܡܹܗ ܛܵܒ̣. |
[No book] |