|
|
| [No book] |
[1]ܘܲܗܘ̤ܵܐ ܓܲܒ̣ܪܵܐ ܡ̣ܢ ܒܸܢܝܵܡܹܝܢ: ܘܲܫܡܹܗ ܩܝܼܫ ܒܲܪ ܐܲܒ̣ܝܼܐܹܠ: ܒܲܪ ܨܪܘܿܪ: ܒܲܪ ܒܟ݂ܵܪܘܼܬ̣: ܒܲܪ ܐܲܦܝܼܚ: ܓܲܒ̣ܪܵܐ ܡ̣ܢ ܒܸܢܝܵܡܹܝܢ ܓܲܢ̄ܒܵܪ ܚܲܝܠܵܐ. |
| [No book] |
[2]ܘܠܹܗ ܗܘ̤ܵܐ ܒܪܵܐ ܘܲܫܡܹܗ ܫܵܐܘܿܠ: ܓܒܸܐ ܘܛܵܒ̣. ܘܠܲܝܬ̇ ܓܲܒ̣ܪܵܐ ܡ̣ܢ ܒ̈ܢܲܝ ܝܼܣܪܵܝܹܠ ܕܛܵܒ̣ ܡܸܢܹܗ: ܘܡ̣ܢ ܟܲܬ̣ܦܹܗ ܘܲܠܥܸܠ ܪܵܡ ܗ̄ܘ̣ܵܐ ܡ̣ܢ ܟܠܹܗ ܥܲܡܵܐ. |
| [No book] |
[3]ܘܐܸܒܲܕ݂ ܐܲܬܵܢܹ̈ܐ ܕܩܝܼܫ ܐܲܒ̣ܘܼܗܝ ܕܫܵܐܘܿܠ: ܘܐܸܡܲܪ ܩܝܼܫ ܠܫܵܐܘܿܠ ܒܪܹܗ: ܕܒܲܪ ܥܲܡܵܟ݂ ܠܚܲܕ݂ ܡ̣ܢ ܛܠܵܝܹ̈ܐ: ܩܘܼܡ ܙܸܠ ܒܥܝܼ ܐܲܬܵܢܹ̈ܐ. ܘܩܵܡ ܫܵܐܘܿܠ ܘܐܸܙܲܠ: ܘܲܕ݂ܒܲܪ ܥܲܡܹܗ ܠܚܲܕ݂ ܡ̣ܢ ܛܠܵܝܹ̈ܐ: ܘܐܸܙܲܠ ܠܡܸܒ̣ܥܵܐ ܐܲܬܵܢܹ̈ܐ ܕܐܲܒ̣ܘܼܗܝ. |
| [No book] |
[4]ܘܲܥܒܲܪ ܒܛܘܼܪܵܐ ܕܐܲܦܪܹܝܡ: ܘܲܥܒܲܪ ܒܐܲܪܥܵܐ ܕܓ̣ܘܼܡܪܹ̈ܐ: ܘܠܵܐ ܐܸܫܟܲܚܘ. ܘܲܥܒܲܕܪ ܒܐܲܪܥܵܐ ܕܬܲܥ̈ܠܹܐ ܘܠܲܝܬ̇: ܘܲܥܒܲܪ ܒܐܲܪܥܵܐ ܕܒܸܢܝܵܡܹܝܢ ܘܠܵܐ ܐܸܫܟܲܚܘ. |
| [No book] |
[5]ܘܐܸܬ̣ܵܘ ܠܗܘܿܢ ܠܐܲܪܥܵܐ ܕܨܘܿܪ. ܘܐܸܡܲܪ ܫܵܐܘܿܠ ܠܛܲܠܝܵܐ ܕܥܲܡܹܗ. ܬܵܐ ܢܸܗܦܘܿܟ݂: ܕܲܠܡܵܐ ܢܸܫܒ̇ܘܿܦ ܐܵܒ̣ܝ ܪܸܢܝܵܐ ܕܐܲܬܵܢܹ̈ܐ ܘܢܸܕ݂ܚܲܠ ܥܠܲܝܢ. |
| [No book] |
[6]ܘܐܸܡܲܪ ܠܹܗ ܛܲܠܝܹܗ: ܗܵܐ ܓܲܒ̣ܪܵܐ ܚܲܕ݂ ܕܐܲܠܵܗܵܐ ܒܲܩܪܝܼܬ̣ܵܐ ܗܵܕܹܐ. ܘܓܲܒ̣ܪܵܐ ܝܲܩܝܼܪ ܒܥܲܝ̈ܢܲܝ ܥܲܡܵܐ: ܘܟ݂ܠ ܕܐܵܡܲܪ ܡܹܐܬ̣ܵܐ ܐܵܬܹܐ. ܗܵܫܵܐ ܢܹܐܙܲܠ ܠܬܲܡܵܢ: ܛܵܟ݂ ܢܚܵܘܹܝܢ ܐܘܼܪܚܵܐ ܕܐܸܬܲܝܢ ܥܠܹܝܗ̇. |
| [No book] |
[7]ܘܐܸܡܲܪ ܫܵܐܘܿܠ ܠܛܲܠܝܹܗ. ܗܵܐ ܐܵܙܠ̄ܝܼܢ ܚ̄ܢܲܢ. ܡܵܢܵܐ ܢܵܘܒܸ̇ܠ ܠܓܲܒ̣ܪܵܐ ܕܐܲܠܵܗܵܐ. ܡܸܛܠ ܕܠܲܚܡܵܐ ܛܠܸܩ ܡ̣ܢ ܡܵܐܢܲܝ̈ܢ: ܘܲܙܘܵܕܹ̈ܐ ܠܲܝܬ̇ ܕܢܵܘܒܸ̇ܠ ܠܓܲܒ̣ܪܵܐ ܕܐܲܠܵܗܵܐ: ܡܸܛܠ ܕܠܲܝܬ̇ ܠܲܢ. |
| [No book] |
[8]ܘܐܵܘܣܸܦ ܛܲܠܝܵܐ ܘܲܥܢܵܐ ܠܡܵܪܹܗ ܘܐܸܡܲܪ: ܗܵܐ ܐܸܫܬ̇ܟܲܚ ܒܐܝܼܕ݂ܝ ܪܘܼܒ̣ܥܹܗ ܕܡܲܬ̣ܩܵܠܵܐ ܕܟܸܣܦܵܐ ܠܓܲܒ̣ܪܵܐ ܕܐܲܠܵܗܵܐ ܘܲܢܚܵܘܹܝܢ ܐܘܼܪܚܲܢ. |
| [No book] |
[9]ܡܸܛܠ ܕܡ̣ܢ ܠܘܼܩܕܲܡ ܒܝܼܣܪܵܝܹܠ: ܗܵܟܲܢܵܐ ܐܵܡܲܪ ܗ̄ܘ̣ܵܐ ܓܲܒ̣ܪܵܐ: ܡܵܐ ܕܐܵܙܹܠ ܗ̄ܘ̣ܵܐ ܠܡܸܒ̣ܥܵܐ ܡ̣ܢ ܐܲܠܵܗܵܐ: ܬܵܘ ܢܹܐܙܲܠ ܥܕܲܡܵܐ ܠܚܲܙܵܝܵܐ: ܡܸܛܠ ܕܲܢܒ̣ܝܼܵܐ ܕܝܵܘܡܵܢܵܐ: ܡ̣ܢ ܩܕ݂ܝܼܡ ܚܲܙܵܝܵܐ ܡܸܬ̣ܩܪܸܐ ܗ̄ܘ̣ܵܐ. |
| [No book] |
[10]ܘܐܸܡܲܪ ܫܵܐܘܿܠ ܠܛܲܠܝܹܗ. ܛܵܒ̣ ܦܸܬ̣ܓ̣ܵܡܵܟ݂: ܬܵܐ ܢܹܐܙܲܠܘ ܘܐܸܙܲܠܘ ܠܲܩܪܝܼܬ̣ܵܐ ܕܬܲܡܵܢ ܓܲܒ̣ܪܵܐ ܕܐܲܠܵܗܵܐ. |
| [No book] |
[11]ܗܸܢܘܿܢ ܣܵܠܩܝܼܢ ܒܡܲܣܩܵܢܵܐ ܕܲܩܪܝܼܬ̣ܵܐ: ܘܐܸܫܟܲܚܘ ܥܠܲܝ̈ܡܵܬ̣ܵܐ ܕܢܵܦ̈ܩܵܢ ܠܡܸܡܠܵܐ ܡܲܝ̈ܵܐ. ܘܐܸܡܲܪ ܠܗܹܝܢ ܫܵܐܘܿܠ: ܐܝܼܬ̣ ܗܵܪܟܵܐ ܚܲܙܝܵܐ. |
| [No book] |
[12]ܘܲܥܢܲܝ̈ ܘܐܵܡܪ̈ܵܢ: ܐܝܼܬ̣ ܗܵܐ ܩܕ݂ܵܡܲܝܟ: ܣܲܩܘ ܗܵܫܵܐ ܒܲܥܓܲܠ: ܡܸܛܠ ܕܝܵܘܡܵܢܵܐ ܐܸܬ̣ܵܐ ܠܲܩܪܝܼܬ̣ܵܐ: ܡܸܛܠ ܕܕܸܒ̣ܚܬ̣ܵܐ ܝܵܘܡܵܢܵܐ ܠܥܲܡܵܐ ܒܒܹܝܡ. |
| [No book] |
[13]ܘܡܵܐ ܕܥܲܠܬ̇ܘܿܢ ܠܲܩܪܝܼܬ̣ܵܐ: ܗܵܟܲܢܵܐ ܬܸܫܟ̇ܚܘܼܢܹܗ: ܥܕܲܠܵܐ ܣܵܠܹܩ ܠܒܹܝܡ ܠܡܸܠܥܲܣ. ܡܸܛܠ ܕܠܵܐ ܠܵܥܹܣ ܥܲܡܵܐ ܥܕܲܡܵܐ ܕܐܵܬܹܐ: ܡܸܛܠ ܕܗ̤ܘ ܡܒܲܪܸܟ݂ ܕܸܒ̣ܚܹ̈ܐ: ܘܒܵܬܲܪܟܸ̇ܢ ܐܵܟ݂ܠܝܼܢ ܐܲܝܠܹܝܢ ܕܲܩܪܹܝܢ. ܘܗܵܫܵܐ ܣܲܩܘ ܡܸܛܠ ܕܝܵܘܡܵܢܵܐ ܡܸܫܟ̇ܚܝܼܢ ܐ̄ܢܬ̇ܘܿܢ ܠܹܗ. |
| [No book] |
[14]ܘܲܣܠܸܩܘ ܠܲܩܪܝܼܬ̣ܵܐ. ܗܸܢܘܿܢ ܥܵܐܠܝܼܢ ܒܡܲܥܠܵܢܵܐ ܕܲܩܪܝܼܬ̣ܵܐ: ܘܗܵܐ ܫܡܘܼܐܹܝܠ ܢܵܦܹܩ ܠܐܘܼܪܥ̱ܗܘܿܢ ܠܡܸܣܲܩ ܠܒܹܝܡ. |
| [No book] |
[15]ܘܡܵܪܝܵܐ ܐܸܡܲܪ ܠܲܫܡܘܼܐܹܝܠ: ܝܵܘܡܵܐ ܚܲܕ݂ ܩܕ݂ܵܡ ܕܢܹܐܬܸܐ ܫܵܐܘܿܠ ܠܡܹܡܲܪ. |
| [No book] |
[16]ܠܙܲܒ̣ܢܵܐ ܕܲܡܚܵܪ ܐܸܫܕܲܪ ܠܘܵܬ̣ܵܟ݂ ܓܲܒ̣ܪܵܐ ܡ̣ܢ ܐܲܪܥܵܐ ܕܒܸܢܝܵܡܹܝܢ: ܡܫܘܿܚܲܝܗܝ ܠܲܡܕܲܒ̇ܪܵܢܵܐ ܥܲܠ ܥܲܡܝ ܝܼܣܪܵܝܹܠ: ܘܢܸܦܪܩܝܼܘܗܝ ܠܥܲܡܝ ܡ̣ܢ ܐܝܼܕ݂ܵܐ ܕܲܦܠܸܫܬܵܝܹ̈ܐ. ܡܸܛܠ ܕܲܚܙܹܝܬܹܗ ܠܥܲܡܝ: ܘܥܸܠܲܬ̤ ܓܥܵܬ̣ܗܘܿܢ ܠܘܵܬ̣ܝ. |
| [No book] |
[17]ܘܲܫܡܘܼܐܹܝܠ ܚܙܵܝܗܝ ܠܫܵܐܘܿܠ: ܕܡܵܪܝܵܐ ܓܒ̣ܵܝܗܝ: ܘܡܵܪܝܵܐ ܐܸܡܲܪ ܠܲܫܡܘܼܐܹܝܠ: ܗܵܐ ܓܲܒ̣ܪܵܐ ܕܐܸܡܪܹܬ̣ ܠܵܟ݂: ܗܵܢܵܐ ܢܹܐܚܘܿܕ݂ ܒܥܲܡܝ. |
| [No book] |
[18]ܘܲܩܪܸܒ̣ ܫܵܐܘܿܠ ܠܘܵܬ̣ ܫܡܘܼܐܹܝܠ ܒܓ̣ܵܘ ܬܲܪܥܵܐ: ܘܐܸܡܲܪ: ܚܵܘ ܐܲܝܟܵܘ ܒܹܝܬ̣ ܚܲܙܝܵܐ. |
| [No book] |
[19]ܘܲܥܢܵܐ ܫܡܘܼܐܹܝܠ ܘܐܸܡܲܪ ܠܫܵܐܘܿܠ: ܐܸܢܵܐ ܗ̄ܘ̣ ܚܲܙܝܵܐ: ܣܲܩ ܩܕ݂ܵܡܲܝ ܠܒܹܝܡ: ܘܐܲܟ݂ܘܿܠ ܥܲܡܝ ܝܵܘܡܵܢܵܐ: ܘܐܹܫܲܕܪܵܟ݂ ܒܨܲܦܪܵܐ: ܘܟ݂ܠ ܕܲܒ̣ܠܸܒܵܟ݂ ܐܹܚܵܘܹܝܟ݂. |
| [No book] |
[20]ܘܗܲܠ ܐܲܬܵܢܹ̈ܐ ܕܐܸܒܲܕ݂ ܠܵܟ݂: ܝܵܘܡܵܢܵܐ ܗܵܐ ܬܠܵܬ̣ܵܐ ܝܵܘ̈ܡܝܼܢ: ܠܵܐ ܬܣܝܼܡ ܠܸܒܵܟ݂ ܥܠܲܝܗܹܝܢ: ܡܸܛܠ ܕܐܸܫܬ̇ܟܲܚ. ܘܲܕ݂ܡ̇ܢ ܗ̄ܝ̣ ܟܠܵܗ̇ ܪܸܓ̇ܬ̣ܵܐ ܕܒܹܝܬ̣ ܝܼܣܪܵܝܹܠ: ܐܸܠܵܐ ܐܸܢ ܕܝܼܠܵܟ݂ ܘܲܕ݂ܒܹܝܬ̣ ܐܲܒ̣ܘܼܟ݂. |
| [No book] |
[21]ܘܲܥܢܵܐ ܫܵܐܘܿܠ ܘܐܸܡܲܪ ܠܲܫܡܘܼܐܹܝܠ: ܗܵܐ ܒܲܪ ܒܸܢܝܵܡܹܝܢ ܐ̄ܢܵܐ: ܡ̣ܢ ܙܥܘܿܪܵܐ ܕܫܲܒ̣ܛܹ̈ܐ ܕܝܼܣܪܵܝܹܠ: ܘܫܲܪܒܲܬ̣ܝ ܙܥܘܿܪܝܵܐ ܗ̄ܝܼ ܡ̣ܢ ܟܠܗܹܝܢ ܫܲܪ̈ܒ̣ܵܬ̣ܵܐ ܕܫܲܒ̣ܛܵܐ ܕܒܸܢܝܵܡܹܝܢ: ܘܲܠܡܵܢܵܐ ܐܸܡܲܪܬ̇ ܠܝܼ ܡܸܠܬ̣ܵܐ ܗܵܕܹܐ. |
| [No book] |
[22]ܘܲܕ݂ܒܲܪ ܫܡܘܼܐܹܝܠ ܠܫܵܐܘܿܠ ܘܲܠܛܲܠܝܹܗ: ܘܐܲܥܸܠ ܐܸܢܘܿܢ ܠܒܲܝܬܵܐ: ܘܝܲܗ̄ܒ̣ ܠܗܘܿܢ ܕܘܼܟ̇ܬ̣ܵܐ ܒܪܹܫ ܩܪ̈ܲܝܵܐ: ܘܗܸܢܘܿܢ ܐܲܝܟ݂ ܬܠܵܬ̣ܝܼ ܓܲܒ̣ܪ̈ܝܼܢ. |
| [No book] |
[23]ܘܐܸܡܲܪ ܫܡܘܼܐܹܝܠ ܠܛܲܒܵܚܵܐ: ܗܲܒ̣ ܡܢܵܬ̣ܵܐ ܕܝܼܗ̄ܒܹܬ̣ ܠܵܟ݂ ܘܐܸܡܪܹܬ̣ ܠܵܟ݂ ܣܝܼܡ ܠܘܵܬ̣ܵܟ݂. |
| [No book] |
[24]ܘܐܲܪܝܼܡ ܛܲܒܵܚܵܐ ܫܵܩܵܐ ܘܥܸܠܵܝܬܵܐ: ܘܣܵܡ ܩܕ݂ܵܡ ܫܵܐܘܿܠ: ܘܐܸܡܲܪ ܗܵܐ ܕܐܸܫܬ̇ܚܲܪ: ܣܝܼܡ ܩܕ݂ܵܡܲܝܟ ܘܐܲܟ݂ܘܿܠ: ܡܸܛܠ ܕܡ̣ܢ ܙܲܒ̣ܢܵܐ ܢܛܝܼܪ ܠܵܟ݂. ܘܐܸܟܲܠ ܫܵܐܘܿܠ ܥܲܡ ܫܡܘܼܐܹܝܠ ܒܝܵܘܡܵܐ ܗܵܘ̇. |
| [No book] |
[25]ܘܲܢܚܸܬ̣ ܡ̣ܢ ܒܹܝܡ ܠܲܩܪܝܼܬ̣ܵܐ: ܘܡܲܠܸܠ ܥܲܡ ܫܵܐܘܿܠ ܥܲܠ ܐܸܓܪܵܐ. |
| [No book] |
[26]ܘܩܲܕ݂ܡ ܗ̄ܘ̣ܵܐ ܟܲܕ݂ ܣܠܸܩ ܨܲܦܪܵܐ: ܘܲܩܪܵܐ ܫܡܘܼܐܹܝܠ ܠܫܵܐܘܿܠ ܠܐܸܓܵܪܵܐ: ܘܐܸܡܲܪ ܩܘܼܡ ܐܸܫܲܕܪܵܟ݂. ܘܩܵܡ ܫܵܐܘܿܠ: ܘܲܢܦܲܩܘ ܬܪ̈ܲܝܗܘܿܢ: ܗ̤ܘ ܘܲܫܡܘܼܐܹܝܠ ܠܒܲܪ. |
| [No book] |
[27]ܗܢܘܿܢ ܢܵܚܬ̇ܝܼܢ ܒܣܵܘܦܵܗ̇ ܕܲܩܪܝܼܬ̣ܵܐ: ܘܲܫܡܘܼܐܹܝܠ ܐܸܡܲܪ ܠܫܵܐܘܿܠ: ܐܸܡܲܪ ܠܛܲܠܝܵܐ ܕܢܸܥܒܲܪ ܩܕ݂ܵܡܲܝܢ: ܘܐܲܢ̄ܬ̇ ܩܘܼܡ ܐܲܝܟ݂ ܕܝܵܘܡܵܢܵܐ: ܘܐܲܫ̱ܡܥܵܟ݂ ܦܸܬ̣ܓ̣ܵܡܹܗ ܕܐܲܠܵܗܵܐ. |