➖ »
«
➖ ➕
Peshitta OT
PesOT
Book of Jubilees (Charles, 1913)
Jub(Char)
←
2 Chronicles
2Ch
30
→
[1]ܘܫܲܕܲܪ ܚܹܙܲܩܝܵܐ ܠܘܵܬ̣ ܟܠܹܗ ܝܼܣܪܵܝܹܠ: ܘܲܕ݂ܒܹܝܬ̣ ܝܼܗܘܼܕ݂ܵܐ. ܘܐܵܦ ܐܸܓ̇ܪ̈ܵܬ̣ܵܐ ܟܬܲܒ̣ ܠܲܕ݂ܒܹܝܬ̣ ܐܲܦܪܹܝܡ: ܘܠܲܕ݂ܒܹܝܬ̣ ܡܢܲܫܹܐ: ܠܡܹܐܬ̣ܵܐ ܠܒܲܝܬܹ̇ܗ ܕܡܵܪܝܵܐ ܕܒ̣ܐܘܿܪܸܫܠܸܡ: ܠܡܸܥܒܲܕ݂ ܥܹܐܕ݂ܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. [No book]
[2]ܘܐܸܬ̣ܡܲܠܲܟ݂ ܡܲܠܟܵܐ ܘܪܵܘ̱ܪ̈ܒ̣ܵܢܵܘܗܝ: ܘܟ݂ܠܵܗ̇ ܟܢܘܼܫܬܵܐ ܕܒ̣ܐܘܿܪܸܫܠܸܡ: ܠܡܸܥܒܲܕ݂ ܥܹܐܕ݂ܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܒܝܲܪܚܵܐ ܬܸܢܝܵܢܵܐ. [No book]
[3]ܡܸܛܠ ܕܠܵܐ ܡܸܫܟ̇ܚܝܼܢ ܗ̄ܘ̣ܵܘ ܠܡܸܥܒ̇ܕܹܗ ܒܹܗ ܒܙܲܒ̣ܢܵܐ ܗܵܘ̇. ܡܸܛܠ ܕܟ݂ܵܗ̈ܢܹܐ ܠܵܐ ܐܸܬ̣ܩܲܕܲܫܘ ܗ̄ܘ̣ܵܘ: ܘܡܲܠܦܵܢܵܘ̈ܗܝ ܕܥܲܡܵܐ ܠܵܐ ܐܸܬ̣ܩܦܸܣܘ ܠܐܘܿܪܸܫܠܸܡ. [No book]
[4]ܘܲܫܦܲܪ ܦܸܬ̣ܓ̣ܵܡܵܐ ܒܥܲܝܢܵܘ̈ܗܝ ܕܡܲܠܟܵܐ: ܘܲܒ̣ܥܲܝܢܵܘ̈ܗܝ ܕܟ݂ܠܹܗ ܥܲܡܵܐ ܕܝܼܣܪܵܝܹܠ. [No book]
[5]ܘܩܵܡ̣ܘ ܘܐܲܫܲܪܘ ܦܸܬ̣ܓ̣ܵܡܵܐ ܠܡܸܥܒ̇ܕܹܗ: ܘܐܲܥܒܲܪܘ ܩܵܠܵܐ ܒܟ݂ܠܹܗ ܝܼܣܪܵܝܹܠ: ܡ̣ܢ ܒܪܹܫܒܲܥ ܘܲܥܕܲܡܵܐ ܠܕ݂ܵܢ: ܠܡܹܐܬ̣ܵܐ ܘܲܠܡܸܥܒܲܕ݂ ܥܹܐܕ݂ܵܐ ܠܡܵܪܝܵܐ: ܐܲܠܵܗܵܐ ܕܝܼܣܪܵܝܹܠ: ܒܐܘܿܪܸܫܠܸܡ ܡܸܛܠ ܕܲܣܓ̣ܝܼ ܗ̄ܘ̣ܵܐ ܠܹܗ ܥܘܼܬ̣ܪ̱ܗܘܿܢ ܛܵܒ̣. [No book]
[6]ܘܐܸܙܲܠܘ ܛܒܸܠܵܘܹ̈ܐ ܒܐܸܓ̇ܪ̈ܵܬ̣ܵܐ ܕܡܲܠܟܵܐ ܘܲܕ݂ܪܵܘ̱ܪ̈ܒ̣ܵܢܵܘܗܝ: ܒܟ݂ܠܹܗ ܝܼܣܪܵܝܹܠ ܘܲܝܗܘܼܕ݂ܵܐ: ܘܲܒ̣ܦܘܼܩܕܵܢܵܐ ܕܡܲܠܟܵܐ ܘܐܵܡ̇ܪܝܼܢ: ܒܢܲܝ̈ ܝܼܣܪܵܝܹܠ: ܬܘܼܒ̣ܘ ܠܘܵܬ̣ ܡܵܪܝܵܐ ܐܲܠܵܗܹܗ ܕܐܲܒ̣ܪܵܗܵܡ ܘܕ݂ܐܝܼܣܚܵܩ ܘܕ݂ܝܼܣܪܵܝܹܠ ܘܢܸܗܦܘܿܟ݂ ܫܲܪܟܵܢܵܐ ܕܐܸܫܬ̇ܟܲܚ ܡܸܢܟ݂ܘܿܢ: ܡ̣ܢ ܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ. [No book]
[7]ܠܵܐ ܬܸܗܘܘܿܢ ܐܲܝܟ݂ ܐܲܒ̣ܵܗܲܝ̈ܟ̇ܘܿܢ: ܘܐܲܝܟ݂ ܐܲܚܲܝ̈ܟ̇ܘܿܢ: ܕܟܲܕܸ̇ܒ̣ܘ ܒܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ. ܘܝܲܗ̄ܒ̣ ܐܸܢܘܿܢ ܠܠܵܘܛܬ̣ܵܐ: ܐܲܝܟܲܢܵܐ ܕܐܲܢ̄ܬ̇ܘܿܢ ܚܵܙܹ̇ܝܢ. [No book]
[8]ܘܐܵܦ ܗܵܫܵܐ ܠܵܐ ܬܩܲܫܘܿܢ ܩܕ݂ܵܠܟ݂ܘܿܢ ܐܲܝܟ݂ ܐܲܒ̣ܵܗܲܝ̈ܟ̇ܘܿܢ ܘܥܘܿܠܘ ܠܡܲܩܕ̇ܫܵܐ ܕܐܸܬ̣ܩܲܕܲܫ ܠܥܵܠܲܡ. ܘܲܦܠܘܿܚܘ ܠܡܵܪܝܵܐ ܐܲܠܵܗܟ݂ܘܿܢ: ܕܢܲܗܦܸܟ݂ ܡܸܢܟ݂ܘܿܢ ܚܸܡܬ̣ܵܐ ܕܪܘܼܓ̣ܙܹܗ. [No book]
[9]ܡܸܛܠ ܕܐܸܬ̣ܓ̇ܠܝܼ ܥܠܲܝܟ̇ܘܿܢ: ܘܥܲܠ ܐܲܚܲܝ̈ܟ̇ܘܿܢ: ܘܥܲܠ ܒܢܲܝ̈ܟ̇ܘܿܢ ܘܗ̤ܘ ܢܸܬܸ̇ܠܟ݂ܘܿܢ ܠܪ̈ܲܚܡܹܐ ܩܕ݂ܵܡ ܫܵܒܲܝ̈ܟ̇ܘܿܢ. ܘܢܲܗܦܸܟ݂ܟ݂ܘܿܢ ܠܐܲܪܥܵܐ ܗܵܕܹܐ. ܡܸܛܠ ܕܚܲܢܵܢ ܗ̄ܘ̣ ܘܪܸܚ̱ܡܬ̣ܵܢ ܗ̄ܘ̣ ܡܵܪܝܵܐ ܐܲܠܵܗܟ݂ܘܿܢ. ܘܠܵܐ ܢܲܗܦܸܟ݂ ܐܵܦܵܘ̈ܗܝ ܡܸܢܟ݂ܘܿܢ: ܟܲܕ݂ ܬܸܬ̣ܦ̄ܢܘܿܢ ܠܘܵܬܹܗ. [No book]
[10]ܘܲܗܘ̤ܵܐ ܛܒܸܠܵܪ̈ܵܘܗܝ ܕܡܲܠܟܵܐ ܚܹܙܲܩܝܵܐ: ܥܵܒܪܝܼܢ ܗ̄ܘ̣ܵܘ ܡ̣ܢ ܩܪܸܐ ܠܲܩܪܸܐ: ܒܐܲܪܥܵܐ ܕܐܲܦܪܹܝܡ ܘܕܲܡܢܲܫܹܐ: ܘܲܥܕܲܡܵܐ ܠܲܙܒ̣ܘܿܠܘܿܢ. [No book]
[11]ܘܲܗܘ̤ܵܐ ܓܵܚܟ̇ܝܼܢ ܥܠܲܝܗܘܿܢ: ܘܡܲܡܣܪܝܼܢ ܥܠܲܝܗܘܿܢ: ܓܲܒ̣ܪܹ̈ܐ ܪ̈ܲܫܝܼܥܹܐ: ܕܐܝܼܬ̣ ܒܫܲܒ̣ܛܵܐ ܕܒܹܝܬ̣ ܐܵܫܹܝܪ: ܘܲܒ̣ܫܲܒ̣ܛܵܐ ܕܒܹܝܬ̣ ܐܲܦܪܹܝܡ: ܘܲܒ̣ܫܲܒ̣ܛܵܐ ܕܒܹܝܬ̣ ܡܢܲܫܹܐ: ܘܲܒ̣ܫܲܒ̣ܛܵܐ ܕܒܹܝܬ̣ ܙܒ̣ܘܿܠܘܿܢ. [No book]
[12]ܘܫܲܪܟܵܐ ܕܫܲܒ̣ܛܹ̈ܐ ܗܵܠܹܝܢ: ܐܸܬ̇ܬ̇ܒܲܪܘ ܒܠܸܒ̇ܗܘܿܢ. ܘܐܸܬ̣ܵܘ ܠܐܘܿܪܸܫܠܸܡ: ܥܲܡ ܫܲܒ̣ܛܵܐ ܕܒܹܝܬ̣ ܝܼܗܘܼܕ݂ܵܐ. ܘܲܗܘ̤ܵܬ̣ ܐܝܼܕܹܗ ܕܡܵܪܝܵܐ ܥܠܲܝܗܘܿܢ: ܠܡܸܬܲܠ ܠܗܘܿܢ ܠܸܒܵܐ ܚܲܕ݂: ܠܡܸܥܒܲܕ݂ ܦܘܼܩܕܵܢܵܐ ܕܡܲܠܟܵܐ ܘܲܕ݂ܪܵܘ̱ܪ̈ܒ̣ܵܢܵܘܗܝ: ܐܲܝܟ݂ ܡܸܠܬܹܗ ܕܡܵܪܝܵܐ. [No book]
[13]ܘܐܸܬ̣ܟܲܢܲܫܘ ܠܐܘܿܪܸܫܠܸܡ ܥܲܡܵܐ ܣܲܓ̇ܝܼܵܐܐ: ܠܡܸܥܒܲܕ݂ ܥܹܐܕ݂ܵܐ ܕܦܲܛܝܼܪܹ̈ܐ: ܒܝܼܲܚܵܐ ܬܸܢܝܵܢܵܐ: ܥܲܡܵܐ ܣܲܓ̇ܝܼܵܐܐ ܕܛܵܒ̣. [No book]
[14]ܘܩܵܡ̣ܘ ܘܲܥܩܲܪܘ ܡܲܕ݂ܒ̇ܚܹ̈ܐ ܕܐܝܼܬ̣ ܒܐܘܿܪܸܫܠܸܡ. ܘܟ݂ܠܗܹܝܢ ܥܠܵـ̈ـܘܵܬ̣ܵܐ ܚܪܲܒ̣ܘ: ܘܲܫܕ݂ܵܘ ܐܸܢܹܝܢ ܒܢܲܚܠܵܐ ܕܩܸܕ݂ܪܘܿܢ. [No book]
[15]ܘܲܥܒܲܕ݂ܘ ܦܸܨܚܵܐ ܒܐܲܪܒܲܥܸܣܪܵܐ: ܫܲܒ̣ܥܵܐ ܝܵܘ̈ܡܝܼܢ ܒܝܲܪܚܵܐ ܬܸܢܝܵܢܵܐ. ܘܟ݂ܵܗ̈ܢܹܐ ܘܠܹܘܵܝܹ̈ܐ ܐܸܬ̣ܩܲܕܲܫܘ ܘܐܲܝܬܝܼܘ ܥ̈ܠܵܘܵܬ̣ܵܐ ܠܒܲܝܬܹ̇ܗ ܕܡܵܪܝܵܐ. [No book]
[16]ܘܩܵܡ̣ܘ ܥܲܠ ܐܲܬ̣ܪ̱ܗܘܿܢ: ܐܲܝܟܲܢܵܐ ܕܡܸܬ̣ܚܙܹܐ: ܐܲܝܟܲܢܵܐ ܕܲܟ݂ܬ̣ܝܼܒ̣ ܒܢܵܡܘܿܣܵܐ ܕܡܘܼܫܹܐ ܢܒ̣ܝܼܵܐ ܕܡܵܪܝܵܐ. ܟܵܗ̈ܢܹܐ ܡܩܲܒ̇ܠܝܼܢ ܗ̄ܘ̣ܵܘ ܕܡܵܐ ܡ̣ܢ ܐܝܼܕ݂ܵܐ ܕܠܹܘܵܝܹ̈ܐ. [No book]
[17]ܡܸܛܠ ܕܣܲܓ̇ܝܼܐܝܼܢ ܗ̄ܘ̣ܵܘ ܓܹܝܪ ܒܥܲܡܵܐ ܕܝܼܣܪܵܝܹܠ ܕܠܵܐ ܐܸܬ̣ܩܲܕܲܫܘ. ܘܠܹܘܵܝܹ̈ܐ ܩܵܡ̣ܘ ܠܗܘܿܢ ܥܲܠ ܢܸܟ݂ܣܬ̣ܵܐ ܕܐܸܡܪܹ̈ܐ: ܘܚܵܙܹ̇ܝܢ ܟܠ ܐܲܝܢܵܐ ܕܲܕ݂ܟܸܐ: ܠܡܸܬ̣ܩܲܕܵܫܘܼ ܠܡܵܪܝܵܐ. [No book]
[18]ܡܸܛܠ ܕܣܲܓ̇ܝܼܐܝܼܢ ܗ̄ܘ̣ܵܘ ܒܥܲܡܵܐ ܕܝܼܣܪܵܝܹܠ ܡ̤ܢ ܕܒܹܝܬ̣ ܐܲܦܪܹܝܡ: ܘܲܡܢܲܫܹܐ: ܘܐܝܼܣܵܟ݂ܵܪ: ܘܲܙܒ̣ܘܿܠܘܿܢ. ܗܵܠܹܝܢ ܐܲܪܒ̇ܥܵܐ ܫܲܒ̣ܛ̈ܝܼܢ ܕܠܵܐ ܐܸܬ̇ܕܲܟ̇ܝܼܘ ܡܸܛܠ ܕܐܲܟ݂ܠܘܼܗܝ ܦܸܨܚܵܐ ܕܠܵܐ ܒܢܵܡܘܿܣ. ܡܸܛܠ ܕܨܲܠܝܼ ܚܹܙܲܩܝܵܐ ܥܠܲܝܗܘܿܢ: ܘܐܸܡܲܪ ܠܗܘܿܢ: ܐܲܠܵܗܵܐ ܛܵܒ̣ܵܐ ܢܚܣܸܐ ܚܠܵܦ ܥܲܡܵܐ ܟܠܹܗ ܕܝܼܣܪܵܝܹܠ. [No book]
[19]ܡܸܛܠ ܕܐܲܬ̣ܩܸܢ̄ܢ ܠܸܒܲܢ ܠܲܡܨܲܠܵܝܘܼ ܠܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ: ܩܘܼܕ݂ܫܵܐ ܠܵܐ ܗ̄ܘ̣ܵܐ ܕܟܸܐ ܡܸܢܲܢ. [No book]
[20]ܘܲܫܡܲܥ ܡܵܪܝܵܐ ܒܩܵܠܹܗ ܕܚܹܙܲܩܝܵܐ: ܘܐܲܣܝܹܗ ܠܥܲܡܵܐ. [No book]
[21]ܘܲܥܒܲܕ݂ܘ ܒܢܝ̈ ܝܼܣܪܵܝܹܠ: ܘܟ݂ܠ ܕܐܸܫܬ̇ܟܲܚܘ ܒܐܘܿܪܸܫܠܸܡ: ܥܹܐܕ݂ܵܐ ܕܦܲܛܝܼܪܹ̈ܐ ܫܲܒ̣ܥܵܐ ܝܵܘ̈ܡܝܼܢ ܒܚܲܕ݂ܘܼܬ̣ܵܐ ܪܲܒ̇ܬ̣ܵܐ ܡܫܲܒ̇ܚܝܼܢ ܗ̄ܘ̣ܵܘ ܠܡܵܪܝܵܐ: ܟܠ ܝܘܿܡ ܒܝܘܿܡ: ܠܹܘܵܝܹ̈ܐ ܒܬܸܫܒ̇ـ̈ـܚܵܬ̣ܵܐ ܕܦܘܼܡܗܘܿܢ: ܘܟ݂ܵܗ̈ܢܹܐ ܒܬܸܫܒ̇ـ̈ـܚܵܬ̣ܵܐ. [No book]
[22]ܘܡܲܠܸܠ̣ ܚܹܙܲܩܝܵܐ ܥܲܡ ܟܠܗܘܿܢ ܠܹܘܵܝܹ̈ܐ: ܕܲܡܫܲܒ̇ܚܝܼܢ ܗ̄ܘ̣ܵܘ ܒܬܸܫܒ̇ـ̈ـܚܵܬ̣ܵܐ ܛܵـ̈ـܒ̣ܵܬ̣ܵܐ ܩܕ݂ܵܡ ܡܵܪܝܵܐ. ܘܐܸܟܲܠ̣ܘ ܗ̄ܘ̣ܵܘ ܓܲܒ̣ܪܹ̈ܐ ܫܲܒ̣ܥܵܐ ܝܵܘ̈ܡܝܼܢ. ܘܲܡܕܲܒ̇ܚܝܼܢ ܗ̄ܘ̣ܵܘ ܕܸܒ̣ܚܹ̈ܐ ܫܲܠܡܹ̈ܐ ܠܡܵܪܝܵܐ: ܘܡܵܘܕܹ̇ܝܢ ܗ̄ܘ̣ܵܘ ܠܡܵܪܝܵܐ ܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ. [No book]
[23]ܘܐܸܬ̣ܟ̇ܠܝܼ ܟܠܹܗ ܥܲܡܵܐ. ܕܝܼܣܪܵܝܹܠ: ܠܡܸܥܒܲܕ݂ ܫܲܒ̣ܥܵܐ ܝܵܘ̈ܡܝܼܢ ܐ̄ܚܪ̈ܵܢܝܼܢ: ܘܫܲܒ̣ܥܵܐ ܝܵܘ̈ܡܝܼܢ ܒܚܲܕ݂ܘܼܬ̣ܵܐ. [No book]
[24]ܡܸܛܠ ܕܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܦܪܸܫ ܘܝܲܗ̄ܒ̣ ܠܥܲܡܵܐ: ܫܲܒ̣ܥܵܐ ܐܲܠܦ̈ܝܼܢ ܚܲܝ̈ܘܵܬ̣ܵܐ ܪܵܘ̱ܪ̈ܒ̣ܵܬ̣ܵܐ ܘܕܲܩܕ̇ܩܵـ̈ـܬ̣ܵܐ. ܘܲܦܪܲܫ ܘܝܲܗ̄ܒ̣ ܠܥܲܡܵܐ ܕܝܼܣܪܵܝܹܠ: ܬܵܘܪܹ̈ܐ ܐܵܠܹܦ: ܘܥܵـ̈ـܢܵܐ ܥܸܣܪܵܐ ܐܲܠܦ̈ܝܼܢ ܘܐܸܬ̣ܩܲܕܲܫܘ ܟܵܗ̈ܢܹܐ ܣܲܓ̇ܝܼ̈ܐܹܐ. [No book]
[25]ܘܲܚܕ݂ܝܼ ܟܠܹܗ ܥܲܡܵܐ ܕܲܝܗܘܼܕ݂ܵܐ: ܘܟ݂ܵܗ̈ܢܹܐ ܘܠܹܘܵܝܹ̈ܐ: ܘܟ݂ܠ ܥܲܡܵܐ ܕܐܵܬܹܝܢ ܡ̣ܢ ܥܲܡܵܐ ܕܝܼܣܪܵܝܹܠ: ܘܓ̣ܝܼܘܿܪܹ̈ܐ ܕܐܵܬܹܝܢ ܡ̣ܢ ܐܲܪܥܵܐ ܕܝܼܣܪܵܝܹܠ: ܘܲܕ݂ܝܵܬ̣ܒ̇ܝܼܢ ܒܲܝܗܘܼܕ݂ܵܐ. [No book]
[26]ܘܲܗܘ̤ܵܬ̣ ܚܲܕ݂ܘܼܬ̣ܵܐ ܪܲܒ̇ܬ̣ܵܐ ܒܐܘܿܪܸܫܠܸܡ. ܡܸܛܠ ܕܡ̣ܢ ܝܵܘܡܵܘ̈ܗܝ ܕܲܫܠܹܝܡܘܿܢ ܒܲܪ ܕܵܘܝܼܕ݂ ܡܲܠܟܵܐ ܕܝܼܣܪܵܝܹܠ: ܠܵܐ ܗܘ̤ܵܬ̣ ܐܲܝܟ݂ ܗܵܕܹܐ ܒܐܘܿܪܸܫܠܸܡ. [No book]
[27]ܘܩܵܡ̣ܘ ܟܵܗ̈ܢܹܐ ܘܠܹܘܵܝܹ̈ܐ: ܘܒܲܪܸܟ݂ܘ ܠܥܲܡܵܐ ܕܝܼܣܪܵܝܹܠ. ܘܲܫܡܲܥ̣ ܡܵܪܝܵܐ ܒܩܵܠܗܘܿܢ ܘܥܸܠܲܬ̤ ܨܠܘܿܬ̣ܗܘܿܢ ܠܡܵܘܬ̇ܒ̣ܵܐ ܕܩܘܼܕ݂ܫܹܗ ܠܲܫܡܲܝܵܐ. [No book]
Author: Enoch the Prophet
Source: ccel.org
Top