|
|
| [No book] |
[1]ܘܟܲܕ݂ ܓܡܲܪ ܫܠܹܝܡܘܿܢ ܠܲܡܨܲܠܵܝܘܼ: ܢܘܼܪܵܐ ܢܸܚܬܲܬ̤ ܡ̣ܢ ܫܡܲܝܵܐ: ܘܐܸܟ݂ܠܲܬ̤ ܥܠܵـ̈ـܘܵܬ̣ܵܐ ܘܕܸܒ̣ܚܹ̈ܐ. ܘܐܝܼܩܵܪܵܐ ܕܲܫܟ݂ܝܼܢܬܹܗ ܕܡܵܪܝܵܐ ܐܸܬ̣ܡ̱ܠܝܼ ܒܲܝܬܵܐ. |
| [No book] |
[2]ܘܠܵܐ ܡܸܫܟ̇ܚܝܼܢ ܗ̄ܘ̣ܵܘ ܟܗ̈ܢܹܐ ܠܡܸܥܲܠ ܠܒܲܝܬܹ̇ܗ ܕܡܵܪܝܵܐ: ܡܸܛܠ ܕܐܸܬ̣ܡ̱ܠܝܼ ܠܹܗ ܒܲܝܬܵܐ ܐܝܼܩܵܪ ܫܟ݂ܝܼܢܬܹ̇ܗ ܕܡܵܪܝܵܐ. |
| [No book] |
[3]ܘܟ݂ܠ ܒܢܲܝ̈ ܝܼܣܪܵܝܹܠ ܚܵܙܹ̇ܝܢ ܗ̄ܘ̣ܵܘ: ܟܲܕ݂ ܢܸܚܬܲܬ̤ ܢܘܼܪܵܐ: ܘܐܝܼܩܵܪ ܫܟ݂ܝܼܢܬܹ̇ܗ ܕܡܵܪܝܵܐ ܐܸܬ̣ܡ̱ܠܝܼ ܒܲܝܬܵܐ. ܘܲܢܦܲܠܘ ܥܲܠ ܐܲܦܲܝ̈ܗܘܿܢ ܥܲܠ ܐܲܪܥܵܐ ܪ̈ܨܝܼܦܵܬ̣ܵܐ: ܘܲܣܓܸܕ݂ܘ ܘܐܵܡ̇ܪܝܼܢ ܓܒܲܪ ܠܚܲܒ̣ܪܹܗ: ܐܵܘܕܵܘ ܠܡܵܪܝܵܐ ܕܛܵܒ̣ ܗ̄ܘ̣ ܘܲܠܥܵܠܡ ܛܲܝܒ̇ܘܼܬܹܗ. |
| [No book] |
[4]ܘܡܲܠܟܵܐ ܘܟ݂ܠܹܗ ܥܲܡܵܐ ܡܕܲܒ̇ܚܝܼܢ ܕܸܒ̣ܚܹ̈ܐ ܠܡܵܪܝܵܐ. |
| [No book] |
[5]ܘܕܲܒܲܚ ܡܲܠܟܵܐ ܫܠܹܝܡܘܿܢ ܕܸܒ̣̈ܚܵܬ̣ܵܐ: ܬܵܘܪܹ̈ܐ ܥܸܣܪܝܼܢ ܘܲܬ̣ܪܹܝܢ ܐܲܠܦ̈ܝܼܢ: ܘܥܵـ̈ـܢܵܐ ܡܵܐܐ ܘܥܸܣܪܝܼܢ ܐܲܠܦ̈ܝܼܢ. ܘܚܲܕܸ̇ܬ̣ ܒܲܝܬܹ̇ܗ ܕܡܵܪܝܵܐ ܡܲܠܟܵܐ ܫܠܹܝܡܘܿܢ: ܘܟ݂ܠܹܗ ܥܲܡܵܐ. |
| [No book] |
[6]ܘܟ݂ܵܗ̈ܢܹܐ ܩܵܝ̇ܡܝܼܢ ܗ̄ܘ̣ܵܘ ܥܲܠ ܬܸܫܡ̈ܫܵܬ̣ܗܘܿܢ ܘܠܹܘܵܝܹ̈ܐ ܒܡܵܐ̈ܢܹܐ ܕܬܸܫ̈ܒ̇ܚܵܬ̣ܵܐ ܡܫܲܒ̇ܚܝܼܢ ܗ̄ܘ̣ܵܘ ܩܕ݂ܵܡ ܡܵܪܝܵܐ. ܘܗܵܟܲܢܵܐ ܐܵܡ̇ܪܝܼܢ ܗ̄ܘ̣ܵܘ ܒܬܸܫ̈ܒ̇ܚܵܬ̣ܗܘܿܢ: ܐܵܘܕܵܘ ܠܡܵܪܝܵܐ ܕܛܵܒ̣ ܗ̄ܘ̣ ܘܲܠܥܵܠܲܡ ܛܲܝܒ̇ܘܼܬܹܗ: ܒܬܸܫ̈ܒ̇ܚܵܬ̣ܵܐ ܕܕ݂ܵܘܝܼܕ݂. ܘܟ݂ܵܗܢܹ̈ܐ ܡܫܲܒ̇ܚܝܼܢ ܗ̄ܘ̣ܵܘ ܒܩܲܪ̈ܢܵܬ̣ܵܐ ܟܦ̈ܝܼܦܵܬ̣ܵܐ ܘܲܦܫܝܼ̈ܛܵܬ̣ܵܐ. ܘܟ݂ܠܹܗ ܥܲܡܵܐ ܕܝܼܣܪܵܝܹܠ ܩܵܐܹ̇ܡ. |
| [No book] |
[7]ܘܩܲܕܸ̇ܫ̣ ܫܠܹܝܡܘܿܢ ܓܵܘܵܗ̇ ܕܕ݂ܵܪܬܵܐ ܕܲܩܕ݂ܵܡ ܒܲܝܬܹ̇ܗ ܕܡܵܪܝܵܐ. ܡܸܛܠ ܕܐܲܣܸܩ̣ ܠܬܲܡܵܢ ܕܸܒ̣ܚܹ̈ܐ: ܘܬܲܪܒܵܐ ܕܫܲܠܡܹ̈ܐ ܡܸܛܠ ܕܡܲܕ݂ܒ̇ܚܵܐ ܕܲܢܚܵܫܵܐ ܕܲܥܒܲܕ݂ ܫܠܹܝܡܘܿܢ: ܙܥܘܿܪ ܗ̄ܘ̣ܵܐ: ܘܠܵܐ ܡܸܫܟܲܚ ܗ̄ܘ̣ܵܐ ܠܲܡܣܲܝܒܵܪܘܼ ܕܸܒ̣ܚܹ̈ܐ: ܘܲܢܫܝܼܦܵܐ: ܘܬܲܪܒܵܐ ܕܫܲܠܡܹ̈ܐ. |
| [No book] |
[8]ܘܲܥܒܲܕ݂ ܫܠܹܝܡܘܿܢ ܒܹܗ ܒܙܲܒ̣ܢܵܐ ܗܵܘ̇: ܥܹܐܕ݂ܵܐ ܫܲܒ̣ܥܵܐ ܝܵܘ̈ܡܝܼܢ: ܘܟ݂ܠܹܗ ܝܼܣܪܵܝܹܠ ܥܲܡܹܗ: ܟܢܘܼ̈ܫܵܬ̣ܵܐ ܪܵܘ̱ܪ̈ܒ̣ܵܬ̣ܵܐ: ܡ̣ܢ ܐܲܢܛܝܘܿܟ݂ܝ̄ ܘܲܥܕܲܡܵܐ ܠܢܲܚܠܵܐ ܕܡܸܨܪܹܝܢ: ܩܕ݂ܵܡ ܡܵܪܝܵܐ ܐܲܠܵܗܲܢ. |
| [No book] |
[9]ܫܲܒ̣ܥܵܐ ܝܵܘ̈ܡܝܼܢ ܕܥܹܐܕ݂ܵܐ: ܘܫܲܒ̣ܥܵܐ ܝܵܘ̈ܡܝܼܢ ܕܚܘܼܕܵܬܹܗ ܕܒܲܝܬܵܐ. ܗܵܠܹܝܢ ܘܗܵܠܹܝܢ ܗܘ̤ܵܐ ܚܘܼܫܒܵܢܗܘܿܢ ܐܲܪܒܲܬܲܥܣܲܪ ܝܵܘ̈ܡܝܼܢ. |
| [No book] |
[10]ܘܲܒ̣ܝܵܘܡܵܐ ܕܟܸܣܐܵܐ ܒܹܗ ܒܝܲܪܚܵܐ ܕܬܸܫܪܝܼ: ܫܲܕܲܪ ܡܲܠܟܵܐ ܠܥܲܡܵܐ: ܘܒܲܪܟܹܗ ܠܡܲܠܟܵܐ ܥܲܡܵܐ. ܘܐܸܙܲܠ̣ܘ ܠܩܘܼܪ̈ܝܼܗܘܿܢ: ܟܲܕ݂ ܚܵܕܹܝܢ ܘܛܵܒ̣ ܠܸܒ̇ܗܘܿܢ: ܘܡܵܘܕܹ̇ܝܢ ܘܲܡܫܲܒ̇ܚܝܼܢ ܥܲܠ ܟܠܗܹܝܢ ܛܵܒ̣ܵـ̈ـܬ̣ܵܐ ܕܲܥܒܲܕ݂ ܡܵܪܝܵܐ ܠܕ݂ܵܘܝܼܕ݂ ܥܲܒ̣ܕܹ̇ܗ: ܘܠܲܫܠܹܝܡܘܿܢ ܒܪܹܗ: ܘܠܝܼܣܪܵܝܹܠ ܥܲܡܹܗ. |
| [No book] |
[11]ܘܲܗܘ̤ܵܐ ܕܟܲܕ݂ ܫܲܠܸܡ ܡܲܠܟܵܐ ܫܠܹܝܡܘܿܢ ܠܡܸܒ̣ܢܵܐ ܒܲܝܬܹ̇ܗ ܕܡܵܪܝܵܐ: ܘܲܠܒܲܝܬܵܐ ܕܡܲܠܟܵܐ: ܘܟ݂ܠܡܸܕܸ̇ܡ ܕܡܸܬ̣ܪܲܥܹܐ ܗ̄ܘ̣ܵܐ ܫܠܹܝܡܘܿܢ ܠܡܸܥܒܲܕ݂ ܒܒܲܝܬܹ̇ܗ ܕܡܵܪܝܵܐ: ܘܲܒ̣ܒܲܝܬܹ̇ܗ ܕܡܲܠܟܵܐ: ܡܲܟ݂ܫܲܪ ܗ̄ܘ̣ܵܐ. |
| [No book] |
[12]ܘܐܸܬ̣ܓ̇ܠܝܼ ܡܵܪܝܵܐ ܥܲܠ ܫܠܹܝܡܘܿܢ ܒܠܸܠܝܵܐ ܗܵܘ̇: ܘܐܸܡܲܪ ܠܹܗ: ܫܸܡ̇ܥܹܬ̣ ܨܠܘܿܬ̣ܵܟ݂ ܘܲܓ̣ܒܹ̇ܝܬ̣ ܕܘܼܟ̇ܬ̣ܵܐ ܗܵܕܹܐ ܠܝܼ: ܠܒܲܝܬܵܐ ܕܕܸܒ̣̈ܚܵܬ̣ܵܐ. |
| [No book] |
[13]ܐܸܢ ܐܸܨܒܹ̇ܐ ܐܸܟ݂ܠܹܐ ܫܡܲܝܵܐ: ܘܠܵܐ ܢܸܚܘܿܬ̣ ܡܸܛܪܵܐ: ܘܐܸܢ ܐܸܨܒܹ̇ܐ ܐܸܦܩܘܿܕ݂ ܥܲܠ ܩܲܡܨܵܐ: ܘܢܹܐܟ݂ܠܝܼܗ̇ ܠܐܲܪܥܵܐ: ܘܐܸܢ ܐܸܨܒܹ̇ܐ ܐܸܓܲܪܸܐ ܡܵܘܬܵܢܵܐ ܒܥܲܡܝ. |
| [No book] |
[14]ܘܢܸܬ̇ܕܲܟ݂ܪܘܼܢ ܥܲܡܝ ܕܐܸܬ̣ܩܪܝܼ ܫܹܡܝ ܥܠܲܝܗܘܿܢ: ܢܨܲܠܘܿܢ ܘܢܸܒ̣ܥܘܿܢ ܡ̣ܢ ܩܕ݂ܵܡܲܝ: ܘܢܸܗܦ̄ܟ݂ܘܼܢ ܡ̣ܢ ܐܘܼܪ̈ܚܵܬ̣ܗܘܿܢ ܒܝܼ̈ܫܵܬ̣ܵܐ. ܘܐܸܢܵܐ ܐܸܫܡܲܥ ܡ̣ܢ ܫܡܲܝܵܐ: ܘܐܸܫܒ̇ܘܿܩ ܠܲܚܛܵܗܲܝ̈ܗܘܿܢ: ܘܐܲܣܹܐ ܐܲܪܥ̱ܗܘܿܢ. |
| [No book] |
[15]ܘܐܵܦ ܗܵܫܵܐ ܥܲܝܢܲܝ̈ ܢܸܗ̱ܘ̈ܝܵܢ ܦܬ̣ܝܼ̈ܚܵܢ: ܘܐܸܕ݂ܢܲܝ̈ ܨܵܝ̈ܬܵܢ ܠܲܨܠܘܿܬ̣ܵܐ ܕܕ݂ܘܼܟ̇ܬ̣ܵܐ ܗܵܕܹܐ. |
| [No book] |
[16]ܘܐܵܦ ܗܵܫܵܐ ܓܒܹܝܬ̣ ܠܝܼ ܒܲܝܬܵܐ ܗܵܢܵܐ: ܕܬܸܗܘܹܐ ܒܹܗ ܫܟ݂ܝܼܢܲܬ̣ܝ ܠܥܵܠܲܡ ܘܢܸܗܘܘܿܢ ܥܒ̣ܵܕܲܝ ܫܲܦܝܼܪܹ̈ܐ ܘܨܸܒ̣ܝܵܢܲܝ̈ ܡܸܬ̣ܥܲܒ̣ܕ̇ܝܼܢ ܒܓ̣ܵܘܹܗ ܟܠܗܘܿܢ ܝܵܘ̈ܡܵܬ̣ܵܐ. |
| [No book] |
[17]ܘܐܲܢ̄ܬ̇ ܐܸܢ ܬܗܲܠܸܟ݂ ܩܕ݂ܵܡܲܝ: ܐܲܝܟܲܢܵܐ ܕܗܲܠܸܟ݂ ܕܵܘܝܼܕ݂ ܐܲܒ̣ܘܼܟ݂: ܒܬܲܡܝܼܡܘܼܬ̣ܵܐ ܕܠܸܒܵܐ ܘܒܲܬ̣ܪܝܼܨܘܼܬ̣ܵܐ: ܠܡܸܥܒܲܕ݂ ܟܠ ܡܸܕܸ̇ܡ ܕܦܲܩܸܕ̇ܬܵܟ݂: ܘܦܘܼܩ̈ܕܵܢܲܝ ܘܢܵܡܘܿܣܲܝ̈ ܬܸܛܲܪ. |
| [No book] |
[18]ܐܹܫܲܪܪܝܼܘܗܝ ܠܟ݂ܘܼܪܣܝܵܐ ܕܡܲܠܟ̇ܘܼܬ̣ܵܟ݂ ܠܥܵܠܲܡ: ܐܲܝܟ݂ ܕܝܼܡܝܼܬ̣ ܠܕ݂ܵܘܝܼܕ݂ ܐܲܒ̣ܘܼܟ݂: ܘܐܸܡ̇ܪܹܬ̣ ܠܹܗ: ܕܠܵܐ ܢܸܥܢܲܕ݂ ܠܵܟ݂ ܒܪܵܐ ܡ̣ܢ ܩܕ݂ܵܡܲܝ: ܕܩܵܐܹ̇ܡ ܥܲܠ ܟܘܼܪܣܝܵܐ ܕܝܼܣܪܵܝܹܠ. |
| [No book] |
[19]ܘܐܸܢ ܡܸܗܦܲܟ݂ ܬܸܗܦ̄ܟ݂ܘܿܢ ܐܲܢ̄ܬ̇ܘܿܢ ܘܲܒ̣ܢܲܝ̈ܟ̇ܘܿܢ ܡ̣ܢ ܐܘܼܪ̈ܚܵܬ̣ܝ: ܘܠܵܐ ܬܸܛܪܘܼܢ ܦܘܼܩ̈ܕܵܢܲܝ ܘܢܵܡܘܿܣܲܝ̈ ܕܝܸܗ̄ܒܹ̇ܬ̣ ܩܕ݂ܵܡܲܝܟ̇ܘܿܢ: ܘܬܸܦ̱ܠܚܘܼܢ ܠܲܦܬܲܟ݂ܪܹ̈ܐ ܕܥܲܡܡܹ̈ܐ: ܘܬܸܣܓܕ݂ܘܼܢ ܠܗܘܿܢ. |
| [No book] |
[20]ܐܹܒܲܕܲܪܟ݂ܘܿܢ ܡ̣ܢ ܐܲܪܥܵܐ ܗܵܕܹܐ ܕܝܸܗ̄ܒܹ̇ܬ̣ ܠܟ݂ܘܿܢ. ܘܒܲܝܬܵܐ ܗܵܢܵܐ ܕܩܲܕ̇ܫܹ̇ܬ̣ ܠܫܹܡܝ: ܐܸܥܩ̄ܪܝܼܘܗܝ ܡ̣ܢ ܩܕ݂ܵܡܲܝ ܘܢܸܗܘܹܐ ܝܼܣܪܵܝܹܠ ܠܡܲܬ̣ܠܵܐ ܘܲܠܬܲܫܥܝܼܬ̣ܵܐ: ܒܹܝܬ̣ ܟܠܗܘܿܢ ܥܲܡܡܹ̈ܐ. |
| [No book] |
[21]ܘܒܲܝܬܵܐ ܗܵܢܵܐ ܢܸܗܘܹܐ ܚܪܸܒ̣. ܘܟ݂ܠ ܡܲܢ ܕܢܸܥܒܲܪ ܥܠܵܘܗܝ: ܢܩܘܼܡ ܘܲܢܢܝܼܕ݂ ܪܹܫܹܗ: ܘܲܢܢܝܼܦ ܒܐܝܼܕܹܗ. ܘܢܹܐܡܪܘܼܢ: ܡܸܛܠ ܡܵܢܵܐ ܥܒܲܕ݂ ܡܵܪܝܵܐ ܗܵܟܲܢܵܐ ܠܲܩܪܝܼܬ̣ܵܐ ܗܵܕܹܐ ܪܲܒ̇ܬ̣ܵܐ: ܘܲܠܒܲܝܬܵܐ ܗܵܢܵܐ. |
| [No book] |
[22]ܘܢܹܐܡܪܘܿܢ: ܥܲܠ ܕܲܫܒܲܩܘ ܕܝܵܬܹܩܹܐ ܕܡܵܪܝܵܐ ܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ: ܕܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ ܘܐܸܙܲܠܘ ܕܚܸܠ̣ܘ ܠܐܲܠܵܗܹ̈ܐ ܕܥܲܡܡܹ̈ܐ: ܘܲܦܠܲܚܘ ܠܗܘܿܢ: ܘܲܣܓܸܕ݂ܘ ܠܗܘܿܢ. ܡܸܛܠ ܗܵܢܵܐ ܐܲܝܬ̇ܝܼ ܥܠܲܝܗܘܿܢ ܡܵܪܝܵܐ ܒܝܼ̈ܫܵܬ̣ܵܐ ܗܵܠܹܝܢ. |