|
|
| [1]ܘܠܐܵܚܵܒ̣ ܫܲܒ̣ܥܝܼܢ ܒܢ̈ܝܼܢ ܐܝܼܬ̣ ܗ̄ܘ̣ܵܐ ܒܫܵܡܪܹܝܢ. ܘܪܵܘ̱ܪ̈ܒ̣ܵܢܹܐ ܕܲܩܪܝܼܬ̣ܵܐ ܡܪܲܒܹ̇ܝܢ ܗ̄ܘ̣ܵܘ ܠܗܘܿܢ ܘܲܟ݂ܬܲܒ̣ ܝܵܗܘ̇ ܐܸܓܲܪܬܵܐ: ܘܫܲܕܲܪ ܠܫܵܡܪܹܝܢ: ܠܘܵܬ̣ ܪܵܘ̱ܪ̈ܒ̣ܵܢܹܐ ܕܐܝܼܙܲܪܥܹܝܠ: ܘܲܠܘܵܬ̣ ܣܵܒܹ̈ܐ: ܘܲܠܘܵܬ̣ ܬܵܪ̈ܐܹܐ ܕܐܵܚܵܒ̣: ܠܡܹܐܡܲܪ. |
[No book] |
| [2]ܒܫܵܥܬ̣ܵܐ ܕܡܵܛܝܵܐ ܐܸܓܲܪܬܵܐ ܗܵܕܹܐ ܠܘܵܬ̣ܟ݂ܘܿܢ: ܘܥܲܡܟ݂ܘܿܢ ܒܢܲܝ̈ ܡܵܪ̈ܲܝܟ̇ܘܿܢ: ܘܥܲܡܟ݂ܘܿܢ ܡܲܪ̈ܟ̇ܒ̣ܵܬ̣ܵܐ ܘܪ̈ܲܟ݂ܫܵܐ: ܘܩܘܼܪ̈ܝܵܐ ܥܲܫ̈ܝܼܢܵܬ̣ܵܐ: ܘܙܲܝܢܵܐ. |
[No book] |
| [3]ܘܡ̇ܢ ܕܚܵܙܹ̇ܝܢ ܐܢ̄ܬ̇ܘܿܢ ܕܛܵܒ̣ ܘܫܲܦܝܼܪ ܡ̣ܢ ܒܢܲܝ̈ ܡܵܪ̈ܲܝܟ̇ܘܿܢ: ܐܵܘܬܸ̇ܒ̣ܘ ܥܲܠ ܟܘܼܪܣܝܵܐ ܕܐܲܒ̣ܘܼܗܝ ܘܐܸܬ̣ܟܲܬܲܫܘ ܥܲܠ ܒܹܝܬ̣ ܡܵܪ̈ܲܝܟ̇ܘܿܢ. |
[No book] |
| [4]ܘܲܕ݂ܚܸܠܘ ܛܵܒ̣ ܛܵܒ̣ ܟܲܕ݂ ܫ̣ܡܲܥܘ ܘܐܸܡܲܪܘ. ܗܵܐ ܬܪܹܝܢ ܡܲܠܟ̇ܝܼ̈ܢ ܠܐ ܩܵܡ̣ܘ ܩܕ݂ܵܡܵܘܗܝ: ܐܲܝܟܲܢܵܐ ܢܩܘܼܡ ܚܢܲܢ ܩܕ݂ܵܡܵܘܗܝ. |
[No book] |
| [5]ܘܲܫܠܲܚܘ ܪܲܒ̇ܒܲܝܬܵܐ: ܘܫܲܠܝܼܛܵܐ ܕܲܩܪܝܼܬ̣ܵܐ: ܘܣܵܒܹ̈ܐ ܘܬ̣ܵܪ̈ܐܹܐ ܠܝܵܗܘ̇: ܘܐܸܡܲܪܘ ܥܲܒ̣ܕܲܝ̈ܟ ܚܢܲܢ ܘܟ݂ܠ ܕܐܵܡܲܪ ܐܲܢ̄ܬ̇ ܠܲܢ: ܢܸܥܒܸ̇ܕ݂ ܘܲܠܐ̄ܢܵܫ ܠܵܐ ܡܲܡܠ̱ܟ݂ܝܼܢ ܚ̄ܢܲܢ ܟܠ ܕܫܲܦܝܼܪ ܒܥܲܝܢܲܝ̈ܟ ܥܒܸܕ݂. |
[No book] |
| [6]ܘܲܟ݂ܬܲܒ̣ ܠܗܘܿܢ ܐܸܓܲܪܬܵܐ ܕܬܲܪܬܹ̇ܝܢ ܙܲܒ̣ܢ̈ܝܼܢ ܘܐܸܡܲܪ: ܐܸܢ ܕܝܼܠܝ ܐܲܢ̄ܬ̇ܘܿܢ: ܘܲܠܩܵܠܝ ܫܵܡ̇ܥܝܼܢ ܐܲܢ̄ܬ̇ܘܿܢ: ܣܲܒ̣ܘ ܪܹ̈ܫܹܐ ܡܵܪ̈ܲܝܟ̇ܘܿܢ: ܘܐܲܝܬܵܘ ܠܝܼ ܡܚܵܪ ܠܗܵܢܵܐ ܥܸܕܵܢܵܐ ܠܐܝܼܙܲܪܥܹܝܠ ܘܲܒ̣ܢܲܝ̈ ܡܲܠܟܵܐ ܗܵܘܹ̇ܝܢ ܗ̄ܘ̣ܵܘ ܫܲܒ̣ܥܝܼܢ ܓܲܒ̣ܪ̈ܝܼܢ. ܘܪܵܘ̱ܪ̈ܒ̣ܵܢܹܐ ܕܲܩܪܝܼܬ̣ܵܐ ܡܪܲܒܹ̇ܝܢ ܗ̄ܘ̣ܵܘ ܠܗܘܿܢ. |
[No book] |
| [7]ܘܟܲܕ݂ ܡܛܵܬ̤ ܐܸܓܲܪܬܵܐ: ܕܒܲܪܘ ܠܲܒ̣ܢܵܘ̈ܗܝ ܕܡܲܠܟܵܐ: ܘܢܲܟܸ̇ܣܘ ܐܸܢܘܿܢ ܫܲܒ̣ܥܝܼܢ ܓܲܒ̣ܪ̈ܝܼܢ. ܘܣܵܡ̣ܘ ܪܹ̈ܫܲܝܗܘܿܢ ܒܲܡܣܲܢܹ̈ܐ: ܘܫܲܕܲܪܘ ܠܐܝܼܙܲܪܥܹܝܠ. |
[No book] |
| [8]ܘܐܸܬ̣ܵܐ ܐܝܼܙܓܲܕܵܐ: ܘܚܵܘܝܹܗ ܘܐܸܡܲܪ: ܐܲܝܬܝܼܘ ܪܹ̈ܫܹܐ ܕܲܒ̣ܢܲܝ̈ ܡܲܠܟܵܐ ܘܐܸܡܲܪ: ܟܫܵܘ ܐܸܢܘܿܢ ܬܲܪܬܹ̇ܝܢ ܟܵܫ̈ܝܵܢ: ܒܡܲܥܠܵܢܵܐ ܕܬܲܪܥܵܐ ܥܕܲܡܵܐ ܠܨܲܦܪܵܐ. |
[No book] |
| [9]ܘܲܢܦܲܩ ܒܨܲܦܪܵܐ: ܘܐܸܡܲܪ ܠܟ݂ܠܹܗ ܥܲܡܵܐ: ܙܲܕ̇ܝܼܩܝܼܢ ܐܢ̄ܬ̇ܘܿܢ ܐܸܢ ܐܸܢܵܐ ܡܸܪܕܹܬ̣ ܥܲܠ ܡܵܪܝ ܘܲܩܛܲܠܬܹ̇ܗ: ܡ̇ܢ ܩܲܛܸܠ ܠܗܵܠܹܝܢ ܟܠܗܘܿܢ. |
[No book] |
| [10]ܕܲܥܘ ܡܸܟܹ̇ܝܠ ܕܠܵܐ ܢܦܲܠ̣ ܡ̣ܢ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܲܪܥܵܐ: ܡ̣ܢ ܟܠ ܡܸܕܸ̇ܡ ܕܐܸܡܲܪ ܡܵܪܝܵܐ ܥܲܠ ܒܲܝܬܹ̇ܗ ܕܐܵܚܵܒ̣. ܘܡܵܪܝܵܐ ܥ̣ܒܲܕ݂ ܡܸܕܸ̇ܡ ܕܡܲܠܸܠ ܒܐܝܼܕ݂ܵܐ ܕܥܲܒ̣ܕܹ̇ܗ ܐܹܠܝܼܵܐ. |
[No book] |
| [11]ܘܲܚܪܲܒ̣ ܝܵܗܘ̇ ܠܟ݂ܠ ܕܐܸܫܬ̇ܟܲܚ ܠܒܹܝܬ̣ ܐܵܚܵܒ̣ ܒܐܝܼܙܲܪܥܹܝܠ: ܘܟ݂ܠ ܪܵܘ̱ܪ̈ܒ̣ܵܢܵܘܗܝ ܘܩܲܪ̈ܝܼܒ̣ܘܗܝ ܘܟ݂ܘܼܡܪ̈ܵܘܗܝ. ܘܠܵܐ ܫܒܲܩ ܠܹܗ ܣܪܝܼܕ݂ܵܐ. |
[No book] |
| [12]ܘܩܵܡ ܘܐܸܙܲܠ ܘܥܲܠ ܠܫܵܡܪܹܝܢ ܘܗ̤ܘ ܥܵܩܲܪ ܗ̄ܘ̣ܵܐ ܥܠܵܘܵـ̈ـܬ̣ܵܐ ܕܒ̣ܐܘܿܪܚܵܐ. |
[No book] |
| [13]ܘܝܵܗܘ̇ ܐܸܫܟܲܚ ܠܐܲܚܵܘ̈ܗܝ ܕܐܹܚܲܙܝܵܐ ܡܲܠܟܵܐ ܕܲܝܗܘܼܕ݂ܵܐ ܘܐܸܡܲܪ ܠܗܘܿܢ ܡ̣ܢ ܐܲܢ̄ܬ̇ܘܿܢ ܐܵܡܪܝܼܢ ܠܹܗ: ܐܲܚܵܘ̈ܗܝ ܚܢܲܢ ܕܐܹܚܲܙܝܵܐ: ܘܲܢܚܸܬ̣̄ܢ ܠܲܫܠܵܡܵܐ ܕܲܒ̣̈ܢܲܝ ܡܲܠܟܵܐ ܘܕܲܒ̣̈ܢܲܝ ܡܲܠܟ̇ܬ̣ܵܐ. |
[No book] |
| [14]ܘܐܸܡܲܪ: ܐܲܚܘܿܕ݂ܘ ܐܸܢܘܿܢ ܟܲܕ݂ ܚܲܝܝܼܢ ܘܐܸܚܲܕ݂ܘ ܐܸܢܘܿܢ: ܘܢܲܟܸ̇ܣܘ ܐܸܢܘܿܢ: ܘܲܫܕ݂ܵܘ ܐܸܢܘܿܢ ܒܓ̣ܘܼܒܵܐ: ܕܒܹܝܬ̣ ܥܵܩܵܪ ܐܲܪܒ̇ܥܝܼܢ ܘܲܬ̣ܪܹܝܢ ܓܲܒ̣ܪ̈ܝܼܢ ܘܠܵܐ ܫܒܲܩ̣ ܡܸܢܗܘܿܢ ܐ̄ܢܵܫ. |
[No book] |
| [15]ܘܐܸܙܲܠ ܡ̣ܢ ܬܲܡܵܢ: ܘܐܸܫܟܲܚ ܠܝܘܿܢܵܕ݂ܵܒ̣ ܒܲܪ ܪܵܟ݂ܵܒ̣ ܟܲܕ݂ ܐܵܬܹ̇ܐ ܠܐܘܼܪܥܹܗ. ܘܒܲܪܟܹܗ ܘܐܸܡܲܪ ܠܹܗ: ܐܝܼܬ̣ ܒܠܸܒܵܟ݂ ܬܪܝܼܨܘܼܬ̣ܵܐ ܐܲܝܟ݂ ܕܲܒ̣ܠܹܒ̇ܝ ܥܲܡ ܠܸܒܵܟ݂. ܘܐܸܡܲܪ ܝܘܿܢܵܕ݂ܵܒ̣. ܐܝܼܬ̣ ܘܐܝܼܬ̣: ܘܐܸܡܲܪ ܠܹܗ ܗܲܒ̣ ܐܝܼܕ݂ܵܟ݂ ܘܝܲܗ̄ܒ̣ ܐܝܼܕܹܗ. ܘܐܲܣܩܹܗ ܠܘܵܬܹܗ ܠܡܲܪܟܲܒ̣ܬ̣ܵܐ. |
[No book] |
| [16]ܘܐܸܡܲܪ ܠܹܗ: ܬܵܐ ܥܵܡܝ: ܘܲܚܙܝܼ ܟܲܕ݂ ܛܵܐܹ̇ܢ ܐ̄ܢܵܐ ܠܡܵܪܝܵܐ. ܘܐܵܘܬ̇ܒܹܗ ܥܲܡܹܗ ܒܡܲܪܟܲܒ̣ܬ̣ܵܐ. |
[No book] |
| [17]ܘܥܲܠ ܠܫܵܡܪܹܝܢ: ܘܲܚܪܲܒ̣ ܠܟ݂ܠ ܕܐܸܫܬ̇ܟܲܚ ܒܒܲܝܬܹ̇ܗ ܕܐܵܚܵܒ̣ ܒܫܵܡܪܹܝܢ: ܥܕܲܡܵܐ ܕܐܵܘܒܸ̇ܕ݂ ܐܸܢܘܿܢ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܐܸܡܲܪ ܠܐܹܠܝܼܵܐ. |
[No book] |
| [18]ܘܟܲܢܸܫ ܝܵܗܘ̇ ܠܟ݂ܠܹܗ ܥܲܡܵܐ: ܘܐܸܡܲܪ ܠܗܘܿܢ: ܐܵܚܵܒ̣ ܦܠܲܚ ܠܒܲܥܠܐ ܩܲܠܝܼܠ. ܝܵܗܘ̇ ܢܸܦ̱ܠܚܝܼܘܗܝ ܣܲܓ̇ܝ. |
[No book] |
| [19]ܘܗܵܫܵܐ ܟܠܗܘܿܢ ܢܒ̣ܝܹ̈ܐ ܕܒܲܥܠܵܐ: ܘܟ݂ܠܗܘܿܢ ܦܵܠܚܵܘ̈ܗܝ ܘܟ݂ܠܗܘܿܢ ܟܘܼܡܪ̈ܵܘܗܝ ܙܲܡܸܢܘ ܠܝܼ. ܘܐ̄ܢܵܫ ܠܵܐ ܢܸܛܥܹܐ: ܡܸܛܠ ܕܕܸܒ̣ܚܬ̣ܵܐ ܪܲܒ̇ܬ̣ܵܐ ܥܵܒܹܕ݂ ܐ̄ܢܵܐ ܠܒܲܥܠܵܐ. ܘܟ݂ܠ ܡ̇ܢ ܕܢܸܛܥܹܐ: ܢܸܚܹܐ ܘܝܵܗܘ̇ ܥܲܒ̣ܕܵܗ̇ ܒܢܸܟ݂ܠܵܐ ܕܢܵܘܒܸ̇ܕ݂ ܠܦܵܠܚܵܘ̈ܗܝ ܕܒܲܥܠܵܐ. |
[No book] |
| [20]ܘܐܸܡܲܪ ܝܵܗܘ̇: ܙܲܡܸܢܘ ܠܟ݂ܠܹܗ ܟܸܢܫܵܐ ܠܒܲܥܠܵܐ. ܘܙܲܡܸܢܘ. |
[No book] |
| [21]ܘܫܲܕܲܪ ܝܵܗܘ̇ ܥܲܠ ܟܠܹܗ ܝܼܣܪܵܝܹܠ ܘܐܸܬ̣ܵܘ ܟܠܗܘܿܢ ܦܵܠܚܵܘ̈ܗܝ ܕܒܲܥܠܵܐ ܘܠܵܐ ܐܸܫܬ̇ܚܲܪ ܐ̄ܢܵܫ ܕܠܵܐ ܐܸܬ̣ܵܐ. ܘܥܲܠ ܠܒܹܝܬ̣ ܒܲܥܠܵܐ ܘܐܸܬ̣ܡ̱ܠܝܼ ܒܹܝܬ̣ ܒܲܥܠܵܐ ܣܦܵܐ ܒܲܣܦܵܐ. |
[No book] |
| [22]ܘܐܸܡܲܪ ܠܓܹܙܲܒ̣ܪܵܐ: ܐܲܦܸܩ ܠܒ̣ܘܼܫܹ̈ܐ ܠܟ݂ܠܗܘܿܢ ܦܵܠܚܲܝ̈ ܒܲܥܠܵܐ. ܘܐܲܦܸܩ ܠܗܘܿܢ ܠܒ̣ܘܼܫܹ̈ܐ. |
[No book] |
| [23]ܘܥܲܠ ܝܵܗܘ̇ ܘܝܘܿܢܵܕ݂ܵܒ̣ ܒܲܪ ܪܵܟ݂ܵܒ̣ ܠܒܹܝܬ̣ ܒܲܥܠܵܐ: ܘܐܸܡܲܪ ܝܵܗܘ̇ ܠܦܵܠܚܵܘ̈ܗܝ ܕܒܲܥܠܵܐ: ܒܨܵܘ ܘܲܚܙܵܘ: ܕܲܠܡܵܐ ܐܝܼܬ̣ ܥܲܡܟ݂ܘܿܢ ܗܵܪܟܵܐ ܡ̣ܢ ܥܲܒ̣ܕܵܘ̈ܗܝ ܕܡܵܪܝܵܐ: ܐܸܠܵܐ ܐܸܢ ܦܵܠܚܵܘ̈ܗܝ ܕܒܲܥܠܵܐ ܒܲܠܚܘܿܕܲܝܗܘܿܢ. |
[No book] |
| [24]ܘܥܲܠܘ ܠܡܸܥܒܲܕ݂ ܕܸܒ̣ܚܹ̈ܐ ܘܲܥ̈ܠܵܘܵܬ̣ܵܐ. ܘܝܵܗܘ̇ ܐܲܩܝܼܡ ܡ̣ܢ ܠܒܲܪ: ܬܠܵܬ̣ܡܵܐܐ ܘܲܬ̣ܡܵܢܐܝܼܢ ܓܲܒ̣ܪ̈ܝܼܢ ܘܐܸܡܲܪ ܓܲܒ̣ܪܵܐ ܕܡܸܬ̣ܦܲܠܲܛ ܡ̣ܢ ܐ̄ܢܵܫܵܐ ܕܡܲܫܠܸܡ ܐ̄ܢܵܐ ܠܟ݂ܘܿܢ: ܢܲܦ̮ܫܹܗ ܚܠܵܦ ܢܲܦ̮ܫܹܗ. |
[No book] |
| [25]ܘܟܲܕ݂ ܓܲܡܲܪ ܠܡܸܥܒܲܕ݂ ܥ̈ܠܵܘܵܬ̣ܵܐ: ܐܸܡܲܪ ܝܵܗܘ̇ ܠܪ̈ܲܗܵܛܹܐ ܘܲܠܓܲܢ̄ܒܵܪܹ̈ܐ: ܥܘܿܠܘ ܚܪܘܿܒ̣ܘ ܐܸܢܘܿܢ: ܘܐ̄ܢܵܫ ܠܵܐ ܢܸܦܘܿܩ ܘܲܚܪܲܒ̣ܘ ܐܸܢܘܿܢ ܒܦܘܼܡܵܐ ܕܚܲܪܒܵܐ: ܘܐܲܪܡ̣ܝܼܘ ܐܸܢܘܿܢ ܪ̈ܲܗܵܛܹܐ ܘܓܲܢ̄ܒܵܪܹ̈ܐ. ܘܐܸܙܲܠܘ ܥܕܲܡܵܐ ܠܲܩܪܝܼܬ̣ܵܐ ܕܒܹܝܬ̣ ܒܲܥܠܵܐ. |
[No book] |
| [26]ܘܐܲܦܸܩܘ ܩܵܝܑܹܡܬ̣ܵܐ ܕܒܹܝܬ̣ ܒܲܥܠܵܐ: ܘܐܵܘܩܕ݂ܘܼܗ̇ ܒܢܘܼܪܵܐ. |
[No book] |
| [27]ܘܲܥܩܲܪܘ ܩܵܝܑܹܡܬ̣ܵܐ ܕܒܲܥܠܵܐ. ܘܥܲܩܪܘܼܗܝ ܠܒܹܝܬ̣ ܒܲܥܠܵܐ: ܘܥܲܒ̣ܕܘܼܗܝ ܒܹܝܬ̣ ܡܲܚ̱ܪܝܵܐ ܥܕܲܡܵܐ ܠܝܵܘܡܵܢܵܐ. |
[No book] |
| [28]ܘܐܵܘܒܸ̇ܕ݂ ܝܵܗܘ̇ ܠܒܲܥܠܵܐ ܡ̣ܢ ܝܼܣܪܵܝܹܠ: |
[No book] |
| [29]ܒܲܠܚܘܿܕ݂ ܒܲܚܛܵܗܵܘ̈ܗܝ ܕܝܼܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܠܵܐ ܣܛܵܐ ܝܵܗܘ̇ ܡ̣ܢ ܒܵܬܲܪܗܘܿܢ ܕܥܸܓ̣̈ܠܹܐ ܕܕܲܗܒ̣ܵܐ ܕܲܒ̣ܒܹܝܬ̣ ܐܹܝܠ ܘܕܲܒ̣ܕ݂ܵܢ. |
[No book] |
| [30]ܘܐܸܡܲܪ ܡܵܪܝܵܐ ܠܝܵܗܘ̇: ܚܠܵܦ ܕܲܥܒܲܕ̇ܬ̇ ܕܫܲܦܝܼܪ ܩܕ݂ܵܡܝ: ܘܟ݂ܠ ܕܲܒ̣ܠܹܒ̇ܝ ܥܒܲܕ̇ܬ̇ ܠܲܕ݂ܒܹܝܬ̣ ܐܵܚܵܒ̣: ܒ̈ܢܲܝܵܐ ܪ̈ܒ̣ܝܼܥܵܝܹܐ ܢܸܬ̇ܒ̣ܘܼܢ ܠܵܟ݂ ܥܲܠ ܟܘܼܪܣܝܵܐ ܕܝܼܣܪܵܝܹܠ. |
[No book] |
| [31]ܘܝܵܗܘ̇ ܠܵܐ ܢܛܲܪ ܠܲܡܗܲܠܵܟ݂ܘܼ ܒܢܵܡܘܿܣܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܡ̣ܢ ܟܠܹܗ ܠܸܒܹ̇ܗ. ܘܠܵܐ ܣܛܵܐ ܡ̣ܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܕܐܲܚܛܝܼ ܠܝܼܣܪܵܝܹܠ. |
[No book] |
| [32]ܘܲܒ̣ܝܵܘ̈ܡܵܬ̣ܵܐ ܗܵܢܘܿܢ: ܫܲܪܝܼ ܡܵܪܝܵܐ ܠܲܡܥܵܩܘܼ ܒܝܼܣܪܵܝܹܠ. ܘܲܡ̣ܚܵܐ ܐܸܢܘܿܢ ܚܙܵܐܹܝܠ ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ. |
[No book] |
| [33]ܡ̣ܢ ܝܘܿܪܕ̇ܢܵܢ ܒܡܲܕ݂ܢܵܚܲܝ̈ ܫܸܡܫܵܐ: ܘܟ݂ܠܵܗ̇ ܐܪܥܵܐ ܕܓܸܠܥܵܕ݂ ܘܲܕ݂ܓܵܕ݂: ܘܲܕ݂ܪܘܼܒܹܝܠ ܘܕܲܡܢܲܫܹܐ: ܡ̣ܢ ܥܲܕܘܵܥܝܼܪ ܕܥܲܠ ܣܸܦܬ̣ܵܐ ܕܢܲܚܠܵܐ ܕܐܲܪܢܘܿܢ: ܘܓܸܠܥܵܕ݂ ܘܡܲܬ̣ܢܝܼܢ. |
[No book] |
| [34]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܵܗܘ̇: ܘܟ݂ܠ ܡܸܕܸ̇ܡ ܕܲܥܒܲܕ݂. ܘܟ݂ܠܵܗ̇ ܓܲܢ̄ܒܵܪܘܼܬܹܗ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. |
[No book] |
| [35]ܘܲܫܟܸܒ̣ ܝܵܗܘ̇ ܥܲܡ ܐܲܒ̣ܵܗܵܘ̈ܗܝ: ܘܩܲܒ̣ܪܘܼܗܝ ܒܫܵܡܪܹܝܢ. ܘܐܲܡ̣ܠܸܟ݂ ܝܵܗܘ̇ ܐܵܚܵܙ ܒܪܹܗ ܒܵܬ̣ܪܹܗ. |
[No book] |
| [36]ܘܝܵܘ̈ܡܵܬ̣ܵܐ ܕܐܲܡ̣ܠܸܟ݂ ܝܵܗܘ̇ ܥܲܠ ܝܼܣܪܵܝܹܠ ܥܸܣܪܝܼܢ ܘܲܬ̣ܡܵܢܹܐ ܫܢ̈ܝܼܢ ܒܫܵܡܪܹܝܢ. |
[No book] |