➖ »
«
➖ ➕
Peshitta OT
PesOT
The Second Book of Clement
2Clem
←
2 Kings
2Kg
14
→
[1]ܒܲܫܢܲܬ̣ ܬܲܪܬܹ̇ܝܢ ܠܝܵܗܘܿܐܵܫ ܒܲܪ ܝܵܗܘܿܐܵܚܵܙ ܡܲܠܟܵܐ ܕܝܼܣܪܵܝܹܠ: ܐܲܡ̣ܠܸܟ݂ ܐܵܡܘܿܨܝܼܵܐ ܒܲܪ ܝܘܿܐܵܫ ܡܲܠܟܵܐ ܕܲܝܗܘܼܕ݂ܵܐ. [No book]
[2]ܒܲܪ ܥܸܣܪܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܟܲܕ݂ ܐܲܡ̣ܠܸܟ݂. ܘܥܸܣܪܝܼܢ ܘܲܬ̣ܫܲܥ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܗ̇ ܕܐܸܡܹܗ: ܝܵܗܘܿܥܲܕܵܢ ܡ̣ܢ ܐܘܿܪܸܫܠܸܡ. [No book]
[3]ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܒܘܼܡ ܠܵܐ ܐܲܝܟ݂ ܕܵܘܝܼܕ݂ ܐܲܒ̣ܘܼܗܝ. ܐܲܝܟ݂ ܕܲܥܒܲܕ݂ ܝܘܿܐܵܫ ܐܲܒ̣ܘܼܗܝ ܥ̣ܒܲܕ݂. [No book]
[4]ܒܪܲܡ ܥ̈ܠܵܘܵܬ̣ܵܐ ܠܵܐ ܐܲܥ̣ܒܲܪ: ܘܲܥܕܲܟܹ̇ܝܠ ܥܲܡܵܐ ܡܕܲܒ̇ܚܝܼܢ ܗ̄ܘ̣ܵܘ ܘܡܲܥܛܪܝܼܢ ܥܲܠ ܥ̈ܠܵܘܵܬ̣ܵܐ. [No book]
[5]ܘܟܲܕ݂ ܐܸܬ̣ܚܲܝܠܲܬ̤ ܡܲܠܟ̇ܘܼܬ̣ܵܐ ܒܐܝܼܕܹܗ: ܩܲܛܸܠ̣ ܠܥܲܒ̣ܕܵܘ̈ܗܝ ܕܲܩܛܲܠܘ ܠܝܘܿܐܵܫ ܡܲܠܟܵܐ ܐܲܒ̣ܘܼܗܝ. [No book]
[6]ܘܠܲܒ̣ܢܲܝ̈ ܩܵܛܘܿܠܹ̈ܐ ܠܵܐ ܩܲܛܸܠ: ܐܲܝܟ݂ ܕܲܟ݂ܬ̣ܝܼܒ̣ ܒܣܸܦܪܵܐ ܕܢܵܡܘܿܣܹܗ ܕܡܘܼܫܹܐ: ܕܦܲܩܸܕ݂ ܡܵܪܝܵܐ ܘܐܸܡܲܪ: ܠܵܐ ܢܡܘܼܬ̣ܘܼܢ ܐܲܒ̣ܵܗܹ̈ܐ ܥܲܠ ܐܲܦܲܝ̈ ܒܢܲـ̈ـܝܵܐ: ܘܲܒ̣ܢܲـ̈ـܝܵܐ ܠܵܐ ܢܡܘܼܬ̣ܘܼܢ ܥܲܠ ܐܲܦܲܝ̈ ܐܲܒ̣ܵܗܲܝ̈ܗܘܿܢ: ܐܸܠܵܐ ܐ̄ܢܵܫ ܒܲܚܛܵܗܵܘ̈ܗܝ ܢܡܘܼܬ̣. [No book]
[7]ܘܗ̤ܘ ܚ̣ܪܲܒ̣ ܠܐܲܕ݂ܘܿܡ ܒܓܲܡܠܲܚ ܥܸܣܪܝܼܢ ܐܲܠܦ̈ܝܼܢ. ܘܲܚܪܲܒ̣ ܠܲܣܠܲܥ ܒܲܩܪܵܒ̣ܵܐ: ܘܲܩ̣ܪܵܐ ܫܡܵܗ̇ ܢܲܩܬ̣ܵܐܹܝܠ ܥܕܲܡܵܐ ܠܝܵܘܡܵܢܵܐ. [No book]
[8]ܗܵܝܕܹ̇ܝܢ ܫܲܕܲܪ ܐܵܡܘܿܨܝܼܵܐ ܕܲܝܗܘܼܕ݂ܵܐ ܐܝܼܙ̈ܓܲܕܹ̇ܐ: ܠܘܵܬ̣ ܝܵܗܘܿܐܵܫ ܒܲܪ ܝܵܗܘܿܐܵܚܵܙ ܒܲܪ ܝܵܗܘܿ ܡܲܠܟܵܐ ܕܝܼܣܪܵܝܹܠ: ܘܐܸܡܲܪ: ܬܵܐ ܢܲܩܒܸ̇ܠ ܐܲܦܹ̈ܐ ܚܲܕ݂ ܕܚܲܕ݂. [No book]
[9]ܘܲܫܠܲܚ ܝܵܗܘܿܐܵܫ ܡܲܠܟܵܐ ܕܝܼܣܪܵܝܹܠ ܠܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܘܐܸܡܲܪ: ܚܘܿܚܵܐ ܕܲܒ̣ܠܸܒ̣ܢܵܢ ܫ̣ܠܲܚ ܠܐܲܪܙܵܐ ܕܲܒ̣ܠܸܒ̣ܢܵܢ: ܗܲܒ̣ ܒܲܪܬ̣ܵܟ݂ ܠܒܹܪܝ ܐܲܢ̄ܬ̇ܬ̣ܵܐ. ܘܥܸܒ̣ܪܲܬ̤ ܚܲܝ̄ܘܬ̣ܵܐ ܕܲܒ̣ܠܸܒ̣ܢܵܢ: ܘܕܵܫܬܹܗ ܠܚܘܿܚܵܐ. [No book]
[10]ܡܸܚܪܲܒ̣ ܚܪܲܒ̣ܬ̇ ܠܐܲܕ݂ܘܿܡ: ܘܐܲܪܝܼܡܵܟ݂ ܠܸܒܵܟ݂. ܐܸܬ̣ܝܲܩܲܪ ܘܬܸܒ̣ ܒܒܲܝܬܵܟ݂: ܘܠܵܐ ܬܸܬ̣ܓܲܪܸܐ ܠܒ̣ܝܼܫܬܵܐ: ܘܬܸܦܸܠ ܐܲܢ̄ܬ̇ ܘܲܝܗܘܼܕ݂ܵܐ ܥܲܡܵܟ݂. [No book]
[11]ܘܠܵܐ ܫܲܡ̣ܥܹܗ ܐܵܡܘܿܨܝܼܵܐ. ܘܲܣܠܸܩ ܝܵܗܘܿܐܵܫ ܡܲܠܟܵܐ ܕܝܼܣܪܵܝܹܠ ܘܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܘܐܲܩܒܸ̇ܠܘ ܐܲܦܹ̈ܐ ܕܲܚܕ݂ܵܕܹ̈ܐ ܒܒܹܝܬ̣ ܫܡܸܫ ܕܲܝܗܘܼܕ݂ܵܐ: ܗ̤ܘ ܘܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ. [No book]
[12]ܘܐܸܬ̇ܬ̇ܒܲܪ ܝܼܗܘܼܕ݂ܵܐ ܡ̣ܢ ܩܕ݂ܵܡ ܝܼܣܪܵܝܹܠ: ܘܲܥܪܲܩ̣ܘ ܐ̄ܢܵܫ ܠܡܲܫܟ̇ܢܹܗ. [No book]
[13]ܘܠܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܚܕܹ̇ܗ ܝܵܗܘܿܐܵܫ ܡܲܠܟܵܐ ܕܝܼܣܪܵܝܹܠ ܒܒܹܝܬ̣ ܫܡܸܫ: ܘܥܲܠ̣ ܠܐܘܿܪܸܫܠܸܡ ܘܲܬ̣ܪܲܥ̣ ܒܫܘܼܪܵܐ ܕܐܘܿܪܸܫܠܸܡ ܡ̣ܢ ܬܲܪܥܵܐ ܕܐܲܦܪܹܝܡ ܘܲܥܕܲܡܵܐ ܠܬܲܪܥܵܐ ܕܙܵܘܝܼܬ̣ܵܐ: ܐܲܪܒܲܥܡܵܐܐ ܐܲܡ̈ܝܼܢ. [No book]
[14]ܘܲܢܣܲܒ̣ ܟܠܹܗ ܕܲܗܒ̣ܵܐ ܘܟܸܣܦܵܐ: ܘܟ݂ܠܗܘܿܢ ܡܵܐܢܹ̈ܐ ܕܐܸܫܬ̇ܟܲܚܘ ܒܒܲܝܬܹ̇ܗ ܕܡܵܪܝܵܐ ܘܲܒ̣ܒܹܝܬ̣ ܓܲܙܵܐ ܕܡܲܠܟܵܐ: ܘܲܒ̣ܢܲܝ̈ ܥܪܘܿܒ̣ܵܐ. ܘܲܗܦܲܟ݂ ܠܫܵܡܪܹܝܢ. [No book]
[15]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܵܗܘܿܐܵܫ ܘܟ݂ܠܡܸܕܸ̇ܡ ܕܲܥܒܲܕ݂ ܘܓܲܢ̄ܒܵܪܘܼܬܹܗ: ܘܕܸܐܬ̣ܟܲܬܲܫ ܥܲܡ ܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. [No book]
[16]ܘܲܫܟܸܒ̣ ܝܵܗܘܿܐܵܫ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܫܵܡܪܹܝܢ ܥܲܡ ܡܲܠ̈ܟܹ̇ܐ ܕܝܼܣܪܵܝܹܠ. ܘܐܲܡ̣ܠܸܟ݂ ܝܘܿܪܲܒ̣ܥܲܡ ܒܪܹܗ ܒܵܬ̣ܪܹܗ. [No book]
[17]ܘܲܚܝܵܐ ܐܵܡܘܿܨܝܼܵܐ ܒܲܪ ܝܘܿܐܵܫ ܡܲܠܟܵܐ ܕܲܝܗܘܼܕ݂ܵܐ: ܡ̣ܢ ܒܵܬܲܪ ܕܡܝܼܬ̣ ܝܵܗܘܿܐܵܫ ܒܲܪ ܝܵܗܘܿܐܵܚܵܙ ܡܲܠܟܵܐ ܕܝܼܣܪܵܝܹܠ: ܚܲܡܫܲܥܸܣܪܹ̈ܐ ܫܢ̈ܝܼܢ. [No book]
[18]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܵܡܘܿܨܝܼܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. [No book]
[19]ܘܲܡܪܲܕ݂ ܥܠܵܘܗܝ ܡܸܪܕܵܐ ܒܐܘܿܪܸܫܠܸܡ: ܘܲܥܪܲܩ ܠܹܗ ܠܲܠܟ݂ܝܼܫ ܘܫܲܕܲܪܘ ܒܵܬ̣ܪܹܗ ܠܲܠܟ݂ܝܼܫ: ܘܩܲܛܠܘܼܗܝ ܬܲܡܵܢ. [No book]
[20]ܘܫܲܩܠܘܼܗܝ ܘܐܸܬ̣ܵܘ ܥܲܠ ܪ̈ܲܟ݂ܫܵܐ. ܘܐܸܬ̣ܩܒܲܪ ܒܐܘܿܪܸܫܠܸܡ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂. [No book]
[21]ܘܲܕ݂ܒܲܪܘ ܟܠܹܗ ܥܲܡܵܐ ܕܲܝܗܘܼܕ݂ܵܐ ܠܥܘܿܙܝܼܵܐ: ܘܗ̤ܘ ܒܲܪ ܫܸܬ̇ܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ. ܘܐܲܡ̣ܠ̱ܟ݂ܘܼܗܝ ܚܠܵܦ ܐܵܡܘܿܨܝܼܵܐ ܐܲܒ̣ܘܼܗܝ. [No book]
[22]ܘܗ̤ܘ ܒܢ̣ܵܐ ܠܐܲܝܠܲܬ̣: ܘܐܵܘܬ̇ܒ̣ܵܗ̇ ܠܲܝܗܘܼܕ݂ܵܐ: ܡ̣ܢ ܒܵܬܲܪ ܕܲܫܟܸܒ̣ ܡܲܠܟܵܐ ܥܲܡ ܐܲܒ̣ܵܗܵܘ̈ܗܝ. [No book]
[23]ܒܲܫܢܲܬ̣ ܚܲܡܫܲܥܸܣܪܹ̈ܐ ܠܐܵܡܘܿܨܝܼܵܐ ܒܲܪ ܝܘܿܐܵܫ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܝܘܿܪܲܒ̣ܥܲܡ ܒܲܪ ܝܵܗܘܿܐܵܫ ܒܲܪ ܝܵܗܘܿܐܵܚܵܙ ܡܲܠܟܵܐ ܕܝܼܣܪܵܝܹܠ: ܒܫܵܡܪܹܝܢ ܐܲܪܒ̇ܥܝܼܢ ܘܲܚܕ݂ܵܐ ܫܢ̈ܝܼܢ. [No book]
[24]ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܠܵܐ ܣܛ̣ܵܐ ܡ̣ܢ ܟܠܗܘܿܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ: ܘܲܒ̣ܗܘܿܢ ܗܲܠܸܟ݂. [No book]
[25]ܘܗ̤ܘ ܐܲܗ̣ܦܲܟ݂ ܬܚܘܼܡܵܐ ܠܝܼܣܪܵܝܹܠ: ܡ̣ܢ ܡܲܥܠܵܢܵܐ ܕܲܚܡܵܬ̣: ܘܲܥܕܲܡܵܐ ܠܝܲܡܵܐ ܕܥܲܪܵܒ̣ܵܐ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܡܲܠܸܠ ܒܐܝܼܕ݂ܵܐ ܕܥܲܒ̣ܕܹ̇ܗ ܝܵܘܢܵܢ ܒܲܪ ܡܲܬܲܝ ܢܒ̣ܝܼܵܐ ܕܡ̣ܢ ܓܲܕ݂ ܚܦܲܪ. [No book]
[26]ܡܸܛܠ ܕܲܚܙܵܐ ܡܵܪܝܵܐ ܫܘܼܥܒܵܕܹܗ ܕܝܼܣܪܵܝܹܠ ܕܡܲܪܝܼܪ ܛܵܒ̣. ܘܠܲܝܬ̇ ܕܐܵܣܲܪ: ܘܠܵܐ ܕܫܵܪܹܐ: ܘܐܵܦܠܵܐ ܕܲܡܥܲܕܲܪ ܠܝܼܣܪܵܝܹܠ. [No book]
[27]ܘܠܵܐ ܐܸܡܲܪ ܡܵܪܝܵܐ ܠܡܸܥܛܵܐ ܫܡܹܗ ܕܝܼܣܪܵܝܹܠ ܡ̣ܢ ܬܚܹܝܬ̣ ܫܡܲܝܵܐ. ܘܲܦܪܲܩ̣ ܐܸܢܘܿܢ ܒܐܝܼܕܹܗ ܕܝܘܿܪܲܒ̣ܥܲܡ ܒܲܪ ܝܵܗܘܿܐܵܫ ܒܲܪ ܝܵܗܘܿܐܵܚܵܙ. [No book]
[28]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܪܲܒ̣ܥܲܡ ܘܟ݂ܠܡܸܕܸ̇ܡ ܕܲܥܒܲܕ݂: ܘܓܲܢ̄ܒܵܪܘܼܬܹܗ: ܘܕܸܐܬ̣ܟܲܬܲܫ ܘܐܲܗ̣ܦܸܟ݂ ܕܲܪܡܣܘܿܩ ܘܲܚܡܵܬ̣ ܠܝܼܣܪܵܝܹܠ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. [No book]
[29]ܘܲܫܟܸܒ̣ ܝܘܿܪܲܒ̣ܥܲܡ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܥܲܡ ܐܲܒ̣ܵܗܲܘ̈ܗܝ ܥܲܡ ܡܲܠ̈ܟܹ̇ܐ ܕܝܼܣܪܵܝܹܠ ܘܐܲܡ̣ܠܸܟ݂ ܙܟܲܪܝܵܐ ܒܪܹܗ ܒܵܬ̣ܪܹܗ. [No book]
Translation: Charles H. Hoole (1885)
Source: www.earlychristianwritings.com
Top