➖ »
«
➖ ➕
Peshitta OT
PesOT
The Second Book of Clement
2Clem
←
2 Kings
2Kg
17
→
[1]ܒܲܫܢܲܬ̣ ܬܲܪܬܲܥܸܣܪܹ̈ܐ ܫܢ̈ܝܼܢ ܠܐܵܚܵܙ ܡܲܠܟܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ ܗܘܿܫܲܥ ܒܲܪ ܐܲܠܵܐ ܥܲܠ ܝܼܣܪܵܝܹܠ: ܒܫܵܡܪܹܝܢ ܬܫܲܥ ܫܢ̈ܝܼܢ. [No book]
[2]ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ. ܒܪܲܡ ܠܵܐ ܐܲܝܟ݂ ܡܲܠ̈ܟܹ̇ܐ ܕܝܼܣܪܵܝܹܠ ܕܲܗܘ̤ܵܘ ܩܕ݂ܵܡܵܘܗܝ. [No book]
[3]ܥܠܵܘܗܝ ܣܠܸܩ ܫܲܠܡܵܢܸܥܣܲܪ ܡܲܠܟܵܐ ܕܐܵܬ̣ܘܿܪ ܘܲܗܘ̤ܵܐ ܠܹܗ ܗܘܿܫܲܥ ܥܲܒ̣ܕܵܐ: ܘܐܲܝܬ̇ܝܼ ܠܹܗ ܩܘܼܪ̈ܒܵܢܹܐ. [No book]
[4]ܘܐܸܫܟܲܚ ܡܲܠܟܵܐ ܕܐܵܬ̣ܘܿܪ ܒܗܘܿܫܲܥ ܡܸܪܕܵܐ. ܘܫܲܕܲܪ ܐܝܼܙ̈ܓܲܕܹ̇ܐ ܠܘܵܬ̣ ܣܹܐܘܿ ܡܲܠܟܵܐ ܕܡܸܨܪܹܝܢ. ܘܠܵܐ ܐܲܣܸܩ ܩܘܼܪ̈ܒܵܢܹܐ: ܠܡܲܠܟܵܐ ܕܐܵܬ̣ܘܿܪ ܐܲܝܟ݂ ܕܲܒ̣ܟ݂ܠ ܫܢ̣ܵܐ. ܘܲܟ݂ܠܵܝܗܝ ܡܲܠܟܵܐ ܕܐܵܬ̣ܘܿܪ: ܘܐܲܣܪܹܗ ܒܒܹܝܬ̣ ܐܲܣܝܼܪܹ̈ܐ. [No book]
[5]ܘܲܣܠܸܩ ܡܲܠܟܵܐ ܕܐܵܬ̣ܘܿܪ ܥܲܠ ܟܠܵܗ̇ ܐܲܪܥܵܐ. ܘܲܣܠܸܩ ܥܲܠ ܫܵܡܪܹܝܢ: ܘܲܫܪܵܐ ܥܠܹܝܗ̇ ܬܠܵܬ̣ ܫܢ̈ܝܼܢ. [No book]
[6]ܘܲܒ̣ܫܲܢ̄ܬܵܐ ܬܫܝܼܥܵܝܬܵܐ ܠܗܘܿܫܲܥ: ܟܒܲܫ ܡܲܠܟܵܐ ܕܐܵܬ̣ܘܿܪ ܠܫܵܡܪܹܝܢ: ܘܓܲܠܝܼ ܠܲܒ̣ܢܲܝ̈ ܝܼܣܪܵܝܹܠ ܠܐܵܬ̣ܘܿܪ. ܘܐܵܘܬܸ̇ܒ̣ ܐܸܢܘܿܢ ܒܲܚܠܲܝܝ ܘܲܒ̣ܚܵܒ̣ܵܪ ܢܗܲܪܓܵܘܙܵܢ ܩܘܼܪ̈ܝܵܐ ܕܡܵܕܲܝ. [No book]
[7]ܘܲܗܘ̤ܵܐ ܕܟܲܕ݂ ܚܛܵܘ ܒܢܲܝ̈ ܝܼܣܪܵܝܹܠ ܠܡܵܪܝܵܐ ܐܲܠܵܗܗܘܿܢ: ܕܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܡ̣ܢ ܬܚܹܝܬ̣ ܐܝܼܕ݂ܵܐ ܕܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܲܕ݂ܚܸܠܘ ܠܐܲܠܵܗܹ̈ܐ ܐ̄ܚܪ̈ܵܢܹܐ. [No book]
[8]ܘܗܲܠܸܟ݂ܘ ܒܢܵܡܘܿܣܹ̈ܐ ܕܥܲܡܡܹ̈ܐ: ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ. [No book]
[9]ܘܐܸܡܲܪܘ ܒܢܲܝ̈ ܝܼܣܪܵܝܹܠ ܡܸܠܹ̈ܐ ܕܠܵܐ ܫܲܦܝܼܪ̈ܵܢ ܥܲܠ ܡܵܪܝܵܐ ܐܲܠܵܗܗܘܿܢ: ܗܸܢܘܿܢ ܘܡܲܠܟܲܝ̈ܗܘܿܢ ܘܲܒ̣ܢܵܘ ܠܗܘܿܢ ܥ̈ܠܵܘܵܬ̣ܵܐ ܒܟ݂ܠ ܩܘܼܪ̈ܝܼܗܘܿܢ: ܡ̣ܢ ܡܲܓܕܲܠ ܢܵܛܘܿܪܹ̈ܐ ܘܲܥܕܲܡܵܐ ܠܲܩܪܝܼܬ̣ܵܐ ܥܲܫܝܼܢܬܵܐ. [No book]
[10]ܘܐܲܩܝܼܡ̣ܘ ܠܗܘܿܢ ܩܵܝ̈ܡܵܬܵܐ ܘܕܸܚ̈ܠܵܬ̣ܵܐ: ܥܲܠ ܟܠ ܪܵܡܬ̣ܵܐ ܕܪܵܡܵܐ ܘܲܬ̣ܚܹܝܬ̣ ܟܠ ܐܝܼܠܵܢ ܕܥܲܒ̇ܝܼܛ. [No book]
[11]ܘܣܵܡܘ ܬܲܡܵܢ ܒܸܣܡܹ̈ܐ ܥܲܠ ܥ̈ܠܵܘܵܬ̣ܵܐ: ܐܲܝܟ݂ ܥܲܡܡܹ̈ܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡܲܝܗܘܿܢ. ܘܲܥ̣ܒܲܕ݂ܘ ܦܸܬ̣ܓ̣ܵܡܹ̈ܐ ܕܒ̣ܝܼܫܝܼܢ ܠܡܲܪܓܵܙܘܼ ܩܕ݂ܵܡ ܡܵܪܝܵܐ. [No book]
[12]ܘܲܦܠܲܚܘ ܠܕܸܚ̈ܠܵܬ̣ܵܐ: ܕܐܸܡܲܪ ܠܗܘܿܢ ܡܵܪܝܵܐ ܠܵܐ ܬܸܥܒ̇ܕ݂ܘܼܢ ܦܸܬ̣ܓ̣ܵܡܵܐ ܗܵܢܵܐ. [No book]
[13]ܘܐܲܣܗܸܕ݂ ܡܵܪܝܵܐ ܒܝܼܣܪܵܝܹܠ ܘܒܲܝܗܘܼܕ݂ܵܐ ܒܐܝܼܕ݂ܵܐ ܕܟ݂ܠܗܘܿܢ ܥܲܒ̣ܕܵܘ̈ܗܝ ܢܒ̣̈ܝܹܐ ܘܟ݂ܠ ܚܲܙܵܝܹ̈ܐ: ܘܐܸܡܲܪ ܬܘܼܒ̣ܘ ܡ̣ܢ ܐܘܼܪ̈ܚܵܬ̣ܟ݂ܘܿܢ ܒܝܼ̈ܫܵܬ̣ܵܐ: ܘܛܲܪܘ ܦܘܼܩ̈ܕܵܢܲܝ ܘܲܩܝܵܡܲܝ̈: ܐܲܝܟ݂ ܢܵܡܘܿܣܹ̈ܐ ܕܦܸܩܕܹ̇ܬ̣ ܠܐܲܒ̣ܵܗܲܝ̈ܟ̇ܘܿܢ: ܘܐܲܝܟ݂ ܕܫܸܠܚܹܬ̣ ܠܗܘܿܢ ܒܐܝܼܕ݂ܵܐ ܕܥܲܒ̣̈ܕܲܝ ܢܒ̣̈ܝܹܐ. [No book]
[14]ܘܠܵܐ ܫܡܲܥܘ: ܘܩܲܫܝܼܘ ܩܕ݂ܵܠܗܘܿܢ ܡ̣ܢ ܩܕ݂ܵܠܵܐ ܕܐܲܒ̣ܵܗܲܝ̈ܗܘܿܢ: ܘܠܵܐ ܗܲܝܡܸܢܘ ܒܡܵܪܝܵܐ ܐܲܠܵܗܗܘܿܢ. [No book]
[15]ܘܐܲܣܠܝܼܘ ܩܝܵـ̈ـܡܲܝ ܘܦܘܼܩ̈ܕܵܢܲܝ ܕܦܲܩܕܹܬ̣ ܠܐܲܒ̣ܵܗܲܝ̈ܗܘܿܢ: ܘܣܵܗ̈ܕ̇ܘܵܬ̣ܵܐ ܕܐܲܣ̱ܗ̇ܕܹܬ̣ ܒܗܘܿܢ. ܘܐܸܙܲܠ̣ܘ ܒܵܬܲܪ ܠܵܐ ܡܸܕܸ̇ܡ: ܘܡܸܕܸ̇ܡ ܠܵܐ ܝܑܼܬܲܪܘ. ܐܸܠܵܐ ܐܸܙܲܠܘ ܒܵܬܲܪ ܥܲܡܡܹ̈ܐ ܕܦܲܩܸܕ݂ ܐܸܢܘܿܢ ܡܵܪܝܵܐ ܕܠܵܐ ܬܸܥܒ̇ܕ݂ܘܼܢ ܐܲܟ݂ܘܵܬ̣ܗܘܿܢ. [No book]
[16]ܘܲܫܒܲܩܘ ܟܠܗܘܿܢ ܦܘܼܩܕܵܢܵܘ̈ܗܝ ܕܡܵܪܝܵܐ ܐܲܠܵܗܗܘܿܢ. ܘܲܥܒܲܕ݂ܘ ܠܗܘܿܢ ܢܣܝܼ̈ܟܹܐ ܬܪܹܝܢ ܥܸܓ̣ܠܹ̈ܐ. ܘܲܥܒܲܕ݂ܘ ܕܸܒ̣ܚܹ̈ܐ ܠܕܸܚ̈ܠܵܬ̣ܵܐ: ܘܲܣܓܸܕ݂ܘ ܠܟ݂ܠ ܚܲܝ̈ܠܹܐ ܕܫܡܲܝܵܐ: ܘܲܦܠܲܚܘ ܠܒܲܥܠܵܐ. [No book]
[17]ܘܐܲܥܒܲܪܘ ܒܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ ܒܢܘܼܪܵܐ. ܘܲܩܨܲܡ̣ܘ ܩܸܨܡܹ̈ܐ ܘܢܲܚܸܫܘ ܘܐܸܬ̣ܚܲܫܲܒ̣ܘ ܠܡܸܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ ܠܡܲܪܓܵܙܘܼܬܹܗ. [No book]
[18]ܘܲܪܓܸ̇ܙ ܡܵܪܝܵܐ ܛܵܒ̣ ܥܲܠ ܝܼܣܪܵܝܹܠ: ܘܐܲܥܒܲܪ ܐܸܢܘܿܢ ܡ̣ܢ ܩܕ݂ܵܡܵܘܗܝ. ܘܠܵܐ ܐܸܫܬ̇ܚܲܪܘ: ܐܸܠܵܐ ܐܸܢ ܫܲܒ̣ܛܵܐ ܕܲܝܗܘܼܕ݂ܵܐ ܒܲܠܚܘܿܕ݂. [No book]
[19]ܘܐܵܦ ܒ̈ܢܲܝ ܝܼܗܘܼܕ݂ܵܐ ܠܵܐ ܢܛܲܪܘ ܦܘܼܩܕܵܢܵܘ̈ܗܝ ܕܡܵܪܝܵܐ ܐܲܠܵܗܗܘܿܢ. ܘܗܲܠܸܟ݂ܘ ܒܢܵܡܘܿܣܹܗ ܕܝܼܣܪܵܝܹܠ: ܘܲܥܒܲܕ݂ܘ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܐܲܪܓ̇ܙܘܼܗܝ ܟܠܗܘܿܢ ܝܵܘ̈ܡܵܬ̣ܵܐ. [No book]
[20]ܘܐܲܣܠܝܼ ܡܵܪܝܵܐ ܠܟ݂ܠܹܗ ܙܲܪܥܹܗ ܕܝܼܣܪܵܝܹܠ. ܘܨܲܥܲܪ ܐܸܢܘܿܢ: ܘܐܲܫܠܸܡ ܐܸܢܘܿܢ ܒܐܝܼܕ݂ܵܐ ܕܒ̣ܵܙܘܿܙܹ̈ܐ: ܥܕܲܡܵܐ ܕܲܫܕ݂ܵܐ ܐܸܢܘܿܢ ܡ̣ܢ ܩܕ݂ܵܡܵܘܗܝ. [No book]
[21]ܡܸܛܠ ܕܲܦܪܲܩܘ ܕܒܹܝܬ̣ ܝܼܣܪܵܝܹܠ ܡ̣ܢ ܒܵܬܲܪ ܕܵܘܝܼܕ݂: ܘܐܲܡܠܸܟ݂ܘ ܥܠܲܝܗܘܿܢ ܠܝܘܿܪܲܒ̣ܥܲܡ ܒܲܪ ܢܵܒ̣ܵܛ ܘܐܲܛܥܝܼ ܝܘܿܪܲܒ̣ܥܲܡ ܠܝܼܣܪܵܝܹܠ ܡ̣ܢ ܒܵܬܲܪ ܡܵܪܝܵܐ: ܘܐܲܚܛܝܼ ܐܸܢܘܿܢ ܚܛܵܗܹ̈ܐ ܪܵܘ̱ܪ̈ܒܹܐ. [No book]
[22]ܘܗܲܠܸܟ݂ܘ ܒܢܲܝ̈ ܝܼܣܪܵܝܹܠ ܒܟ݂ܠܗܘܿܢ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܕܲܥܒܲܕ݂: ܘܠܵܐ ܣܛܵܘ ܡܸܢܗܘܿܢ. [No book]
[23]ܥܕܲܡܵܐ ܕܐܲܥܒܲܪ ܡܵܪܝܵܐ ܠܝܼܣܪܵܝܹܠ ܡ̣ܢ ܩܕ݂ܵܡܵܘܗܝ: ܐܲܝܟ݂ ܕܐܸܡܲܪ ܡܵܪܝܵܐ ܒܐܝܼܕ݂ܵܐ ܕܟ݂ܠܗܘܿܢ ܢܒ̣ܝܹ̈ܐ. ܘܓܲܠܝܼ ܐܸܢܘܿܢ ܠܲܒ̣̈ܢܲܝ ܝܼܣܪܵܝܹܠ ܡ̣ܢ ܐܲܪܥܗܘܿܢ ܠܐܵܬ̣ܘܿܪ: ܥܕܲܡܵܐ ܠܝܵܘܡܵܢܵܐ. [No book]
[24]ܘܐܲܝܬ̇ܝܼ ܡܲܠܟܵܐ ܕܐܵܬ̣ܘܿܪ ܡ̣ܢ ܒܵܒܹܠ: ܘܡ̣ܢ ܟܘܿܬ̣: ܘܡ̣ܢ ܥܵܘܵܐ: ܘܡ̣ܢ ܚܡܵܬ̣: ܘܡ̣ܢ ܣܦܲܪܘܹܝܡ. ܘܐܵܘܬܸ̇ܒ̣ ܐܸܢܘܿܢ ܒܩܘܼܪ̈ܝܵܐ ܕܫܵܡܪܹܝܢ: ܚܠܵܦ ܒܢܲܝ̈ ܝܼܣܪܵܝܹܠ. ܘܝܸܪܬ̣ܘ ܠܫܵܡܪܹܝܢ: ܘܝܸܬܸܒ̣ܘ ܒܩܘܼܪ̈ܝܵܗ̇. [No book]
[25]ܘܡ̣ܢ ܪܹܫܝܼܬ̣ܵܐ ܟܲܕ݂ ܝܼܬܸܒ̣ܘ ܬܲܡܵܢ ܠܵܐ ܕܚܸܠ̣ܘ ܠܡܵܪܝܵܐ. ܘܫܲܕܲܪ ܡܵܪܝܵܐ ܥܠܲܝܗܘܿܢ ܐܲܪ̈ܝܵܘܵܬ̣ܵܐ: ܘܲܗܘ̤ܵܘ ܡܩܲܛܠܝܼܢ ܒܗܘܿܢ. [No book]
[26]ܘܚܵܘܝܼܘ ܠܡܲܠܟܵܐ ܕܐܵܬ̣ܘܿܪ: ܘܐܸܡܲܪܘ ܠܹܗ: ܥܲܡܡܹ̈ܐ ܕܓܲܠܝܼܬ̇ ܘܐܵܘܬܸ̇ܒ̣ܬ̇ ܒܩܘܼܪ̈ܝܵܐ ܕܫܵܡܪܹܝܢ: ܠܵܐ ܝܵܕ݂ܥܝܼܢ ܕܝܼܢܵܐ ܕܐܲܠܵܗܵܗ̇ ܕܐܲܪܥܵܐ. ܘܫܲܕܲܪ ܥܠܲܝܗܘܿܢ ܐܲܪ̈ܝܵܘܵܬ̣ܵܐ: ܘܗܵܐ ܡܩܲܛܠܝܼܢ ܒܗܘܿܢ: ܡܸܛܠ ܕܠܵܐ ܝܵܕ݂ܥܝܼܢ ܕܝܼܢܵܐ ܕܐܲܠܵܗܵܗ̇ ܕܐܲܪܥܵܐ. [No book]
[27]ܘܲܦܩܲܕ݂ ܡܲܠܟܵܐ ܕܐܵܬܘܿܪ: ܘܐܸܡܲܪ: ܐܵܘܒܸ̇ܠܘ ܠܬܲܡܵܢ ܚܲܕ݂ ܡ̣ܢ ܟܵܗܢܹ̈ܐ ܕܓܲܠܝܼܬ̇ܘܿܢ ܡ̣ܢ ܬܲܡܵܢ. ܘܢܹܐܙܲܠ ܘܢܸܬܸ̇ܒ̣ ܬܲܡܵܢ: ܘܢܸܠܸܦ ܐܸܢܘܿܢ ܕܝܼܢܵܐ ܕܐܲܠܵܗܵܗ̇ ܕܐܲܪܥܵܐ. [No book]
[28]ܘܐܸܬ̣ܵܐ ܚܲܕ݂ ܡ̣ܢ ܟܵܗ̈ܢܹܐ ܕܓܲܠܝܼ ܡ̣ܢ ܫܵܡܪܹܝܢ. ܘܝܸܬܸܒ̣ܘ ܒܒܹܝܬ̣ ܐܹܝܠ ܘܲܗܘ̤ܵܐ ܡܲܠܸܦ ܠܗܘܿܢ: ܐܲܝܟܲܢܵܐ ܢܸܕ݂ܚ̄ܠܘܼܢ ܠܡܵܪܝܵܐ. [No book]
[29]ܘܲܗܘ̤ܵܘ ܦܵܠܚܝܼܢ ܥܲܡ ܥܲܡ ܐܵܠܵܗܹܗ. ܘܲܫܒܲܩܘ ܒܵـ̈ـܬܹ̇ܐ ܕܲܥܠܵـ̈ـܘܵܬ̣ܵܐ ܕܲܥܒܲܕ݂ܘ ܒܡܵܫܪܹܝܢ ܥܲܡ ܥܲܡ ܒܩܘܼܪ݁ܝܼܗܘܿܢ: ܟܲܪ ܕܗܸܢܘܿܢ ܝܵܬ̣ܒ̇ܝܼܢ. [No book]
[30]ܘܐ̄ܢܵܫܲܝ̈ ܒܵܒܹܠ ܦܵܠܚܝܼܢ ܠܣܵܟ݂ܘܼܬ̣ ܒܢܘܼܬ̣. ܘܐ̄ܢܵܫܲܝ̈ ܟܘܵܬ̣ ܦܵܠܚܝܼܢ ܠܢܸܪܓܲܠ. ܘܐ̄ܢܵܫܲܝ̈ ܚܡܵܬ̣ ܦܵܠܚܝܼܢ ܠܐܲܫܝܼܡܵܐ. [No book]
[31]ܘܥܵܘܵܝܹ̈ܐ ܦܵܠܚܝܼܢ ܠܝܲܒ̣ܙܲܚ ܘܲܠܬܲܪܬܲܩ. ܘܲܣܦܲܪ̈ܘܵܝܹܐ ܡܵܘܩ̄ܕ݂ܝܼܢ ܒܢܲܝ̈ܗܘܿܢ ܒܢܘܼܪܵܐ: ܠܐܲܪܕܲܡܠܸܟ݂ ܘܠܲܥܡܵܠܹܝܩ ܐܲܠܵܗܹ̈ܐ ܕܲܣܦܲܪܘܹܝܡ. [No book]
[32]ܘܲܗܘ̤ܵܘ ܕܵܚܠܝܼܢ ܠܡܵܪܝܵܐ. ܘܲܥܒܲܕ݂ܘ ܠܗܘܿܢ ܡܸܢܗܘܿܢ ܟܘܼܡܪܹ̈ܐ ܕܲܥܠܵـ̈ـܘܵܬ̣ܵܐ: ܘܲܗܘ̤ܵܘ ܦܵܠܚܝܼܢ ܠܗܘܿܢ: ܒܒܹܝܬ̣ ܥܠܵـ̈ـܘܵܬ̣ܵܐ. [No book]
[33]ܠܡܵܪܝܵܐ ܕܵܚܠܝܼܢ ܗ̄ܘ̣ܸܘ: ܘܠܲܐܠܵܗܲܝ̈ܗܘܿܢ ܦܵܠܚܝܼܢ ܗ̄ܘ̣ܵܘ: ܐܲܝܟ݂ ܢܵܡܘܿܣܵܐ ܕܥܲܡܡܹ̈ܐ: ܕܓܲܠܝܼܘ ܒܢܲܝ̈ ܝܼܣܪܵܝܹܠ ܡ̣ܢ ܐܲܪܥ̱ܗܘܿܢ. [No book]
[34]ܥܕܲܡܵܐ ܠܝܵܘܡܵܢܵܐ. ܥܲܠ ܕܲܫܒܲܩܘ ܠܡܵܪܝܵܐ: ܘܥܵܒ̣ܕ̇ܝܼܢ ܐܲܝܟ݂ ܢܵܡܘܿܣܹ̈ܐ ܕܥܲܡܡܹ̈ܐ: ܘܠܵܐ ܕܵܚ̇ܠܝܼܢ ܠܡܵܪܝܵܐ. ܘܠܵܐ ܥܵܒ̣ܕ̇ܝܼܢ ܐܲܝܟ݂ ܩܝܵܡܵܐ. ܘܐܲܝܟ݂ ܕܝܼܢܵܐ: ܘܐܲܝܟ݂ ܢܵܡܘܿܣܵܐ: ܘܐܲܝܟ݂ ܦܘܼܩܕܵܢܵܐ ܕܦܲܩܸܕ݂ ܡܵܪܝܵܐ ܠܲܒ̣ܢܲܝ̈ ܝܲܥܩܘܿܒ̣: ܕܫܲܡܝܼ ܫܡܹܗ ܝܼܣܪܵܝܹܠ. [No book]
[35]ܘܐܲܩܝܼܡ ܡܵܪܝܵܐ ܩܝܵܡܵܐ ܥܲܡܗܘܿܢ: ܘܦܲܩܸܕ݂ ܐܸܢܘܿܢ ܘܐܸܡܲܪ: ܠܵܐ ܬܸܕ݂ܚ̄ܠܘܼܢ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܠܵܐ ܬܸܣܓܕ݂ܘܼܢ ܠܗܘܿܢ: ܘܠܵܐ ܬܸܦ̱ܠܚܘܼܢ ܐܸܢܘܿܢ: ܘܠܵܐ ܬܕܲܒ̇ܚܘܼܢ ܠܗܘܿܢ. [No book]
[36]ܐܸܠܵܐ ܦܠܘܿܚܘ ܠܡܵܪܝܵܐ ܕܐܲܣܩܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܒܚܲܝܠܵܐ ܪܲܒܵܐ: ܘܒܲܕ݂ܪܵܥܵܐ ܪܵܡܵܐ. ܠܹܗ ܦܠܘܿܚܘ: ܘܠܹܗ ܣܓ̣ܘܿܕ݂ܘ: ܘܠܹܗ ܕܲܒܲܚܘ. [No book]
[37]ܘܲܩܝܵܡܹ̈ܐ: ܘܕ݂ܝܼܢܹ̈ܐ: ܘܢܵܡܘܿܣܹ̈ܐ: ܘܦܘܼܩ̈ܕܵܢܹܐ: ܕܲܟ݂ܬܲܒ̣ ܠܟ݂ܘܿܢ: ܛܲܪܘ ܘܲܥܒܸܕ݂ܘ ܟܠܗܘܿܢ ܝܵܘ̈ܡܵܬ̣ܵܐ. [No book]
[38]ܘܠܵܐ ܬܸܕ݂ܚ̄ܠܘܼܢ ܠܐܲܠܵܗܹ̈ܐ ܐ̄ܚܪ̈ܵܢܹܐ. ܘܲܩܝܵܡܹ̈ܐ ܕܐܲܩܝܼܡܹ̇ܬ̣ ܥܲܡܟ݂ܘܿܢ: ܠܵܐ ܬܸܛܥܘܿܢ. ܘܐܵܐ ܬܸܕ݂ܚ̄ܠܘܼܢ ܠܐܲܠܵܗܹ̈ܐ ܕܥܲܡܡܹ̈ܐ. [No book]
[39]ܐܸܠܵܐ ܠܡܵܪܝܵܐ ܐܲܠܵܗܟ݂ܘܿܢ ܕܚܲܠܘ. ܘܗ̤ܘ ܡܦܲܨܹܐܠܟ݂ܘܿܢ ܡ̣ܢ ܐܝܼܕ݂ܵܐ ܕܟ݂ܠܗܘܿܢ ܒܥܸܠܕ̇ܒ̣ܵܒܲܝ̈ܟ̇ܘܿܢ. [No book]
[40]ܘܠܵܐ ܫ̣ܡܲܥܘ: ܐܸܠܵܐ ܐܲܝܟ݂ ܢܵܡܘܿܣܗܘܿܢ ܩܲܕ݂ܡܵܝܵܐ ܥܲܒ̣ܕ̇ܝܼܢ ܗ̄ܘ̣ܵܘ. [No book]
[41]ܘܲܗܘ̤ܵܘ ܐܵܦ ܥܲܡܡܹ̈ܐ ܗܵܠܹܝܢ: ܕܝܼܬܸܒ̣ܘ ܒܫܵܡܪܹܝܢ: ܕܵܚ̇ܠܝܼܢ ܠܡܵܪܝܵܐ: ܘܠܲܓܠܝܼܦܲܝ̈ܗܘܿܢ ܦܵܠܚܝܼܢ ܗ̄ܘ̣ܵܘ: ܐܵܦ ܒܢܲܝ̈ܗܘܿܢ ܐܵܦ ܒܢܲܝ̈ ܒܢܲܝ̈ܗܘܿܢ. ܐܲܝܟ݂ ܕܲܥܒܲܕ݂ܘ ܐܲܒ̣ܵܗܲܝ̈ܗܘܿܢ: ܥܵܒ̣ܕܝܼܢ ܗ̄ܘ̣ܵܘ ܐܵܦ ܗܸܢܘܿܢ ܥܕܲܡܵܐ ܠܝܵܘܡܵܢܵܐ. [No book]
Translation: Charles H. Hoole (1885)
Source: www.earlychristianwritings.com
Top