|
|
| [1]ܒܝܵܘܡܵܘ̈ܗܝ ܣܠܸܩ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܠ ܐܘܿܪܸܫܠܸܡ ܘܲܗܘ̤ܵܐ ܠܹܗ ܝܘܿܝܵܩܝܼܡ ܥܲܒ̣ܕܵܐ ܬܠܵܬ̣ ܫܢ̈ܝܼܢ. ܘܲܗܦܲܟ݂ ܘܲܡܪܲܕ݂ ܥܠܵܘܗܝ. |
[No book] |
| [2]ܘܓܲܪܝܼ ܒܹܗ ܡܵܪܝܵܐ: ܓܲܝܵܣܹ̈ܐ ܕܟܲܠ̈ܕܵܝܹܐ: ܘܓܲܝܵܣܹ̈ܐ ܕܐܲܕ݂ܘܿܡ: ܘܓܲܝܵܣܹ̈ܐ ܕܡܘܼܐܵܒ̣: ܘܓܲܝܵܣܹ̈ܐ ܕܲܒ̣ܢܲܝ̈ ܥܲܡܘܿܢ ܘܓܲܪܝܼ ܐܸܢܘܿܢ ܒܲܝܗܘܼܕ݂ܵܐ: ܕܢܵܘܒ̇ܕ݂ܘܼܢ ܐܸܢܘܿܢ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܡܲܠܸܠ̣ ܒܐܝܼܕ݂ܵܐ ܕܥܲܒ̣ܕܵܘ̈ܗܝ ܢܒ̣ܝܹ̈ܐ ܦܘܼܡܹܗ ܕܡܵܪܝܵܐ. |
[No book] |
| [3]ܘܲܗܘ̤ܵܐ ܪܘܼܓ̣ܙܵܐ ܥܲܠ ܝܼܗܘܼܕ݂ܵܐ: ܕܢܲܥܒܲܪ ܐܸܢܘܿܢ ܡܟܢ ܩܕ݂ܵܡܵܘܗܝ: ܡܸܛܠ ܚܛܵܗܵܘ̈ܗܝ ܕܲܡܢܲܫܹܐ ܘܟ݂ܠܡܸܕܸ̇ܡ ܕܲܥܒܲܕ݂. |
[No book] |
| [4]ܐܵܦ ܕܡܵܐ ܙܲܟܵܝܵܐ ܕܐܸܫܲܕ݂: ܘܲܡܠܵܗ̇ ܠܐܘܿܪܸܫܠܸܡ ܕܡܵܐ ܙܲܟܵܝܵܐ. ܘܠܵܐ ܨܒ̣ܵܐ ܡܵܪܝܵܐ ܠܡܸܫܒܲܩ. |
[No book] |
| [5]ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܝܵܩܝܼܡ ܘܟ݂ܠܡܸܕܸ̇ܡ ܕܲܥܒܲܕ݂ ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. |
[No book] |
| [6]ܘܲܫܟܸܒ̣ ܝܘܿܝܵܩܝܼܡ ܥܲܡ ܐܲܒ̣ܵܗܵܘ̈ܗܝ. ܘܐܲܡܠܸܟ݂ ܝܘܿܝܵܟ݂ܝܼܢ ܒܪܹܗ ܒܵܬ̣ܪܹܗ. |
[No book] |
| [7]ܘܠܵܐ ܐܵܘܣܸܦ ܬܘܼܒ̣ ܡܲܠܟܵܐ ܕܡܸܨܪܹܝܢ ܠܡܸܦܲܩ ܡ̣ܢ ܐܲܪܥܹܗ. ܡܸܛܠ ܕܲܢܣܲܒ̣ ܡܲܠܟܵܐ ܕܒ̣ܵܒܹܠ: ܡ̣ܢ ܢܲܚܠܵܐ ܕܡܸܨܪܹܝܢ ܘܲܥܕܲܡܵܐ ܠܢܲܗܪܵܐ ܦܪܵܬ̣: ܟܠ ܐܝܼܬ̣ ܗ̄ܘ̣ܵܐ ܠܡܲܠܟܵܐ ܕܡܸܨܪܹܝܢ. |
[No book] |
| [8]ܒܲܪ ܬܡܵܢܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ ܝܘܿܝܵܟ݂ܝܼܢ ܟܲܕ݂ ܐܲܡ̣ܠܸܟ݂ ܘܲܬ̣ܠܵܬ̣ܵܐ ܝܲܪ̈ܚܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ: ܢܸܚ̄ܫܬ̣ܵܐ ܒܲܪܬ̣ ܐܸܠܝܵܬ̣ܵܢ ܡ̣ܢ ܐܘܿܪܸܫܠܸܡ. |
[No book] |
| [9]ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ ܐܲܒ̣ܘܼܗܝ. |
[No book] |
| [10]ܒܙܲܒ̣ܢܵܐ ܗܵܘ̇: ܣܠܸܩ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܠ ܐܘܿܪܸܫܠܸܡ ܘܐܸܬ̣ܚܲܒ̣ܫܲܬ̤ ܩܪܝܼܬ̣ܵܐ ܒܐܘܼܠܨܵܢܵܐ. |
[No book] |
| [11]ܘܐܸܬ̣ܵܐ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ ܥܲܠ ܩܪܝܼܬ̣ܵܐ: ܘܥܲܒ̣ܕܵܘ̈ܗܝ ܫܪܹܝܢ ܥܠܹܝܗ̇. |
[No book] |
| [12]ܘܲܢܦܲܩ ܝܘܿܝܵܟ݂ܝܼܢ ܡܲܠܟܵܐ ܕܲܝܗܘܼܕ݂ܵܐ ܠܘܵܬ̣ ܡܲܠܟܵܐ ܕܒ̣ܵܒܹܠ: ܗ̤ܘ ܘܐܸܡܹܗ: ܘܥܲܒ̣ܕܵܘ̈ܗܝ: ܘܪܵܘ̱ܪ̈ܒ̣ܵܢܵܘܗܝ: ܘܲܡܗܲܝܡܢܵܘ̈ܗܝ. ܘܕܲܒ̣ܪܹܗ ܥܲܡܹܗ ܡܲܠܟܵܐ ܕܒ̣ܵܒܹܠ: ܒܲܫܢܲܬ̣ ܬܡܵܢܹܐ ܕܡܲܠܟ̇ܘܼܬܹܗ. |
[No book] |
| [13]ܘܐܲܦܸܩ ܡ̣ܢ ܬܲܡܵܢ ܟܠܹܗ ܓܲܙܵܐ ܕܒܲܝܬܹ̇ܗ ܕܡܵܪܝܵܐ: ܘܓܲܙܵܐ ܕܒܹܝܬ̣ ܡܲܠܟܵܐ. ܘܦܲܣܸܩ ܟܠܗܘܿܢ ܡܵܐܢܹ̈ܐ ܕܕܲܗܒ̣ܵܐ ܕܲܥܒܲܕ݂ ܫܠܹܝܡܘܿܢ ܡܲܠܟܵܐ ܕܝܼܣܪܵܝܹܠ ܠܗܲܝܟ̇ܠܹܗ ܕܡܵܪܝܵܐ: ܐܲܝܟ݂ ܕܐܸܡܲܪ ܡܵܪܝܵܐ. |
[No book] |
| [14]ܘܓܲܠܝܼ ܠܟܠܵܗ̇ ܐܘܿܪܸܫܠܸܡ: ܘܲܠܟ݂ܠܗܘܿܢ ܪܵܘ̱ܪ̈ܒ̣ܵܢܹܐ ܘܲܠܟ݂ܠܗܘܿܢ ܓܲܢ̄ܒܵܪ̈ܲܝ ܚܲܝܠܵܐ: ܥܸܣܪܵܐ ܐܲܠܦ̈ܝܼܢ ܒܓ̣ܵܠܘܼܬ̣ܵܐ: ܘܟ݂ܠܗܘܿܢ ܕܲܚܫܹ̈ܐ: ܘܪ̈ܲܗܵܛܹܐ. ܘܠܵܐ ܫܒܲܩ ܐܸܠܵܐ ܐܸܢ ܡܸܣܟܹ̇ܢܹ̈ܐ ܕܥܲܡܵܐ ܕܐܲܪܥܵܐ. |
[No book] |
| [15]ܘܓܲܠܝܼ ܠܝܘܿܝܵܟ݂ܝܼܢ ܠܒ̣ܵܒܹܠ: ܘܠܐܸܡܹܗ ܕܡܲܠܟܵܐ: ܘܲܠܢܸܫܵܘ̈ܗܝ ܕܡܲܠܟܵܐ: ܘܠܲܡܗܲܝܡܢܵܘܼ̈ܗܝ: ܘܲܠܪܵܘ̱ܪ̈ܒ̣ܵܢܹܐ ܕܐܲܪܥܵܐ. ܘܐܵܘܒܸ̇ܠ ܐܸܢܘܿܢ ܒܓ̣ܵܠܘܼܬ̣ܵܐ ܡ̣ܢ ܐܘܿܪܸܫܠܸܡ ܠܒ̣ܵܒܹܠ. |
[No book] |
| [16]ܘܲܠܟ݂ܠܗܘܿܢ ܓܲܒ̣ܪܹ̈ܐ ܚܲܝܠܬ̣ܵܢܹ̈ܐ ܫܲܒ̣ܥܵܐ ܐܲܠܦ̈ܝܼܢ: ܘܕܲܚ̈ܫܹܐ ܘܪ̈ܲܗܵܛܹܐ ܐܵܠܹܦ: ܘܟ݂ܠܗܘܿܢ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ: ܐܲܝܬ̇ܝܼ ܐܸܢܘܿܢ ܡܲܠܟܵܐ ܕܒ̣ܵܒܹܠ ܒܓ̣ܵܠܘܼܬ̣ܵܐ ܠܒ̣ܵܒܹܠ. |
[No book] |
| [17]ܘܐܲܡ̣ܠܸܟ݂ ܡܲܠܟܵܐ ܕܒ̣ܵܒܹܠ ܠܲܡܬܲܢܝܵܐ ܕܵܕܹܗ ܚܠܵܦܵܘܗܝ. ܘܫܲܡܝܼ ܫܡܹܗ ܨܹܕܲܩܝܵܐ. |
[No book] |
| [18]ܒܲܪ ܥܸܣܪܝܼܢ ܗ̄ܘ̣ܵܐ ܘܲܚܕ݂ܵܐ ܫܢ̈ܝܼܢ ܨܹܕܲܩܝܵܐ ܟܲܕ݂ ܐܲܡ̣ܠܸܟ݂ ܘܲܚܕܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ: ܚܲܡܘܿܛ ܒܲܪܬ̣ ܐܹܪܲܡܝܵܐ ܡ̣ܢ ܠܸܒ̣ܢܵܐ. |
[No book] |
| [19]ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܕܲܥܒܲܕ݂ ܝܘܿܝܵܩܝܼܡ. |
[No book] |
| [20]ܘܲܗܘ̤ܵܐ ܪܘܼܓ̣ܙܹܗ ܕܡܵܪܝܵܐ ܥܲܠ ܝܼܗܘܼܕ݂ܵܐ ܘܥܲܠ ܐܘܿܪܸܫܠܸܡ: ܥܕܲܡܵܐ ܕܲܫܕ݂ܵܐ ܐܸܢܘܿܢ ܡ̣ܢ ܩܕ݂ܵܡܵܘܗܝ. ܘܲܡܪܲܕ݂ ܨܹܕܲܩܝܵܐ ܥܲܠ ܡܲܠܟܵܐ ܕܒ̣ܵܒܹܠ. |
[No book] |