➖ »
«
➖ ➕
Peshitta OT
PesOT
The Book of Enoch (1917)
1Eno(Cha)
←
2 Samuel
2Sa
11
→
[1]ܘܲܠܗܸܦܟ̇ܬܵܐ ܕܫܲܢ̄ܬܵܐ ܠܙܲܒ̣ܢܵܐ ܕܡܲܦܩܵܢܵܐ ܕܡܲܠ̈ܟܹ̇ܐ: ܫܲܕܲܪ ܕܵܘܝܼܕ݂ ܠܝܘܿܐܵܒ̣ ܘܲܠܥܲܒ̣ܕܵܘ̈ܗܝ ܥܲܡܹܗ: ܘܲܠܟ݂ܠܹܗ ܝܼܣܪܵܝܹܠ: ܘܲܫܪܵܘ ܥܲܠ ܪܲܒܲܬ̣. ܘܕ݂ܵܘܝܼܕ݂ ܝܵܬܹܒ̣ ܗ̄ܘ̣ܵܐ ܒܐܘܿܪܸܫܠܸܡ. [No book]
[2]ܘܲܠܥܸܕܵܢ ܪܲܡܫܵܐ ܩܵܡ ܕܵܘܝܼܕ݂ ܡ̣ܢ ܡܲܫܟ̇ܒܹܗ: ܘܲܡܗܲܠܸܟ݂ ܥܲܠ ܐܸܓܵܪܵܐ ܕܒܹܝܬ̣ ܡܲܠܟ̇ܘܼܬܹܗ. ܘܲܚܙܵܐ ܐܲܢ̄ܬ̇ܬ̣ܵܐ ܚܕ݂ܵܐ ܟܲܕ݂ ܣܵܚܝܵܐ: ܘܐܲܢ̄ܬ̇ܬ̣ܵܐ ܫܲܦܝܼܪ ܗ̄ܘ̣ܵܐ ܛܵܒ̣ ܚܸܙܘܵܗ̇. [No book]
[3]ܘܫܲܕܲܪ ܕܵܘܝܼܕ݂ ܘܫܲܐܸܠ ܥܠܹܝܗ̇ ܥܲܠ ܐܲܢ̄ܬ̇ܬ̣ܵܐ: ܘܐܵܡܪܝܼܢ ܗܵܕܹܐ ܒܲܬ̣ܫܒܲܥ ܒܲܪܬ̣ ܐܲܚܝܼܢܥܸܡ ܐܲܢ̄ܬ̇ܬܹܗ ܕܐܘܿܪܝܵܐ ܚܹܬ̣ܵܝܵܐ. [No book]
[4]ܘܫܲܕܲܪ ܕܵܘܝܼܕ݂ ܡܲܠܲܐܟ݂ܵܐ ܘܕܲܒ̣ܪܵܗ̇: ܘܥܸܠܲܬ̤ ܠܘܵܬܹܗ ܘܲܕ݂ܡܸܟ݂ ܥܲܡܵܗ̇: ܟܲܕ݂ ܣܚܵܬ̣ ܡ̣ܢ ܟܸܦ̮ܣܵܗ̇: ܘܗܸܦܟܲܬ̤ ܬܘܼܒ̣ ܘܐܸܙܲܠ̄ܬ̤ ܠܒܲܝܬܵܗ̇. [No book]
[5]ܘܒܸܛܢܲܬ̤ ܐܲܢ̄ܬ̇ܬ̣ܵܐ: ܘܫܲܕܪܬ̤ ܚܵܘܝܲܬ̤ ܠܕ݂ܵܘܝܼܕ݂: ܘܐܵܡܪܵܐ ܠܹܗ ܕܒܲܛܢܵܐ ܐ̄ܢܵܐ. [No book]
[6]ܘܫܲܕܲܪ ܕܵܘܝܼܕ݂ ܠܘܵܬ̣ ܝܘܿܐܵܒ̣: ܫܲܕܲܪ ܠܝܼ ܠܐܘܿܪܝܼܵܐ ܚܹܬ̣ܝܵܐ. ܘܫܲܕܪܹܗ ܝܘܿܐܵܒ̣ ܠܐܘܿܪܝܼܵܐ ܚܹܬ̣ܵܝܵܐ ܠܘܵܬ̣ ܕܵܘܝܼܕ݂. [No book]
[7]ܘܐܸܬ̣ܵܐ ܐܘܿܪܝܑܼܵ ܠܘܵܬ̣ ܕܵܘܝܼܕ݂. ܘܫܲܐܸܠ ܕܵܘܝܼܕ݂ ܠܐܘܿܪܝܼܵܐ ܥܲܠ ܝܘܿܐܵܒ̣ ܘܥܲܠ ܥܲܡܵܐ ܘܥܲܠ ܩܪܵܒ̣ܵܐ. [No book]
[8]ܘܐܸܡܲܪ ܕܵܘܝܼܕ݂ ܠܐܘܿܪܝܼܵܐ: ܚܘܿܬ̣ ܠܒܲܝܬܵܟ݂ ܘܐܲܫܝܼܓ̣ ܪܸ̈ܓ̣ܠܲܝܟ. ܘܲܢܦܲܩ ܐܘܿܪܝܼܵܐ ܡ̣ܢ ܒܹܝܬ̣ ܡܲܠܟܵܐ: ܘܢܸܦܩܲܬ̤ ܒܵܬ̣ܪܹܗ ܡܵܘܗܲܒ̣ܬ̣ܵܐ ܕܡܲܠܟܵܐ. [No book]
[9]ܘܲܕ݂ܡܸܟ݂ ܐܘܿܪܝܼܵܐ ܒܬܲܪܥܵܐ ܕܡܲܠܟܵܐ ܥܲܠ ܓܹܢ̄ܒ̣ ܟܠܗܘܿܢ ܥܲܒ̣̈ܕܹܐ ܕܡܵܪܹܗ: ܘܠܵܐ ܢܚܸܡ ܠܒܲܝܬܹ̇ܗ. [No book]
[10]ܘܚܵܘܝܼܘܼ ܠܕ݂ܵܘܝܼܕ݂ ܕܠܵܐ ܢܚܸܬ̣ ܐܘܿܪܝܼܵܐ ܠܒܲܝܬܹ̇ܗ. ܘܐܸܡܲܪ ܠܹܗ ܕܵܘܝܼܕ݂ ܠܐܘܿܪܝܼܵܐ: ܗܵܐ ܡ̣ܢ ܐܘܼܪܚܵܐ ܐܸܬܲܝܬ̇: ܠܡܵܢܵܐ ܠܵܐ ܢܚܸܬ̇ܬ̇ ܠܒܲܝܬܵܟ݂. [No book]
[11]ܐܸܡܲܪ ܠܹܗ ܐܘܿܪܝܼܵܐ ܠܕ݂ܵܘܝܼܕ݂: ܩܹܒ̣ܘܿܬ̣ܵܐ ܕܲܕ݂ܝܵܬܹܩܹܐ ܕܡܵܪܝܵܐ: ܘܝܼܣܪܵܝܹܠ ܘܲܝܗܘܼܕ݂ܵܐ ܝܵܬ̣ܒ̇ܝܼܢ ܒܲܡܛܲܠ̈ܠܹܐ: ܘܡܵܪܝ ܝܘܿܐܵܒ̣ ܘܥܲܒ̣ܕܵܘ̈ܗܝ ܕܡܵܪܝ ܫܪܹܝܢ ܥܲܠ ܐܲܦܲܝ̈ ܕܲܒ̣ܪܵܐ: ܘܐܸܢܵܐ ܐܹܙܲܠ ܠܒܲܝܬ̇ܝ: ܘܐܸܠܥܲܣ ܘܐܸܫܬܹ̇ܐ ܘܐܸܕ݂ܡܲܟ݂ ܥܲܡ ܐܲܢ̄ܬܲܬ̣ܝ. ܠܵܐ ܚܲܝܲܝ̈ܟ ܘܠܵܐ ܚܲܝܲܝ̈ ܢܲܦ̮ܫܵܟ݂: ܠܵܐ ܥܵܒܹܕ݂ ܐ̄ܢܵܐ ܐܲܝܟ݂ ܗܵܕܹܐ. [No book]
[12]ܐܵܡܲܪ ܠܹܗ ܕܵܘܝܼܕ݂ ܠܐܘܿܪܝܼܵܐ: ܦܘܼܫ ܝܵܘܡܵܢܵܐ ܗܵܪܟܵܐ: ܘܲܡܚܵܪ ܐܹܫܕܪܵܟ݂. ܘܦܵܫ ܐܘܿܪܝܼܵܐ ܒܐܘܿܪܸܫܠܸܡ ܒܝܵܘܡܵܐ ܗܵܘ̇. [No book]
[13]ܘܲܠܝܵܘܡܵܐ ܐ̄ܚܪܹܢܵܐ: ܩܪܵܝܗܝ ܕܵܘܝܼܕ݂ ܘܲܠܥܸܣ ܩܕ݂ܵܡܵܘܗܝ: ܘܐܸܫܬܲܝܼ ܘܲܪܘܼܝܼ: ܘܲܢܦܲܩ ܒܪܲܡܫܵܐ. ܘܲܕ݂ܡܸܟ݂ ܥܲܠ ܓܹܢ̄ܒ̣ ܥܲܒ̣̈ܕܹܐ ܕܡܵܪܹܗ: ܘܲܠܒܲܝܬܹ̇ܗ ܠܵܐ ܢܸܚܸܬ̣. [No book]
[14]ܘܲܒ̣ܨܲܦܪܵܐ ܟܬܲܒ̣ ܕܵܘܝܼܕ݂ ܐܸܓܲܪܬܵܐ ܠܝܘܿܐܵܒ̣: ܘܫܲܕܲܪ ܒܐܝܼܕܹܗ ܕܐܘܿܪܝܼܵܐ. [No book]
[15]ܘܲܟ݂ܬܲܒ̣ ܠܹܗ. ܥܒܸܕܲܝܗܝ ܠܐܘܿܪܝܼܵܐ ܒܪܹܫ ܚܲܝܠܵܐ ܕܲܩܪܵܒ̣ܵܐ: ܘܲܦܘܿܟ݂ܘ ܠܟ݂ܘܿܢ ܡ̣ܢ ܒܵܬ̣ܪܹܗ. ܕܢܸܒ̣ܠܲܥ ܘܲܢܡܘܼܬ̣. [No book]
[16]ܘܟܲܕ݂ ܫܪܵܐ ܝܘܿܐܵܒ̣ ܥܲܠ ܩܪܵܝܼܬ̣ܵܐ: ܐܲܩܝܼܡ ܠܐܘܿܪܝܼܵܐ ܒܕ݂ܘܼܟ̇ܬ̣ܵܐ ܘܝܵܕܲܥ ܕܓܲܒ̣ܪܹ̈ܐ ܚܲܝ̱ܠܬ̣ܵܢܹ̈ܐ ܬܲܡܵܢ. [No book]
[17]ܘܲܢܦܲܩܘ ܐ̄ܢܵܫܵܐ ܕܲܩܪܝܼܬ̣ܵܐ ܘܐܸܬ̣ܟܲܬܲܫܘ ܥܲܡ ܝܘܿܐܵܒ̣: ܘܢܦܲܠܘ ܬܲܡܵܢ ܡ̣ܢ ܥܵܡܵܐ ܡ̣ܢ ܥܲܒ̣ܕܵܘ̈ܗܝ ܕܕ݂ܵܘܝܼܕ݂: ܘܡܝܼܬ̣ ܐܵܦ ܐܘܿܪܝܼܵܐ ܚܹܬ̣ܝܵܐ. [No book]
[18]ܘܫܲܕܲܪ ܝܘܿܐܵܒ̣ ܘܚܵܘܝܼ ܠܕ݂ܵܘܝܼܕ݂ ܟܠ ܡܸܕܸܡ ܕܲܗܘ̤ܵܐ ܒܲܩܪܵܒ̣ܵܐ. [No book]
[19]ܘܦܲܩܕܹܗ ܝܘܿܐܵܒ̣ ܠܡܲܠܲܐܟ݂ܵܐ: ܘܐܸܡܲܪ ܠܹܗ: ܡܵܐ ܕܛܲܠܸܩܬ̇ ܠܡܹܐܡܲܪ ܠܡܲܠܟܵܐ ܟܠ ܡܸܕܸܡ ܕܲܗܘ̤ܵܐ ܒܲܩܪܵܒ̣ܵܐ. [No book]
[20]ܐܸܢ ܗ̤ܘ ܕܣܸܠܩܲܬ̤ ܚܸܡܬܹܗ ܕܡܲܠܟܵܐ ܘܐܸܡܲܪ ܠܵܟ݂: ܠܡܵܢܵܐ ܐܸܬ̣ܩܲܪܒ̣ܬ̇ܘܿܢ ܠܘܵܬ̣ ܩܪܝܼܬ̣ܵܐ ܠܡܸܬ̣ܟܲܬܵܫܘܼ ܥܲܡܵܗ̇: ܠܵܐ ܝܵܕ݂ܥܝܼܢ ܗ̄ܘܲܝܬ̇ܘܿܢ: ܕܫܵܕܹܝܢ ܡ̣ܢ ܫܘܼܪܑܵ. [No book]
[21]ܡܲܢܘܼ ܩܲܛܠܹܗ ܠܐܲܒ̣ܝܼܡܲܠܟ ܒܲܪ ܢܕ݂ܘܼܒ̣ܥܹܝܠ: ܠܵܐ ܗ̄ܘ̣ܵܐ ܐܲܢ̄ܬ̇ܬ̣ܵܐ ܫܕ݂ܵܬ̤ ܥܠܵܘܗܝ ܬܸܒ̣ܪܵܐ ܕܪܲܟ݂ܒܵܐ ܕܪܲܚܝܵܐ ܡ̣ܢ ܫܘܼܪܵܐ ܘܡܝܼܬ̣. ܠܡܵܢܵܐ ܐܸܬ̣ܩܲܪܲܒ̣ܬ̇ܘܿܢ ܠܘܵܬ̣ ܫܘܼܪܵܐ. ܐܸܢ ܗ̤ܘ ܕܐܸܡܲܪ ܠܵܟ݂ ܗܵܠܹܝܢ: ܐܸܡܲܪ ܠܹܗ: ܐܵܦ ܥܲܒ̣ܕܵܟ݂ ܐܘܿܪܝܼܵܐ ܚܹܬ̣ܝܵܐ ܡܝܼܬ̣. [No book]
[22]ܘܐܸܙܲܠ ܡܲܠܲܐܟ݂ܵܐ: ܘܚܵܘܝܼ ܠܕ݂ܵܘܝܼܕ݂ ܟܠ ܡܸܕܸܡ ܕܦܲܩܕܹܗ ܝܘܿܐܵܒ̣. [No book]
[23]ܘܐܸܡܲܪ ܠܹܗ ܡܲܠܲܐܟ݂ܵܐ ܠܕ݂ܵܘܝܼܕ݂: ܥܫܸܢܘ ܥܠܲܝܢ ܐ̄ܢܵܫܵܐ: ܘܲܢܦܲܩܘ ܥܠܲܝܢ ܠܕܲܒ̣ܪܵܐ: ܘܐܸܬ̣ܬ̇ܬ̇ܣܝܼܡ̄ܢ ܥܠܲܝܗܘܿܢ ܥܕܲܡܵܐ ܠܬܲܪܥܵܐ ܕܩܪܝܼܬ̣ܵܐ. [No book]
[24]ܘܲܫܕ݂ܵܐ ܗܵܢܘܿܢ ܕܩܵܝܡܝܼܢ ܥܲܠ ܫܘܼܪܵܐ: ܘܡܝܼܬ̣ܘ ܡ̣ܢ ܥܲܒ̣̈ܕܲܝܟ ܡܲܠܟܵܐ: ܘܐܵܦ ܥܲܒ̣ܕܵܟ݂ ܐܘܿܪܝܼܵܐ ܚܹܬ̣ܵܝܵܐ ܡܝܼܬ̣. [No book]
[25]ܘܐܸܡܲܪ ܕܵܘܝܼܕ݂ ܠܡܲܠܲܐܟ݂ܵܐ: ܐܸܡܲܪ ܠܝܘܿܐܵܒ̣: ܠܵܐ ܢܸܬܒ̇ܐܸܫ ܒܥܲܝܢܲܝ̈ܟ ܥܲܠ ܗܵܕܹܐ: ܐܵܦ ܗܵܟܲܢܵܐ ܐܵܦ ܗܵܟܲܢܵܐ ܓܵܕܹܫ ܒܲܩܪܵܒ̣ܵܐ. ܐܲܥܫܸܢ ܩܪܵܒ̣ܵܐ ܥܲܠ ܩܪܝܼܬ̣ܵܐ: ܘܐܲܚܘܿܕܹܝܗ̇ ܘܲܣܚܘܿܦܹܝܗ̇. [No book]
[26]ܘܫܸܡܥܲܬ̤ ܐܲܢ̄ܬ̇ܬܹܗ ܕܐܘܿܪܝܼܵܐ ܚܸܬ̣ܵܝܵܐ ܕܡܝܼܬ̣ ܒܲܥܠܵܗ̇: ܘܐܲܪܩܕܲܬ̤ ܥܲܠ ܒܲܥܠܵܗ̇. [No book]
[27]ܘܲܥܒܲܪܘ ܝܵܘ̈ܡܵܬ̣ܵܐ ܕܐܸܒ̣ܠܵܗ̇. ܘܫܲܕܲܪ ܕܵܘܝܼܕ݂ ܘܐܲܥܠܵܗ̇ ܠܒܲܝܬܹ̇ܗ: ܘܲܗܘ̤ܵܬ̣ ܠܹܗ ܐܲܢ̄ܬ̇ܬ̣ܵܐ: ܘܝܼܠܕܲܬ̤ ܠܹܗ ܒܪܵܐ: ܘܐܸܬ̣ܒܲܐܫܲܬ̤ ܥܒ̣ܝܼܕܲܬܵܐ ܕܲܥܒܲܕ݂ ܕܵܘܝܼܕ݂ ܩܕ݂ܵܡ ܡܵܪܝܵܐ. [No book]
Legend
[Gg: Text found only in Greek Akhmim]]
[E: Text found only in Ethiopic]]
<Restored text>
[Interpolation or note]
(Editor's addition or note)
Translation: R. H. Charles, D. Litt., D.D. (1917)
Source: sacred-texts.com
Top