➖ »
«
➖ ➕
Peshitta OT
PesOT
The Second Book of Clement
2Clem
←
2 Samuel
2Sa
21
→
[1]ܘܲܗܘ̤ܵܐ ܟܲܦܢܵܐ ܒܝܵܘ̈ܡܵܬܹܗ ܕܕ݂ܵܘܝܼܕ݂ ܬܠܵܬ̣ ܫܢ̈ܝܼܢ: ܫܲܢ̄ܬܵܐ ܒܵܬܲܪ ܫܲܢ̄ܬܵܐ. ܘܲܒ̣ܥܵܐ ܕܵܘܝܼܕ݂ ܡ̣ܢ ܡܵܪܝܵܐ: ܘܐܸܡܲܪ ܡܵܪܝܵܐ: ܡܸܛܠ ܫܵܐܘܿܠ ܘܡܸܛܠ ܒܲܝܬܵܐ ܕܲܕ݂ܡܵܐ: ܥܲܠ ܕܩܲܛܸܠ ܠܓܸܒ̣ܥ̈ܘܿܢܵܝܹܐ. [No book]
[2]ܘܲܩܪܵܐ ܡܲܠܟܵܐ ܠܓܸܒ̣ܥ̈ܘܿܢܵܝܹܐ: ܘܐܸܡܲܪ ܠܗܘܿܢ: ܘܓܸܒ̣ܥ̈ܘܿܢܵܝܹܐ ܠܵܐ ܗ̄ܘ̣ܵܐ ܡ̣ܢ ܒ̈ܢܲܝ ܝܼܣܪܵܝܹܠ: ܐܸܠܵܐ ܡ̣ܢ ܫܲܪܟܵܐ ܐܸܢܘܿܢ ܕܐܵܡܘܿܪ̈ܵܝܹܐ: ܘܲܒ̣ܢܲܝ ܝܼܣܪܵܝܹܠ ܝܼܡܵܘ ܠܗܘܿܢ. ܘܲܒ̣ܥܵܐ ܫܵܐܘܿܠ ܕܲܢܩܲܛܸܠ ܐܸܢܘܿܢ: ܟܲܕ݂ ܛܲܢ ܕܢܲܚܛܸܐ ܒܲܒ̣̈ܢܲܝ ܝܼܣܪܵܝܹܠ ܘܠܲܐܒ̣̈ܢܲܝ ܝܼܗܘܼܕ݂ܵܐ. [No book]
[3]ܘܐܸܡܲܪ ܕܵܘܝܼܕ݂ ܠܓܸܒ̣ܥ̈ܘܿܢܵܝܹܐ: ܡܵܢܵܐ ܐܸܥܒܸ̇ܕ݂ ܠܟ݂ܘܿܢ: ܘܲܒ̣ܡܵܢܵܐ ܐܹܚܣܹܝܟ݂ܘܿܢ: ܘܒܲܪܸܟ݂ܘ ܝܵܪܬ̇ܘܼܬܹܗ ܕܡܵܪܝܵܐ. [No book]
[4]ܐܵܡܪܝܼܢ ܠܹܗ ܓܸܒ̣ܥ̈ܘܿܢܵܝܹܐ: ܠܵܐ ܗ̄ܘ̣ܵܐ ܣܹܐܡܵܐ ܘܕܲܗܒ̣ܵܐ ܚܲܝܵܒ̣ ܗ̄ܘ̣ܵܐ ܠܲܢ ܫܵܐܘܿܠ ܘܒܲܝܬܹ̇ܗ: ܘܠܵܐ ܐܝܼܬ̣ ܠܲܢ ܐ̄ܢܵܫ ܕܢܸܩܛܘܿܠ ܒܝܼܣܪܵܝܹܠ: ܐܵܡܲܪ ܠܗܘܿܢ: ܘܡܵܢܵܐ ܐܵܡܪܝܼܢ ܐ̄ܢܬ̇ܘܿܢ ܐܸܥܒܸ̇ܕ݂ ܠܟ݂ܘܿܢ. [No book]
[5]ܐܵܡܪܝܼܢ ܠܡܲܠܟܵܐ: ܓܲܒ̣ܪܵܐ ܕܐܵܘܒ̇ܕܲܢ ܘܕ݂ܐܸܬ̣ܚܲܫܲܒ̣ ܕܢܵܘܒ̇ܕܲܢ: ܕܠܵܐ ܢܟܲܬܲܪ ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ. [No book]
[6]ܢܸܬ̇ܠܘܼܢ ܠܲܢ ܫܲܒ̣ܥܵܐ ܐ̄ܢܵܫ̈ܝܼܢ ܡ̣ܢ ܒܢܵܘ̈ܗܝ: ܘܲܢܕܲܒܲܚ ܐܸܢܘܿܢ ܩܕ݂ܵܡ ܡܵܪܝܵܐ ܒܪܵܡܬ̣ܵܐ ܕܫܵܐܘܿܠ. ܐܵܡܲܪ ܠܗܘܿܢ ܡܲܠܟܵܐ: ܐܸܢܵܐ ܐܸܬܸ̇ܠ. [No book]
[7]ܘܚܵܣ ܡܲܠܟܵܐ ܥܲܠ ܡܲܦܝܼܒ̣ܵܫܬ̇ ܒܲܪ ܝܘܿܢܵܬ̣ܵܢ ܒܲܪ ܫܵܐܘܿܠ: ܡܸܛܠ ܡܵܘܡܵܬܹܗ ܕܡܵܪܝܵܐ ܕܲܗܘ̤ܵܬ̣ ܒܲܝܢܵܬ̣ܗܘܿܢ: ܒܹܝܬ̣ ܕܵܘܝܼܕ݂ ܠܝܘܿܢܵܬ̣ܵܢ ܒܲܪ ܫܵܐܘܿܠ. [No book]
[8]ܘܲܕ݂ܒܲܪ ܡܲܠܟܵܐ ܠܲܬ̣ܪܹܝܢ ܒܢܹܝ̈ܗ̇ ܕܪܲܨܦܵܐ ܒܲܪܬ̣ ܐܲܢܵܐ ܕܝܼܠܕܲܬ̤ ܠܫܵܐܘܿܠ: ܠܐܲܪܡܘܿܢܝܼ ܘܲܠܡܲܦܝܼܒ̣ܵܫܬ̇: ܘܲܠܚܲܡܫܵܐ ܒ̈ܢܲܝ ܢܵܕ݂ܵܒ̣ ܒܲܪܬ̣ ܫܵܐܘܿܠ: ܕܝܸܠܕܲܬ̤ ܠܥܲܙܪܵܐܹܝܠ ܒܲܪ ܒܲܪܙܸܠܝܼ ܕܡ̣ܢ ܡܚܘܿܠܵܐ. [No book]
[9]ܘܐܲܫܠܸܡ ܐܸܢܘܿܢ ܒܓܸܒ̣ܥ̈ܘܿܢܵܝܹܐ: ܘܕܲܒܲܚܘ ܐܸܢܘܿܢ ܒܛܘܼܪܵܐ ܩܕ݂ܵܡ ܡܵܪܝܵܐ: ܘܲܢܦܲܠܘ ܫܲܒ̣ܥܵܬܲܝ̈ܗܘܿܢ ܐܲܟ݂ܚ̄ܕ݂ܵܐ. ܘܗܢܘܿܢ ܐܸܬ̣ܩܲܛܲܠܘ ܒܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ ܕܲܚܨܵܕ݂ܵܐ: ܒܪܹܫ ܚܨܵܕ݂ܵܐ ܕܲܣܥܵܪܹ̈ܐ. [No book]
[10]ܘܢܸܣܒܲܬ̤ ܪܲܨܦܵܐ ܒܲܪܬ̣ ܐܲܢܵܐ ܣܲܩܵܐ: ܘܦܸܪܣܲܬ̤ ܠܵܗ̇ ܥܲܠ ܫܘܿܥܵܐ: ܡ̣ܢ ܪܹܫ ܚܨܵܕ݂ܵܐ ܥܕܲܡܵܐ ܕܲܢܚܸܬ̣ ܥܠܲܝܗܘܿܢ ܡܲܝ̈ـܵܐ ܡ̣ܢ ܫܡܲܝܵܐ. [No book]
[11]ܘܠܵܐ ܫܸܒ̣ܩܲܬ̤ ܠܦܵܪܲܚܬ̣ܵܐ ܕܲܫܡܲܝܵܐ ܕܬܸܫܟܲܢ ܥܠܲܝܗܘܿܢ ܒܐܝܼܡܵܡܵܐ: ܐܵܦܠܵܐ ܠܚܲܝ̄ܘܬ̣ܵܐ ܕܕܲܒ̣ܪܵܐ ܒܠܸܠܝܵܐ. [No book]
[12]ܘܚܵܘܝܼܘ ܠܕ݂ܵܘܝܼܕ݂ ܡܸܕܸܡ ܕܥܸܒ̣ܕܲܬ̤ ܪܲܨܦܵܐ ܒܲܪܬ̣ ܐܲܢܵܐ ܕܪܘܼܟ݂ܬܹ̇ܗ ܕܫܵܐܘܿܠ: ܘܐܸܙܲܠ ܕܵܘܝܼܕ݂: ܘܲܢܣܲܒ̣ ܓܲܪ̈ܡܹܐ ܕܫܵܐܘܿܠ ܘܓܲܪ̈ܡܹܐ ܕܝܘܿܢܵܬ̣ܵܢ ܒܪܹܗ: ܡ̣ܢ ܡܵܪ̈ܝܹܗ̇ ܕܝܵܒ̣ܝܼܫ ܕܓܸܠܥܵܕ݂: ܕܲܓ̣ܢܲܒ̣ܘ ܐܸܢܘܿܢ ܡ̣ܢ ܪܵܚܘܿܒ̣ ܕܒܹܝܬ̣ ܝܵܫܵܢ: ܕܲܬ̣ܠܵܘ ܐܸܢܘܿܢ ܬܲܡܵܢ ܦܠܸܫܬܵܝܹ̈ܐ ܒܝܵܘܡܵܐ ܕܲܩܛܲܠܘ ܦܠܸܫܬܵܝܹ̈ܐ ܠܫܵܐܘܿܠ ܒܛܘܼܪܵܐ ܕܲܓ̣ܠܲܒ̇ܘܿܥ. [No book]
[13]ܘܐܲܣܸܩ ܡ̣ܢ ܬܲܡܵܢ ܠܓܲܪ̈ܡܹܐ ܕܫܵܐܘܿܠ ܘܲܠܓܲܪ̈ܡܹܐ ܕܝܘܿܢܵܬ̣ܵܢ ܒܪܹܗ: ܘܟܲܢܸܫܘ ܓܲܪ̈ܡܹܐ ܕܲܩܛܝܼܠܹ̈ܐ. [No book]
[14]ܘܲܩܒܲܪܘ ܓܲܪ̈ܡܵܘܗܝ ܕܫܵܐܘܿܠ ܘܲܕ݂ܝܘܿܢܵܬ̣ܵܢ ܒܪܹܗ: ܒܐܲܪܥܵܐ ܕܒܸܢܝܵܡܹܝܢ ܒܨܲܠܨܲܚ ܒܩܲܒ̣ܪܵܐ ܕܩܝܼܫ ܐܲܒ̣ܘܼܗܝ. ܘܲܥܒܲܕ݂ܘ ܟܠ ܡܸܕܸܡ ܕܲܦܩܲܕ݂ ܡܲܠܟܵܐ. ܘܐܸܬ̣ܪܲܥܝܼ ܐܲܠܵܗܵܐ ܠܐܲܪܥܵܐ ܡ̣ܢ ܒܵܬܲܪ ܗܵܕܹܝܢ. [No book]
[15]ܘܲܗܘ̤ܵܐ ܬܘܼܒ̣ ܩܪܵܒ̣ܵܐ ܠܲܦܠܸܫ̈ܬܵܝܹܐ ܥܲܡ ܝܼܣܪܵܝܹܠ: ܘܲܢܚܸܬ̣ ܕܵܘܝܼܕ݂ ܘܥܲܒ̣ܕܵܘ̈ܗܝ ܥܲܡܹܗ ܠܡܸܬ̣ܟܲܬܵܫܘܼ ܥܲܡ ܦܠܸܫܬܵܝܹ̈ܐ. [No book]
[16]ܘܲܕ݂ܚܸܠܘ ܕܵܘܝܼܕ݂ ܘܝܘܿܐܵܒ̣ ܘܐܲܒ̣ܝܼܫܲܝ ܡ̣ܢ ܓܲܢ̄ܒܵܪܵܐ: ܕܡܲܬ̣ܩܵܠܵܐ ܕܫܸܪܝܵܢܹܗ ܬܠܵܬ̣ܡܵܐܐ ܡܲܬ̣ܩܵܠ̈ܝܼܢ ܕܲܢܚܵܫܵܐ: ܘܗ̤ܘ ܐܲܣܝܼܪ ܗ̄ܘ̣ܵܐ ܣܲܦ̮ܣܹܪܵܐ ܚܕܲܬܵܐ: ܘܐܸܡܲܪ ܠܡܸܩܛܠܹܗ ܠܕ݂ܵܘܝܼܕ݂. [No book]
[17]ܘܥܲܕܪܹܗ ܐܲܒ̣ܝܼܫܲܝ ܒܲܪ ܨܘܿܪܝܼܵܐ: ܘܲܡܚܵܝܗܝ ܠܲܦܠܫܬܵܝܵܐ ܘܫܲܛܠܹܗ. ܗܵܝܕܹܝܢ ܝܼܡܲܘ ܠܹܗ ܥܲܒ̣ܕܵܘ̈ܗܝ ܠܕ݂ܵܘܝܼܕ݂: ܘܐܵܡܪܝܼܢ ܠܹܗ: ܠܵܐ ܬܸܦܘܿܩ ܥܲܡܵܢ ܠܲܩܪܵܒ̣ܵܐ: ܘܠܵܐ ܬܲܕ݂ܥܸܟ݂ ܫܪܵܓܹܐ ܕܝܼܣܪܵܝܹܠ. [No book]
[18]ܘܡ̣ܢ ܒܵܬܲܪ ܗܵܝܕܹܝܢ: ܗܘ̤ܵܐ ܬܘܼܒ̣ ܩܪܵܒ̣ܵܐ ܒܓ̣ܵܬ̣ ܥܲܡ ܦܠܸܫܬܵܝܹ̈ܐ. ܘܗܵܝܕܹܝܢ ܩܛܲܠ ܣܲܒ̣ܟ̇ܝܼ ܚܘܼܫܵܝܵܐ: ܠܣܵܦܵܪ ܕܡ̣ܢ ܒ̈ܢܲܝ̈ ܓܲܢ̄ܒܵܪܹ̈ܐ. [No book]
[19]ܘܲܗܘ̤ܵܐ ܬܘܼܒ̣ ܩܪܵܒ̣ܵܐ ܠܝܼܣܪܵܝܹܠ ܥܲܡ ܦܠܸܫܬܵܝܹ̈ܐ: ܘܲܩܛܲܠ ܐܸܠܚܲܢܲܢ ܒܲܪ ܡܲܠܲܦ ܙܵܩܘܿܪܵܐ ܕܡ̣ܢ ܒܹܝܬ̣ ܠܚܸܡ ܠܓܸܘܼܠܝܵܕ݂ ܦܠܸܫܬܵܝܵܐ: ܘܫܸܘܝܵܐ ܕܢܲܝܙܟܹܗ ܥܒܸܐ ܗ̄ܘ̣ܵܐ ܐܲܝܟ݂ ܢܵܘܠܵܐ ܕܓܲܪ̈ܝܵܝܹܐ. [No book]
[20]ܘܲܗܘ̤ܵܐ ܬܘܼܒ̣ ܩܪܵܒ̣ܵܐ ܒܓ̣ܵܬ̣: ܘܲܗܘ̤ܵܐ ܓܲܒ̣ܪܵܐ ܓܲܢ̄ܒܵܪܵܐ: ܕܨܒ̣̈ܥܵܬ̣ܵܐ ܕܐܝܼܕ݂ܵܘ̈ܗܝ ܕܨܒ̣̈ܥܵܬ̣ܵܐ ܕܪܸ̈ܓ̣ܠܵܘܗܝ ܫܸܬ̣: ܥܸܣܪܝܼܢ ܘܐܲܪܒܲܥ ܒܡܸܢܝܵܢܵܐ: ܐܵܦ ܗܘ̤ ܐܸܬ̣̱ܝܼܠܸܕ݂ ܠܓܲܢ̄ܒܵܪܹ̈ܐ. [No book]
[21]ܘܚܸܲܕ݂ ܠܝܼܣܪܵܝܹܠ: ܘܩܲܛܠܹܗ ܝܘܿܢܵܕ݂ܵܒ̣ ܒܲܪ ܫܲܡܵܐ ܐܲܚܘܼܗܝ ܕܕ݂ܵܘܝܼܕ݂. [No book]
[22]ܗܵܠܹܝܢ ܐܲܪܒ̇ܥܵܐ ܐܸܬ̣̱ܝܼܠܸܕ݂ܘ ܠܓܲܢ̄ܒܵܪܹ̈ܐ ܒܓ̣ܵܬ̣: ܘܐܸܫܬ̣ܠܸܡܘ ܒܐܝܼܕ݂ܵܐ ܕܕ݂ܵܘܝܼܕ݂ ܘܒ̣ܐܝܼܕ݂ܵܐ ܕܥܲܒ̣ܕܵܘ̈ܗܝ. [No book]
Translation: Charles H. Hoole (1885)
Source: www.earlychristianwritings.com
Top