|
|
| [1]ܘܲܗܘ̤ܵܐ ܩܪܵܒ̣ܵܐ ܠܒܹܝܬ̣ ܫܵܐܘܿܠ ܘܲܠܒܹܝܬ̣ ܕܵܘܝܼܕ݂. ܘܕ݂ܵܘܝܼܕ݂ ܐܵܙܸܠ ܘܥܵܫܹܝܢ: ܘܲܕ݂ܒܹܝܬ̣ ܫܵܐܘܿܠ ܐܵܙܠ̄ܝܼܢ ܘܡܸܬ̣ܡܲܣܟ̇ܝܼܢ. |
[No book] |
| [2]ܘܐܸܬ̣̱ܝܼܠܕ݂ܘ ܠܕ݂ܵܘܝܼܕ݂ ܒ̈ܢܲܝܵܐ ܒܚܸܒ̣ܪܘܿܢ. ܘܲܗܘ̤ܵܐ ܒܘܼܟ݂ܪܹܗ ܚܲܡܢܘܿܢ: ܡ̣ܢ ܐܲܚܢܥܸܡ ܐܝܼܙܲܪܥܠܵܝܬܵܐ. |
[No book] |
| [3]ܘܬܸܢܝܵܢܹܗ ܟܵܠܵܒ̣: ܡ̣ܢ ܐܲܒ̣ܝܼܓܸܠ ܐܲܢ̄ܬ̇ܬܹܗ ܕܢܵܒ̣ܵܠ ܟܲܪܡ̄ܠܵܝܵܐ. ܘܲܬ̣ܠܝܼܬ̣ܵܝܵܐ ܐܲܒ̣ܫܵܠܘܿܡ ܒܲܪ ܡܲܥܟܵܐ ܒܲܪܬ̣ ܬܘܼܠܡܲܝ ܡܲܠܟܵܐ ܕܓ̣ܵܫܘܿܪ. |
[No book] |
| [4]ܘܲܪܒ̣ܝܼܥܵܝܵܐ ܐܵܕ݂ܘܿܢܝܵܐ ܒܲܪ ܚܲܓܲܝܬ̣. ܘܲܚܡܝܼܫܵܝܵܐ ܫܦܲܛܝܵܐ ܒܲܪ ܐܲܦܝܼܛܸܠ. |
[No book] |
| [5]ܘܲܫܬ̣ܝܼܬ̣ܵܝܵܐ ܐܝܼܬܸܪܥܸܡ ܕܡ̣ܢ ܥܸܓ̣ܠܵܐ ܐܲܢ̄ܬ̇ܬܹܗ ܕܕ݂ܵܘܝܼܕ݂. ܗܵܠܹܝܢ ܐܸܬ̣̱ܝܼܠܸܕ݂ܘ ܠܕ݂ܵܘܝܼܕ݂ ܒܚܸܒ̣ܪܘܿܢ. |
[No book] |
| [6]ܘܲܗܘ̤ܵܐ ܕܟܲܕ݂ ܗܘ̤ܵܐ ܩܪܵܒ̣ܵܐ ܒܹܝܬ̣ ܒܲܝܬܵܐ ܕܫܵܐܘܿܠ ܠܒܹܝܬ̣ ܒܲܝܬܵܐ ܕܕ݂ܵܘܝܼܕ݂: ܘܐܲܒ̣ܢܹܝܪ ܡܚܲܡܣܸܢ ܗ̄ܘ̣ܵܐ ܒܲܕ݂ܒܹܝܬ̣ ܫܵܐܘܿܠ. |
[No book] |
| [7]ܘܲܠܫܵܐܘܿܠ ܐܝܼܬ̣ ܗ̄ܘ̣ܵܐ ܕܪܘܼܟ݂ܬܵܐ ܘܲܫܡܵܗ̇ ܪܲܨܦܵܐ ܒܲܪܬ̣ ܐܲܢܵܐ. ܘܐܸܡܲܪ ܐܲܫܒܵܫܘܿܠ ܠܐܲܒ̣ܢܹܝܪ: ܠܡܵܢܵܐ ܥܵܐܹܠ ܐܲܢ̄ܬ̇ ܥܲܠ ܕܪܘܼܟ݂ܬܹ̇ܗ ܕܐܵܒ̣ܝ. |
[No book] |
| [8]ܘܐܸܬ̣ܒ̇ܐܸܫ ܠܐܲܒ̣ܢܹܝܪ ܛܵܒ̣ ܥܲܠ ܡܸܠܵܘ̈ܗܝ ܕܐܲܫܒܵܫܘܿܠ: ܘܐܸܡܲܪ ܐܲܒ̣ܢܹܝܪ: ܪܹܫ ܟܲܠ̈ܒܹ̇ܐ ܐ̄ܢܵܐ ܕܲܝܗܘܼܕ݂ܵܐ ܝܵܘܡܵܢܵܐ: ܕܥܸܒ̣ܕܹܬ̣ ܛܲܝܒ̇ܘܼܬ̣ܵܐ ܥܲܡ ܕܒܹܝܬ̣ ܐܲܒ̣ܘܼܟ݂: ܘܒܲܐܚܵܘ̈ܗܝ ܘܲܒ̣ܪ̈ܵܚܡܵܘܗܝ: ܘܠܵܐ ܐܲܫܠܸܡܬܵܟ݂ ܒܐܝܼܕ݂ܵܘ̈ܗܝ ܕܕ݂ܵܘܝܼܕ݂: ܘܐܲܢ̄ܬ̇ ܕܟܲܪܬ̇ ܥܠܲܝ ܥܵܘܠܵܐ ܕܐܲܢ̄ܬ̇ܬ̣ܵܐ ܝܵܘܡܵܢܵܐ. |
[No book] |
| [9]ܗܵܟܲܢܵܐ ܢܸܥܒܸ̇ܕ݂ ܐܲܠܵܗܵܐ ܠܐܲܒ̣ܢܹܝܪ ܘܗܵܟܲܢܵܐ ܢܵܘܣܸܦ ܠܹܗ: ܐܸܠܵܐ ܐܲܝܟ̇ܢܵܐ ܕܐܸܡܲܪ ܡܵܪܝܵܐ ܠܕ݂ܵܘܝܼܕ݂ ܗܵܟܲܢܵܐ ܐܸܥܒܸ̇ܕ݂ ܠܹܗ. |
[No book] |
| [10]ܠܡܲܥܒܵܪܘܼ ܡܲܠܟ̇ܘܼܬ̣ܵܐ ܡ̣ܢ ܕܒܹܝܬ̣ ܫܵܐܘܿܠ: ܘܠܲܡܩܵܡܘܼ ܟܘܼܪܣܝܹܗ ܕܕ݂ܵܘܝܼܕ݂ ܥܲܠ ܝܼܣܪܵܝܹܠ ܘܥܲܠ ܝܼܗܘܼܕ݂ܵܐ: ܡ̣ܢ ܕܵܢ ܘܲܥܕܲܡܵܐ ܠܒܹܪ ܫܒܲܥ. |
[No book] |
| [11]ܘܠܵܐ ܐܸܫܟܲܚ ܬܘܼܒ̣ ܐܲܫܒܵܫܘܿܠ ܠܲܡܬܲܒ̣ܘܼܬܹܗ ܠܐܲܒ̣ܢܹܝܪ ܦܸܬ̣ܓ̣ܵܡܵܐ ܡ̣ܢ ܕܸܚ̱ܠܬܹܗ. |
[No book] |
| [12]ܘܫܲܕܲܪ ܐܲܒ̣ܢܹܝܪ ܐܝܼܙ̈ܓܲܕܹܗ ܠܘܵܬ̣ ܕܵܘܝܼܕ݂: ܠܡܹܐܡܲܪ: ܡܵܢܲܐ ܗ̄ܝ̣ ܐܲܪܥܵܐ: ܐܲܩܝܼܡ ܩܝܵܡܵܟ݂ ܥܲܡܝ: ܘܗܵܐ ܐܝܼܕ݂ܝ ܥܲܡܵܟ݂ ܠܡܲܦܢܵܝܘܼ ܠܘܵܬ̣ܵܟ݂ ܠܟ݂ܠܹܗ ܝܼܣܪܵܝܹܠ. |
[No book] |
| [13]ܘܐܸܡܲܪ ܕܵܘܝܼܕ݂: ܫܲܦܝܼܪ: ܐܸܢܵܐ ܡܩܝܼܡ ܐ̄ܢܵܐ ܥܲܡܵܟ݂ ܩܝܵܡܵܐ: ܒܪܲܡ ܦܸܬ̣ܓ̣ܵܡܵܐ ܚܲܕ݂ ܫܵܐܸܠ ܐ̄ܢܵܐ ܡܸܢܵܟ݂: ܠܵܐ ܬܸܚܙܸܐ ܐܲܦܲܝ̈ ܐܸܠܵܐ ܐܸܢ ܬܲܝܬܹ̇ܐ ܥܲܡܵܟ݂ ܠܡܲܠܟܸ̇ܠ ܒܲܪܬ̣ ܫܵܐܘܿܠ. |
[No book] |
| [14]ܘܫܲܕܲܪ ܕܵܘܝܼܕ݂ ܐܝܼܙ̈ܓܲܕܹ̇ܐ ܠܘܵܬ̣ ܐܲܫܒܵܫܘܿܠ ܒܲܪ ܫܵܐܘܿܠ: ܘܐܸܡܲܪ ܠܹܗ: ܗܲܒ̣ܠܝܼ ܐܲܢ̄ܬܲܬ̣ܝ ܕܡܸܟ݂ܪܹܬ̣ ܠܝܼ ܒܡܵܐܬܹܝܢ ܥܘܼܪ̈ܠܵܘܵܬ̣ܵܐ ܕܲܦܠܸܫ̈ܬܵܝܹܐ. |
[No book] |
| [15]ܘܫܲܕܲܪ ܐܲܫܒܵܫܘܿܠ ܘܕ݂ܵܒ̣ܪܵܗ̇ ܡ̣ܢ ܠܘܵܬ̣ ܒܲܥܠܵܗ̇: ܡ̣ܢ ܠܘܵܬ̣ ܦܲܠܛܝܼ ܒܲܪ ܠܝܼܫ. |
[No book] |
| [16]ܘܐܸܙܲܠ ܒܲܥܠܵܗ̇ ܡܗܲܠܸܟ݂ ܘܒ̣ܵܟܹܐ ܒܵܬ̣ܪܵܗ̇ ܥܕܲܡܵܐ ܠܒܹܝܬ̣ ܚܘܿܪܝܼܡ. ܘܐܸܡܲܪ ܠܹܗ ܐܲܒ̣ܢܹܝܪ ܗܦܘܿܟ݂: ܘܲܗܦܲܟ݂. |
[No book] |
| [17]ܘܡܸܠܬܹܗ ܕܐܲܒ̣ܢܹܝܪ ܗܘ̤ܵܬ̣ ܥܲܡ ܣܵܒܹ̈ܐ ܕܝܼܣܪܵܝܹܠ: ܘܐܸܡܲܪ: ܐܵܦ ܡ̣ܢ ܐܸܬ̣ܡܵܠܝ ܐܵܦ ܡ̣ܢ ܡܢܵܬ̣ܡܵܠܝ: ܒܵܥܹܝܢ ܗ̄ܘܲܝܬ̇ܘܿܢ ܠܕ݂ܵܘܝܼܕ݂ ܕܢܲܡܠܸܟ݂ ܥܠܲܝܗܘܿܢ. |
[No book] |
| [18]ܘܗܵܫܵܐ ܥܒܸܕ݂ܘ ܗܵܟܲܢܵܐ: ܡܸܛܠ ܕܡܵܪܝܵܐ ܐܸܡܲܪ ܥܲܠ ܕܵܘܝܼܕ݂: ܕܲܒ̣ܝܲܕ݂: ܕܵܘܝܼܕ݂ ܥܲܒ̣ܕܲܝ ܐܸܥܒܸ̇ܕ݂ ܦܘܼܪܩܵܢܵܐ ܠܥܲܡܝ ܝܼܣܪܵܝܹܠ ܡ̣ܢ ܐܝܼܕ݂ܵܐ ܕܲܦܠܸܫ̈ܬܵܝܹܐ: ܘܡ̣ܢ ܐܝܼܕ݂ܵܐ ܕܟ݂ܠܗܘܿܢ ܒܥܸܠܕܒ̣ܵܒܲܝ̈ܗܘܿܢ. |
[No book] |
| [19]ܘܡܲܠܸܠ ܐܲܒ̣ܢܹܝܪ ܐܵܦ ܩܕ݂ܵܡ ܒܸܢܝܵܡܹܝܢ: ܘܐܸܙܲܠ ܐܲܒ̣ܢܹܝܪ ܠܲܡܡܲܠܵܠܘܼ ܩܕ݂ܵܡ ܕܵܘܝܼܕ݂ ܒܚܸܒ̣ܪܘܿܢ: ܟܲܕ݂ ܫܦܲܪ ܒܥܲܝܢܲܝ̈ ܟܠܹܗ ܝܼܣܪܵܝܹܠ: ܘܲܒ̣ܥܲܝܢܲܝ̈ ܟܠܹܗ ܒܹܝܬ̣ ܒܸܢܝܵܡܹܝܢ. |
[No book] |
| [20]ܘܐܸܬ̣ܵܐ ܐܲܒ̣ܢܹܝܪ ܠܘܵܬ̣ ܕܵܘܝܼܕ݂ ܠܚܸܒ̣ܪܘܿܢ: ܘܥܲܡܹܗ ܥܸܣܪܝܼܢ ܓܲܒ̣ܪ̈ܝܼܢ. ܘܲܥܒܲܕ݂ ܕܵܘܝܼܕ݂ ܠܐܲܒ̣ܢܹܝܪ ܘܲܠܥܸܣܪܝܼܢ ܓܲܒ̣ܪ̈ܝܼܢ ܕܥܲܡܹܗ: ܡܲܫܬ̇ܝܵܐ ܪܲܒܵܐ. |
[No book] |
| [21]ܘܐܸܡܲܪ ܐܲܒ̣ܢܹܝܪ ܠܕ݂ܵܘܝܼܕ݂: ܐܹܩܘܼܡ ܐܹܙܲܠ ܐܹܟܲܢܸܫ ܠܡܵܪܝ ܡܲܠܟܵܐ ܠܟ݂ܠܹܗ ܝܼܣܪܵܝܹܠ: ܘܲܢܩܝܼܡܘܼܢ ܥܲܡܵܟ݂ ܩܝܵܡܵܐ: ܘܬܲܡܠܸܟ݂ ܠܟ݂ܠ ܕܪܵܓܵܐ ܢܲܦ̮ܫܵܟ݂. ܘܫܲܕܲܪ ܕܵܘܝܼܕ݂ ܠܐܲܒ̣ܢܹܝܪ ܘܐܸܙܲܠ ܒܲܫܠܵܡܵܐ. |
[No book] |
| [22]ܘܗܵܐ ܓܲܒ̣ܪܹ̈ܐ ܕܕ݂ܵܘܝܼܕ݂ ܘܝܘܿܐܵܒ̣ ܐܸܬ̣ܵܘ ܡ̣ܢ ܓܲܝܣܵܐ: ܘܲܕ݂ܒ̣ܵܪܬܵܐ ܣܲܓܝܼܐܬ̣ܵܐ ܐܲܝܬ̇ܝܼܘ ܥܲܡܗܘܿܢ. ܘܐܲܒ̣ܢܹܝܪ ܠܵܐ ܗ̄ܘ̣ܵܐ ܥܲܡ ܕܵܘܝܼܕ݂ ܗ̄ܘ̣ܵܐ ܒܚܸܒ̣ܪܘܿܢ: ܡܸܛܠ ܕܫܲܕܪܹܗ ܘܐܸܙܲܠ ܒܲܫܠܵܡܵܐ. |
[No book] |
| [23]ܘܐܸܬ̣ܵܐ ܝܘܿܐܵܒ̣ ܘܟ݂ܠܹܗ ܥܲܡܵܐ ܕܥܲܡܹܗ: ܘܚܵܘܝܼܘ ܠܝܘܿܐܵܒ̣ ܕܐܸܬ̣ܵܐ ܐܲܒ̣ܢܹܝܪ ܒܲܪ ܢܹܝܪ ܠܘܵܬ̣ ܡܲܠܟܵܐ ܕܵܘܝܼܕ݂: ܘܫܲܕܪܹܗ ܘܐܸܙܲܠ ܒܲܫܠܵܡܵܐ. |
[No book] |
| [24]ܘܐܸܬ̣ܵܐ ܝܘܿܐܵܒ̣ ܠܘܵܬ̣ ܕܵܘܝܼܕ݂ ܡܲܠܟܵܐ ܘܐܸܡܲܪ ܠܹܗ. ܡܵܢܵܐ ܥܒܲܕܲܬ̇: ܗܵܐ ܐܸܬ̣ܵܐ ܐܲܒ̣ܢܹܝܪ ܠܘܵܬ̣ܵܟ݂: ܠܡܵܢܵܐ ܫܲܕܪܬܵܝܗܝ ܘܐܸܙܲܠ ܡ̣ܢ ܠܘܵܬ̣ܵܟ݂. |
[No book] |
| [25]ܠܵܐ ܝܵܕܲܥ ܐܲܢ̄ܬ̇ ܕܬܲܒ̣ܢܹܝܪ ܒܲܪ ܢܹܝܪ ܠܲܡܫܲܕܵܠܘܼܬ̣ܵܟ݂ ܐܸܬ̣ܵܐ: ܘܲܠܡܸܕܲܥ ܡܲܦܩܵܟ݂ ܘܡܲܥܠܵܟ݂: ܘܲܠܡܸܕܲܥ ܟܠ ܕܥܵܒܹܕ݂ ܐܲܢ̄ܬ̇. |
[No book] |
| [26]ܘܲܢܦܲܩ ܝܘܿܐܵܒ̣ ܡ̣ܢ ܠܘܵܬ̣ ܕܵܘܝܼܕ݂: ܘܫܲܕܲܪ ܐܝܼܙܓ̈ܕܹܐ ܒܵܬܲܪ ܐܲܒ̣ܢܹܝܪ: ܘܐܲܗܦܟ݂ܘܼܗܝ ܡ̣ܢ ܟܪܲܗܣܝܼܪܵܐ: ܘܕܵܘܝܼܕ݂ ܠܵܐ ܝܼܕܲܥ. |
[No book] |
| [27]ܘܲܗܦܲܟ݂ ܐܲܒ̣ܢܝܼܪ ܠܚܸܒ̣ܪܘܿܢ: ܘܛܲܫܝܹܗ ܝܘܿܐܵܒ̣ ܠܓ̣ܵܘ ܡ̣ܢ ܬܲܪܥܵܐ ܠܲܡܡܲܠܵܠܘܼ ܥܲܡܹܗ ܒܫܸܠܝܵܐ: ܘܲܡܚܵܝܗܝ ܬܲܡܵܢ ܒܚܘܼܡܫܹܗ: ܘܡܝܼܬ̣ ܒܲܕ݂ܡܵܐ ܕܲܥܫܵܐܹܝܠ ܐܲܚܘܼܗܝ. |
[No book] |
| [28]ܘܲܫܡܲܥ ܕܵܘܝܼܕ݂ ܡ̣ܢ ܒܵܬܲܪܟܸ̇ܢ: ܘܐܸܡܲܪ: ܙܲܟܵܐ ܐ̄ܢܵܐ ܘܡܲܠܟ̇ܘܼܬ̣ܝ ܡ̣ܢ ܩܕ݂ܵܡ ܡܵܪܝܵܐ ܠܥܵܠܲܡ ܡ̣ܢ ܕܡܹܗ ܕܐܲܒ̣ܢܹܝܪ ܒܲܪ ܢܹܝܪ. |
[No book] |
| [29]ܢܸܬ̇ܬ̇ܢܝܼܚ ܥܲܠ ܪܹܫܹܗ ܕܝܘܿܐܵܒ̣: ܘܥܲܠ ܪܹܫ ܟܠܹܗ ܒܹܝܬ̣ ܐܲܒ̣ܘܼܗܝ: ܘܠܵܐ ܢܸܥܢܲܕ݂ ܡ̣ܢ ܒܲܝܬܹ̇ܗ ܕܝܘܿܐܵܒ̣ ܕܵܝܒܵܐ ܘܓܲܪܒܵܐ: ܘܕ݂ܵܐܚܹܕ݂ ܡܘܼܥܵܙܵܠܵܐ: ܘܲܕ݂ܢܵܦܹܠ ܒܚܲܪܒܵܐ: ܘܲܕ݂ܚܲܣܝܼܪ ܠܲܚܡܵܐ. |
[No book] |
| [30]ܝܘܿܐܵܒ̣ ܘܐܲܒ̣ܝܼܫܲܝ ܐܲܚܘܼܗܝ ܩܛܲܠܘ ܠܐܲܒ̣ܢܹܝܪ: ܥܲܠ ܕܲܩܛܲܠ ܠܲܥܫܵܐܹܝܠ ܐܲܚܘܼܗܘܿܢ: ܒܓ̣ܒ̣ܥܘܿܢ ܒܲܩܪܵܒ̣ܵܐ. |
[No book] |
| [31]ܘܐܸܡܲܪ ܕܵܘܝܼܕ݂ ܠܝܘܿܐܵܒ̣ ܘܲܠܟ݂ܠܹܗ ܥܲܡܵܐ ܕܥܲܡܹܗ: ܨܪܵܘ ܡܵܐܢܲܝ̈ܟ̇ܘܿܢ: ܣܲܩܹ̈ܐ: ܘܐܲܪܩܸܕ݂ܘ ܩܕ݂ܵܡ ܐܲܒ̣ܢܹܝܪ. ܕܵܘܝܼܕ݂ ܘܟ݂ܠܹܗ ܥܲܡܵܐ ܐܵܙܠ̄ܝܼܢ ܒܵܬܲܪ ܥܲܪܣܵܐ. |
[No book] |
| [32]ܘܩܲܒ̣ܪܘܼܗܝ ܠܐܲܒ̣ܢܹܝܪ ܒܚܸܒ̣ܪܘܿܢ. ܘܐܲܪܝܼܡ ܡܲܠܟܵܐ ܩܵܠܹܗ ܘܲܒ̣ܟ݂ܵܐ ܥܲܠ ܩܲܒ̣ܪܹܗ ܕܐܲܒ̣ܢܹܝܪ: ܘܲܒ̣ܟ݂ܵܘ ܟܠܹܗ ܥܲܡܵܐ. |
[No book] |
| [33]ܘܐܸܬ̣ܐ̱ܒܸܠ ܡܲܠܟܵܐ ܥܲܠ ܐܲܒ̣ܢܹܝܪ: ܘܐܸܡܲܪ: ܐܲܝܟ݂ ܡܵܘܬܹ̇ܗ ܕܢܵܒ̣ܵܠ ܡܝܼܬ̣ ܐܲܒ̣ܢܹܝܪ. |
[No book] |
| [34]ܐܝܼܕܲܝ̈ܟ ܠܵܐ ܐܲܣܝܼܪ̈ܵܢ: ܘܪܸ̈ܓ̣ܠܲܝܟ ܠܵܐ ܒܫܸ̈ܫܠܬ̣ܵܐ. ܩܪܸܒ̣ܬ̇ ܐܲܝܟ݂ ܢܵܦܠܵܐ. ܩܕ݂ܵܡ ܒ̈ܢܲܝ ܥܵܘܠܵܐ ܢܦܲܠܬ̇. ܘܐܵܘܣܸܦܘ ܟܠܹܗ ܥܲܡܵܐ ܠܡܸܒ̣ܟܵܐ ܥܠܵܘܗܝ. |
[No book] |
| [35]ܘܐܸܡܲܪ ܟܠܹܗ ܥܲܡܵܐ ܠܡܵܘܟܵܠܘܼܬܹܗ ܠܕ݂ܵܘܝܼܕ݂ ܠܲܚܡܵܐ ܥܲܕ݂ ܩܲܝܵܡ ܝܵܘܡܵܐ. ܘܝܼܡܵܐ ܕܵܘܝܼܕ݂ ܘܐܸܡܲܪ: ܗܵܟܲܢܵܐ ܢܸܥܒܸ̇ܕ݂ ܠܝܼ ܐܲܠܵܗܵܐ ܘܗܵܟܲܢܵܐ ܢܵܘܣܸܦ ܠܝܼ: ܐܸܢ ܩܕ݂ܵܡ ܕܢܸܥܪܲܒ̣ ܫܸܡܫܵܐ ܐܸܛܥܲܡ ܠܲܚܡܵܐ ܐܵܘ ܡܸܕܸܡ. |
[No book] |
| [36]ܘܟ݂ܠܹܗ ܥܲܡܵܐ ܝܼܕܲܥܘ. ܘܲܛܐܸܒ̣ ܒܥܲܝܢܲܝ̈ܗܘܿܢ: ܟܠ ܕܲܥܒܲܕ݂ ܡܲܠܟܵܐ: ܘܲܫܦܲܪ ܒܥܲܝܢܲܝ̈ ܟܠܹܗ ܥܲܡܵܐ. |
[No book] |
| [37]ܘܝܼܕܲܥܘ ܟܠܹܗ ܥܲܡܵܐ ܘܟ݂ܠܹܗ ܝܼܣܪܵܝܹܠ ܒܝܵܘܡܵܐ ܗܵܘ̇: ܕܠܵܐ ܗ̄ܘ̣ܵܐ ܡ̣ܢ ܡܲܠܟܵܐ ܗ̄ܘ̣ܵܬ̣ ܠܡܸܩܛܠܹܗ ܠܐܲܒ̣ܢܹܝܪ ܒܲܪ ܢܹܝܪ. |
[No book] |
| [38]ܘܐܸܡܲܪ ܡܲܠܟܵܐ: ܠܵܐ ܝܵܕ݂ܥܝܼܢ ܐܲܢ̄ܬܘܿܢ ܕܪܹܫܵܐ ܪܲܒܵܐ ܢܦܲܠ ܝܵܘܡܵܢܵܐ ܡ̣ܢ ܝܼܣܪܵܝܹܠ. |
[No book] |
| [39]ܘܐܸܢܵܐ ܝܵܘܡܵܢܵܐ ܕܵܚܹܠ ܐ̄ܢܵܐ. ܘܲܚܙܹܝܬ̣ ܐܸܢܵܐ ܡܲܠܟܵܐ: ܕܓܲܒ̣ܪܹ̈ܐ ܗܵܠܹܝܢ ܒ̈ܢܲܝ ܨܘܿܪܝܵܐ ܩܫܹܝܢ ܡܹܢܝ. ܢܸܦܪܘܿܥ ܡܵܪܝܵܐ ܠܥܵܒܹܕ݂ ܒܝܼܫܬܵܐ ܐܲܝܟ݂ ܒܝܼܫܬܹ̇ܗ. |
[No book] |