|
|
| [1]ܗܵܟܲܢܵܐ ܚܵܘ̣ܝܲܢܝ ܡܵܪܹܐ ܡܵܪ̈ܵܘܵܬ̣ܵܐ ܒܪܝܼܬ̣ܵܐ ܕܩܲܡܨܵܐ ܒܪܹܫ ܡܵܘܥܝܼܬ̣ܵܐ ܕܠܩܸܫܵܐ: ܘܗ̤ܘ ܠܸܩܫܵܐ ܒܵܬܲܪ ܓܸܙܵܐ ܗ̄ܘܼܵܐ ܕܡܠܟܵܐ. |
[No book] |
| [2]ܘܟܲܕ݂ ܓܲܡܲܪ ܠܡܹܐܟ݂ܠܹܗ ܠܥܸܣܒܵܐ ܕܐܲܪܥܵܐ ܐܸܡ̇ܪܹܬ̣: ܡܵܪܹܐ ܡܵܪ̈ܵܘܵܬ̣ܵܐ ܚܲܣܵܢ. ܡܲܢ̣ܘܼ ܢܩܝܼܡܝܼܘܗܝ ܠܝܲܥܩܘܿܒ̣: ܡܸܛܠ ܕܲܙܥܘܿܪ ܗ̄ܘܼ. |
[No book] |
| [3]ܐܲܗܦܸܟ݂ܝܗ̇ ܡܵܪܝܵܐ ܠܗܵܕܹܐ ܘܠܵܐ ܬܸܗܘܹܐ. |
[No book] |
| [4]ܗܵܟܲܢܵܐ ܚܵܘ̣ܝܲܢܝ ܡܵܪܹܐ ܡܵܪ̈ܵܘܵܬ̣ܵܐ: ܘܗܵܐ ܩ̣ܪܵܐ ܠܲܡܕ݂ܵܢ ܒܢܘܼܪܵܐ ܡܵܪܹܐ ܡܵܪ̈ܵܘܵܬ̣ܵܐ: ܘܐܸܟ݂ܠܲܬ̤ ܠܲܬ̣ܗܘܿܡܵܐ ܪܲܒܵܐ: ܘܐܸܟ݂ܠܲܬ̤ ܠܦܵܠܓ̇ܘܼܬ̣ܵܐ. |
[No book] |
| [5]ܘܐܸܡ̇ܪܹܬ̣ ܡܵܪܹܐ ܡܵܪ̈ܵܘܵܬ̣ܵܐ ܚܲܣܵܢ: ܡܲܢ̣ܘܼ ܢܩܝܼܡܝܼܘܗܝ ܠܝܲܥܩܘܿܒ̣: ܡܸܛܠ ܕܲܙܥܘܿܪ ܗ̄ܘܼ. |
[No book] |
| [6]ܐܲܗܦܸܟܹܝܗ̇ ܡܵܪܝܵܐ ܠܗܵܕܹܐ: ܘܐܵܦ ܗ̤ܝ ܠܵܐ ܬܸܗܘܹܐ. |
[No book] |
| [7]ܗܵܟܲܢܵܐ ܚܵܘ̣ܝܲܢܝ: ܘܗܵܐ ܡܵܪܝܵܐ ܩܵܐܹ̇ܡ ܥܲܠ ܫܘܼܪܵܐ ܕܐܵܕ݂ܵܡܘܿܣ: ܘܐܝܼܕܹܗ ܐܵܕ݂ܵܡܘܿܣ. |
[No book] |
| [8]ܘܐܸܡܲܪ ܠܝܼ ܡܵܪܝܵܐ: ܡܵܢܵܐ ܚ̣ܙܲܝܬ̇ ܥܵܡܘܿܣ: ܘܐܸܡ̇ܪܹܬ̣ ܐܵܕ݂ܵܡܘܿܣ: ܘܐܸܡܲܪ ܠܝܼ ܡܵܪܝܵܐ: ܗܵܐ ܐܸܢܵܐ ܣܵܐܹ̇ܡ ܐ̄ܢܵܐ ܐܵܕ݂ܵܡܘܿܣ ܒܓ̣ܵܘ ܥܲܡܝ ܝܑܼܣܪܵܝܹܠ: ܘܠܵܐ ܐܵܘܣܸܦ ܬܘܼܒ̣ ܕܐܲܥܒܲܪ ܐܸܢܘܿܢ. |
[No book] |
| [9]ܘܢܸܚ̱ܪ̈ܒ̣ܵܢ ܦܪ̈ܲܟܹ̇ܐ ܕܓ̣ܘܼܚܟܵܐ: ܘܡܲܩܕ̇ܫܹ̈ܐ ܕܝܼܣܪܵܝܹܠ ܢܸܚ̱ܪܒ̣ܘܼܢ: ܘܐܹܩܘܼܡ ܥܲܠ ܒܹܝܬ̣ ܝܘܿܪܲܒ̣ܥܲܡ ܒܚܲܪܒܵܐ. |
[No book] |
| [10]ܘܲܫ̣ܠܲܚ ܐܵܡܘܿܨܝܼܵܐ ܟܘܼܡܪܵܐ ܕܒܹܝܬ̣ ܐܹܝܠ: ܠܘܵܬ̣ ܝܘܿܪܲܒ̣ܥܲܡ ܡܲܠܟܵܐ ܕܝܼܣܪܵܝܹܠ: ܘܐܸܡܲܪ ܠܹܗ: ܡܸܪܲܕ݂ ܥܠܲܝܟ ܥܵܡܘܿܣ ܒܓ̣ܵܘ ܒܹܝܬ̣ ܝܑܼܣܪܵܝܹܠ: ܘܠܵܐ ܡܸܫܟ̇ܚܵܐ ܐܲܪܥܵܐ ܠܲܡܣܲܝܒܵܪܘܼ ܡܸܠܵܘ̈ܗܝ. |
[No book] |
| [11]ܡܸܛܠ ܕܗܵܟܲܢܵܐ ܐܵܡܲܪ ܥܵܡܘܿܣ: ܕܲܒ̣ܚܲܪܒܵܐ ܢܸܬ̣ܩܛܸܠ ܝܘܿܪܲܒ̣ܥܲܡ: ܘܝܼܣܪܵܝܹܠ ܒܫܸܒ̣ܝܵܐ ܢܸܫܬ̇ܒܸܐ ܡ̣ܢ ܐܲܪܥܹܗ. |
[No book] |
| [12]ܘܐܸܡܲܪ ܐܵܡܘܿܨܝܼܵܐ ܠܥܵܡܘܿܣ ܚܲܙܵܝܵܐ: ܥܪܘܿܩ ܙܸܠ ܠܵܟ݂ ܠܐܲܪܥܵܐ ܕܲܝܗܘܼܕ݂ܵܐ: ܘܐܲܟ݂ܘܿܠ ܬܲܡܵܢ ܠܲܚܡܵܐ: ܘܬܲܡܵܢ ܬܸܬ̣ܢܲܒܸ̇ܐ. |
[No book] |
| [13]ܘܒܹܝܬ̣ ܐܹܝܠ ܠܵܐ ܬܵܘܣܸܦ ܬܘܼܒ̣ ܠܡܹܬ̣ܢܲܒܵܝܘܼ: ܡܸܛܠ ܕܡܲܩܕ̇ܫܵܐ ܗ̄ܘܼ ܕܡܲܠܟܵܐ ܘܒܹܝܬ̣ ܡܲܠܟ̇ܘܼܬ̣ܵܐ ܗ̄ܘܼ. |
[No book] |
| [14]ܘܲܥܢ̣ܵܐ ܥܵܡܘܿܣ ܘܐܸܡܲܪ ܠܐܵܡܘܿܨܝܼܵܐ: ܐܸܠܵܐ ܠܵܐ ܗܘܹ̇ܝܬ̣ ܢܒ̣ܝܼܵܐ: ܐܵܦܠܵܐ ܒܲܪ ܢܒ̣̈ܝܹܐ: ܐܸܠܵܐ ܪܵܥܝܵܐ ܐ̄ܢܵܐ ܘܠܵܩܹ̇ܛ ܫܲܩܡܹ̈ܐ. |
[No book] |
| [15]ܘܕܲܒ̣ܪܲܢܝ ܡܵܪܝܵܐ ܡ̣ܢ ܒܸܣܬܲܪ ܥܵـ̈ـܢܵܐ: ܘܐܸܡܲܪ ܠܝܼ ܡܵܪܝܵܐ: ܙܸܠ ܐܸܬ̣ܢܲܒܵܐ ܥܲܠ ܥܲܡܝ ܝܑܼܣܪܵܝܹܠ. |
[No book] |
| [16]ܡܸܟܹ̇ܝܠ ܫܡܲܥ ܡܸܠܬܹܗ ܕܡܵܪܝܵܐ: ܐܲܢ̄ܬ̇ ܐܸܡܲܪܬ̇ ܕܠܵܐ ܬܸܬ̣ܢܲܒܸ̇ܐ ܥܲܠ ܕܒܹܝܬ̣ ܝܑܼܣܪܵܝܹܠ: ܘܠܵܐ ܬܲܠܸܦ ܠܲܕ݂ܒܹܝܬ̣ ܐܝܼܣܚܵܩ. |
[No book] |
| [17]ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ: ܐܲܢ̄ܬ̇ܬ݂ܵܟ݂ ܒܲܡܕ݂ܝܼܢ̄ܬܵܟ݂ ܬܙܲܢܸܐ: ܘܲܒ̣ܢܲܝ̈ܟ ܘܲܒ̣̈ܢܵܬ̣ܵܟ݂ ܒܚܲܪܒܵܐ ܢܸܦܠܘܼܢ: ܘܐܲܪܥܵܟ݂ ܒܲܫܘܵܝܬܵܐ ܬܸܬ̣ܦܲܠܲܓ̣: ܘܐܲܢ̄ܬ̇ ܒܐܲܪܥܵܐ ܛܲܡ̱ܐܬ̣ܵܐ ܬܡܘܼܬ̣: ܘܝܼܣܪܵܝܹܠ ܒܫܸܒ̣ܝܵܐ ܢܸܫܬ̇ܒܸܐ ܡ̣ܢ ܐܲܪܥܹܗ. |
[No book] |