|
|
| [1]ܠܵܐ ܬܸܟ̇ܘܿܣ ܠܡܵܪܝܵܐ ܐܲܠܵܗܵܟ݂: ܬܵܘܪܵܐ ܐܵܘ ܐܸܡܪܵܐ ܕܐܝܼܬ̣ ܒܹܗ ܡܘܼܡܵܐ: ܟܠ ܡܸܕܸ̇ܡ ܕܲܣܢܸܐ: ܡܸܛܠ ܕܲܛܡܲܐ ܗ̄ܘ̣ ܩܕ݂ܵܡ ܡܵܪܝܵܐ ܐܲܠܵܗܵܟ݂. |
[No book] |
| [2]ܘܐܸܢ ܢܸܫܬ̇ܟܲܚ ܒܲܝܢܵܬ̣ܟ݂ܘܿܢ ܒܲܚܕ݂ܵܐ ܡ̣ܢ ܩܘܼܪ̈ܝܼܟ݂ܘܿܢ ܕܝܵܗܹܒ̣ ܠܟ݂ܘܿܢ ܡܵܪܝܵܐ ܐܲܠܵܗܟ݂ܘܿܢ: ܓܲܒ̣ܪܵܐ ܐܵܘ ܐܲܢ̄ܬ̇ܬ̣ܵܐ: ܕܢܸܥܒܸ̇ܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ ܐܲܠܵܗܵܟ݂: ܘܢܸܥܒܲܪ ܥܲܠ ܩܝܵܡܹܗ. |
[No book] |
| [3]ܘܢܹܐܙܲܠ ܘܢܸܦܠܘܿܚ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܢܸܣܓ̇ܘܿܕ݂ ܠܗܘܿܢ: ܐܵܘ ܠܫܸܡܫܵܐ: ܐܵܘ ܠܣܲܗܪܵܐ: ܐܵܘ ܠܟ݂ܠ ܚܲܝ̈ܠܵܘܵܬ̣ܵܐ ܕܲܫܡܲܝܵܐ ܕܠܵܐ ܦܲܩܕܹܬ̣. |
[No book] |
| [4]ܘܲܢܚܵܘܘܿܢܵܟ݂: ܘܬܸܫܡܲܥ: ܘܲܬ̣ܥܲܩܸܒ̣ ܫܲܦܝܼܪ ܐܸܢ ܫܲܪܝܼܪܵܐ ܗ̄ܝܼ ܡܸܠܬ̣ܵܐ: ܘܐܸܬ̣ܥܲܒ̣ܕܲܬ̤ ܗܵܕܹܐ ܛܲܢܦܘܼܬ̣ܵܐ ܒܝܼܣܪܵܝܹܠ. |
[No book] |
| [5]ܐܲܦܸܩܲܝܗܝ ܠܓܲܒ̣ܪܵܐ ܗܵܘ̇: ܐܵܘ ܠܐܲܢ̄ܬ̇ܬ̣ܵܐ ܗܵܝ̇: ܕܲܥܒܲܕ݂ܘ ܦܸܬ̣ܓ̣ܵܡܵܐ ܗܵܢܵܐ ܒܝܼܫܵܐ ܒܩܘܼܪ̈ܝܵܟ݂: ܐܸܢ ܓܲܒ̣ܪܵܐ ܗ̄ܘ̣ ܐܵܘ ܐܲܢ̄ܬ̇ܬ̣ܵܐ: ܘܲܪܓ̣ܘܼܡܘ ܐܸܢܘܿܢ ܒܟܹܐܦܹ̈ܐ: ܘܲܢܡܘܼܬ̣ܘܼܢ. |
[No book] |
| [6]ܥܲܠ ܦܘܼܡ ܬܪܹܝܢ ܣܵܗܕ̇ܝܼܢ: ܐܵܘ ܥܲܠ ܦܘܼܡ ܬܠܵܬ̣ܵܐ ܣܵܗ̈ܕ̇ܝܼܢ: ܢܸܬ̣ܩܛܸܠ ܡܵܢ ܚܲܝܵܒ̣ ܡܵܘܬܵܐ: ܠܵܐ ܢܸܬ̣ܩܛܸܠ ܥܲܠ ܦܘܼܡܵܐ ܕܣܵܗܕܵܐ ܚܲܕ݂. |
[No book] |
| [7]ܘܐܝܼܕ݂ܵܐ ܕܣܵܗ̈ܕܹ̇ܐ ܬܫܲܪܸܐ ܒܹܗ ܒܩܲܕ݂ܡܵܝܬܵܐ ܠܡܸܩܛܠܹܗ: ܘܐܝܼܕ݂ܵܐ ܕܟ݂ܠܹܗ ܥܲܡܵܐ ܒܐܲܚܪܵܝܬܵܐ: ܘܐܵܘܒܸ̇ܕ݂ܘ ܥܵܒ̣ܕܲܝ̈ ܒܝܼ̈ܫܵܬ̣ܵܐ ܡ̣ܢ ܒܲܝܢܵܬ̣ܟ݂ܘܿܢ. |
[No book] |
| [8]ܘܟܲܕ݂ ܢܸܬ̣ܟܲܣܸܐ ܡܸܢܟ݂ܘܿܢ ܦܸܬ̣ܓ̣ܵܡܵܐ ܕܕ݂ܝܼܢܵܐ: ܒܹܝܬ̣ ܕܡܵܐ ܠܲܕ݂ܡܵܐ: ܘܒܹܝܬ̣ ܕܝܼܢܵܐ ܠܕ݂ܝܼܢܵܐ: ܘܒܹܝܬ̣ ܡܚܘܿܬ̣ܵܐ ܕܓܲܪܒ̣ܵܐ ܠܒܹܝܬ̣ ܡܚܘܿܬ̣ܵܐ ܕܓܲܪܒ̣ܵܐ: ܦܸܬ̣ܓ̣ܵܡܵܐ ܕܚܸܪܝܵܢܵܐ ܒܩܘܼܪ̈ܝܼܟ݂ܘܿܢ: ܬܩܘܼܡ ܘܬܹܐܙܲܠ ܠܐܲܬ̣ܪܵܐ ܕܢܸܓ̣ܒܹ̇ܐ ܠܹܗ ܡܵܪܝܵܐ ܐܲܠܵܗܵܟ݂. |
[No book] |
| [9]ܘܬܹܐܙܲܠ ܠܘܵܬ̣ ܟܵܗܢܵܐ: ܐܵܘ ܠܘܵܬ̣ ܠܹܘܵܝܵܐ: ܐܵܘ ܠܘܵܬ̣ ܕܲܝܵܢܵܐ ܕܢܸܗܘܸܐ ܒܝܵܘ̈ܡܵܬ̣ܵܐ ܗܵܢܘܿܢ: ܘܲܬ̣ܫܲܐܸܠ: ܘܲܢܚܵܘܿܢܵܟ݂ ܦܸܬ̣ܓ̣ܵܡܵܐ ܕܕ݂ܝܼܢܵܐ. |
[No book] |
| [10]ܘܬܸܥܒܸ̇ܕ݂ ܡ̣ܢ ܦܘܼܡ ܦܸܬ̣ܓ̣ܵܡܵܐ ܕܲܢܚܵܘܘܹܢܵܟ݂ ܡ̣ܢ ܐܲܬ̣ܪܵܐ ܗܵܘ̇: ܐܲܝܟ݂ ܕܐܸܡܲܪ ܡܵܪܝܵܐ: ܘܬܸܛܲܪ ܘܬܸܥܒܸ̇ܕ݂ ܐܲܝܟ݂ ܕܢܲܠܦܘܼܢܵܟ݂. |
[No book] |
| [11]ܡ̣ܢ ܦܘܼܡ ܢܵܡܘܿܣܵܐ ܕܲܢܚܵܘܘܿܢܵܟ݂: ܘܡ̣ܢ ܦܘܼܡ ܕܝܼܢܵܐ ܕܢܹܐܡܪܘܼܢ ܠܵܟ݂ ܬܸܥܒܸ̇ܕ݂. ܘܠܵܐ ܬܸܣܛܸܐ ܡ̣ܢ ܦܘܼܡ ܦܸܬ̣ܓ̣ܵܡܵܐ ܕܲܢܚܵܘܘܿܢܵܟ݂: ܠܵܐ ܠܝܲܡܝܼܢܵܐ ܘܠܵܐ ܠܣܸܡܵܠܵܐ. |
[No book] |
| [12]ܘܓܲܒ̣ܪܵܐ ܕܢܸܥܒܸ̇ܕ݂ ܒܡܲܪܵܚܘܼܬ̣ܵܐ: ܘܠܵܐ ܢܸܫܡܲܥ ܠܟ݂ܵܗܢܵܐ ܕܩܵܐܹ̇ܡ ܠܲܡܫܲܡܵܫܘܼ ܬܲܡܵܢ ܩܕ݂ܵܡ ܡܵܪܝܵܐ ܐܲܠܵܗܵܟ݂: ܐܵܘ ܠܕܲܝܵܢܹ̈ܐ: ܢܸܬ̣ܩܛܸܠ ܓܲܒ̣ܪܵܐ ܗܵܘ̇: ܘܐܵܘܒܸ̇ܕ݂ܘ ܥܵܒ̣ܕܲܝ̈ ܒܝܼ̈ܫܵܬ̣ܵܐ ܡ̣ܢ ܒܲܝܢܵܬ̣ܟ݂ܘܿܢ. |
[No book] |
| [13]ܘܟ݂ܠܹܗ ܥܲܡܵܐ ܢܸܫܡܥܘܼܢ ܘܢܸܕ݂ܚܠܘܼܢ: ܘܬ̣ܘܼܒ̣ ܠܵܐ ܢܲܡܪܚܘܼܢ. |
[No book] |
| [14]ܘܟܲܕ݂ ܬܸܥܘܿܠ ܠܐܲܪܥܵܐ ܕܝܵܗܹ̇ܒ̣ ܠܵܟ݂ ܡܵܪܝܵܐ ܐܲܠܵܗܵܟ݂: ܘܬܹܐܪܬܝܼܗ̇ ܘܬܸܬܸ̇ܒ̣ ܒܵܗ̇: ܘܬܹܐܡܲܪ ܐܲܩܝܼܡ ܥܠܲܝ ܡܲܠܟܵܐ ܗܵܠܹܝܢ ܥܲܡܡܹ̈ܐ ܕܒܲܚܕ݂ܵܪ̈ܲܝ. |
[No book] |
| [15]ܡܩܵܡܘܼ ܐܲܩܝܼܡ ܥܠܲܝܟ ܡܲܠܟܵܐ ܐܲܝܢܵܐ ܕܓ̣ܵܒܹܐ ܠܹܗ ܡܵܪܝܵܐ ܐܲܠܵܗܵܟ݂: ܡ̣ܢ ܒܲܝܢܵܬ̣ ܐܲܚܲܝ̈ܟ ܐܲܩܝܼܡ ܥܠܲܝܟ ܡܲܠܟܵܐ. ܠܵܐ ܫܲܠܝܼܛ ܠܵܟ݂ ܕܲܬ̣ܩܝܼܡ ܥܠܲܝܟ ܓܲܒ̣ܪܐ ܢܘܼܟ݂ܪܵܝܵܐ ܐܲܝܢܵܐ ܕܠܵܐ ܗ̄ܘ̣ܵܐ ܡ̣ܢ ܐܲܚܲܝ̈ܟ. |
[No book] |
| [16]ܒܲܠܚܘܿܕ݂ ܕܹܝܢ ܠܵܐ ܬܸܣܓܹܐ ܠܹܗ ܪ̈ܲܟ݂ܫܵܐ: ܕܠܵܐ ܢܲܗܦܟ݂ܝܼܘܗܝ ܠܥܲܡܵܐ ܠܡܸܨܪܹܝܢ ܟܲܕ݂ ܢܸܣܓܘܿܢ ܠܹܗ ܪ̈ܲܟ݂ܫܵܐ. ܘܡܵܪܝܵܐ ܐܸܡܲܪ ܠܟ݂ܘܿܢ: ܠܵܐ ܬܵܘܣܦܘܼܢ ܬܘܼܒ̣ ܠܡܸܗܦܲܟ݂ ܒܐܘܼܪܚܵܐ ܗܵܕܹܐ. |
[No book] |
| [17]ܘܠܵܐ ܢܲܣܓܹܐ ܠܹܗ ܢܸܫܹ̈ܐ ܕܠܵܐ ܢܲܣ̈ܛܝܵܢ ܠܸܒܹ̇ܗ: ܘܣܹܐܡܵܐ ܘܕܲܗܒ̣ܵܐ ܠܵܐ ܢܲܣܓܹܐ ܠܹܗ ܛܵܒ̣. |
[No book] |
| [18]ܘܡܵܐ ܕܝܵܬܹ̇ܒ̣ ܥܲܠ ܟܘܼܪܣܝܵܐ ܕܡܲܠܟ̇ܘܼܬܹܗ: ܢܸܟ݂ܬܘܿܒ̣ ܠܹܗ ܦܲܪܫܲܓ̣ܢܹܗ ܕܢܵܡܘܿܣܵܐ ܗܵܢܵܐ ܒܣܸܦܪܵܐ: ܡ̣ܢ ܩܕ݂ܵܡ ܟܵܗܢܵܐ ܘܠܹܘܵܝܵܐ. |
[No book] |
| [19]ܘܢܸܗܘܸܐ ܥܲܡܹܗ: ܘܢܸܗܘܸܐ ܩܵܪܹܐ ܒܹܗ ܟܠ ܝܵܘ̈ܡܲܝ ܚܲܝܵܘ̈ܗܝ: ܕܢܹܐܠܲܦ ܠܡܸܕ݂ܚܲܠ ܡ̣ܢ ܩܕ݂ܵܡ ܡܵܪܝܵܐ ܐܲܠܵܗܹܗ: ܘܢܸܛܲܪ ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܢܵܡܘܿܣܵܐ ܗܵܢܵܐ ܘܦܘܼܩ̈ܕܵܢܹܐ ܗܵܠܹܝܢ: ܘܢܸܥܒܸ̇ܕ݂ ܐܸܢܘܿܢ. |
[No book] |
| [20]ܕܠܵܐ ܢܸܬ̇ܬ̇ܪܝܼܡ ܠܸܒܹ̇ܗ ܡ̣ܢ ܐܲܚܵܘ̈ܗܝ: ܘܠܵܐ ܢܸܣܛܸܐ ܡ̣ܢ ܦܘܼܩ̈ܕܵܢܹܐ ܠܵܐ ܠܝܲܡܝܼܢܵܐ ܘܠܵܐ ܠܣܸܡܵܠܵܐ: ܕܢܲܣܓܸܐ ܝܵܘ̈ܡܵܬ̣ܵܐ ܕܡܲܠܟ̇ܘܼܬܹܗ ܗܘ̤ ܘܲܒ̣ܢܵܘ̈ܗܝ ܒܲܝܢܵܬ̣ ܒ̈ܢܲܝ ܝܼܣܪܵܝܹܠ. |
[No book] |