|
|
| [1]ܘܟܲܕ݂ ܬܸܦܘܿܩ ܠܲܩܪܵܒ̣ܵܐ ܥܲܠ ܒܥܸܠܕ̇ܒ̣ܵܒܲܝ̈ܟ: ܘܬܸܚܙܸܐ ܪ̈ܟ݂ܫܵܐ: ܘܡܲܪ̈ܟ̇ܒ̣ܵܬ̣ܵܐ: ܥܲܡܵܐ ܕܣܲܓ̇ܝܼ ܡܸܢܵܟ݂: ܠܵܐ ܬܸܕ݂ܚܲܠ ܡܸܢܗܘܿܢ: ܡܸܛܠ ܕܡܵܪܝܵܐ ܐܲܠܵܗܵܟ݂ ܐܵܙܹܠ ܥܲܡܵܟ݂: ܕܐܲܣܩܵܟ݂ ܡ̣ܢ ܐܲܪܥܵܐ ܕܡܸܨܪܹܝܢ. |
[No book] |
| [2]ܘܡܵܐ ܕܲܩܪܸܒ̣ܬ̇ܘܿܢ ܠܲܩܪܵܒ̣ܵܐ: ܢܸܩܪܘܿܒ̣ ܟܵܗܢܵܐ: ܘܢܹܐܡܲܪ ܠܥܲܡܵܐ. |
[No book] |
| [3]ܫܡܲܥ ܝܼܣܪܵܝܹܠ: ܐܲܢ̄ܬ̇ܘܿܢ ܩܵܪܒ̣ܝܼܬ̇ܘܿܢ ܝܵܘܡܵܢܵܐ ܠܲܩܪܵܒ̣ܵܐ ܥܲܠ ܒܥܸܠܕ̇ܒ̣ܵܒܲܝ̈ܟ̇ܘܿܢ: ܠܵܐ ܢܸܬ̇ܬ̇ܒܲܪ ܠܸܒ̇ܟ݂ܘܿܢ: ܘܠܵܐ ܬܸܕ݂ܚܠܘܼܢ: ܘܠܵܐ ܬܙܘܼܥܘܼܢ: ܘܠܵܐ ܬܸܬ̣ܪܲܗܒ̇ܘܼܢ ܡ̣ܢ ܩܕ݂ܵܡܲܝܗܘܿܢ. |
[No book] |
| [4]ܡܸܛܠ ܕܡܵܪܝܵܐ ܐܲܠܵܗܵܟ݂ ܐܵܙܹܠ ܥܲܡܵܟ݂ ܕܐܲܣܩܵܟ݂ ܡ̣ܢ ܐܲܪܥܵܐ ܕܡܸܨܪܹܝܢ: ܘܗܘ̤ ܢܸܬ̣ܟܲܬܲܫ ܥܲܠ ܐܲܦܲܝ̈ܟ̇ܘܿܢ ܥܲܡ ܒܥܸܠܕ̇ܒ̣ܵܒܲܝ̈ܟ̇ܘܿܢ: ܘܢܸܦܪܘܿܩܟ݂ܘܿܢ. |
[No book] |
| [5]ܘܢܹܐܡܪܘܼܢ ܣܵܦܪܹ̈ܐ ܠܥܲܡܵܐ: ܡܲܢܘܼ ܓܲܒ̣ܪܵܐ ܕܲܒ̣ܢܵܐ ܒܲܝܬܵܐ ܚܲܕܬ̣ܵܐ ܘܠܵܐ ܚܲܕ̇ܬܹܗ: ܢܸܗܦܘܿܟ݂ ܢܹܐܙܲܠ ܠܒܲܝܬܹ̇ܗ: ܕܲܠܡܵܐ ܢܸܬ̣ܩܛܸܠ ܒܲܩܪܵܒ̣ܵܐ: ܘܓܲܒ̣ܪܵܐ ܐ̄ܚܪܹܢܵܐ ܢܚܲܕ̇ܬ̣ܝܼܘܗܝ. |
[No book] |
| [6]ܘܡܲܢܘܼ ܓܲܒ̣ܪܵܐ ܕܲܢܨܲܒ̣ ܟܲܪܡܵܐ ܘܠܵܐ ܥܨܲܪ ܡܸܢܹܗ: ܢܸܗܦܘܿܟ݂ ܢܹܐܙܲܠ ܠܒܲܝܬܹ̇ܗ: ܕܲܠܡܵܐ ܢܸܬ̣ܩܛܸܠ ܒܲܩܪܵܒ̣ܵܐ: ܘܓܲܒ̣ܪܵܐ ܐ̄ܚܪܹܢܵܐ ܢܸܥܨܪܝܼܘܗܝ. |
[No book] |
| [7]ܘܡܲܢܘܼ ܓܵܒ̣ܪܵܐ ܕܲܡܟܲܪ ܐܲܢ̄ܬ̇ܬ̣ܵܐ ܘܠܵܐ ܢܲܣܒܵܗ̇: ܢܸܗܦܘܿܟ݂ ܢܹܐܙܲܠ ܠܒܲܝܬܹ̇ܗ: ܕܲܠܡܵܐ ܢܸܬ̣ܩܛܸܠ ܒܲܩܪܵܒ̣ܵܐ: ܘܓܲܒ̣ܪܵܐ ܐ̄ܚܪܹܢܵܐ ܢܸܣܒ̣ܝܼܗ̇. |
[No book] |
| [8]ܘܢܵܘܣܦܘܼܢ ܣܵܦܪܹ̈ܐ ܘܢܹܐܡܪܘܼܢ ܠܥܲܡܵܐ: ܡܲܢܘܼ ܓܲܒ̣ܪܵܐ ܕܕܲܚܸܠ ܘܪܲܬ̇ܝܼܬ̣ ܠܸܒܹ̇ܗ: ܢܸܗܦܘܿܟ݂ ܢܹܐܙܲܠ ܠܒܲܝܬܹ̇ܗ: ܕܲܠܡܵܐ ܢܸܬ̇ܬ̇ܒܲܪ ܠܸܒܵܐ ܕܐܲܚܵܘ̈ܗܝ ܐܲܝܟ݂ ܕܠܸܒܹ̇ܗ. |
[No book] |
| [9]ܘܡܵܐ ܕܫܲܠܸܡܘ ܣܵܦܪܹ̈ܐ ܠܡܹܐܡܲܪ ܠܥܲܡܵܐ: ܢܩܘܼܡܘܼܢ ܪܹ̈ܫܲܝ ܚܲܝ̈ܠܵܘܵܬ̣ܵܐ ܒܪܹܫ ܥܲܡܵܐ. |
[No book] |
| [10]ܘܡܵܐ ܕܩܵܪܹܒ̣ ܐܲܢ̄ܬ̇ ܠܲܩܪܝܼܬ̣ܵܐ ܠܡܸܬ̣ܟܲܬܵܫܘܼ ܥܠܹܝܗ̇: ܐܲܟ݂ܪܸܙ ܥܠܹܝܗ̇ ܫܠܵܡܵܐ. |
[No book] |
| [11]ܘܐܸܢ ܫܠܵܡܵܐ ܬܸܥܢܹܝܟ݂ ܘܬܸܦ̮ܬܲܚ ܠܵܟ݂: ܟܠ ܥܲܡܵܐ ܕܡܸܫܬ̇ܟܲܚ ܒܵܗ̇: ܢܸܗܘܘܿܢ ܠܵܟ݂ ܥܲܒ̣̈ܕܹ̇ܐ ܡܲܣܩܲܝ̈ ܡܲܕܲܐܬ̣ܵܐ: ܘܢܸܦܠܚܘܼܢܵܟ݂. |
[No book] |
| [12]ܘܐܸܢ ܠܵܐ ܬܲܫܠܸܡ ܠܵܟ݂: ܘܬܸܥܒܸ̇ܕ݂ ܥܲܡܵܟ݂ ܩܪܵܒ̣ܵܐ: ܐܲܠܘܿܨܹܝܗ̇. |
[No book] |
| [13]ܘܢܲܫܠܡܝܼܗ̇ ܡܵܪܝܵܐ ܐܲܠܵܗܵܟ݂ ܒܐܝܼ̈ܕܲܝܟ. ܘܩܲܛܸܠ ܟܠܗܘܿܢ ܕܸܟ݂ܪܹ̈ܝܗ̇ ܒܦܘܼܡܵܐ ܕܚܲܪܒܵܐ. |
[No book] |
| [14]ܒܲܠܚܘܿܕ݂ ܢܸܫܹ̈ܐ: ܘܝܼܩܲܪܬܵܐ: ܘܲܒ̣ܥܝܼܪܵܐ: ܘܟ݂ܠ ܕܐܝܼܬ̣ ܒܲܩܪܝܼܬ̣ܵܐ: ܘܟ݂ܠ ܒܸܙܬ̣ܵܐ ܒܘܿܙ ܠܵܟ݂: ܘܐܲܟ݂ܘܿܠ ܡ̣ܢ ܒܸܙܬ̣ܵܐ ܕܲܒ̣ܥܸܠܕ̇ܒ̣ܵܒܲܝ̈ܟ ܕܝܵܗܹ̇ܒ̣ ܠܵܟ݂ ܡܵܪܝܵܐ ܐܲܠܵܗܵܟ݂. |
[No book] |
| [15]ܗܵܟܲܢܵܐ ܥܒܸܕ݂ ܠܟ݂ܠܗܹܝܢ ܩܘܼܪ̈ܝܵܐ ܕܪ̈ܲܚܝܼܩܵܢ ܡܸܢܵܟ݂ ܛܵܒ̣: ܕܠܵܐ ܗ̤ܘܲܝ̈ ܡ̣ܢ ܩܘܼܪܝܵܐ ܕܥܲܡܡܹ̈ܐ ܗܵܠܹܝܢ. |
[No book] |
| [16]ܒܲܠܚܘܿܕ݂ ܡ̣ܢ ܩܘܼܪ̈ܝܵܐ ܕܗܵܠܹܝܢ ܥܲܡܡܹ̈ܐ ܕܝܵܗܹ̇ܒ̣ ܠܵܟ݂ ܡܵܪܝܵܐ ܐܲܠܵܗܵܟ݂ ܝܘܼܪܬܵܢܵܐ ܠܵܐ ܬܲܚܸܐ ܟܠ ܢܸܫܡܵܐ. |
[No book] |
| [17]ܐܸܠܵܐ ܡܸܚܪܲܒ̣ ܚܪܘܿܒ̣ ܐܸܢܘܿܢ ܠܚܹܝ̈ܬ̣ܵܝܹܐ: ܘܠܵܐ ܡܘܼܪ̈ܵܝܹܐ: ܘܠܲܟ݂ܢܲܥܢܵܝܹ̈ܐ: ܘܲܠܦܲܪܙܠܵܝܹ̈ܐ: ܘܲܠܚܵܘܵܝܹ̈ܐ: ܘܲܠܝܵܒܘܿܣܵܝܹ̈ܐ: ܐܲܝܟ݂ ܕܦܲܩܕ݂ܵܟ݂ ܡܵܪܝܵܐ ܐܲܠܵܗܵܟ݂. |
[No book] |
| [18]ܕܠܵܐ ܢܲܠܦܘܼܢܵܟ݂ ܠܡܸܥܒܸܕ݂ ܐܲܝܟ݂ ܟܠܵܗ̇ ܛܲܢܦܘܼܬ̣ܗܘܿܢ ܕܥܵܒ̣ܕ̇ܝܼܢ ܗ̄ܘ̣ܵܘ ܠܐܲܒ̣ܵܗܲܝ̈ܗܘܿܢ: ܘܬܸܚܛܘܿܢ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ. |
[No book] |
| [19]ܘܟܲܕ݂ ܬܹܐܠܨܝܼܗ̇ ܠܲܩܪܝܼܬ̣ܵܐ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ ܠܡܸܬ̣ܟܲܬܵܫܘܼ ܥܠܹܝܗ̇ ܘܲܠܡܸܟ݂ܒ̇ܫܵܗ̇: ܠܵܐ ܬܚܲܒܸ̇ܠ ܐܝܼܠܵܢܹ̈ܝܗ̇: ܘܠܵܐ ܬܲܪܡܸܐ ܥܠܲܝܗܘܿܢ ܦܲܪܙܠܵܐ: ܡܸܛܠ ܕܡܸܢܗܘܿܢ ܕܐܝܼܠܵܢܵܐ ܕܚܲܩܠܵܐ ܠܵܐ ܗ̄ܘ̣ܵܐ ܐܲܝܟ݂ ܒܲܪܢܵܫܵܐ ܕܢܸܥܪܘܿܩ ܡ̣ܢ ܩܕ݂ܵܡܲܝܟ ܒܐܘܼܠܨܵܢܵܐ. |
[No book] |
| [20]ܒܲܠܚܘܿܕ݂ ܕܹܝܢ ܐܝܼܠܵܢܵܐ ܐܲܝܢܵܐ ܕܝܵܕܲܥ ܐܲܢ̄ܬ̇ ܕܠܵܐ ܗ̄ܘ̣ܵܐ ܐܝܼܠܵܢܵܐ ܕܡܹܐܟ݂ܘܼܠܬܵܐ: ܠܹܗ ܚܲܒܸ̇ܠ ܘܲܦܣܘܿܩ: ܘܲܒ̣ܢܝܼ ܩܲܠܩܘܼܡܹ̈ܐ ܥܲܠ ܩܪܝܼܬ̣ܵܐ ܕܥܵܒ̣ܕܵܐ ܥܲܡܵܟ݂ ܩܪܵܒ̣ܵܐ: ܥܕܲܡܵܐ ܕܬܸܟ݂ܒ̇ܫܝܼܗ̇. |
[No book] |