➕
   
Ecclesiastes
Ecc
1
→
[1]ܦܸܬ̣ܓ̣ܵܡܵܘ̈ܗܝ ܕܩܘܿܗܠܲܬ̣ ܒܲܪ ܕܵܘܝܼܕܼ ܡܲܠܟܵܐ ܕܐܘܿܪܸܫܠܸܡ. [2]ܗܒܸܠ ܗܸܒ̣̈ܠܝܼܢ: ܐܵܡ̇ܲܪ ܩܘܿܗܠܲܬ̣: ܗܒܸܠ ܗܸܒ̣̈ܠܝܼܢ. ܟܠܡܸܕܸ̇ܡ ܗܸܒ̣ܠܵܐ. [3]ܡܵܢܵܐ ܝܘܼܬ̣ܪܵܢܵܐ ܠܒܲܪܢܵܫܵܐ ܒܟ̣ܠ ܥܲܡܠܵܐ ܕܗ̤ܘ ܥܵܡܹ̇ܠ ܬܚܹܝܬ̣ ܫܸܡܫܵܐ. [4]ܕܵܪܵܐ ܐܵܙܹ̇ܠ: ܘܕܼܵܪܵܐ ܐܵܬܹ̇ܐ. ܘܐܲܪܥܵܐ ܠܥܵܠܲܡ ܩܲܝܵܡܵܐ. [5]ܕܵܢܲܚ̇ ܫܸܡܫܵܐ: ܘܥܵܪܹܒ̣ ܫܸܡܫܵܐ. ܘܠܲܐܬܲܪ ܕܕܼܵܢܲܚ̇ ܗ̤ܘ ܬܵܐܹ̇ܒ̣: ܕܡ̣ܢ ܬܲܡܵܢ ܬܘܼܒ̣ ܢܸܕܼܢܲܚ. [6]ܐܵܙܹ̇ܠ ܠܬܲܝܡܢܵܐ: ܘܡܸܬ̣ܟܲܪܸܟ ܠܓܲܪܒ̇ܝܵܐ. ܡܸܬ̣ܟ̇ܪܵܟܼܵܘܼ ܡܸܬ̣ܟ̇ܪܸܟ: ܘܐܵܙܹ̇ܠ ܪܘܼܚܵܐ. ܘܲܠܚܵܕܼܪ̈ܵܬܹܗ ܬܵܐܹ̇ܒ̣ ܪܘܼܚܵܐ. [7]ܟܠ ܢܲܚܠܹ̈ܐ ܪܵܡܹ̇ܝܢ ܒܝܲܡܵܐ. ܘܝܲܡܵܐ ܠܵܐ ܡܸܬ̣̱ܡܠܸܐ: ܠܐܲܬܲܪ ܕܐܵܙ̇ܠ̄ܝܼܢ ܢܲܚܠܹ̈ܐ: ܠܬܲܡܵܢ ܗܸܢ̣ܘܿܢ ܬܵܝܒ̇ܝܼܢ ܠܡܹܐܙܲܠ. [8]ܟܠܗܘܿܢ ܦܸܬ̣ܓ̣ܵܡܹ̈ܐ ܠܐܹܝܢ. ܠܵܐ ܢܸܣܒܲܥ ܓܲܒ̣ܪܵܐ ܠܲܡܡܲܠܵܠܘܼ. ܘܠܵܐ ܣܵܒ̣ܥܵܐ ܥܲܝܢܵܐ ܠܡܸܚܙܵܐ. ܘܠܵܐ ܡܵܠ̇ܝܵܐ ܐܸܕܼܢܵܐ ܠܡܸܫܡܲܥ. [9]ܡܵܐ ܕܲܗܘ̤ܵܐ: ܗ̤ܘ ܗܵܘܹ̇ܐ. ܘܡܵܐ ܕܐܸܬ̣ܥ̱ܒ̣ܕܼ: ܗ̤ܘ ܡܸܬ̣ܥ̱ܒܸܕܼ. ܘܠܲܝܬ̇ ܡܸܕܸ̇ܡ ܚܕܸܬ̣ ܬܚܹܝܬ̣ ܫܸܡܫܵܐ. [10]ܟܠ ܕܲܢܡܲܠܸܠ ܘܢܹܐܡܲܪ: ܚܙܝܼ ܗܵܢܵܐ: ܚܕܸܬ̣ ܗ̄ܘܼ. ܟܒܲܪ ܗܘ̤ܵܐ ܡ̣ܢ ܠܥܵܠܡܝܼܢ ܕܡ̣ܢ ܠܩܘܼܕܼܡܝܼܢ. [11]ܠܲܝܬ̇ ܕܘܼܟ̣ܪܵܢ ܠܩܲܕܼܡܵܝܹ̈ܐ: ܘܐܵܦ ܠܵܐ ܠܐܲܚܪ̈ܵܝܹܐ ܕܗܵܘܹ̇ܝܢ: ܠܲܝܬ̇ ܠܗܘܿܢ ܕܘܼܟ̣ܪܵܢ ܥܲܡ ܐܲܝܠܹܝܢ ܕܗܵܘܹ̇ܝܢ ܒܐܲܚܪܵܝܬܵܐ. [12]ܐܸܢܵܐ ܩܘܿܗܠ̣ܵܬ̣ ܗܘܹ̇ܝܬ̣ ܡܲܠܟܵܐ ܥܲܠ ܝܼܣܪܵܝܹܠ ܒܐܘܿܪܸܫܠܸܡ. [13]ܘܝܼܗ̄ܒܹ̇ܬ̣ ܠܹܒ̇ܝ ܠܡܸܒ̣ܥܵܐ ܘܲܠܡܸܬ̣ܒܲܝܵܢܘܼ ܒܚܸܟ̣ܡ̱ܬ̣ܵܐ: ܥܲܠ ܟܠ ܕܐܸܬ̣ܥ̱ܒܲܕܼ ܬܚܹܝܬ̣ ܫܸܡܫܵܐ. ܥܸܢܝܵܢܵܐ ܒܝܼܫܵܐ ܝܲܗ̄ܒ̣ ܡܵܪܝܵܐ ܠܲܒ̣ܢܲܝ̈ܢܵܫܵܐ ܕܢܸܬ̣ܥ̱ܢܘܿܢ ܒܹܗ. [14]ܚܙܹ̇ܝܬ̣ ܟܠ ܥܒ̣ܵܕܼܵܐ ܕܐܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ. ܘܗܵܐ ܟܠܡܸܕܸ̇ܡ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ. [15]ܡܕܼܵܘܕܼܵܐ ܠܵܐ ܡܸܫܟܲܚ ܠܡܸܬ̣ܩܲܢ. ܘܚܲܣܝܼܪܵܐ ܠܵܐ ܡܸܫܟܲܚ ܠܡܸܬ̣ܡ̱ܢܵܝܘܼ. [16]ܡܲܠܥܹ̇ܬ̣ ܐܸܢܵܐ ܥܲܡ ܠܹܒ̇ܝ ܠܡܹܐܡܲܪ: ܐܸܢܵܐ ܗܵܐ ܝܸܪܒܹ̇ܬ̣ ܘܐܵܘܣܦܹ̇ܬ̣ ܚܸܟ̣ܡ̱ܬ̣ܵܐ: ܥܲܠ ܟܠ ܕܲܗܘ̤ܵܘ ܩܕܼܵܡܲܝ ܒܐܘܿܪܸܫܠܸܡ. ܘܠܹܒ̇ܝ ܚܙ̣ܵܐ ܣܘܿܓ̣ܵܐܐ ܕܚܸܟ̣ܡ̱ܬ̣ܵܐ ܘܕܼܝܼܕܲܥܬ̣ܵܐ. [17]ܘܝܸܗ̄ܒܹ̇ܬ̣ ܠܹܒ̇ܝ ܠܡܸܕܲܥ ܚܸܟ̣ܡ̱ܬ̣ܵܐ: ܘܝܼܕܲܥܬ̣ܵܐ: ܘܡܲܬ̣̈ܠܹܐ: ܘܣܲܟ̇ܘܼܠܬ̣ܵܢܘܼܬ̣ܵܐ. ܘܝܼܕܼܥܹ̇ܬ̣ ܕܐܵܦ ܗܵܢܵܐ ܛܘܼܪܵܦܵܐ ܕܪܘܼܚܵܐ. [18]ܡܸܛܠ ܕܲܒ̣ܣܘܿܓܲܐܬ̣ ܚܸܟ̣ܡ̱ܬ̣ܵܐ ܣܘܿܓܲܐܬ̣ ܪܘܼܓ̣ܙܵܐ. ܘܲܕܼܡܵܘܣܸܦ ܠܡܸܕܲܥ: ܡܵܘܣܸܦ ܟܹܐܒ̣ܵܐ.
 
Top