|
|
| [1]ܘܲܗܘ̤ܵܐ ܒܝܵܘ̈ܡܵܘܗܝ ܕܐܲܚܫܝܼܪܹܫ ܗܵܘܿ ܒܪܹܗ ܕܐܲܚܫܝܼܪܹܫ: ܕܐܲܡ̣ܠܸܟ݂ ܡ̣ܢ ܗܘܿܕ݂: ܘܲܥܕܲܡܵܐ ܠܟ݂ܘܼܫ: ܥܲܠ ܡܵܐܐ ܘܥܸܣܪܝܼܢ ܡܕ݂ܝܼ̈ܢܵܢ. |
[No book] |
| [2]ܒܝܵܘ̈ܡܵܬ̣ܵܐ ܗܵܢ̇ܘܿܢ: ܟܲܕ݂ ܝܵܬܹܒ̣ ܗ̄ܘܼܵܐ ܡܲܠܟܵܐ ܐܲܚܫܝܼܪܹܫ ܥܲܠ ܟܘܼܪܣܝܵܐ ܕܡܲܠܟ̇ܘܼܬܹܗ: ܕܲܒ̣ܫܘܿܫܲܢ ܒܝܼܪܬܵܐ. |
[No book] |
| [3]ܒܲܫܢܲܬ̣ ܬܠܵܬ̣ ܕܡܲܠܟ̇ܘܼܬܹܗ: ܥܒܲܕ݂ ܡܲܫܬ̇ܝܵܐ ܪܲܒܵܐ ܠܟ݂ܠܗܘܿܢ ܪܵܘܪ̈ܒ̣ܵܢܵܘܗܝ: ܘܥܲܒ̣ܕܵܘ̈ܗܝ: ܚܹܝܠ ܦܵܪ̈ܣܵܝܹܐ ܘܡܵـ̈ـܕ݂ܵܝܹܐ ܘܦܲܪ̈ܬ̇ܘܵܝܹܐ. ܘܪܵܘ̱ܪ̈ܒ̣ܵܢܹܐ ܕܡܲܠܟܵܐ ܩܕ݂ܵܡܵܘܗܝ: ܘܪܵܘ̱ܪ̈ܒ̣ܵܢܹܐ ܕܲܡܕ݂ܝܼ̈ܢܵܬ̣ܵܐ. |
[No book] |
| [4]ܟܲܕ݂ ܚܵܘܝܼ ܥܘܼܬ̣ܪܵܐ ܘܐܝܼܩܵܪܵܐ ܕܡܲܠܟ̇ܘܼܬܹܗ: ܘܐܝܼܩܵܪܵܐ ܕܬܸܫܒ̇ܘܿܚܬܵܐ ܕܪܲܒ̇ܘܼܬܹܗ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ: ܡܵܐܐ ܘܲܬ̣ܡܵܢܐܝܼܢ ܝܵܘ̈ܡܝܼܢ. |
[No book] |
| [5]ܘܟܲܕ݂ ܫܲܠܸܡ̣ܘ ܝܵܘ̈ܡܵܬ̣ܵܐ ܗܵܢܘܿܢ: ܥ̣ܒܲܕ݂ ܡܲܠܟܵܐ ܠܟ݂ܠ ܥܲܡܵܐ ܕܐܸܫܬ̇ܟܲܚ ܒܫܘܿܫܲܢ ܒܝܼܪܬܵܐ: ܡ̣ܢ ܙܥܘܿܪܵܐ ܘܲܥܕܲܡܵܐ ܠܪܲܒܵܐ: ܡܲܫܬ̇ܝܵܐ ܫܲܒ̣ܥܵܐ ܝܵܘ̈ܡܝܼܢ: ܒܕ݂ܵܪܲܬ̣ ܓܲܢܲܬ̣ ܒܲܝܬܿܘܿܢܵܐ ܕܡܲܠܟܵܐ. |
[No book] |
| [6]ܘܲܢܓ̇ܝܼ̈ܕ݂ܵܢ ܘܐܹܠܹ̈ܐ ܕܲܥܡܲܪ ܟܘܼܒܵܐ: ܕܬܸܟ݂ܠ̱ܬ̣ܵܐ: ܘܲܡܬ̣ܝܼ̈ܚܵܢ ܒܚܲܒ̣̈ܠܹܐ ܕܒ̣ܘܼܨܵܐ ܘܕܲܐܪܓ̇ܘܵܢܵܐ ܥܲܠ ܓܝܼ̈ܓ̣ܠܹܐ ܕܟܸܣܦܵܐ: ܘܥܲܠ ܥܲܡܘܿܕ݂ܵܐ ܕܐܸܫܟܵܪܥܵܐ. ܘܥܲܪ̈ܣܵܬ̣ܵܐ ܕܕܲܗܒ̣ܵܐ ܘܲܕ݂ܣܹܐܡܵܐ ܪ̈ܲܡܝܵܢ ܥܲܠ ܪܨܝܼܦܵܬ̣ܵܐ ܕܫܝܼܫܵܐ: ܘܬܸܫ̱ܘ̈ܝܵܬ̣ܵܐ ܕܒ̣ܘܼܨܵܐ ܘܲܕ݂ܫܹܐܪܵܝܵܐ. |
[No book] |
| [7]ܘܡܲܫܩܹܝܢ ܒܡܵܐܢܹ̈ܐ ܕܕܲܗܒ̣ܵܐ: ܘܡܵܐܢܹ̈ܐ ܡ̣ܢ ܡܵܐܢܹ̈ܐ ܦܪܝܼܫܝܼܢ: ܘܚܲܡܪܵܐ ܕܡܲܠܟ̇ܘܼܬ̣ܵܐ ܣܲܓ̇ܝܼ: ܐܲܝܟ݂ ܐܝܼܕ݂ܵܐ ܕܡܲܠܟܵܐ. |
[No book] |
| [8]ܘܡܲܫܬ̇ܝܵܐ ܒܢܵܡܘܿܣܵܐ: ܘܠܲܝܬ̇ ܕܐܵܠܹ̇ܨ. ܡܸܛܠ ܕܗܵܟܲܢܵܐ ܦ̣ܩܲܕ݂ ܡܲܠܟܵܐ: ܠܟ݂ܠ ܕܪܲܒ̇ ܒܒܲܝܬܹ̇ܗ: ܕܢܸܥܒ̇ܕ݂ܘܼܢ ܨܸܒ̣ܝܵܢܵܐ ܕܟ݂ܠ ܐ̄ܢܵܫ. |
[No book] |
| [9]ܘܘܲܫܬ̇ܝܼ ܡܲܠܟ̇ܬ̣ܵܐ ܥܸܒ̣ܕܲܬ̤ ܐܵܦ ܗ̤ܝ ܡܲܫܬ̇ܝܵܐ ܪܲܒܵܐ ܠܟ݂ܠܗܹܝܢ ܢܸܫܹ̈ܐ ܒܒܹܝܬ̣ ܡܲܠܟ̇ܘܼܬܹܗ ܕܡܲܠܟܵܐ ܐܲܚܫܝܼܪܹܫ. |
[No book] |
| [10]ܘܲܒ̣ܝܵܘܡܵܐ ܫܒ̣ܝܼܥܵܝܵܐ ܟܲܕ݂ ܫܦܲܪ ܠܸܒܹ̇ܗ ܕܡܲܠܟܵܐ ܒܚܲܡܪܵܐ: ܐܸܡܲܪ ܠܲܡܗܲܝܡܢܹ̈ܐ ܠܒܸܙܬ̣ܵܐ: ܘܲܠܪܲܚܒ̇ܘܿܢܵܐ: ܘܲܠܒܸܓ̣ܬ̣ܵܐ: ܘܠܲܐܓ̣ܒ̣ܘܼܬ̣ܵܐ: ܘܲܠܬܲܪܲܫ: ܘܲܠܙܵܬܲܪ: ܘܲܠܟܲܪܟܲܫ: ܫܲܒ̣ܥܵܐ ܡܗܲܝܡܢܹ̈ܐ ܕܲܡܫܲܡܫܝܼܢ ܩܕ݂ܵܡ ܡܲܠܟܵܐ ܐܲܚܫܝܼܪܹܫ. |
[No book] |
| [11]ܠܡܲܥܵܠܘܼ ܠܘܲܫܬ̇ܝܼ ܡܲܠܟ̇ܘܼܬ̣ܵܐ ܩܕ݂ܵܡ ܡܲܠܟܵܐ ܒܬ̣ܵܓ̣ܵܐ ܕܡܲܠܟ̇ܘܼܬ̣ܵܗ̇: ܠܲܡܚܵܘܵܝܘܼ ܠܥܲܡܡܹ̈ܐ ܘܲܠܪܵܘ̱ܪ̈ܒ̣ܵܢܹܐ ܫܘܼܦܪܵܗ̇: ܡܸܛܠ ܕܫܲܦܝܼܪ ܗ̄ܘܼܵܐ ܚܸܙܘܵܗ̇. |
[No book] |
| [12]ܘܠܵܐ ܨܒ̣ܵܬ̤ ܘܲܫܬ̇ܝܼ ܡܲܠܟ̇ܘܼܬ̣ܵܐ ܠܡܸܥܲܠ: ܒܦܸܬ̣ܓ̣ܵܡܵܐ ܕܫܲܕܲܪ ܥܠܹܝܗ̇ ܡܲܠܟܵܐ ܒܐܝܼܕ݂ܵܐ ܕܲܡܗܲܝܡܢܹ̈ܐ: ܘܲܪܓܸܙ ܡܲܠܟܵܐ ܛܵܒ̣. ܘܚܸܡܬܹܗ ܡܸܬ̣ܓܵܘܙܠܵܐ ܗ̄ܘܼܵܬ̣. |
[No book] |
| [13]ܘܐܸܡܲܪ ܡܲܠܟܵܐ ܠܚܲܟ̇ܝܼܡܹ̈ܐ ܒܢܲܝ̈ ܝܵܕ݂ܥܲܝ̈ ܙܲܒ̣ܢܹ̈ܐ: ܡܸܛܠ ܕܗܵܟܲܢܵܐ ܗ̄ܘܼ ܢܵܡܘܿܣܹܗ ܐܵܡܲܪ ܗ̄ܘܼܵܐ ܩܕ݂ܵܡ ܟܠ ܕܝܵܕ݂ܥܝܼܢ ܗ̄ܘܼܵܘ ܢܵܡܘܿܣܹ̈ܐ ܘܕ݂ܝܼܢܹ̈ܐ. |
[No book] |
| [14]ܘܠܲܕ݂ܩܲܪܝ̣ܒ̣ܝܼܢ ܠܹܗ: ܒܪܹܫ: ܘܲܫܬܲܪ: ܘܐܲܪܡܲܬ̣: ܘܡܘܿܣ: ܘܬܲܪܫܝܼܫ: ܘܡܲܪܣܵܐ: ܘܲܡܥܵܘܟ݂ܵܢ: ܫܲܒ̣ܥܵܐ ܪܵܘ̱ܪ̈ܒ̣ܵܢܹܐ ܕܦܵܪܹܣ ܘܲܕ݂ܡܵܕܲܝ. ܕܝܵܬ̣ܒ̇ܝܼܢ ܩܕ݂ܵܡ ܡܲܠܟܵܐ: ܘܡܸܬ̣ܚܙܹܝܢ ܩܕ݂ܵܡܵܘܗܝ: ܒܬܲܪܥܵܐ ܕܡܲܠܟ̇ܘܼܬ̣ܵܐ. |
[No book] |
| [15]ܐܸܡܲܪܘ: ܕܡܵܢܵܐ ܘܵܠܹ̇ܐ ܠܡܸܥܒܲܕ݂ ܠܵܗ̇ ܠܡܲܠܟ̇ܬ̣ܵܐ ܘܲܫܬ̇ܝܼ: ܥܲܠ ܕܠܵܐ ܥܸܒ̣ܕܲܬ̤ ܡܸܠܬܹܗ ܕܡܲܠܟܵܐ ܐܲܚܫܝܼܪܹܫ: ܕܲܫܠܲܚ̣ ܒܐܝܼܕ݂ܵܐ ܕܲܡܗܲܝܡܢܹ̈ܐ. |
[No book] |
| [16]ܘܐܸܡܲܪ ܡܥܵܘܟ݂ܵܢ ܩܕ݂ܵܡ ܡܲܠܟܵܐ: ܘܲܩܕ݂ܵܡ ܪܵܘ̱ܪ̈ܒ̣ܵܢܹܐ: ܠܵܐ ܗ̄ܘܼܵܐ ܥܲܠ ܡܲܠܟܵܐ ܒܲܠܚܘܿܕ݂ ܒܲܣܪܲܬ̤ ܘܲܫܬ̇ܝܼ ܡܲܠܟ̇ܬ̣ܵܐ: ܐܸܠܵܐ ܥܲܠ ܟܠܗܘܿܢ ܪܵܘ̱ܪ̈ܒ̣ܵܢܹܐ: ܘܥܲܠ ܟܠܗܘܿܢ ܥܲܡܡܹ̈ܐ ܕܲܒ̣ܟ݂ܠܗܹܝܢ ܡܕ݂ܝܼ̈ܢܵܬ̣ܵܐ ܕܡܲܠܟܵܐ ܐܲܚܫܝܼܪܹܫ. |
[No book] |
| [17]ܘܟܲܕ݂ ܢܸܦܘܿܩ ܛܸܒܵܐ ܘܡܸܠܬ̣ܵܐ ܗܵܕܹܐ ܥܲܠ ܟܠܗܹܝܢ ܢܸܫܹ̈ܐ: ܢܸܗ̱ܘ̈ܝܵܢ ܫܵܝ̈ܛܵܢ ܘܒ̣ܵܣܪ̈ܵܢ ܓܲܒ̣ܪ̈ܲܝܗܹܝܢ ܒܥܲܝܢܲܝ̈ܗܹܝܢ: ܘܢܸܗ̱ܘ̈ܝܵܢ ܐܵܡܪ̈ܵܢ ܕܡܲܠܟܵܐ ܐܲܚܫܝܼܪܹܫ ܦ̣ܩܲܕ݂ ܠܡܲܥܵܠܘܼ ܠܘܲܫܬ̇ܝ ܡܲܠܟ̇ܬ̣ܵܐ ܩܕ݂ܵܡܵܘܗܝ: ܘܠܵܐ ܥܸܠܲܬ̣. |
[No book] |
| [18]ܝܵܘܡܵܢܵܐ ܢܹܐܡܪܘܿܢ ܪܵܘ̱ܪ̈ܒ̣ܵܢܹܐ ܕܦܵܪܹܣ ܘܲܕ݂ܡܵܕܲܝ ܕܲܫܡܲܥܘ ܦܸܬ̣ܓ̣ܵܡܵܗ̇ ܕܡܲܠܟ̇ܬ̣ܵܐ ܡ̣ܢ ܟܠܗܘܿܢ ܪܵܘ̱ܪ̈ܒ̣ܵܢܹܐ ܕܡܲܠܟܵܐ: ܘܟ݂ܠܵܗ̇ ܒܣܝܼܪܘܼܬ̣ܵܐ ܘܪܘܼܓ̣ܙܵܐ. |
[No book] |
| [19]ܐܸܢ ܥܲܠ ܡܲܠܟܵܐ ܫܲܦܝܼܪ ܢܸܦܘܿܩ ܦܸܬ̣ܓ̣ܵܡܵܐ ܕܡܲܠܟ̇ܘܼܬ̣ܵܐ ܡ̣ܢ ܩܕ݂ܵܡܵܘܗܝ: ܘܢܸܬ̣ܟ̇ܬܸܒ̣ ܒܢܵܡܘܿܣ ܡܵܕܲܝ ܘܦܵܪܹܣ ܕܠܵܐ ܥܵܒܲܪ. ܘܬ̣ܘܼܒ̣ ܠܵܐ ܬܸܥܘܿܠ ܘܲܫܬ̇ܝܼ ܡܲܠܟ̇ܬ̣ܵܐ ܠܘܵܬ̣ ܡܲܠܟܵܐ ܐܲܚܫܝܼܪܹܫ. ܘܡܲܠܟ̇ܘܼܬ̣ܵܗ̇ ܢܸܬܸ̇ܠ ܡܲܠܟܵܐ ܠܲܚܒܲܪܬ̣ܵܗ̇ ܕܛܵܒ̣ܵܐ ܡܸܢܵܗ̇. |
[No book] |
| [20]ܘܢܸܫܬ̇ܡܲܥ ܦܸܬ̣ܓ̣ܵܡܵܐ ܕܡܲܠܟܵܐ. ܘܢܸܥܒܲܪ ܒܟ݂ܠܵܗ̇ ܡܲܠܟ̇ܘܼܬ̣ܵܐ: ܡܸܛܠ ܕܪܲܒܵܐ ܗ̄ܝܼ: ܘܟ݂ܠܗܹܝܢ ܢܸܫܹ̈ܐ ܢܸܥ̈ܒ̇ܕ݂ܵܢ ܐܝܼܩܵܪܵܐ ܠܓܲܒ̣ܪ̈ܲܝܗܹܝܢ: ܡ̣ܢ ܪܲܒܵܐ ܘܲܥܕܲܡܵܐ ܠܲܙܥܘܿܪܵܐ. |
[No book] |
| [21]ܘܲܫܦܲܪ ܦܸܬ̣ܓ̣ܵܡܵܐ ܗܵܢܵܐ ܒܥܲܝܢܵܘ̈ܗܝ ܕܡܲܠܟܵܐ ܘܲܕ݂ܪܵܘ̱ܪ̈ܒ̣ܵܢܵܘܗܝ. ܘܲܥܒܲܕ݂ ܡܲܠܟܵܐ ܐܲܝܟ݂ ܦܸܬ̣ܓ̣ܵܡܹܗ ܕܲܡܥܵܘܟ݂ܵܢ. |
[No book] |
| [22]ܘܫܲܕܲܪ ܐܸܓ̇ܪ̈ܵܬ̣ܵܐ ܠܟ݂ܠܗܹܝܢ ܡܕ݂ܝܼ̈ܢܵܬܹܗ ܕܡܲܠܟܵܐ: ܠܲܡܕ݂ܝܼܢ̄ܬܵܐ ܐܲܝܟ݂ ܟܬ̣ܵܒ̣ܵܗ̇: ܘܲܠܥܲܡܵܐ ܐܲܝܟ݂ ܠܸܫܵܢܹܗ: ܠܡܸܗܘܵܐ ܟܠ ܓܒܲܪ ܫܲܠܝܼܛ ܒܒܲܝܬܹ̇ܗ: ܘܲܡܡܲܠܸܠ ܐܲܝܟ݂ ܠܸܫܵܢ ܥܲܡܹܗ. |
[No book] |