➖ »
«
➖ ➕
Peshitta OT
PesOT
The Acts of Thomas
ActThom
←
Esther
Est
16
   
[(ܦܲܪܫܲܓ̣ܢܵܐ ܕܐܸܓ̇ܪܬܵܐ ܕܡܲܠܟܵܐ ܐܲܪܛܲܚܫܲܫܬ̇ ܕܫܲܕ̇ܪܵܗ̇ ܡܸܛܠ ܝܗ̄ܘܼܕ݂ܵܝܹ̈ܐ ܠܟ݂ܠܗܹܝܢ ܡܕ݂ܝܼ̈ܢܵܬ̣ܵܐ ܕܡܲܠܟ̇ܘܼܬܹܗ ܗܵܝ̇ ܕܐܵܦ ܗ̤ܝ ܠܵܐ ܫܟ݂ܝܼܚܵܐ ܒܐܲܨܲܚܬܵܐ ܥܸܒ̣ܪܵܝܬܵܐ).]
[1]ܡ̣ܢ ܐܲܪܛܚܫܲܫܬ̇ ܡܲܠܟܵܐ ܪܲܒܵܐ ܕܡܲܡܠܲܟ݂ ܡ̣ܢ ܗܘܿܕ݂ ܘܲܥܕܲܡܵܐ ܠܟ݂ܘܼܫ ܠܘܵܬ̣ ܫܲܠܝܼܛܹ̈ܐ ܕܲܡܵܐܐ ܘܥܸܣܪܝܼܢ ܘܲܫܒܲܥ ܡܕ݂ܝܼ̈ܢܵܢ ܠܪܵܘ̱ܪ̈ܒ̣ܵܢܹܐ ܕܲܡܕ݂ܝܼ̈ܢܵܬ̣ܵܐ ܕܲܬ̣ܚܹܝܬ̣ ܫܘܼܠܛܵܢܲܢ ܫܠܵܡܵܐ. [No book]
[2]ܣܲܓ̇ܝܼ̈ܐܹܐ ܐܸܬ̇ܕܲܒܲܪܘ ܒܝܼܫܵܐܝܼܬ̣ ܘܐܸܫܬ̣ ܥܠܝܼܘ ܟܲܕ݂ ܚ̣ܙܵܘܗܝ ܕܪܹ̈ܫܵܢܹܐ ܡܚܲܒ̇ܒ̣ܝܼܢ ܠܗܘܿܢ ܘܲܡܝܲܩܪܝܼܢ ܠܗܘܿܢ. [No book]
[3]ܘܠܵܐ ܗ̄ܘܼܵܐ ܒܲܠܚܘܿܕ݂ ܡܸܬ̣ܚܲܦܛܝܼܢ ܠܡܸܛܠܲܡ ܠܥܲܒ̣̈ܕܹ̇ܐ ܕܡܲܠ̈ܟܹ̇ܐ ܐܸܠܵܐ ܐܵܦ ܠܵܐ ܡܸܬ̣ܢܲܟ݂ܠܝܼܢ ܥܲܠ ܐܲܝܠܹܝܢ ܕܐܵܘܪܸܒ̣ܘ ܐܸܢܘܿܢ ܟܲܕ݂ ܠܵܐ ܡܸܬ̇ܬ̇ܢܝܼܚܝܼܢ ܒܐܝܼܩܵܪܵܐ ܕܐܸܬ̣̱ܝܼܗܸܒ̣ ܠܗܘܿܢ. [No book]
[4]ܘܠܵܐ ܟܲܕ̇ܘܼ ܠܗܘܿܢ ܕܠܵܐ ܡܩܲܒ̇ܠܝܼܢ ܛܲܝܒ̇ܘܼܬ̣ܵܐ ܥܲܠ ܐܲܦܲܝ̈ ܛܵܒ̣ܵـ̈ـܬ̣ܵܐ ܕܐܸܣܬ̇ܥܲܪ ܥܲܡܗܘܿܢ ܘܫܵܪܹܝܢ ܙܸܕ݂ܩܹ̈ܐ ܕܐ̄ܢܵܫܘܼܬ̣ܵܐ. ܐܸܠܵܐ ܐܵܦ ܡܸܬ̣ܚܲܫܒ̣ܝܼܢ ܒܢܲܦ̮ܫܗܘܿܢ ܕܡܸܫܟ̇ܚܝܼܢ ܠܡܸܬ̣ܦܲܠܵܛܘܼ ܡ̣ܢ ܓܙܵܪ ܕܝܼܢܵܐ ܕܐܲܠܵܗܵܐ ܗܵܘܿ ܕܚܵܙܹ̇ܐ ܟܠܡܸܕܸ̇ܡ. [No book]
[5]ܘܲܡܛܵܬ̤ ܫܵܢܝܘܼܬ̣ܗܘܿܢ ܥܕܲܡܵܐ ܠܗܵܝ̇ ܕܡܸܬ̣ܦܲܪܣܝܼܢ ܠܲܡܣܲܚܵܦܘܼ ܒܨܸܢ̈ܥܵܬ̣ܵܐ ܕܕܲܓܵܠܘܼܬ̣ܗܘܿܢ ܠܗܵܢܘܿܢ ܕܲܒ̣ܛܝܼܠ ܠܗܘܿܢ ܠܲܡܫܲܡܠܵܝܘܼ ܠܬܸܫܡܸܫܬܵܐ ܕܣܝܼܡܵܐ ܥܠܲܝܗܘܿܢ ܘܗܵܟܲܢܵܐ ܟܠܡܸܕܸ̇ܡ ܫܲܦܝܪܵܐܝܼܬ̣ ܥܵܒ̣ܕ̇ܝܼܢ ܐܲܝܟ݂ ܕܢܸܫܬ̇ܘܿܢ ܠܩܘܼܠܵܣܵܐ ܡ̣ܢ ܟܠܢܵܫ. [No book]
[6]ܟܲܕ݂ ܒܢܸܟ݂ܠ̱ܗܘܿܢ ܘܲܒ̣ܚܵܪܥܘܼܬ̣ܗܘܿܢ ܡܲܛܥܹܝܢ ܠܐܸܕ݂ܢܹ̈ܐ ܕܪܹ̈ܫܵܢܹܐ ܕܲܦܫܝܼܛܝܼܢ ܘܚܵܫܒ̇ܝܼܢ ܠܐܚܪ̈ܵܢܹܐ ܐܲܟ݂ܘܵܬ̣ܗܘܿܢ. [No book]
[7]ܘܡܸܫܬܲܪܪܵܐ ܗ̤ܝ ܡܸܠܬ̣ܵܐ ܗܵܕܹܐ ܡ̣ܢ ܫܲܪ̈ܒܹ̇ܐ ܕܩܲܕ݂ܡܵܝܹ̈ܐ ܘܡ̣ܢ ܓܸܕ݂ܫܹ̈ܐ ܕܓ̣ܵܕ݂ܫܝܼܢ ܝܘܿܡ ܒܝܘܿܡ ܟܹܐܡܲܬ̣ ܕܲܒ̣ܡܸܠ̈ܟܹ̇ܐ ܕܐ̄ܢܵܫܵܐ ܒܝܼܫܹ̈ܐ ܗܵܦ̈ܟܵܢ ܠܒ̣ܝܼܫܬܵܐ ܬܲܪ̈ܥ̱ܝܵܬ̣ܵܐ ܛܵܒ̣ܵـ̈ـܬ̣ܵܐ ܕܡܲܠ̈ܟܹ̇ܐ. [No book]
[8]ܘܲܠܗܵܕܹܐ ܙܵܕܹ̇ܩ ܕܢܹܐܨܲܦ ܕܲܫܠܵܡܵܐ ܕܟ݂ܠܗܹܝܢ ܡܕ݂ܝܼ̈ܢܵܬ̣ܵܐ. [No book]
[9]ܘܠܵܐ ܬܸܬ̣ܚܲܫܒ̣ܘܼܢ ܕܡ̣ܢ ܩܲܠܝܼܠܘܼܬ̣ ܪܸܥܝܵܢܲܢ ܗ̄ܝܼ ܐܸܢ ܦܵܩܕ̇ܝܼܢܲܢ ܦܘܼܩܕܵܢܹ̈ܐ ܕܕܲܠܩܘܼܒ̣ܠܵܐ ܐܸܠܵܐ ܡܫܲܚ̱ܠܦܝܼܢܲܢ ܦܘܼܣܩܵܢܲܝ̈ܢ ܠܦܘܼܬ̣ ܡܵܐ ܕܬ̣ܵܒܲܥ. ܫܘܼܚܠܵܦܵܐ ܘܣܘܼܢܩܵܢܵܐ ܕܙܲܒ̣̈ܢܹܐ ܘܝܘܼܬ̣ܪܵܢܵܐ ܕܓ̣ܵܘܵܐ. [No book]
[10]ܘܐܲܝܟܲܢܵܐ ܕܬܸܣܬܲܟܠܘܿܢ ܡܸܠܬܲܢ ܢܲܗܝܼܪܵܐܝܼܬ̣ ܕܲܥܘ ܕܗܵܡܵܢ ܒܲܪ ܗܲܡܲܕܲܬ̇ ܕܐܝܼܬ̣ܵܘܗܝ ܗ̄ܘܼܵܐ ܡܵܩܹܕ݂ܘܿܢܵܝܵܐ ܒܠܸܒܵܐ ܘܲܒ̣ܓܸܢܣܵܐ ܘܢܘܼܟ݂ܪܵܝܵܐ ܗ̄ܘܼ ܠܫܲܪܒ̇ܬ̣ܵܐ ܕܦܲܪ̈ܣܵܝܹܐ ܛܵܘܸܫ ܙܲܕ̇ܝܼܩܘܼܬܲܢ ܒܩܲܫܝܘܼܬܹܗ ܕܟܲܢܸܫ̣ܢܵܝܗܝ ܟܲܕ݂ ܛܵܒ̣ ܢܘܼܟ݂ܪܵܝܵܐ ܗ̄ܘܼܵܐ. [No book]
[11]ܘܡ̣ܢ ܒܵܬܲܪ ܕܲܣܥܲܪܢ ܥܲܡܹܗ ܛܵܒ̣ܬ̣ܵܐ ܘܩܵܪܹܝܢ ܗ̄ܘܲܝܢ ܠܹܗ ܐܲܒ̣ܘܼܢ ܘܟ݂ܠ ܠܹܗ ܣܵܓ̣ܕ̇ܝܼܢ ܗ̄ܘܼܵܘ ܒܵܬܲܪ ܡܲܠܟܵܐ. [No book]
[12]ܐܸܫܬܲܥܠܝܼ ܫܘܼܥܠܵܝܵܐ ܪܲܒܵܐ ܘܐܸܬ̣ܦܲܪܲܣ ܠܡܸܚܛܲܦ ܡܸܢܲܢ ܡܲܠܟ̇ܘܼܬܲܢ ܘܚܲܝܲܝ̈ܢ. [No book]
[13]ܡܸܛܠ ܕܲܒ̣ܥ̣ܵܐ ܕܲܢܡܝܼܬ̣ ܠܡܘܼܪܕ̇ܟܲܝ ܕܲܒ̣ܗܲܝܡܵܢܘܼܬܹܗ ܘܲܒ̣ܛܵܒ̣ܵـ̈ـܬܹܗ ܕܲܠܘܵܬܲܢ ܩܵܝ̇ܡܝܼܢܲܢ ܗܵܫܵܐ ܒܚܲܝܹ̈ܐ ܘܲܕ݂ܢܵܘܒܸ̇ܕ݂ ܐܵܦ ܠܐܸܣܬܹ̇ܝܪ ܫܵܘܬܵܦܬܲܢ ܒܡܲܠܟ̇ܘܼܬ̣ܵܐ ܘܲܠܟ݂ܠܹܗ ܓܸܢܣܵܗ̇ ܒܢܸܟ݂ܠܵܐ ܚܲܕ݂ܬ̣ܵܐ ܕܠܵܐ ܐܸܫܬ̇ܡܲܥ ܐܲܟ݂ܘܵܬܹܗ ܣܵܟ݂. [No book]
[14]ܘܣܝܼܡܵܐ ܗ̄ܘܼܵܬ̣ ܠܹܗ ܕܲܢܩܘܼܡ ܐܵܦ ܥܠܲܝܢ ܒܵܬܲܪ ܩܸܛܠܗܘܿܢ. ܘܢܸܡܪܲܕ݂ ܥܠܲܝܢ ܘܲܚܢܲܢ ܒܫܸܠܝܵܐ: ܘܢܲܥܒܲܪ ܡܲܠܟ̇ܘܼܬ̣ܵܐ ܕܦܵܪ̈ܣܵܝܹܐ ܠܡܵܩܹܕ݂ܘܿܢܵܝܹ̈ܐ. [No book]
[15]ܚܢܲܢ ܕܹܝܢ. ܠܵܐ ܐܸܫܟܲܚ̄ܢ ܣܲܟ݂ܠܘܼܬ̣ܵܐ ܡܸܕܸ̇ܡ ܥܲܠ ܝܗ̄ܘܼܕ݂ܵܝܹܐ ܕܐܲܦܸܩ ܥܠܲܝܗܘܿܢ ܓܙܵܪܕܝܼܢܵܐ ܕܡܵܘܬܵܐ. ܗܵܢܵܐ ܓܲܒ̣ܪܵܐ ܕܒ̣ܝܼܫ ܡ̣ܢ ܟܠܗܘܿܢ ܒܢܲܝ̈ܢܵܫܵܐ ܐܸܠܵܐ ܒܗܸܦܟܵܐ. ܚܙܲܝܢ ܕܐܝܼܬ̣ ܠܗܘܿܢ ܢܵܡܘܿܣܹ̈ܐ ܟܹܐܢܹ̈ܐ. [No book]
[16]ܘܕ݂ܐܝܼܬܲܝܗܘܿܢ ܒܢܵܘ̈ܗܝ ܕܐܲܠܵܗܵܐ ܡܪܲܝܡܵܐ ܘܪܲܒܵܐ ܘܚܲܝ ܥܵܠܡܹ̈ܐ ܗܵܘܿ ܕܡ̣ܢ ܛܵܒ̣ܵܬܹ̈ܗ ܕܲܠܘܵܬܲܢ ܐܸܬ̣ܝܲܗ̄ܒܲܬ̤ ܗܵܕܹܐ ܡܲܠܟ̇ܘܼܬ̣ܵܐ ܠܐܲܒ̣ܗܲܝ̈ܢ ܘܠܲܢ: ܘܡܸܬ̣ܢܲܛܪܵܐ ܥܕܲܡܵܐ ܠܝܵܘܡܵܢܵܐ. [No book]
[17]ܕܲܥܘ ܡܵܕܹܝܢ ܕܐܸܓ̇ܪ̈ܵܬ̣ܵܐ ܕܫܲܕܲܪ ܗܵܘܿ ܒܲܫܡܲܢ ܣܪ̈ܝܼܩܵܢ ܐܸܢܹܝܢ. [No book]
[18]ܘܡܸܛܠ ܗܵܢܵܐ ܪܘܼܫܥܵܐ ܕܲܣܥܲܪ ܘܡܸܛܠ ܢܸܟ݂ܠܵܐ ܕܐܸܬ̣ܢܟܸܠ ܐܸܨܛ̄ܠܸܒ̣ ܗ̤ܘ ܘܟ݂ܠܗܘܿܢ ܐ̄ܢܵܫܵܘ̈ܗܝ ܥܲܠ ܩܲܝܣܵܐ ܒܬܲܪܥܵܐ ܕܗܵܕܹܐ ܡܕ݂ܝܼܢ̄ܬܵܐ ܕܗ̤ܝ ܗ̄ܝܼ ܫܘܿܫܲܢ. ܕܐܲܠܵܗܵܐ ܦܲܪܥܹܗ ܥܲܠ ܥܒ̣ܵܕ݂ܵܘ̈ܗܝ ܘܠܵܐ ܗ̄ܘܼܵܐ ܚܢܲܢ. [No book]
[19]ܢܸܬ̣ܟ̇ܪܸܙ ܡܵܕܹܝܢ ܗܵܢܵܐ ܦܘܼܩܕܵܢܵܐ ܕܲܫܠܲܚ̄ܢ ܗܵܫܵܐ ܒܟ݂ܠܗܹܝܢ ܡܕ݂ܝܼ̈ܢܵܬ̣ܵܐ ܕܢܸܗܘܹܐ ܦܣܵܣܵܐ. ܠܲܝܗܘܼܕ݂ܵܝܹ̈ܐ ܕܢܹܐܚܕ̇ܘܼܢ ܒܢܵܡܘܿܣܲܝ̈ܗܘܿܢ. [No book]
[20]ܘܚܲܝܵܒ̣ܝܼܬ̇ܘܿܢ ܕܲܬ̣ܥܲܕ̇ܪܘܼܢ ܐܸܢܘܿܢ ܐܲܝܟܲܢܵܐ ܕܢܸܫܟ̇ܚܘܼܢ ܠܡܸܩܛܲܠ ܠܐܲܝܠܹܝܢ ܕܐܸܬ̇ܛܲܝܲܒ̣ܘ ܗ̄ܘܼܵܘ ܠܡܵܘܒܵܕ݂ܘܼܬ̣ܗܘܿܢ ܒܲܬ̣ܠܵܬ̣ ܥܸܣܪܵܐ ܒܝܲܪܚܵܐ ܕܲܬ̣ܪܸܥܣܲܪ ܕܲܫܡܹܗ ܐܵܕ݂ܵܪ. [No book]
[21]ܡܸܛܠ ܕܗܵܢܵܐ ܝܵܘܡܵܐ ܕܐܝܼܬ̣ܵܘܗܝ ܗ̄ܘܼܵܐ ܥܠܲܝܗܘܿܢ ܝܵܘܡܵܐ ܕܐܸܒ̣ܠܵܐ ܘܕܲܒ̣ܟ݂ܵܬ̣ܵܐ ܐܲܗ̣ܦܟܹܗ ܠܚܲܕ݂ܘܼܬ̣ܵܐ ܐܲܠܵܗܵܐ ܐܲܚܝܼܕ݂ ܟܠ. [No book]
[22]ܣܝܼܡܘܼܗܝ ܗܵܟܹܝܠ ܐܵܦ ܐܲܢ̄ܬ̇ܘܿܢ ܠܗܵܢܵܐ ܝܵܘܡܵܐ ܒܡܸܢܝܵܢܵܐ ܕܫܲܪܟܵܐ. ܘܲܥܒܸܕ݂ܘ ܒܹܗ ܚܲܓܵܐ ܒܚܲܕ݂ܘܼܬ̣ܵܐ ܪܲܒ̇ܬ̣ܵܐ ܕܢܸܬ̣̱ܝܼܕܲܥ ܠܟ݂ܠ ܫܲܪ̈ܒ̣ܵܢ ܕܐܵܬ̣̈ܝܵܢ. [No book]
[23]ܕܟ݂ܠܗܘܿܢ ܐܲܝܠܹܝܢ ܕܡܸܬ̇ܛܦܝܼܣܝܼܢ ܠܦܵܪ̈ܣܵܝܹܐ ܒܗܲܝܡܵܢܘܼܬ̣ܵܐ. ܢܸܬ̣ܦܲܪܥܘܿܢ ܐܲܝܟ݂ ܗܲܝܡܵܢܘܼܬ̣ܗܘܿܢ. ܘܐܲܝܠܹܝܢ ܕܟ݂ܵܡ̇ܢܝܼܢ ܟܡܹܐܢܹ̈ܐ ܥܲܠ ܡܲܠܟ̇ܘܼܬ̣ܗܘܿܢ. ܢܹܐܒ̣ܕ̇ܘܼܢ ܒܥܵܘ̱ܠܗܘܿܢ. [No book]
[24]ܘܟ݂ܠ ܡܕ݂ܝܼܢܵܐ ܐܵܘ ܩܪܝܼܬ̣ܵܐ ܕܠܵܐ ܨܵܒ̣ܝܵܐ ܠܡܸܫܬܵܘܬܵܦܘܼ ܒܗܵܢܵܐ ܚܲܓܵܐ. ܬܹܐܒ̣ܕ݂ ܒܣܲܝܦܵܐ ܘܲܒ̣ܢܘܼܪܵܐ ܘܬܸܬ̣ܥ̱ܛܹܐ ܘܬܸܗܘܹܐ ܠܨܸܕ݂ܝܵܐ ܐܲܝܟ݂ ܕܠܵܐ ܢܸܫܟܲܚ ܠܡܸܥܒܲܪ ܒܵܗ̇ ܐ̄ܢܵܫܵܐ ܘܠܵܐ ܚܲܝ̄ܘܼܬ̣ܵܐ ܠܥܵܠܲܡ ܕܢܸܗܘܹܐ ܡܲܬ̣ܠܵܐ ܥܲܠ ܫܵܛ̇ܝܘܼܬ̣ܗܘܿܢ ܘܡܵܪܘܿܕ݂ܘܼܬ̣ܗܘܿܢ. [No book]
 
Top