➕
←
Esther
Est
7
→
[1]ܘܥܲܠ ܡܲܠܟܵܐ ܘܗܵܡܵܢ ܠܡܲܫܬ̇ܝܵܐ ܕܥܸܒ̣ܕܲܬ̤ ܐܸܣܬܹ̇ܝܪ ܡܲܠܟ̇ܬ̣ܵܐ. ܒܝܵܘܡܵܐ ܗܵܘܿ ܝܲܗ̄ܒ̣ ܡܲܠܟܵܐ ܐܲܚܫܝܼܪܹܫ ܠܐܸܣܬܹ̇ܝܪ ܡܲܠܟ̇ܬ̣ܵܐ: ܒܲܝܬܹ̇ܗ ܕܗܵܡܵܢ ܒܥܸܠܕ̇ܒ̣ܵܒ̣ܵܐ ܕܲܝܗܘܼܕ݂ܵܝܹ̈ܐ. ܘܡܘܼܪܕ̇ܟܲܝ ܥܲܠ ܩܕ݂ܵܡ ܡܲܠܟܵܐ: ܡܸܛܠ ܕܲܓ̣ܠܵܬ̤ ܐܸܣܬܹ̇ܝܪ ܡܵܢܵܐ ܗܘ̤ܵܐ ܠܵܗ̇. [2]ܘܐܸܡܲܪ ܠܵܗ̇ ܡܲܠܟܵܐ ܠܐܸܣܬܹ̇ܝܪ: ܐܵܦ ܒܹܗ ܒܝܵܘܡܵܐ ܗܵܘܿ ܕܡܲܫܬ̇ܝܵܐ ܕܚܲܡܪܵܐ: ܡܵܢܲܐ ܗ̄ܝܼ ܫܸܐ̱ܠܬܹܟ݂ܝ ܘܒ̣ܵܥܘܼܬܹܟ݂ܝ. ܥܕܲܡܵܐ ܠܦܸܠܓܵܗ̇ ܕܡܲܠܟ̇ܘܼܬ̣ܝ: ܢܸܬ̣ܥ̱ܒܸܕ݂ ܠܹܟ݂ܝ. ܘܲܫܩܲܠ ܡܲܠܟܵܐ ܥܸܙܲܩܬ̣ܵܐ ܕܲܫܩܲܠ ܡ̣ܢ ܗܵܡܵܢ: ܘܝܲܗ̄ܒ̣ܵܗ̇ ܠܡܘܼܪܕ̇ܟܲܝ ܘܐܲܩܝܼܡܬܹܗ ܐܸܣܬܹ̇ܝܪ ܠܡܘܼܪܕ̇ܟܲܝ ܥܲܠ ܒܲܝܬܹ̇ܗ ܕܗܵܡܵܢ. [3]ܘܲܥܢܵܬ̤ ܐܸܣܬܹ̇ܝܪ ܘܐܸܡܪܲܬ̤. ܐܸܢ ܐܸܫܟ̇ܚܹ̇ܬ̣ ܪ̈ܲܚܡܹܐ ܒܥܲܝܢܲܝ̈ܟ ܡܲܠܟܵܐ: ܘܐܸܢ ܥܲܠ ܡܲܠܟܵܐ ܫܲܦܝܼܪ: ܬܸܬ̣̱ܝܼܗܸܒ̣ ܢܲܦ̮ܫܝ ܒܫܸܐܠܲܬ̣ܝ: ܘܥܲܡܝ ܒܒ̣ܵܥܘܼܬ̣ܝ. ܘܗܸܦܟܲܬ̤ ܐܸܣܬܹ̇ܝܪ ܘܡܲܠܠܲܬ̤ ܩܕ݂ܵܡ ܡܲܠܟܵܐ: ܘܢܸܦܠܲܬ̤ ܥܲܠ ܪܸ̈ܓ̣ܠܵܘܗܝ: ܘܒ̣ܵܥܝܵܐ ܘܡܸܬ̣ܟܲܫܦܵܐ ܠܹܗ: ܕܢܲܥܒܲܪ ܒܝܼܫܬܵܐ ܕܗܵܡܵܢ ܐܵܓ̣ܵܓ̣ܵܝܵܐ: ܘܡܲܚܫܲܒ̣ܬܵܐ ܕܐܸܬ̣ܚܲܫܲܒ̣ ܥܲܠ ܝܗ̄ܘܼܕ݂ܵܝܹ̈ܐ. [4]ܡܸܛܠ: ܕܐܸܙܕܲܒ̣ܢܲܢ ܐܸܢܵܐ ܘܥܲܡܝ ܠܩܸܛܠܵܐ: ܘܲܠܚܲܪܒܵܐ: ܘܠܲܐܒ̣ܕܵܢܵܐ. ܘܐܸܠܘܼ ܕܢܸܬ̣ܩܢܸܐ ܥܲܒ̣̈ܕܹ̇ܐ ܘܐܲܡ̈ܗܵܬ̣ܵܐ ܐܸܙܕ̇ܒ̣ܵܢܢܲܢ: ܫܵܬ̣ܩܵܐ ܗ̄ܘܹ̇ܝܬ̣. ܠܵܐ ܓܹܝܪ ܫܵܠܹ̇ܐ ܒܥܸܠܕ̇ܒ̣ܵܒ̣ܵܐ ܕܢܲܗܲܪ ܠܡܲܠܟܵܐ. ܘܐܵܘܫܸܛ ܡܲܠܟܵܐ ܠܐܸܣܬܹ̇ܝܪ ܫܲܒ̣ܛܵܐ ܕܕܲܗܒ̣ܵܐ. ܘܩܸܪܒܲܬ̤ ܠܹܗ ܐܸܣܬܹ̇ܝܪ. [5]ܘܲܥܢ̣ܵܐ ܡܲܠܟܵܐ ܐܲܚܫܝܼܪܹܫ ܘܐܸܡܲܪ ܠܐܸܣܬܹ̇ܝܪ ܡܲܠܟ̇ܬ̣ܵܐ: ܡܲܢܘܼ ܗܵܢܵܐ: ܐܵܘ ܐܲܝܢܵܘ: ܕܐܸܬ̇ܬ̇ܪܝܼܡ ܠܸܒܹ̇ܗ ܕܢܸܥܒܸ̇ܕ݂ ܗܵܟܲܢܵܐ. ܘܩܵܡܲܬ̤ ܩܕ݂ܵܡ ܡܲܠܟܵܐ. ܘܐܸܡܪܲܬ̤. ܐܸܢ ܥܲܠ ܡܲܠܟܵܐ ܫܲܦܝܼܪ. ܘܫܵܦܲܪ ܦܸܬ̣ܓ̣ܵܡܵܐ ܩܕ݂ܵܡ ܡܲܠܟܵܐ: ܘܐܸܢ ܐܸܫܟ̇ܚܹ̇ܬ̣ ܪ̈ܲܚܡܹܐ ܒܥܲܝܢܵܘ̈ܗܝ: ܢܸܟ݂ܬ̇ܘܿܒ̣ ܘܢܲܗܦܸܟ݂ ܐܸܓ̇ܪ̈ܵܬ̣ܵܐ ܘܡܲܚܫ̈ܒ̣ܵܬ̣ܵܐ ܕܗܵܡܵܢ ܐܵܓ̣ܓ̣ܵܝܵܐ ܕܲܟ݂ܬܲܒ̣ ܠܡܵܘܒܵܕ݂ܘܼ ܠܟ݂ܠܗܘܿܢ ܝܗ̄ܘܼܕ݂ܵܝܹ̈ܐ ܒܟ݂ܠܗܹܝܢ ܡܕ݂ܝܼ̈ܢܵܬܹܗ ܕܡܲܠܟܵܐ. [6]ܘܐܸܡܪܲܬ̤ ܐܸܣܬܹ̇ܝܪ: ܓܲܒ̣ܪܵܐ ܐܵܠܘܿܨܵܐ: ܘܲܒ̣ܥܸܠܕ̇ܒ̣ܵܒ̣ܵܐ ܗܵܡܵܢ ܗ̄ܘܼ ܗܵܢܵܐ ܒܝܼܫܵܐ. ܘܗܵܡܵܢ ܐܸܬ̇ܬ̇ܙܝܼܥ ܡ̣ܢ ܩܕ݂ܵܡ ܡܲܠܟܵܐ ܘܡܲܠܟ̇ܬ̣ܵܐ. ܐܲܝܟܲܢܵܐ ܓܹܝܪ ܡܲܨܝܵܐ ܐ̄ܢܵܐ ܕܐܸܚܙܹܐ ܒܒ̣ܝܼܫܬܵܐ ܕܬܸܓ̣ܕܲܫ ܠܥܲܡܝ ܘܐܲܝܟܲܢܵܐ ܡܸܫܟ̇ܚܵܐ ܐ̄ܢܵܐ ܕܐܸܚܙܹܐ ܒܐܲܒ̣ܕܵܢܵܐ ܕܫܲܪܒܲܬ̣ܝ. [7]ܘܡܲܠܟܵܐ ܩܵܡ̣ ܒܚܸܡܬܹܗ ܡ̣ܢ ܡܲܫܬ̇ܝܵܐ ܕܚܲܡܪܵܐ: ܠܡܸܦܲܩ ܠܓܲܢܲܬ̣ ܒܲܝܬ̇ܘܿܢܵܐ. ܘܗܵܡܵܢ ܩܵܡ̣ ܕܢܸܒ̣ܥܸܐ ܥܲܠ ܢܲܦ̮ܫܹܗ: ܡ̣ܢ ܐܸܣܬܹ̇ܝܪ ܡܲܠܟ̇ܬ̣ܵܐ: ܡܸܛܠ ܕܲܚܙܵܐ ܕܓܸܪܡܲܬ̤ ܠܵܗ̇ ܥܠܵܘܗܝ ܒܝܼܫܬܵܐ ܡ̣ܢ ܡܲܠܟܵܐ. ܘܐܸܡܲܪ ܡܲܠܟܵܐ ܐܲܚܫܝܼܪܹܫ ܠܐܸܣܬܹ̇ܝܪ ܡܲܠܟ̇ܬ̣ܵܐ: ܗܵܐ ܒܲܝܬܹ̇ܗ ܕܗܵܡܵܢ ܝܸܗ̄ܒܹ̇ܬ̣ ܠܹܟ݂ܝ: ܘܠܹܗ ܬܠܵܘ ܥܲܠ ܩܲܝܣܵܐ: ܥܲܠ ܕܐܵܘܫܸܛ ܐܝܼܕ݂ܵܐ ܒܲܝܗܘܼ̈ܕ݂ܵܝܹܐ. [8]ܘܡܲܠܟܵܐ ܗ̣ܦܲܟ݂ ܡ̣ܢ ܓܲܢܬ̣ܵܐ ܕܒܲܝܬ̇ܘܿܢܵܐ: ܠܒܹܝܬ̣ ܡܲܫܬ̇ܝܵܐ ܕܚܲܡܪܵܐ. ܘܗܵܡܵܢ ܪܡܸܐ ܥܲܠ ܥܲܪܣܵܐ: ܘܐܸܣܬܹ̇ܝܪ ܝܵܬ̣ܒܵܐ ܥܠܹܝܗ̇. ܘܐܸܡܲܪ ܡܲܠܟܵܐ: ܘܐܵܦ ܠܲܡܨܲܥܵܪܘܼ ܠܡܲܠܟ̇ܬ̣ܵܐ ܥܲܡܝ ܒܓ̣ܵܘ ܒܲܝܬܵܐ. ܘܡܸܠܬ̣ܵܐ ܢܸܦܩܲܬ̤ ܡ̣ܢ ܦܘܼܡܹܗ ܕܡܲܠܟܵܐ. ܘܐܲܦܵܘ̈ܗܝ ܕܗܵܡܵܢ ܐܸܬ̣ܚܲܦܝܼ. ܘܐܲܢ̄ܬ̇ܘܿܢ ܥܲܠ ܝܗ̄ܘܼܕ݂ܵܝܹ̈ܐ ܐܲܝܟ݂ ܕܫܲܦܝܼܪ ܒܥܲܝܢܲܝ̈ܟ̇ܘܿܢ ܒܲܫܡܵܐ ܕܡܲܠܟܵܐ ܚܬ̣ܘܿܡܘ ܒܥܸܙܲܩܬ̣ܵܐ ܕܡܲܠܟܵܐ: ܒܲܟ݂ܬ̣ܵܒ̣ܵܐ ܕܡܸܬ̣ܟ̇ܬܸܒ̣ ܒܫܸܡ ܡܲܠܟܵܐ: ܘܡܸܬ̣ܚܬܸܡ ܒܥܸܙܲܩܬܹܗ ܕܡܲܠܟܵܐ ܘܠܵܐ ܗܵܦܹ̇ܟ݂. [9]ܘܲܥܢܵܐ ܪܲܚܒ̇ܘܿܢܵܐ ܚܲܕ݂ ܡ̣ܢ ܡܗܲܝܡܢܵܘ̈ܗܝ ܕܡܲܠܟܵܐ: ܘܐܸܡܲܪ ܩܕ݂ܵܡ ܡܲܠܟܵܐ: ܗܵܐ ܐܵܦ ܩܲܝܣܵܐ ܬܲܩܸܢ ܗ̄ܘܼܵܐ ܗܵܡܵܢ ܠܡܸܬ̣ܠܵܐ ܠܡܘܼܪܕ̇ܟܲܝ ܥܠܵܘܗܝ: ܥܲܠ ܕܐܸܡܲܪ ܫܲܦܝܼܪܬܵܐ ܥܲܠ ܡܲܠܟܵܐ. ܘܩܵܐܹ̇ܡ ܒܒܲܝܬܹ̇ܗ ܕܗܵܡܵܢ. ܪܵܘܡܹܗ ܚܲܡܫܝܼܢ ܐܲܡ̈ܝܼܢ. ܘܐܸܡܲܪ ܡܲܠܟܵܐ: ܬܠܵܐܘܼܗܝ ܥܠܵܘܗܝ. ܘܐܸܬ̣ܩܪܝܼܘ ܣܸܦܪܹ̈ܐ ܕܡܲܠܟܵܐ ܒܙܲܒ̣ܢܵܐ ܗܵܘܿ: ܒܝܲܪܚܵܐ ܬܠܝܼܬ̣ܵܝܵܐ ܕܗ̤ܘ ܚܙܝܼܪܵܢ: ܒܲܬ̣ܠܵܬ̣ܵܐ ܘܥܸܣܪܝܼܢ ܒܹܗ ܒܝܲܪܚܵܐ: ܘܲܟ݂ܬܲܒ̣ܘ ܟܠ ܡܸܕܸ̇ܡ ܕܲܟ݂ܬܲܒ̣ ܡܘܪܕ̇ܟܲܝ ܥܲܠ ܝܗ̄ܘܼܕ݂ܵܝܹ̈ܐ: ܠܪ̈ܲܒܲܝ ܚܲܝܠܹ̈ܐ ܘܲܠܡܵܪ̈ܵܘܵܬ̣ܵܐ ܘܲܠܪ̈ܵܘ̱ܪ̈ܒ̣ܵܢܹܐ ܕܲܡܕ݂ܝܼ̈ܢܵܬ̣ܵܐ: ܡ̣ܢ ܗܘܿܕ݂ ܘܲܥܕܲܡܵܐ ܠܟ݂ܘܼܫ: ܡܵܐܐ ܘܥܸܣܪܝܼܢ ܘܲܫܒܲܥ ܡܕ݂ܝܼ̈ܢܵܢ: ܡܕ݂ܝܼܢ̄ܬܵܐ ܐܲܝܟ݂ ܟܬ̣ܵܒ̣ܵܗ̇: ܘܲܠܥܲܡܵܐ ܐܲܝܟ݂ ܠܸܫܵܢܹܗ: ܘܠܲܝܗܘܼܕ݂ܵܝܹ̈ܐ ܐܲܝܟ݂ ܟܬ̣ܵܒ̣ܗܘܿܢ: ܘܐܲܝܟ݂ ܠܸܫܵܢܗܘܿܢ. [10]ܘܲܬ̣ܠܵܐܘܼܗܝ ܠܗܵܡܵܢ ܥܲܠ ܩܲܝܣܵܐ: ܕܬܲܩܸܢ ܠܹܗ ܠܡܘܼܪܕ̇ܟܲܝ. ܘܚܸܡܬܹܗ ܕܡܲܠܟܵܐ ܐܸܬ̇ܬ̇ܢܝܼܚܲܬ̤. ܘܐܸܬ̣ܟ̇ܬܸܒ̣ܘ ܒܫܸܡ ܡܲܠܟܵܐ ܐܲܚܫܝܼܪܹܫ: ܘܐܸܬ̣ܚܬܸܡܘ ܒܥܸܙܲܩܬ̣ܵܐ ܕܡܲܠܟܵܐ. ܘܫܲܕܲܪ ܐܸܓ̇ܪ̈ܵܬ̣ܵܐ ܒܝܲܕ݂ ܪ̈ܲܗܛܹܐ: ܘܲܒ̣ܝܲܕ݂ ܐܸܣܦ̈ܘܿܟܹ̇ܐ: ܪ̈ܵܟ݂ܒܲܝ ܪ̈ܲܟ݂ܫܵܐ ܒܢܲܝ̈ ܪ̈ܲܡܟܵܐ. [11]ܐܸܓ̇ܪ̈ܵܬ̣ܵܐ ܕܲܟ݂ܬܲܒ̣ ܡܲܠܟܵܐ ܥܲܠ ܝܗ̄ܘܼܕ݂ܵܝܹ̈ܐ: ܕܲܒ̣ܟ݂ܠ ܡܕ݂ܝܼ̈ܢܵܬ̣ܵܐ ܠܡܸܬ̣ܟܲܢܵܫܘܼ: ܘܠܲܡܩܵܡ ܠܢܲܦ̮ܫܗܘܿܢ: ܘܲܠܡܸܚܪܲܒ̣ ܘܲܠܡܸܩܛܲܠ ܘܲܠܡܵܘܒܵܕ݂ܘܼ ܠܟ݂ܠ ܐ̄ܢܵܫ ܕܲܡܥܝܼܩ ܠܗܘܿܢ: ܘܲܛܠܵܝܹ̈ܐ ܘܢܸܫܹ̈ܐ: ܘܩܸܢܝܵܢܗܘܿܢ ܠܒܸܙܬ̣ܵܐ. [12]ܒܚܲܕ݂ ܝܘܿܡ ܕܲܒ̣ܟ݂ܠܗܹܝܢ ܡܕ݂ܝܼ̈ܢܵܬܹܗ ܕܡܲܠܟܵܐ ܐܲܚܫܝܼܪܹܫ: ܒܲܬ̣ܠܵܬ̣ܥܸܣܪܹ̈ܐ ܒܝܲܪܚܵܐ ܕܲܬ̣ܪܸܥܣܲܪ: ܕܗ̤ܘ ܐܵܕ݂ܵܪ. [13]ܘܦܲܪܫܲܓ̣ܢܹܗ ܕܲܟ݂ܬ̣ܵܒ̣ܵܐ ܐܸܬ̣̱ܝܼܗܸܒ̣ ܒܟ݂ܠ ܡܕ݂ܝܼܢܵܐ. ܘܲܦܩܲܕ݂ ܠܟ݂ܠܗܘܿܢ ܥܲܡܡܹ̈ܐ: ܕܢܸܗܘܘܿܢ ܝܗ̄ܘܼܕ݂ܵܝܹ̈ܐ ܡܛܲܝܒ̣ܝܼܢ ܠܝܵܘܡܵܐ ܗܵܢܵܐ: ܕܢܸܬ̣ܦܲܪܥܘܼܢ ܡ̣ܢ ܒܥܸܠܕ̇ܒ̣ܵܒܲܝ̈ܗܘܿܢ. [14]ܘܐܸܬ̣ܵܘ ܪ̈ܲܗܵܛܹܐ: ܘܐܸܣܦ̈ܘܿܟܹ̇ܐ ܪ̈ܵܟ݂ܒܲܝ ܪ̈ܲܟ݂ܫܵܐ: ܘܲܢܦܲܩ̣ܘ ܡܣܲܪܗܒ̣ܵܐܝܼܬ̣ ܒܦܸܬ̣ܓ̣ܵܡܵܐ ܘܲܒ̣ܦܘܼܩܕܵܢܵܐ ܕܐܸܬ̣ܦܩܸܕ݂ ܒܫܘܿܫܲܢ ܒܝܼܪܬܵܐ. [15]ܘܡܘܼܪܕ̇ܟܲܝ ܢܦܲܩ ܡ̣ܢ ܩܕ݂ܵܡ ܡܲܠܟܵܐ: ܒܲܠܒ̣ܘܼܫܵܐ ܕܡܲܠܟ̇ܬ̣ܵܐ: ܕܬܸܟ݂ܠ̱ܬ̣ܵܐ: ܘܲܕ݂ܒ̣ܘܼܨܵܐ: ܘܒܲܟ݂ܠܝܼܠܵܐ ܕܕܲܗܒ̣ܵܐ. ܘܲܟ݂ܪܝܼܟ݂ ܒܒ̣ܘܼܨܵܐ ܘܒܲܐܪܓ̇ܘܵܢܵܐ. ܘܲܡܕ݂ܝܼܢ̄ܬܵܐ ܫܘܿܫܲܢ ܕܵܨܲܬ̤ ܘܲܚܕ݂ܵܬ̤. [16]ܘܥܲܠ ܝܗ̄ܘܼ̈ܕ݂ܵܝܹܐ ܗܘ̤ܵܐ ܢܘܼܗܪܵܐ ܘܚܲܕ݂ܘܼܬ̣ܵܐ ܘܐܝܼܩܵܪܵܐ ܘܲܕ݂ܝܵܨܵܐ. [17]ܒܟ݂ܠ ܡܕ݂ܝܼ̈ܢܵܬ̣ܵܐ ܘܲܒ̣ܟ݂ܠ ܩܘܼܪ̈ܝܵܐ: ܐܲܬܲܪ ܕܡܲܛܝܼ ܦܸܬ̣ܓ̣ܵܡܵܐ ܕܡܲܠܟܵܐ ܘܦܘܼܩܕܵܢܹܗ: ܚܲܕ݂ܘܼܬ̣ܵܐ ܪܲܒ̇ܬ̣ܵܐ ܗܘ̤ܵܬ̣ ܠܲܝܗܘܼ̈ܕ݂ܵܝܹܐ: ܘܡܲܫܬ̇ܝܵܐ ܘܝܵܘܡܵܐ ܛܵܒ̣ܵܐ: ܘܣܘܿܓ̣ܵܐܐ ܡ̣ܢ ܥܲܡܡܹ̈ܐ ܕܐܲܪܥܵܐ ܡܸܬ̇ܬܵܘܗܝܼܢ: ܡܸܛܠ ܕܢܸܦܠܲܬ̤ ܕܸܚ̱ܠܬ̣ܵܐ ܕܲܝܗܘܼ̈ܕ݂ܵܝܹܐ ܥܠܲܝܗܘܿܢ.
 
Top