|
|
| [1]ܒܝܲܪܚܵܐ ܬܠܝܼܬ݂ܵܝܵܐ ܒܵܬܲܪ ܡܲܦܩܵܢܵܐ ܕܲܒ݂ܢܲܝ ܝܼܣܪܵܝܹܠ ܡܼܢ ܡܸܨܪܹܝܢ: ܒܹܗ ܒܝܵܘܡܵܐ ܗܵܢܵܐ ܐܸܬ݂ܵܘ ܠܡܲܕ݂ܒܿܪܵܐ ܕܣܝܼܢ. |
[No book] |
| [2]ܘܲܫܩܲܠܘ ܡܼܢ ܪܦܝܼܕ݂ܝܼܢ: ܘܐܸܬ݂ܵܘ ܠܡܲܕ݂ܒܿܪܵܐ ܕܣܝܼܢܲܝ: ܘܲܫܪܵܘ ܒܡܲܕ݂ܒܿܪܵܐ: ܘܲܫܪܵܐ ܬܲܡܵܢ ܝܼܣܪܵܝܹܠ ܠܘܼܩܒܲܠ ܛܘܼܪܵܐ. |
[No book] |
| [3]ܘܡܘܼܫܹܐ ܣܠܸܩ ܠܘܵܬ݂ ܐܲܠܵܗܵܐ: ܘܲܩܪܵܐ ܠܹܗ ܐܲܠܵܗܵܐ ܡܼܢ ܛܘܼܪܵܐ: ܘܐܸܡܲܪ: ܗܵܟܲܢܵܐ ܬܹܐܡܲܪ ܠܲܕ݂ܒܹܝܬ݂ ܝܲܥܩܘܿܒ݂: ܘܲܬ݂ܚܵܘܹܐ ܠܲܒ݂ܢܲܝ ܝܼܣܪܵܝܹܠ. |
[No book] |
| [4]ܐܲܢ̄ܬܿܘܿܢ ܚܙܲܝܬܿܘܿܢ ܡܸܕܸܿܡ ܕܥܸܒ݂ܕܹܬ݂ ܠܡܸܨܪܵܝܹܐ: ܘܲܫܩܲܠܬܿܟ݂ܘܿܢ ܐܲܝܟ݂ ܕܥܲܠ ܓܸܦܲܝ ܢܸܫܪܵܐ: ܘܐܲܝܬܿܝܼܬܿܟ݂ܘܿܢ ܠܘܵܬ݂ܝ. |
[No book] |
| [5]ܘܗܵܫܵܐ ܐܸܢ ܡܸܫܡܲܥ ܬܸܫܡܥܘܿܢ ܒܩܵܠܝ: ܘܬܸܛܪܘܼܢ ܩܝܵܡܝ: ܬܸܗܘܘܿܢ ܚܲܒܿܝܼܒ݂ܝܼܢ ܠܝܼ ܡܼܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ: ܡܸܛܠ ܕܕ݂ܝܼܠܝ ܗ̄ܝܼ ܐܲܪܥܵܐ. |
[No book] |
| [6]ܘܐܲܢ̄ܬܿܘܢ ܬܸܗܘܘܿܢ ܠܝܼ ܡܲܠܟܿܘܼܬ݂ܵܐ: ܘܟ݂ܵܗܢܹ̈ܐ ܘܥܲܡܵܐ ܩܲܕܿܝܼܫܵܐ: ܗܵܠܹܝܢ ܦܸܬ݂ܓ݂ܵܡܹܐ ܬܹܐܡܲܪ ܠܲܕ݂ܒܹܝܬ݂ ܝܼܣܪܵܝܹܠ. |
[No book] |
| [7]ܘܐܸܬ݂ܵܐ ܡܘܼܫܹܐ ܘܲܩܪܵܐ ܠܩܲܫܝܼܫܹ̈ܐ ܕܥܲܡܵܐ: ܘܐܸܡܲܪ ܩܕ݂ܵܡܲܝܗܘܿܢ ܟܠܗܘܿܢ ܦܸܬ݂ܓ݂ܵܡܹ̈ܐ ܗܵܠܹܝܢ ܕܦܲܩܕܹܗ ܡܵܪܝܵܐ. |
[No book] |
| [8]ܘܲܥܢܵܘ ܟܠܹܗ ܥܲܡܵܐ ܐܲܟ݂ܚ̄ܕ݂ܵܐ: ܘܐܸܡܲܪܘ: ܟܠ ܡܸܕܸܿܡ ܕܐܵܡܲܪ ܡܵܪܝܵܐ ܢܸܥܒܸܿܕ݂: ܘܐܲܗܦܸܟ݂ ܡܘܼܫܹܐ ܦܸܬ݂ܓ݂ܵܡܵܘܗܝ ܕܥܲܡܵܐ ܠܘܵܬ݂ ܡܵܪܝܵܐ. |
[No book] |
| [9]ܘܐܸܡܲܪ ܡܵܪܝܵܐ ܠܡܘܼܫܹܐ: ܗܵܐ ܐܵܬܹܐ ܐ̄ܢܵܐ ܠܘܵܬ݂ܵܟ݂ ܒܥܲܡܛܵܢܵܐ ܕܲܥܢܵܢܵܐ: ܡܸܛܠ ܕܢܸܫܡܥܘܼܢ ܥܲܡܵܐ ܟܲܕ݂ ܡܲܡܠܸܠ ܐ̄ܢܵܐ ܥܲܡܵܟ݂: ܘܐܵܦ ܠܵܟ݂ ܢܗܲܝܡܢܘܼܢ ܠܥܵܠܲܡ: ܘܚܵܘܝܼ ܡܘܼܫܹܐ ܦܸܬ݂ܓ݂ܵܡܵܘܗܝ ܕܥܲܡܵܐ ܩܕ݂ܵܡ ܡܵܪܝܵܐ. |
[No book] |
| [10]ܘܐܸܡܲܪ ܡܵܪܝܵܐ ܠܡܘܼܫܹܐ: ܙܸܠ ܠܘܵܬ݂ ܥܲܡܵܐ: ܘܩܲܕܸܿܫ ܐܸܢܘܿܢ ܝܵܘܡܵܢܵܐ ܘܲܡܚܵܪ: ܘܲܢܚܵܘܪܘܼܢ ܠܒ݂ܘܼܫܲܝܗܘܿܢ. |
[No book] |
| [11]ܘܢܸܗܘܘܿܢ ܡܛܲܝܼܒ݂ܝܼܢ ܠܝܵܘܡܵܐ ܬܠܝܼܬ݂ܵܝܵܐ: ܡܸܛܠ ܕܲܒ݂ܝܵܘܡܵܐ ܬܠܝܼܬ݂ܵܝܵܐ ܢܵܚܹܬ݂ ܡܵܪܝܵܐ ܠܥܹܝܢ ܟܠܹܗ ܥܲܡܵܐ ܠܛܘܼܪܵܐ ܕܣܝܼܢܲܝ. |
[No book] |
| [12]ܘܐܲܪܡܵܐ ܣܵܗܕܿܘܼܬ݂ܵܐ ܒܥܲܡܵܐ ܘܐܸܡܲܪ ܠܗܘܿܢ: ܐܸܙܕܲܗܪܘ ܠܵܐ ܬܸܣܩܘܼܢ ܠܛܘܼܪܵܐ: ܘܠܵܐ ܬܸܬ݂ܩܲܪܒ݂ܘܼܢ ܠܲܫܦܘܿܠܵܘ̈ܗܝ: ܘܟ݂ܠ ܡܿܢ ܕܢܸܩܪܘܿܒ݂ ܠܛܘܼܪܵܐ ܢܸܬ݂ܩܛܸܠ. |
[No book] |
| [13]ܠܵܐ ܬܸܩܪܘܿܒ݂ ܒܹܗ ܐܝܼܕ݂ܵܐ: ܐܸܠܵܐ ܡܸܬ݂ܪܓܵܡܘܼ ܢܸܬ݂ܪܓܸܡ ܘܡܸܫܬܿܕ݂ܵܝܘܼ ܢܸܫܬܿܕܹܐ: ܐܸܢ ܒܥܝܼܪܵܐ ܗ̄ܝܼ ܘܐܸܢ ܒܲܪܢܵܫܵܐ ܠܵܐ ܢܸܚܸܐ: ܘܡܵܐ ܕܫܸܬ݂ܩܲܬ݂ ܩܲܪܢܵܐ: ܫܪܹܐ ܠܟ݂ܘܿܢ ܠܡܸܣܲܩ ܠܛܘܼܪܵܐ. |
[No book] |
| [14]ܘܲܢܚܸܬ݂ ܡܘܼܫܹܐ ܡܼܢ ܛܘܼܪܵܐ ܠܘܵܬ݂ ܥܲܡܵܐ: ܘܩܲܕܸܿܫ ܠܥܲܡܵܐ: ܘܚܵܘܲܪ ܠܒ݂ܘܼܫܲܝܗܘܿܢ. |
[No book] |
| [15]ܘܐܸܡܲܪ ܡܘܼܫܹܐ ܠܥܲܡܵܐ: ܗܘܲܝܬܿܘܿܢ ܡܛܲܝܼܒ݂ܝܼܢ ܠܝܵܘܡܵܐ ܬܠܝܼܬ݂ܵܝܵܐ: ܠܵܐ ܬܸܬ݂ܩܲܪܒ݂ܘܼܢ ܠܐܲܢ̄ܬܿܬ݂ܵܐ. |
[No book] |
| [16]ܘܲܗܘܵܐ ܒܝܵܘܡܵܐ ܬܠܝܼܬ݂ܵܝܵܐ ܟܲܕ݂ ܗܘܵܐ ܫܲܦܪܵܐ: ܗܘܵܘ ܩܵܠܹ̈ܐ ܘܒܲܪ̈ܩܹܐ: ܘܲܥܢܵܢܵܐ ܬܲܩܝܼܦܬܵܐ ܗܘܵܬ݂ ܥܲܠ ܛܘܼܪܵܐ: ܘܩܵܠܵܐ ܕܩܲܪܢܵܐ ܚܲܣܝܼܢ ܗ̄ܘܵܐ ܛܵܒ݂: ܘܙܵܥܘ ܟܠܹܗ ܥܲܡܵܐ ܕܐܝܼܬ݂ ܒܡܲܫܪܝܼܬ݂ܵܐ. |
[No book] |
| [17]ܘܐܲܦܸܩ ܡܘܼܫܹܐ ܠܥܲܡܵܐ ܠܐܘܼܪܥܹܗ ܕܐܲܠܵܗܵܐ ܡܼܢ ܡܲܫܪܝܼܬ݂ܵܐ: ܘܩܵܡܘ ܒܲܫܦܘܿܠܵܘ̈ܗܝ ܕܛܘܼܪܵܐ. |
[No book] |
| [18]ܘܛܘܼܪܵܐ ܕܣܝܼܢܲܝ ܬܵܐܹܢ ܗ̄ܘܵܐ ܟܠܹܗ: ܡܸܛܠ ܕܲܢܚܸܬ݂ ܥܠܵܘܗܝ ܡܵܪܝܵܐ ܒܢܘܼܪܵܐ: ܘܲܣܠܸܩ ܬܸܢܵܢܹܗ ܐܲܝܟ݂ ܬܸܢܵܢܵܐ ܕܐܲܬܘܿܢܵܐ: ܘܙܵܥ ܟܠܹܗ ܛܘܼܪܵܐ ܛܵܒ݂. |
[No book] |
| [19]ܘܲܗܘܵܐ ܩܵܠܵܐ ܕܩܲܪܢܵܐ ܐܵܙܹܠ ܗ̄ܘܵܐ ܘܬ݂ܵܩܹܦ ܛܵܒ݂: ܘܡܘܼܫܹܐ ܡܡܲܠܸܠ ܗ̄ܘܵܐ: ܘܐܲܠܵܗܵܐ ܥܵܢܹܐ ܠܹܗ ܒܩܵܠܵܐ. |
[No book] |
| [20]ܘܲܢܚܸܬ݂ ܡܵܪܝܵܐ ܠܛܘܼܪܵܐ ܕܣܝܼܢܲܝ: ܠܪܹܫܹܗ ܕܛܘܼܪܵܐ: ܘܲܩܪܵܐ ܡܵܪܝܵܐ ܠܡܘܼܫܹܐ ܠܪܹܫܹܗ ܕܛܘܼܪܵܐ: ܘܲܣܠܸܩ ܡܘܼܫܹܐ. |
[No book] |
| [21]ܘܐܸܡܲܪ ܡܵܪܝܵܐ ܠܡܘܼܫܹܐ: ܚܘܿܬ݂ ܣܲܗܸܕ݂ ܒܥܲܡܵܐ ܕܠܵܐ ܢܲܪܚܩܘܼܢ ܩܕ݂ܵܡ ܡܵܪܝܵܐ ܠܡܸܚܙܵܐ: ܘܢܸܦܸܠ ܡܸܢܗܘܿܢ ܣܲܓܿܝܼ. |
[No book] |
| [22]ܘܐܵܦ ܟܵܗܢܹ̈ܐ ܕܩܲܪܝܼܒ݂ܝܼܢ ܠܡܵܪܝܵܐ ܢܸܬ݂ܩܲܕܿܫܘܼܢ: ܕܠܵܐ ܢܸܫܠܲܛ ܒܗܘܿܢ ܡܵܪܝܵܐ. |
[No book] |
| [23]ܘܐܸܡܲܪ ܡܘܼܫܹܐ ܠܡܵܪܝܵܐ: ܠܵܐ ܡܸܫܟܿܚܝܼܢ ܥܲܡܵܐ ܠܡܸܣܲܩ ܠܛܘܼܪܵܐ ܕܣܝܼܢܲܝ: ܡܸܛܠ ܕܐܲܢ̄ܬ ܣܲܗܸܕܬ ܒܲܢ ܘܐܸܡܲܪܬ ܠܝܼ: ܕܬܲܚܸܡܲܝܗܝ ܠܛܘܼܪܵܐ: ܘܩܲܕܸܿܫܲܝܗܝ. |
[No book] |
| [24]ܘܐܸܡܲܪ ܠܹܗ ܡܵܪܝܵܐ: ܙܸܠ ܚܘܿܬ݂: ܘܣܲܩ ܐܲܢ̄ܬ ܘܐܲܗܪܘܿܢ ܐܲܚܘܼܟ݂ ܥܲܡܵܟ݂: ܘܟܵܗܢܹ̈ܐ ܘܥܲܡܵܐ ܠܵܐ ܢܲܪܚܩܘܼܢ ܠܡܸܣܲܩ ܩܕ݂ܵܡ ܡܵܪܝܵܐ: ܕܲܠܡܵܐ ܢܩܲܛܸܠ ܡܸܢܗܘܿܢ. |
[No book] |
| [25]ܘܲܢܚܸܬ݂ ܡܘܼܫܹܐ ܠܘܵܬ݂ ܥܲܡܵܐ: ܘܐܸܡܲܪ ܠܗܘܿܢ. |
[No book] |