➖ »
«
➖ ➕
Peshitta OT
PesOT
The Second Book of Clement
2Clem
←
Exodus
Exo
8
→
[1]ܘܐܸܡܲܪ ܡܵܪܝܵܐ ܠܡܘܼܫܹܐ: ܙܸܠ ܠܘܵܬ݂ ܦܸܪܥܘܿܢ ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܫܲܕܲܪ ܠܥܲܡܝ ܘܢܸܦܠܚܲܢܝ. [No book]
[2]ܘܐܸܢ ܠܵܐ ܨܵܒܹܐ ܐܲܢ̄ܬ ܠܲܡܫܲܕܵܪܘܼ: ܗܵܐ ܡܵܚܹܐ ܐ̄ܢܵܐ ܠܟ݂ܠܹܗ ܬܚܘܼܡܵܟ݂ ܒܐܘܼܪ̈ܕܿܥܹܐ. [No book]
[3]ܘܢܲܪܚܸܫ ܢܲܗܪܵܐ ܐܘܼܪ̈ܕܥܹܐ: ܘܢܸܣ̈ܩܵܢ ܘܢܸܥ̈ܠܵܢ ܠܒܲܝܬܵܟ݂ ܘܲܠܩܲܝܛܘܼܢܵܟ݂: ܘܲܠܒܹܝܬ݂ ܡܲܫܟܿܒ݂ܵܟ݂: ܘܲܠܥܲܪܣܵܬ݂ܵܟ݂: ܘܲܒ݂ܒܹܝܬ݂ ܥܲܒ݂ܕܲܝܟ ܘܲܒ݂ܥܲܡܵܟ݂: ܘܲܒ݂ܬ݂ܵܘܵܢܲܝܟ ܘܒܲܐܨ̈ܘܵܬ݂ܵܟ݂. [No book]
[4]ܘܒ݂ܵܟ݂ ܘܲܒ݂ܟ݂ܠܹܗ ܥܲܡܵܟ݂ ܢܸܣܩ̈ܵܢ ܐܘܼܪ̈ܕܿܥܹܐ. [No book]
[5]ܘܐܸܡܲܪ ܡܵܪܝܵܐ ܠܡܘܼܫܹܐ: ܐܸܡܲܪ ܠܐܲܗܪܘܿܢ ܐܲܚܘܼܟ݂: ܐܵܪܝܼܡ ܐܝܼܕ݂ܵܟ݂ ܒܚܘܼܛܪܵܐ ܥܲܠ ܢܲܗܪ̈ܵܘܵܬ݂ܵܐ: ܘܥܲܠ ܪ̈ܵܡܹܐ ܘܥܲܠ ܐܵܓ݂ܡܹ̈ܐ: ܘܐܲܣܸܩ ܐܘܼܪ̈ܕܥܹܐ ܥܲܠ ܐܲܪܥܵܐ ܕܡܸܨܪܹܝܢ. [No book]
[6]ܘܐܵܪܝܼܡ ܐܲܗܪܘܿܢ ܐܝܼܕܹܗ ܥܲܠ ܡܲܝܵܐ ܕܡܸܨܪ̈ܵܝܹܐ: ܘܲܣܠܸܩ ܐܘܼܪܕܥܹܐ: ܘܟܲܣ̈ܝܵܗ ܠܐܲܪܥܵܐ ܕܡܸܨܪܹܝܢ. [No book]
[7]ܘܲܥܒܲܕ݂ܘ ܗܵܟܲܢܵܐ ܐܵܦ ܚܲܪܵܫܹܐ ܒܚܲܪܵܫܲܝܗܘܢ: ܘܐܲܣܸܩܘ ܐܘܼܪܕܥܹܐ ܥܲܠ ܐܲܪܥܵܐ ܕܡܸܨܪܹܝܢ. [No book]
[8]ܘܲܩܪܵܐ ܦܸܪܥܘܿܢ ܠܡܘܼܫܹܐ ܘܠܲܐܗܪܘܿܢ: ܘܐܸܡܲܪ ܠܗܘܿܢ: ܨܲܠܵܘ ܩܕ݂ܵܡ ܡܵܪܝܵܐ: ܘܢܲܦܪܸܩ ܐܘܼܪ̈ܕܥܹܐ ܡܹܢܝ ܘܡܼܢ ܥܲܡܝ: ܘܐܹܫܲܕܲܪ ܠܥܲܡܵܐ ܘܢܲܕܲܒܿܚܘܼܢ ܩܕ݂ܵܡ ܡܵܪܝܵܐ. [No book]
[9]ܘܐܸܡܲܪ ܡܘܼܫܹܐ ܠܦܸܪܥܘܿܢ: ܫܐܲܠ ܠܵܟ݂ ܙܲܒ݂ܢܵܐ ܠܐܸܡܲܬ݂ܝ ܐܹܨܲܠܹܐ ܥܠܲܝܟ: ܘܥܲܠ ܥܲܒ݂ܕܲܝܟ ܘܥܲܠ ܥܲܡܵܟ݂: ܘܢܲܦܪܸܩ ܐܘܼܪܕܥܹܐ ܡܸܢܵܟ݂ ܘܡܼܢ ܒܲܝܬܵܟ݂. [No book]
[10]ܘܐܸܡܲܪ ܠܹܗ ܡܚܵܪ: ܘܐܸܡܲܪ ܠܹܗ ܐܲܝܟ݂ ܡܸܠܬ݂ܵܟ݂: ܡܸܛܠ ܕܬܸܕܲܥ ܕܠܲܝܬ ܐܲܝܟ݂ ܡܵܪܝܵܐ: ܐܲܠܵܗܲܢ. [No book]
[11]ܘܢܸܦܪܩܲܢ ܐܘܼܪܕܥܹܐ ܡܸܢܵܟ݂ ܘܡܼܢ ܒܲܝܬܵܟ݂: ܘܡܼܢ ܥܲܒ݂ܕܲܝܟ ܘܡܼܢ ܥܲܡܵܟ݂: ܒܲܠܚܘܿܕ ܕܲܒ݂ܢܲܗܪܵܐ ܢܸܫܬܲܚܪܲܢ. [No book]
[12]ܘܲܢܦܲܩܘ ܡܘܼܫܹܐ ܘܐܲܗܪܘܿܢ ܡܼܢ ܠܘܵܬ݂ ܦܸܪܥܘܿܢ: ܘܨܲܠܝܼ ܡܘܼܫܹܐ ܩܕ݂ܵܡ ܡܵܪܝܵܐ ܡܸܛܠ ܐܘܼܪܕܥܹܐ ܕܐܵܝܬܿܝܼ ܥܲܠ ܦܸܪܥܘܿܢ. [No book]
[13]ܘܲܥܒܲܕ݂ ܡܵܪܝܵܐ ܐܲܝܟ݂ ܡܸܠܬܹܗ ܕܡܘܼܫܹܐ: ܘܡܝܼܬ݂ ܐܘܼܪܕܥܹܐ ܡܼܢ ܒܵܬܹ̈ܐ ܘܡܼܢ ܕܵܪܹ̈ܐ ܘܡܼܢ ܚܲܩܵܠܵܬ݂ܵܐ. [No book]
[14]ܘܟܲܢܸܫܘ ܐܸܢܹܝܢ ܟܪܵܘܵܢ ܟܪܵܘܵܢ: ܘܣܸܪܝܲܬ݂ ܐܲܪܥܵܐ. [No book]
[15]ܘܲܚܙܵܐ ܦܸܪܥܘܿܢ ܕܲܗܘܲܬ݂ ܪܘܲܚܬ݂ܵܐ: ܘܥܲܒܿܝܼ ܠܸܒܹܿܗ ܘܠܵܐ ܫܡܲܥ ܐܸܢܘܿܢ: ܐܲܝܟ݂ ܕܐܸܡܲܪ ܡܵܪܝܵܐ ܠܡܘܼܫܹܐ. [No book]
[16]ܘܐܸܡܲܪ ܡܵܪܝܵܐ ܠܡܘܼܫܹܐ: ܐܸܡܲܪ ܠܐܲܗܪܘܿܢ: ܐܵܪܝܼܡ ܚܘܼܛܪܵܟ݂ ܘܲܡܚܝܼ ܠܥܲܦܪܵܐ ܕܐܲܪܥܵܐ: ܘܢܸܗܘܸܐ ܩܲܠܡܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ. [No book]
[17]ܘܲܥܒܲܕ݂ ܗܵܟܲܢܵܐ: ܘܐܵܪܝܼܡ ܐܲܗܪܘܿܢ ܐܝܼܕܹܗ ܒܚܘܼܛܪܹܗ: ܘܲܡܚܵܐ ܠܥܲܦܪܵܐ ܕܐܲܪܥܵܐ: ܘܲܗܘܵܬ݂ ܩܲܠܡܵܐ ܒܲܒ݂ܢܲܝܢܵܫܵܐ ܘܒܲܒ݂ܥܝܼܪܵܐ: ܘܟ݂ܠܹܗ ܥܲܦܪܵܐ ܕܐܲܪܥܵܐ ܗܘܵܐ ܠܹܗ ܩܲܠܡܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ. [No book]
[18]ܘܲܥܒܲܕ݂ܘ ܗܵܟܲܢܵܐ ܐܵܦ ܚܲܪܵܫܹܐ ܒܚܲܪܵܫܲܝܗܘܿܢ: ܘܠܵܐ ܐܸܫܟܲܚܘ ܠܲܡܦܲܪܵܩܘܼܬ݂ܵܗ ܠܩܲܠܡܵܐ: ܘܲܗܘܵܬ݂ ܩܲܠܡܵܐ ܒܲܒ݂ܢܲܝܢܵܫܵܐ ܘܒܲܒ݂ܥܝܼܪܵܐ. [No book]
[19]ܘܐܸܡܲܪܘ ܚܲܪܵܫܹܐ ܠܦܸܪܥܘܿܢ: ܨܸܒ݂ܥܵܗ ܗ̄ܝܼ ܕܐܲܠܵܗܵܐ: ܘܐܸܬ݂ܩܲܫܝܼ ܠܸܒܹܿܗ ܕܦܸܪܥܘܿܢ: ܘܠܵܐ ܫܡܲܥ ܐܸܢܘܿܢ: ܐܲܝܟܲܢܵܐ ܕܐܸܡܲܪ ܡܵܪܝܵܐ. [No book]
[20]ܘܐܸܡܲܪ ܡܵܪܝܵܐ ܠܡܘܼܫܹܐ: ܩܲܕܸܿܡ ܒܨܲܦܪܵܐ ܘܩܘܼܡ ܩܕ݂ܵܡ ܦܸܪܥܘܿܢ: ܗܵܐ ܢܵܦܹܩ ܠܡܲܝܵܐ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܫܲܕܲܪ ܠܥܲܡܝ ܘܢܸܦܠܚܲܢܝ. [No book]
[21]ܘܐܸܢ ܠܵܐ ܨܵܒܹܐ ܐܲܢ̄ܬ ܠܲܡܫܲܕܵܪܘܼ ܠܥܲܡܝ: ܗܵܐ ܡܫܲܕܲܪ ܐ̄ܢܵܐ ܥܠܲܝܟ: ܘܥܲܠ ܥܲܡܵܟ݂: ܘܥܲܠ ܒܲܝܬܵܟ݂: ܥܲܪܘܼܒ݂ܵܐ ܕܟ݂ܠ ܓܢܸܣ: ܘܢܸܬ݂ܡܠܘܿܢ ܒܵܬܹ̈ܐ ܕܡܸܨܪܵܝܹܐ ܥܲܪܘܼܒ݂ܵܐ: ܐܲܝܟ݂ ܐܲܪܥܵܐ ܕܗܸܢܘܿܢ ܥܠܹܝܗܿ. [No book]
[22]ܘܐܸܦܪܘܿܫ ܒܝܵܘܡܵܐ ܗܵܘ ܠܐܲܪܥܵܐ ܕܓܹܫܵܢ: ܕܥܲܡܝ ܝܵܬ݂ܒܿܝܼܢ ܒܵܗ: ܕܠܵܐ ܢܸܗܘܸܐ ܬܲܡܵܢ ܥܲܪܘܼܒ݂ܵܐ: ܡܸܛܠ ܕܬܸܕܲܥ ܕܐܸܢܵܐ ܐ̄ܢܵܐ ܡܵܪܝܵܐ ܒܓ݂ܵܘܵܗ ܕܐܲܪܥܵܐ. [No book]
[23]ܘܐܸܥܒܸܿܕ ܦܘܼܪܫܵܢܵܐ ܒܹܝܬ݂ ܥܲܡܝ ܠܥܲܡܵܟ݂: ܘܲܡܚܵܪ ܬܸܗܘܸܐ ܐܵܬ݂ܵܐ ܗܵܕܹܐ. [No book]
[24]ܘܲܥܒܲܕ ܡܵܪܝܵܐ ܗܵܟܲܢܵܐ: ܘܐܲܝܬܿܝܼ ܥܲܪܘܼܒ݂ܵܐ ܕܬܲܩܝܼܦ ܠܒܹܝܬ݂ ܦܸܪܥܘܿܢ ܘܲܠܒܹܝܬ݂ ܥܲܒ݂ܕܵܘܗܝ: ܘܲܒ݂ܟ݂ܠܵܗ ܐܲܪܥܵܐ ܕܡܸܨܪܹܝܢ: ܘܐܸܬ݂ܚܲܒܿܠܲܬ݂ ܐܲܪܥܵܐ ܡܸܛܠ ܥܲܪܘܼܒ݂ܵܐ. [No book]
[25]ܘܲܩܪܵܐ ܦܸܪܥܘܿܢ ܠܡܘܼܫܹܐ ܘܠܲܐܗܪܘܿܢ: ܘܐܸܡܲܪ ܠܗܘܿܢ: ܙܸܠܘ ܕܲܒܲܚܘ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ ܒܐܲܪܥܵܐ. [No book]
[26]ܘܐܸܡܲܪ ܡܘܼܫܹܐ: ܠܵܐ ܫܲܦܝܼܪ ܠܡܸܥܒܲܕ ܗܵܟܲܢܵܐ: ܡܸܛܠ ܕܡܼܢ ܛܲܢܦܘܼܬ݂ܵܐ ܕܡܸܨܪܵܝܹܐ ܡܕܲܒܿܚܝܼܢܲܢ ܠܡܵܪܝܵܐ ܐܲܠܵܗܲܢ: ܘܐܸܢ ܕܵܒ݂ܚܝܼܢܲܢ ܕܸܚܠܵܬ݂ܵܐ ܕܡܸܨܪܵܝܹܐ ܠܥܹܝܢܲܝܗܘܿܢ: ܪܵܓܿܡܝܼܢ ܠܲܢ. [No book]
[27]ܡܲܪܕܹܿܐ ܬܠܵܬ݂ܵܐ ܝܵܘܡܝܼܢ ܢܹܐܙܲܠ ܒܡܲܕ݂ܒܿܪܵܐ: ܘܲܢܕܲܒܲܚ ܠܡܵܪܝܵܐ ܐܲܠܵܗܲܢ: ܐܲܝܟ݂ ܕܢܹܐܡܲܪ ܠܲܢ. [No book]
[28]ܘܐܸܡܲܪ ܦܸܪܥܘܿܢ: ܐܸܢܵܐ ܐܹܫܲܕܲܪܟ݂ܘܿܢ: ܘܲܬܿܕܲܒܿܚܘܼܢ ܠܡܵܪܝܵܐ ܐܲܠܵܗܟ݂ܘܿܢ ܒܡܲܕ݂ܒܿܪܵܐ: ܒܲܠܚܘܿܕ݂ ܡܲܪܚܵܩܘܼ ܠܵܐ ܬܲܪܚܩܘܿܢ ܠܡܹܐܙܲܠ: ܘܨܲܠܵܘ ܐܵܦ ܥܠܲܝ. [No book]
[29]ܘܐܸܡܲܪ ܡܘܼܫܹܐ ܠܦܸܪܥܘܿܢ: ܗܵܐ ܢܵܦܹܩ ܐ̄ܢܵܐ ܡܼܢ ܠܘܵܬ݂ܵܟ݂: ܘܐܹܨܲܠܸܐ ܩܕ݂ܵܡ ܡܵܪܝܵܐ: ܘܢܸܦܪܲܩ ܥܲܪܘܼܒ݂ܵܐ ܡܼܢ ܦܸܪܥܘܿܢ: ܘܡܼܢ ܥܲܒ݂ܕܵܘܗܝ: ܘܡܼܢ ܥܲܡܹܗ ܡܚܵܪ: ܒܲܠܚܘܿܕ݂ ܕܠܵܐ ܢܵܘܣܸܦ ܦܸܪܥܘܿܢ ܠܲܡܕܲܓܵܠܘܼ: ܕܠܵܐ ܢܫܲܕܲܪ ܠܥܲܡܵܐ ܘܲܢܕܲܒܿܚܘܼܢ ܠܡܵܪܝܵܐ. [No book]
[30]ܘܲܢܦܲܩ ܡܘܼܫܹܐ ܡܼܢ ܠܘܵܬ݂ ܦܸܪܥܘܿܢ: ܘܨܲܠܝܼ ܩܕ݂ܵܡ ܡܵܪܝܵܐ. [No book]
[31]ܘܲܥܒܲܕ݂ ܡܵܪܝܵܐ ܐܲܝܟ݂ ܡܸܠܬܹܗ ܕܡܘܼܫܹܐ: ܘܲܦܪܲܩ ܥܲܪܘܼܒ݂ܵܐ ܡܼܢ ܦܸܪܥܘܿܢ: ܘܡܼܢ ܥܲܒ݂ܕܵܘܗܝ: ܘܡܼܢ ܥܲܡܹܗ: ܘܠܵܐ ܐܸܫܬܚܲܪ ܐܵܦܠܵܐ ܚܲܕ݂. [No book]
[32]ܘܩܲܫܝܼ ܦܸܪܥܘܿܢ ܠܸܒܹܿܗ ܐܵܦ ܒܙܲܒ݂ܢܵܐ ܗܵܢܵܐ: ܘܠܵܐ ܫܲܕܪܹܗ ܠܥܲܡܵܐ. [No book]
Translation: Charles H. Hoole (1885)
Source: www.earlychristianwritings.com
Top