➕
←
Ezekiel
Eze
16
→
[1]ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ. [2]ܒܲܪܢܵܫܵܐ: ܐܵܘܕܲܥܹܝܗ̇ ܠܐܘܿܪܸܫܠܸܡ ܛܲܢܦܘܼܬ̣ܵܗ̇. [3]ܘܐܸܡܲܪ: ܗܵܟܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܠܐܘܿܪܸܫܠܸܡ: ܥܸܩܵܪܹܟ̣ܝ ܘܡܵܘܠܵܕܹܟ̣ܝ ܡ̣ܢ ܐܲܪܥܵܐ ܕܲܟ̣ܢܵܥܢ: ܐܲܒ̣ܘܼܟ̣ܝ ܐܵܡܘܿܪܵܝܵܐ ܘܐܸܡܹܟ̣ܝ ܚܹܝܬ̣ܵܝܬܵܐ. [4]ܘܡܵܘܠܕܼܵܢܝܼܬܹܟ̣ܝ ܒܝܵܘܡܵܐ ܕܝܼܠܸܕܼܬܹܟ̣ܝ: ܠܵܐ ܦܸܣܩܲܬ̤ ܫܸܪܹܟ̣ܝ: ܘܲܒ̣ܡܲـ̈ـܝܵܐ ܠܵܐ ܐܲܣܚܝܵܬܹܟ̣ܝ: ܘܲܒ̣ܡܸܠܚܵܐ ܠܵܐ ܡܠܲܚܬܹܟ̣ܝ ܘܲܒ̣ܥܲܙܪܘܼܪܹ̈ܐ ܠܵܐ ܟܪܲܟ̣ܬܹܟ̣ܝ. [5]ܘܠܵܐ ܚܵܣܲܬ̤ ܥܠܲܝܟ̇ܝ ܥܲܝܢܵܗ̇: ܕܬܸܥܒܸ̇ܕܼ ܠܹܟ̣ܝ ܚܕܼܵܐ ܡ̣ܢ ܗܵܠܹܝܢ: ܘܲܬ̣ܪܲܚܸܡ ܥܠܲܝܟ̇ܝ: ܐܸܠܵܐ ܐܸܫܬ̇ܕܼܝܼܬ̇ܝ ܒܕܲܒ̣ܪܵܐ ܒܲܥܫܝܼܩܘܼܬ̣ܵܗ̇ ܕܢܲܦ̮ܫܹܟ̣ܝ: ܒܝܵܘܡܵܐ ܕܝܠܸܕܼܬܹܟ̣ܝ. [6]ܘܥܸܒ̣ܪܹܬ̣ ܥܠܲܝܟ̇ܝ: ܘܲܚܙܹܝܬܹ̇ܟ̣ܝ ܕܲܡܦܲܠܦܲܠܬ̇ܝ ܒܲܕܼܡܹܟ̣ܝ: ܘܐܸܡ̇ܪܹܬ̣ ܠܹܟ̣ܝ ܒܲܕܼܡܹܟ̣ܝ ܚܝܵܝ. [7]ܘܲܣܓܵܝ ܐܲܝܟ ܡܵܘܥܝܼܬ̣ܵܐ ܕܚܲܩܠܵܐ: ܘܲܣܓܲܝܬ̇ܝ ܘܲܪܒܲܝܬ̇ܝ ܘܥܲܠܬ̇ܝ ܠܲܡܕܼܝܼ̈ܢܵܬ̣ܵܐ: ܬܕܲܝ̈ܟ̇ܝ ܩܵܡ̣ܘ ܘܣܲܥܪܹܟ̣ܝ ܝܼܥ̣ܵܐ: ܘܲܗ̤ܘܲܝܬ̇ܝ ܥܲܪܛܸܠ ܘܥܲܪܝܲܬ̣. [8]ܘܥܸܒ̣ܪܹܬ̣ ܥܠܲܝܟ̇ܝ ܘܲܚܙܹ̇ܝܬܹܟ̣ܝ ܘܲܚܙܹ̇ܝܬ̣ ܙܲܒ̣ܢܹܟ̣ܝ ܙܲܒ̣ܢܵܐ ܕܥܲܙܪܵܪܬܵܐ: ܘܦܸܪܣܹܬ̣ ܐܝܼܕܼܝ ܥܠܲܝܟ̇ܝ: ܘܟܲܣܝܼܬ̣ ܦܘܼܪܣܵܝܹܟ̣ܝ: ܘܝܼܡ̇ܝܼܬ̣ ܠܹܟ̣ܝ: ܘܥܸܠܹ̇ܬ̣ ܥܲܡܹܟ̣ܝ ܒܲܩܝܵܡܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܘܲܗ̤ܘܲܝܬ̇ܝ ܠܝܼ. [9]ܘܐܲܣܚܝܼܬܹܟ̣ܝ ܒܡܲـ̈ـܝܵܐ: ܘܐܲܫܝܼܓܹ̇ܬ̣ ܕܡܹܟ̣ܝ ܡܸܢܹܟ̣ܝ: ܘܡܫܲܚܬܹ̇ܟ̣ܝ ܒܡܸܫܚܵܐ. [10]ܘܐܲܠܒܸ̇ܫܬܹ̇ܟ̣ܝ ܦܸܬ̣ܟܵܐ: ܘܐܲܣܐܸܢܬܹ̇ܟ̣ܝ ܡܣܵܢܹ̈ܐ ܘܐܸܣܪܹܬ̣ ܒܚܲܨܲܝ̈ܟ̇ܝ ܒܘܼܨܵܐ: ܘܟܲܣܝܼܬܹ̇ܟ̣ܝ: ܚܸܠܵܐ. [11]ܘܨܲܒܸ̇ܬ̇ܬܹ̇ܟ̣ܝ ܨܸܒ̣ܬܵܐ: ܘܐܲܪܡ̇ܝܼܬ̣ ܫܹܐܪܹ̈ܐ ܒܐܝܼܕܲܝ̈ܟ̇ܝ ܘܗܲܡܢܝܼܟ̣ܵܐ ܒܨܵܘܪܹܟ̣ܝ. [12]ܘܒܹܪ̈ܘܼܠܹܐ ܒܹܝܬ̣ ܥܲܝܢܲܝ̈ܟ̇ܝ: ܘܲܩܕܼܵܫܹ̈ܐ ܒܐܸܕܼܢܲܝ̈ܟ̇ܝ: ܘܲܟ̣ܠܝܼܠܵܐ ܕܫܘܼܒ̣ܚܵܐ ܒܪܹܫܹܟ̣ܝ. [13]ܘܐܸܨܛܲܒܲܬ̇ܬ̇ܝ ܒܕܲܗܒ̣ܵܐ ܘܒܲܚܡܘܼܪܬܵܐ: ܘܐܸܬ̣ܠ̱ܒܸ̇ܫܬ̇ܝ ܒܘܼܨܵܐ: ܘܬܸܟ̣ܠ̱ܬ̣ܵܐ ܘܦܸܬ̣ܟܵܐ: ܘܲܢܫܝܼܦܵܐ ܘܕܸܒ̣ܫܵܐ ܘܡܸܫܚܵܐ ܐܸܟܲܠܬ̇ܝ: ܘܲܫ̣ܦܲܪܬ̇ܝ ܛܵܒ̣ ܛܵܒ̣: ܘܐܲܨܠܲܚܬ̇ܝ ܒܡܲܠ̈ܟ̇ܘܵܬ̣ܵܐ. [14]ܘܲܢܦܲܩ̣ ܫܡܵܐ ܠܫܘܼܦܪܹܟ̣ܝ ܒܥܲܡܡܹ̈ܐ: ܡܸܛܠ ܟܠܝܼܠܵܐ ܕܫܘܼܒ̣ܚܝ ܕܣܵܡܹ̇ܬ̣ ܥܠܲܝܟ̇ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. [15]ܘܐܸܬ̇ܬ̇ܟܸܠܬ̇ܝ ܥܲܠ ܫܘܼܦܪܹܟ̣ܝ: ܘܙܲܢܝܼܬ̇ܝ ܥܲܠ ܫܡܹܟ̣ܝ: ܘܐܸܫܲܕ̇ܬܝ ܙܵܢܝܘܼܬܹܟ̣ܝ ܥܲܠ ܟܠ ܕܥܵܒܲܪ. [16]ܘܲܢܣܲܒ̣ܬ̇ܝ ܡ̣ܢ ܠܒ̣ܘܼܫܲܝ̈: ܘܲܥܒܲܕ̇ܬ̇ܝ ܠܹܟ̣ܝ ܩ̈ܢܵܝܵܬ̣ܵܐ ܘܙܲܢܝܼܬ̇ܝ ܒܗܹܝܢ: ܠܵܐ ܬܲܥܠܹܝܢ ܘܠܵܐ ܢܸܗܘ̈ܝܵܢ ܕܝܼܠܹܟ̣ܝ. [17]ܘܲܢܣܲܒ̣ܬ̇ܝ ܡܵܐܢܹ̈ܐ ܕܫܘܼܒ̣ܚܹܟ̣ܝ: ܡ̣ܢ ܕܲܗܒ̣ܵܐ ܘܡ̣ܢ ܣܹܐܡܵܐ ܕܝܸܗ̄ܒܹ̇ܬ̣ ܠܹܟ̣ܝ: ܘܲܥ̣ܒܲܕ̇ܬ̇ܝ ܠܹܟ̣ܝ ܨܲܠܡܹ̈ܐ ܕܸܟ̣ܪܹ̈ܐ: ܘܙܲܢܝܼܬ̇ܝ ܒܗܘܿܢ. [18]ܘܲܢܣܲܒ̣ܬ̇ܝ ܡܵܐܢܹ̈ܐ ܕܨܸܒ̣ܬܹ̇ܟ̣ܝ ܘܟܲܣܝܬ̇ܝ ܐܸܢܘܿܢ: ܘܡܸܫܚܝ ܘܒܸܣܡܲܝ̈ ܣܵܡ̣ܬ̇ܝ ܩܕܼܵܡܲܝܗܘܿܢ. [19]ܘܠܲܚܡܵܐ ܕܝܸܗ̄ܒܹ̇ܬ̣ ܠܹܟ̣ܝ ܢܫܝܦܵܐ ܘܕܸܒ̣ܫܵܐ ܘܡܸܫܚܵܐ ܠܡܹܐܟ̣ܘܼܠܬܵܐ: ܣܵܡ̣ܬ̇ܝܼܘܗܝ ܩܕܼܵܡܲܝܗܘܿܢ ܠܪܹܝܚܵܐ ܕܲܣܘܵܬ̣ܵܐ ܐܵܡܲܪ ܡܵܪܐ ܡܵܪ̈ܵܘܵܬ̣ܵܐ. [20]ܘܲܢܣܲܒ̣ܬ̇ܝ ܒܢܲܝ̈ܟ̇ܝ ܘܲܒ̣ـ̈ـܢܵܬܹܟ̣ܝ ܕܝܼܠܸܕ̇ܬ̇ܝ ܠܝܼ: ܘܕܲܒܲܚܬ̇ܝ ܠܗܘܿܢ ܠܡܹܐܟ̣ܘܼܠܬܵܐ: ܣܛܲܪ ܡ̣ܢ ܙܵܢܝܘܼܬܹܟ̣ܝ. [21]ܘܲܢܟܲܣܬ̇ܝ ܒܢܲܝ̈ ܝܲܗ̄ܒ̣ܬ̇ܝ ܠܗܘܿܢ: ܟܲܕܼ ܐܸܫܬܲܪܲܚܬ̇ܝ ܒܗܘܿܢ. [22]ܘܲܒ̣ܟ̣ܠܵܗ̇ ܛܲܢܦܘܼܬܹܟ̣ܝ ܘܙܵܢܝܘܼܬܹܟ̣ܝ: ܠܵܐ ܐܸܬ̇ܕ̇ܟܲܪܬ̇ܝ ܝܵܘ̈ܡܵܬ̣ܵܐ ܕܛܲܠܝܘܼܬܹܟ̣ܝ: ܟܲܕܼ ܥܲܪܛܸܠܵܝܵܐ ܗ̄ܘܲܝܬ̇ܝ ܘܥܲܪܝܵܐ ܘܲܡܦܲܠܦܠܵܐ ܒܲܕܼܡܵܐ. [23]ܘܡ̣ܢ ܒܵܬܲܪ ܗܵܠܹܝܢ ܟܠܗܹܝܢ ܒܝܼ̈ܫܵܬܹܟ̣ܝ: ܘܵܝ ܠܹܟ̣ܝ ܘܵܝ ܠܹܟ̣ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. [24]ܒܢܲܝܬ̇ܝ ܠܹܟ̣ܝ ܒܲܝܬܵܐ ܕܓܲܝ̈ܒܹܐ: ܘܲܥܒܲܕ̇ܬܝ ܠܹܟ̣ܝ ܥܠܵـ̈ـܘܵܬ̣ܵܐ ܒܟ̣ܠ ܫܘܼܩ. [25]ܘܲܒ̣ܟ̣ܠ ܪܹܫ ܐܘܼܪ̈ܚܵܬ̣ܵܐ ܒܢܲܝܬ̇ܝ ܦܪ̈ܲܟܲܝܟ̇ܝ: ܘܛܲܢܸܦܬ̇ܝ ܫܘܼܦܪܹܟ̣ܝ: ܘܲܦܫܲܛܬ̇ܝ ܪܸ̈ܓ̣ܠܲܝܟ̇ܝ: ܥܲܠ ܟܠ ܕܥܵܒܲܪ: ܘܐܲܣܓ̇ܝܼܬ̇ܝ ܙܵܢܝܘܼܬܹܟ̣ܝ. [26]ܘܙܲܢܝܼܬ̇ܝ ܒܲܒ̣ܢܲܝ̈ ܡܸܨܪܹܝܢ ܫܒ̣ܵܒܲܝ̈ܟ̇ܝ ܪܵܘܪ̈ܒܲܝ ܒܸܣܪܵܐ: ܘܐܲܣܓ̇ܝܼܬ̇ܝ ܙܵܢܝܘܼܬܹܟ̣ܝ ܘܐܲܪܓܸ̇ܙܬ̇ܝܼܢܝ. [27]ܘܐܲܪܝܼܡܹ̇ܬ̣ ܐܝܼܕܼܝ ܥܠܲܝܟ̇ܝ ܘܐܘܒ̇ܕܹܬ̣ ܦܘܼܩܕܵܢܲܝ̈ܟ̇ܝ: ܘܐܲܫܠܸܡ̇ܬܹܟ̣ܝ ܒܝܼܕܼ ܣܵܢ̈ܐܬܹܟ̣ܝ ܒ̈ܢܵܬ̣ ܦܠܸܫܬܵܝܹ̈ܐ: ܕܬ̣ܵܟ̣̈ܣܵܢ ܗ̄ܘܲܝ̈ ܠܹܟ̣ܝ ܡ̣ܢ ܐܘܼܪ̈ܚܵܬܹܟ̣ܝ ܕܙܵܢܝܘܼܬ̣ܵܐ. [28]ܘܙܲܢܝܘܼܬ̇ܝ ܒܲܒ̣ܢܲܝ̈ ܐܵܬ̣ܘܿܪ: ܘܠܵܐ ܣܒܲܥܬ̇ܝ. [29]ܘܐܲܣܓ̇ܝܼܬ̇ܝ ܙܵܢܝܘܼܬܹܟ̣ܝ ܥܲܠ ܐܲܪܥܵܐ ܕܲܟ̣ܢܲܥܢ ܘܲܕܼܟܲܠܕܼܵܝܹ̈ܐ: ܘܐܵܦ ܒܗܵܠܹܝܢ ܠܵܐ ܣܒܲܥܬ̇ܝ. [30]ܡܵܢܵܐ ܐܸܕ̇ܘܼܢ ܠܒܲܪܬܹܟ̣ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܲܥܒܲܕ̇ܬ̇ܝ ܗܵܠܹܝܢ ܟܠܗܘܿܢ ܥܒ̣ܵܕܹ̈ܐ ܕܐܲܢ̄ܬ̇ܬ̣ܵܐ ܙܵܢܝܼܬ̣ܵܐ ܘܡܲܪܵܚܬܵܐ. [31]ܟܲܕܼ ܒܢܲܝܬ̇ܝ ܓܲܝܒܲܝ̈ܟ̇ܝ ܒܟ̣ܠ ܪܹܫ ܐܘܼܪ̈ܚܵܬ̣ܵܐ: ܘܲܥܠܵـ̈ـܘܵܬܹܟ̣ܝ ܒܟ̣ܠ ܫܘܼܩ. ܘܠܵܐ ܗ̤ܘܲܝܬ̇ܝ ܐܵܦܠܵܐ ܐܲܝܟ ܙܵܢܝܼܬ̣ܵܐ ܕܲܡܟܲܢܫܵܐ ܐܲܓ̣ܪܵܐ. [32]ܐܵܦܠܵܐ ܐܲܝܟ ܐܲܢ̄ܬܲܬ̣ ܓܲܒ̣ܪܵܐ ܓܲܝܵܪܬܵܐ ܕܢܵܣܒܵܐ ܡ̣ܢ ܢܘܼܟ̣ܪ̈ܵܝܹܐ. [33]ܠܟ̣ܠܗܹܝܢ ܙܵܢ̈ܝܵܬ̣ܵܐ ܝܵܗ̄ܒ̇ܝܼܢ ܐܲܓ̣ܪܵܐ: ܘܐܲܢ̄ܬ̇ܝ ܝܲܗ̄ܒ̣ܬ̇ܝ ܐܲܓ̣ܪܵܐ ܠܟ̣ܠܗܘܿܢ ܪ̈ܵܚܡܲܝܟ̇ܝ: ܘܲܫܚܲܕ̇ܬ̇ܝ ܐܸܢܘܿܢ ܒܙܵܢܝܘܼܬܹܟ̣ܝ: ܕܢܹܐܬ̣ܘܿܢ ܠܘܵܬܹܟ̣ܝ ܡ̣ܢ ܟܠܗܘܿܢ ܚܕܼܵܪܲܝܟ̇ܝ. [34]ܘܐܸܬ̣ܦܪܸܫܬ̇ܝ ܡ̣ܢ ܢܸܫܹ̈ܐ ܒܙܵܢܝܘܼܬܹܟ̣ܝ: ܒܗܵܝ̇ ܕܝܵܗ̄ܒܵܐ ܗ̄ܘܲܝܬ̇ܝ ܐܲܓ̣ܪܵܐ: ܘܐܲܓ̣ܪܵܐ ܠܵܐ ܝܲܗ̄ܒ̣ܘ ܠܹܟ̣ܝ. [35]ܡܸܛܠ ܗܵܢܵܐ ܙܵܢܝܼܬ̣ܵܐ ܫܡܲܥܝ ܦܸܬ̣ܓ̣ܵܡܹܗ ܕܡܵܪܝܵܐ. [36]ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܝܲܗ̄ܒ̣ܬ̇ܝ ܢܚܵܫܹܟ̣ܝ: ܘܲܓܠܲܝܬ̇ܝ ܦܘܼܪܣܵܝܹܟ̣ܝ ܒܙܵܢܝܘܼܬܹܟ̣ܝ ܥܲܠ ܪ̈ܵܚܡܲܝܟ̇ܝ: ܘܥܲܠ ܟܠܗܘܿܢ ܦܬܲܟ̣ܪܹ̈ܐ ܛܲܢܦܘܼܬܹܟ̣ܝ: ܘܲܕܼܡܵܐ ܕܲܒ̣ܢܲܝ̈ܟ̇ܝ ܝܲܗ̄ܒ̣ܬ̇ܝ ܠܗܘܿܢ. [37]ܡܸܛܠ ܗܵܢܵܐ ܗܵܐ ܡܟܲܢܸܫ ܐ̄ܢܵܐ ܠܟ̣ܠܗܘܿܢ ܪ̈ܵܚܡܲܝܟ̇ܝ ܕܲܨܒܲܝܬ̇ܝ ܒܗܘܿܢ: ܘܲܠܟ̣ܠ ܕܲܪܚܸܡ̣ܬ̇ܝ ܥܲܡ ܕܲܣܢܲܝܬ̇ܝ: ܘܐܹܟܲܢܸܫ ܐܸܢܘܿܢ ܥܠܲܝܟ̇ܝ ܡ̣ܢ ܚܕܼܵܪܲܝܟ̇ܝ: ܘܐܸܓ̣ܠܹܐ ܦܘܼܪܣܵܝܹܟ̣ܝ ܠܥܹܢܲܝܗܘܿܢ: ܘܢܸܚܙܘܿܢ ܟܠܹܗ ܦܘܼܪܣܵܝܹܟ̣ܝ. [38]ܘܐܹܕ̇ܘܿܢܹܟ̣ܝ ܕܝܼܢܵܐ ܕܓܲܝܵܪ̈ܵܬ̣ܵܐ: ܘܕܼܝܼܢܵܐ ܕܐܲܝܠܹܝܢ ܕܐܵܫ̈ܕܵܢ ܕܡܵܐ: ܘܐܸܬ̇ܠܹܟ̣ܝ ܠܲܕܼܡܵܐ: ܘܲܠܚܸܡܬ̣ܵܐ ܘܠܲܛܢܵܢܵܐ. [39]ܘܐܲܫ̱ܠܡܹܟ̣ܝ ܒܐܝܼܕܲܝ̈ܗܘܿܢ: ܘܢܸܣܚ̄ܦܘܼܢ ܒܹܝܬ̣ ܓܲܝܒܲܝ̈ܟ̇ܝ: ܘܢܸܥܩ̄ܪܘܼܢ ܦܪ̈ܲܟܲܝܟ̇ܝ: ܘܢܲܫ̱ܠܚܘܼܢ ܠܒ̣ܘܼܫܲܝ̈ܟ̇ܝ: ܘܢܸܣܒ̣ܘܼܢ ܡܵܐܢܹ̈ܐ ܕܫܘܼܒ̣ܚܹܟ̣ܝ: ܘܢܸܫܒ̇ܩܘܼܢܹܟ̣ܝ ܥܲܪܛܸܠ. [40]ܘܢܸܣܩܘܼܢ ܥܠܲܝܟ̇ܝ ܟܸܢܫܹ̈ܐ ܘܢܸܪܓܡܘܼܢܹܟ̣ܝ ܒܟܹܐܦܹ̈ܐ: ܘܢܸܡܚܘܿܢܹܟ̣ܝ ܒܣܲܝܦܲܝ̈ܗܘܿܢ. [41]ܘܢܵܘܩ̄ܕܼܘܼܢܹܟ̣ܝ ܒܓ̣ܵܘ ܢܘܼܪܵܐ: ܘܢܸܥܒ̇ܕܼܘܼܢ ܡܸܢܹܟ̣ܝ ܕܝܼܢܹ̈ܐ ܠܥܹܝܢ ܢܸܫܹ̈ܐ ܣܲܓ̇ܝܼ̈ܐܵܬ̣ܵܐ: ܘܐܹܒܲܛܠܹܟ̣ܝ ܡ̣ܢ ܙܵܢܝܘܼܬ̣ܵܐ: ܘܬ̣ܘܼܒ̣ ܠܵܐ ܬܸܬ̇ܠܝܼܢ ܐܲܓ̣ܪܵܐ. [42]ܘܐܲܢܝܼܚ ܚܸܡܬ̣ܝ ܥܠܲܝܟ̇ܝ: ܘܢܸܥܒܲܪ ܛܢܵܢܝ ܡܸܢܹܟ̣ܝ: ܘܐܸܬ̇ܬ̇ܢܝܼܚ ܘܠܵܐ ܐܸܪܓܲܙ ܬܘܼܒ̣. [43]ܥܲܠ ܕܠܵܐ ܐܸܬ̇ܕ̇ܟܲܪܬ̇ܝ ܝܵܘ̈ܡܵܬ̣ܵܐ ܕܛܲܠܝܘܼܬܹܟ̣ܝ: ܘܐܲܪܓܸ̇ܙܬ̇ܝܼܢܝ ܒܗܵܠܹܝܢ ܟܠܗܹܝܢ: ܐܵܦ ܐܸܢܵܐ ܗܵܐ ܦܸܪܥܹ̇ܬ̣ ܐܘܼܪ̈ܚܵܬܹܟ̣ܝ ܒܪܹܫܹܟ̣ܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܲܥܒܲܕܬ̇ܝ ܛܲܢܦܘܼܬ̣ܵܐ ܘܙܵܢܝܼܬ̣ܵܐ. [44]ܘܟ̣ܠ ܡܲܢ ܕܡܲܡܬܲܠ ܡܲܬ̣ܠܵܐ ܥܠܲܝܟ̇ܝ ܢܲܡܬܸ̇ܠ: ܘܢܹܐܡܲܪ ܒܲܪܬ̣ܵܐ ܐܲܝܟ ܐܸܡܵܐ. [45]ܒܲܪܬ̣ ܐܸܡܹܟ̣ܝ ܐܲܢ̄ܬ̇ܝ: ܫܵܒ̣ܩܲܬ̣ ܒܲܥܠܵܗ̇ ܘܲܒ̣ܢܹ̈ܝܗ̇: ܘܚܵܬ̣ܵܐ ܐܲܢ̄ܬ̇ܝ ܕܐܲܚ̈ܘܵܬ̣ܵܐ ܕܲܫܒܲܩ ܓܲܒ̣ܪ̈ܲܝܗܹܝܢ ܘܲܒ̣ܢܲܝ̈ܗܹܝܢ: ܐܸܡܟܹܝܢ ܚܹܝܬ̣ܵܝܬ̣ܵܐ ܘܐܲܒ̣ܘܼܟܹܝܢ ܐܵܡܘܿܪܵܝܵܐ. [46]ܘܚܵܬܹܟ̣ܝ ܩܲܫܝܼܫܬܵܐ ܫܵܡܪܹܝܢ: ܗ̤ܝ ܘܲܒ̣ܢܵـ̈ـܬ̣ܵܗ̇ ܕܝܵܬ̣ܒܵܐ ܡ̣ܢ ܣܸܡܵܠܹܟ̣ܝ: ܘܚܵܬܹܟ̣ܝ ܙܥܘܿܪܬܵܐ ܕܝܵܬ̣ܒܵܐ ܡ̣ܢ ܝܲܡܝܼܢܹܟ̣ܝ: ܣܕܼܘܿܡ ܘܲܒ̣ܢܵـ̈ـܬ̣ܵܗ̇. [47]ܘܠܵܐ ܗ̄ܘܼܵܐ ܐܲܝܟ ܐܘܼܪ̈ܚܵܬ̣ܗܹܝܢ ܗܲܠܸܟ̣ܬ̇ܝ: ܘܠܵܐ ܗ̄ܘܼܵܐ ܐܲܝܟ ܛܲܢܦ̈ܘܵܬ̣ܗܹܝܢ ܥ̣ܒܲܕ̇ܬ̇ܝ: ܥܲܕܼ ܩܲܠܝܼܠ ܘܝܲܬ̇ܝܼܪ ܡܸܢܗܹܝܢ ܚܲܒܸ̇ܠܬ̇ܝ: ܒܟ̣ܠܗܹܝܢ ܐܘܼܪ̈ܚܵܬܹܟ̣ܝ. [48]ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܥܸܒ̣ܕܲܬ̤ ܣܕܼܘܼܡ ܚܵܬܹܟ̣ܝ ܗ̤ܝ ܘܲܒ̣̈ܢܵܬ̣ܵܗ̇: ܐܲܝܟ ܕܲܥܒܲܕ̇ܬ̇ܝ ܐܲܢ̄ܬ̇ܝ ܘܲܒ̣̈ܢܵܬܹܟ̣ܝ. [49]ܗܵܢܵܘ ܥܵܘܼܠܵܐ ܕܲܣܕܼܘܿܡ ܚܵܬܹܟ̣ܝ ܓܵܐܝܼܬ̣ܵܐ: ܕܣܵܒ̣ܥܵܐ ܗ̄ܘܼܵܬ̣ ܠܲܚܡܵܐ: ܘܝܵܬ̣ܒܵܐ ܗ̄ܘܼܵܬ̣ ܒܫܸܠܝܵܐ ܗ̤ܝ ܘܲܒ̣̈ܢܵܬ̣ܵܗ̇: ܘܒ̣ܐܝܼܕܼܵܐ ܕܒܲܝܫܹ̈ܐ ܘܲܕܼܡܸܣܟܹ̇ܢܹ̈ܐ ܠܵܐ ܐܸܚܲܕܼ. [50]ܐܸܠܵܐ ܐܸܬ̇ܬ̇ܪܝܼܡ ܘܲܥܒܲܕܼ ܒܝܼܫܬܵܐ ܩܕܼܵܡܲܝ: ܘܟܲܕܼ ܗܵܠܹܝܢ ܚܙܹ̇ܝܬ̣ ܒܗܹܝܢ ܗܸܦܟܹ̇ܬ̣ ܐܸܢܹܝܢ. [51]ܫܵܡܪܹܝܢ ܐܲܝܟ ܦܸܠܓ̣ܵܐ ܕܲܚܛܵܗܲܝ̈ܟ̇ܝ ܠܵܐ ܚܛܵܬ̤: ܐܲܣܓ̇ܝܼܬ̇ܝ ܛܲܢܦܘܼܬܹܟ̣ܝ ܡܸܢܗܹܝܢ: ܘܲܙܟܲܝܬ̇ܝ ܠܐܲܚ̈ܘܵܬܹܟ̣ܝ ܒܟ̣ܠܵܗ̇ ܛܲܢܦܘܼܬܹܟ̣ܝ ܕܲܥ̣ܒܲܕ̇ܬ̇ܝ. [52]ܘܐܵܦ ܐܲܢ̄ܬ̇ܝ ܩܲܒܸ̇ܠܝ ܒܸܗܬ̇ܬܹܟ̣ܝ: ܕܲܙܟܲܝܬ̇ܝ ܚ̈ܘܵܬܹܟ̣ܝ ܒܲܚܛܵܗܲܝ̈ܟ̇ܝ: ܘܐܸܬ̇ܛܲܢܦܬ̇ܝ ܝܲܬ̇ܝܼܪ ܡܸܢܗܹܝܢ: ܘܗܸܢܹܝܢ ܐܸܙܕ̇ܕܲܩ ܝܲܬ̇ܝܼܪ ܡܸܢܹܟ̣ܝ: ܘܐܵܦ ܐܲܢ̄ܬ̇ܝ ܒܗܲܬ̣ܝ: ܘܩܲܒܸ̇ܠܝ ܚܸܦܪܹܟ̣ܝ: ܕܐܸܙܕܲܕܲܩ ܐܲܚ̈ܘܵܬܹܟ̣ܝ ܝܲܬ̇ܝܼܪ ܡܸܢܹܟ̣ܝ. [53]ܘܐܲܗܦܸܟ ܫܒ̣ܝܼܬ̣ܗܹܝܢ: ܫܒ̣ܝܼܬ̣ܵܐ ܕܲܣܕܼܘܿܡ ܘܕܲܒ̣̈ܢܵܬ̣ܵܗ̇: ܘܲܫܒ̣ܝܼܬ̣ܵܐ ܕܫܵܡ̇ܪܹܝܢ ܘܕܲܒ̣̈ܢܵܬ̣ܵܗ̇: ܘܐܲܫܒܸ̇ܐ ܫܒ̣ܝܼܬܹܟ̣ܝ ܒܲܝܢܵܬ̣ܗܹܝܢ. [54]ܕܲܬ̣ܩܲܒ̇ܠܝܼܢ ܒܸܗܬ̇ܬ̣ܵܐ: ܘܬܸܚ̄ܦܪܝܼܢ ܒܟ̣ܠ ܡܸܕܸ̇ܡ ܕܲܥܒܲܕ̇ܬ̇ܝ ܕܬܲܪܓ̇ܙܝܼܢܵܢܝ. [55]ܘܚܵܬܹܟ̣ܝ ܣܕܼܘܿܡ ܘܲܒ̣̈ܢܵܬ̣ܵܗ̇ ܢܸܬ̣ܩ̈ܢܵܢ ܐܲܝܟ ܕܡ̣ܢ ܩܕܼܝܼܡ: ܘܫܵܡܪܹܝܢ ܘܲܒ̣̈ܢܵܬ̣ܵܗ̇ ܢܸܬ̣ܩـ̈ـܢܵܢ ܐܲܝܟ ܕܡ̣ܢ ܩܕܼܝܼܡ: ܘܐܲܢ̄ܬ̇ܝ ܘܲܒ̣̈ܢܵܬܹܟ̣ܝ ܬܸܗܘܹܝܢ ܐܲܝܟ ܕܡ̣ܢ ܩܕܼܝܼܡ. [56]ܘܠܵܐ ܗܘ̤ܵܬ̣ ܣܕܼܘܿܡ ܚܵܬܹܟ̣ܝ ܠܛܸܒܵܐ ܒܦܘܼܡܹܟ̣ܝ ܒܝܵܘܡܵܐ ܕܓܲܐܝܘܼܬܹܟ̣ܝ. [57]ܡ̣ܢ ܩܕܼܵܡ ܕܬܸܬܓ̇ܠܹܐ ܒܝܼܫܬܹ̇ܟ̣ܝ: ܐܲܝܟ ܚܸܣܕܵܐ ܕܲܒ̣̈ܢܵܬ̣ ܐܲܕܘܿܡ: ܘܟ̣ܠܗܹܝܢ ܒ̈ܢܵܬ̣ ܦܠܸܫܬܵܝܹ̈ܐ ܕܲܚܕܼܝܼܪ̈ܵܢ ܗ̄ܘܲܝ̈ ܠܵܗ̇: ܘܫܵܝ̈ܛܵܢ ܗ̄ܘܲܝ̈ ܠܵܗ̇. [58]ܘܲܚܛܵܗܲܝ̈ܟ̇ܝ ܘܛܲܢܦ̈ܘܵܬܹܟ̣ܝ ܐܲܢ̄ܬ̇ܝ ܫ̣ܩܲܠܬ̇ܝ ܐܸܢܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. [59]ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܵܒܹ̇ܕܼ ܐ̄ܢܵܐ ܠܹܟ̣ܝ ܐܲܝܟ ܕܲܥܒܲܕ̇ܬ̇ܝ: ܥܲܠ ܕܫܵܛ̣ܬ̇ܝ ܡܵܘ̈ܡܵܬ̣ܝ ܘܒܲܛܠܸܬ̇ܝ ܩܝܵܡܝ. [60]ܐܸܢܵܐ ܕܹܝܢ ܐܸܬ̇ܕ̇ܟܲܪ ܩܝܵܡܝ ܕܥܲܡܹܟ̣ܝ ܕܲܒ̣ܝܵܘ̈ܡܵܬ̣ܵܐ ܕܛܲܠܝܘܼܬܹܟ̣ܝ: ܘܐܲܩܝܼܡ ܠܹܟ̣ܝ ܩܝܵܡܵܐ ܕܥܵܠܲܡ. [61]ܘܬܸܥ̱ܗܕܼܝܼܢ ܐܘܼܪ̈ܚܵܬܹܟ̣ܝ ܘܬܸܒ̣ܗ̱ܬ̣ܝܼܢ: ܕܢܸܣܒܹ̇ܬ̣ ܠܐܲܚ̈ܘܵܬܹܟ̣ܝ ܠܩܲܫܝܼܫܬܵܐ ܘܠܲܙܥܘܿܪܬܵܐ: ܘܝܸܗ̄ܒܹ̇ܬ̣ ܐܸܢܹܝܢ ܠܹܟ̣ܝ ܒ̈ܢܵܬ̣ܵܐ ܠܵܐ ܡ̣ܢ ܩܝܵܡܹܟ̣ܝ. [62]ܘܐܲܩܝܼܡ ܐܸܢܵܐ ܩܝܵܡܝ ܥܲܡܹܟ̣ܝ: ܘܬܸܕ̇ܥܝܼܢ ܕܐܸܢܵܐ ܐ̄ܢܵܐ ܡܵܪܝܵܐ. [63]ܡܸܛܠ ܕܬܸܬ̇ܕܲܟ̣ܪܝܼܢ ܘܬܸܒ̣ܗ̱ܬ̣ܝܼܢ: ܘܬ̣ܘܼܒ̣ ܠܵܐ ܬܸܦ̮ܬ̇ܚܝܼܢ ܦܘܼܡܹܟ̣ܝ ܡ̣ܢ ܒܹܗܬ̇ܬܹܟ̣ܝ: ܡܵܐ ܕܫܸܒ̣ܩܹ̇ܬ̣ ܠܹܟ̣ܝ ܟܠܡܸܕܸ̇ܡ ܕܲܥܒܲܕ̇ܬ̇ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.
 
Top