|
|
| [1]ܒܲܫܢܲܬ̣ ܚܕܲܥܸܣܪܹ̈ܐ ܒܚܲܕܼ ܒܝܲܪܚܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ. |
[No book] |
| [2]ܒܲܪܢܵܫܵܐ: ܥܲܠ ܕܐܸܡܪܲܬ̤ ܨܘܿܪ ܥܲܠ ܐܘܿܪܸܫܠܸܡ ܐܲܚܵܢ: ܐܸܬ̇ܬܲܒܲܪܘ ܬܲܪ̈ܥܹܐ ܕܥܲܡܡܹ̈ܐ ܘܲܦܢ̣ܵܘ ܠܘܵܬ̣ܝ: ܘܚܸܪܒܲܬ̤ ܘܲܨܕܼܵܬ̤. |
[No book] |
| [3]ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܠܲܝܟ̇ܝ ܨܘܿܪ: ܘܐܲܣܸܩ ܥܠܲܝܟ̇ܝ ܥܲܡܡܹ̈ܐ ܣܲܓ̇ܝܼ̈ܐܐ: ܐܲܝܟ ܕܣܵܠܹ̇ܩ ܝܲܡܵܐ ܒܓܲܠܠܵܘ̈ܗܝ. |
[No book] |
| [4]ܘܲܢܚܲܒ̇ܠܘܼܢ ܫܘܼܪܹ̈ܝܗ̇ ܕܨܘܿܪ: ܘܢܸܣܚ̄ܦܘܼܢ ܡܲܓܕ̇ܠܹܝ̈ܗ̇: ܘܢܸܥܩ̄ܪܘܼܢ ܥܲܦܪܵܗ̇ ܡܸܢܵܗ̇: ܘܐܸܥܒ̇ܕܼܝܼܗ̇ ܐܲܝܟ ܟܹܐܦܵܐ ܫܲܥܝܼܥܬܵܐ. |
[No book] |
| [5]ܘܒܹܝܬ̣ ܡܲܫܛܵܚܹ̈ܐ ܬܸܗܘܹܐ ܠܲܡܨܝܼ̈ܕܼܵܬ̣ܵܐ ܒܓ̣ܵܘ ܝܲܡܵܐ: ܡܸܛܠ ܕܐܸܢܵܐ ܡܲܠܠܹ̇ܬ̣ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܘܬܸܗܘܹܐ ܒܸܙܬ̣ܵܐ ܠܥܲܡܡܹ̈ܐ. |
[No book] |
| [6]ܘܲܒ̣̈ܢܵܬ̣ܵܗ̇ ܕܲܒ̣ܕܲܒ̣ܪܵܐ ܒܚܲܪܒܵܐ ܢܸܬ̣ܩܲܛ̈ܠܵܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ. |
[No book] |
| [7]ܡܸܛܠ ܕܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܡܲܝܬܹ̇ܐ ܐ̄ܢܵܐ ܥܲܠ ܨܘܿܪ: ܠܲܢܒ̣ܘܼܟܲܕܼܢܵܨܲܪ ܡܲܠܟܵܐ ܕܒ̣ܵܒܹܠ ܡ̣ܢ ܓܲܪܒ̇ܝܵܐ: ܡܠܸܟ ܡܲܠ̈ܟܹ̇ܐ: ܒܪ̈ܲܟ̣ܫܵܐ: ܘܲܒ̣ܡܲܪ̈ܟ̇ܒ̣ܵܬ̣ܵܐ: ܘܲܒ̣ܦܲܪ̈ܵܫܹܐ: ܘܲܒ̣ܟ̣ܢܘܼܫܝܵܐ: ܘܲܒ̣ܥܲܡܵܐ ܣܲܓܝܼܵܐܐ. |
[No book] |
| [8]ܒ̈ܢܵܬܹܟ̣ܝ ܕܲܒ̣ܚܲܩܠܵܐ ܒܚܲܪܒܵܐ ܢܩܲܛܸܠ: ܘܲܢܩܝܼܡ ܥܠܲܝܟ̇ܝ ܕܵܘܩܹ̈ܐ: ܘܢܲܟ̣ܡܸܢ ܥܠܲܝܟ̇ܝ ܟܡܹܐܢܹ̈ܐ: ܘܲܢܩܝܼܡ ܥܠܲܝܟ̇ܝ ܣܲܟ̇ܪܵܐ. |
[No book] |
| [9]ܘܲܫܢܵܢܹ̈ܐ ܕܢܲܝܙܟ̣ܵܘ̈ܗܝ ܢܸܬܸ̇ܠ ܒܫܘܼܪ̈ܲܝܟ̇ܝ: ܘܡܲܓܕ̇ܠܲܝ̈ܟ̇ܝ ܢܸܥܩ̄ܪܘܼܢ ܒܣܲܝܦܲܝ̈ܗܘܿܢ. |
[No book] |
| [10]ܡ̣ܢ ܗܠܲܟ̣ܬ̣ܵܐ ܕܪ̈ܲܟ̣ܫܹܗ ܢܟܲܣܹܟ̣ܝ ܚܸܠܵܐ: ܘܡ̣ܢ ܩܵܠܵܐ ܕܦܲܪ̈ܵܫܵܘܗܝ ܘܲܕܼܓ̣ܝܼ̈ܓ̣ܠܹܐ ܕܡܲܪ̈ܟ̇ܒ̣ܵܬܹܗ ܢܙܘܼܥܘܼܢ ܫܘܼܪ̈ܲܝܟ̇ܝ: ܘܡܵܐ ܕܥܵܐܹ̇ܠ ܒܬܲܪ̈ܥܲܝܟ̇ܝ: ܐܲܝܟ ܗܵܘܿ ܕܥܵܐܹ̇ܠ ܠܲܡܕܼܝܼܢ̄ܬܵܐ ܡܬܲܪܲܥܬܵܐ. |
[No book] |
| [11]ܘܲܒ̣ܦܲܪ̈ܣܵܬ̣ܵܐ ܕܪ̈ܲܟ̣ܫܹܗ ܢܕܼܘܼܫ ܟܠܗܘܿܢ ܫܘܼܩܲܝ̈ܟ̇ܝ: ܘܲܢܩܲܛܸܠ ܥܲܡܹܟ̣ܝ ܒܚܲܪܒܵܐ: ܘܲܥ̈ܠܵܘܵܬ̣ܵܐ ܕܥܘܼܫܢܹܟ̣ܝ ܒܐܲܪܥܵܐ ܢܸܣܚܘܿܦ. |
[No book] |
| [12]ܘܢܸܒ̇ܙܘܼܢ ܢܸܟ̣ܣܲܝ̈ܟ̇ܝ ܘܢܸܫܒ̇ܘܿܢ ܩܸܢܝܵܢܹܟ̣ܝ: ܘܢܸܣܚ̄ܦܘܼܢ ܫܘܼܪ̈ܲܝܟ̇ܝ: ܘܢܸܥܩ̄ܪܘܼܢ ܒܵـ̈ـܬܹ̇ܐ ܕܪܸܓ̇ܬܹܟ̣ܝ: ܘܟܹܐܦܲܝ̈ܟ̇ܝ ܘܩܲܝܣܲܝ̈ܟ̇ܝ ܘܥܘܼܬ̣ܪܹܟ̣ܝ ܢܸܫܕ̇ܘܿܢ ܒܝܲܡܵܐ. |
[No book] |
| [13]ܘܐܹܒܲܛܸܠ ܣܘܿܓ̣ܵܐܐ ܕܲܙܡܵܪܹܟ̣ܝ: ܘܬ̣ܘܼܒ̣ ܠܵܐ ܢܸܫܬ̇ܡܲܥ ܩܵܠܵܐ ܕܟܸܢܵܪܹܟ̣ܝ. |
[No book] |
| [14]ܘܐܸܥܒ̇ܕܹܟ̣ܝ ܟܹܐܦܵܐ ܫܲܥܝܼܥܬܵܐ: ܘܡܲܫܛܵܚܹ̈ܐ ܕܲܡܨܝܼ̈ܕܼܵܬ̣ܵܐ: ܘܬ̣ܘܼܒ̣ ܠܵܐ ܬܸܬ̣ܒ̇ܢܹܝܢ: ܡܸܛܠ ܕܐܸܢܵܐ ܡܲܠܠܹ̇ܬ̣: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. |
[No book] |
| [15]ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܠܨܘܿܪ: ܡ̣ܢ ܩܵܠܵܐ ܕܡܲܦܘܼܠܬܹ̇ܟ̣ܝ ܘܡ̣ܢ ܫܘܼܢܵܩܵܐ ܕܲܩܛܝܼܠܲܝ̈ܟ̇ܝ: ܘܩܸܛ̈ܠܹܐ ܕܡܸܬ̣ܩܲܛܠܝܼܢ ܒܓ̣ܵܘܹܟ̣ܝ: ܢܙܘܼ̈ܥܵܢ ܓܵܙܪ̈ܵܬ̣ܵܐ. |
[No book] |
| [16]ܘܢܸܚܬ̣ܘܼܢ ܡ̣ܢ ܟܘܼܪ̈ܣܵܘܵܬ̣ܗܘܿܢ ܟܠܗܘܿܢ ܪܵܘܪ̈ܒ̣ܵܢܹܐ ܕܝܲܡܵܐ: ܘܢܸܫܩ̄ܠܘܼܢ ܡܸܢܗܘܿܢ ܐܸܣܛܠܲܝ̈ܗܘܿܢ: ܘܢܸܫ̱ܠܚܘܼܢ ܡܵܐܢܹ̈ܐ ܕܨܸܒ̣ܬ̇ܗܘܿܢ: ܘܢܸܠܒ̇ܫܘܼܢ ܙܵܘܸܥܬ̣ܵܐ: ܘܢܸܬ̇ܒ̣ܘܼܢ ܒܐܲܪܥܵܐ ܘܢܸܬ̣ܘ̱ܪܘܼܢ ܘܠܵܐ ܢܸܬ̇ܬ̇ܢܝܼܚܘܼܢ: ܘܢܸܬ̣ܡ̱ܗܘܿܢ ܥܠܲܝܟ̇ܝ. |
[No book] |
| [17]ܘܢܹܐܠܘܿܢ ܥܠܲܝܟ̇ܝ ܐܘܿܠ̈ܝܵܬ̣ܵܐ: ܘܢܹܐܡܪܘܼܢ ܠܹܟ̣ܝ: ܐܲܝܟܲܢܵܐ ܐܸܒܲܕ̇ܬܝ ܥܵܡܘܿܪܬܵܐ ܕܝܲܡܡܹ̈ܐ: ܡܕܼܝܼܢ̄ܬܵܐ ܥܲܫܝܼܢܬܵܐ ܕܥܲܫܝܼܢܵܐ ܗ̄ܘܼܵܬ̣ ܒܝܲܡܵܐ ܗ̤ܝ ܘܥܵܡܘܿܪܹ̈ܝܗ̇: ܕܝܲܗ̄ܒ̣ܘ ܕܸܚܠܲܬ̣ܗܘܿܢ ܒܟ̣ܠܗܘܿܢ ܥܵܡܘܿܪܹ̈ܝܗ̇. |
[No book] |
| [18]ܡܸܟܹ̇ܝܠ ܢܙܘܼ̈ܥܵܢ ܓܵܙܪ̈ܵܬ̣ܵܐ ܒܝܵܘܡܵܐ ܕܡܲܦܘܼܠܬܹ̇ܟ̣ܝ: ܘܢܸܬ̇ܕܲܠ̈ܚܵܢ ܓܵܙܪ̈ܵܬ̣ܵܐ ܒܝܵܘܡܵܐ ܕܡܲܦܘܼܠܬܹ̇ܟ̣ܝ. |
[No book] |
| [19]ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܠܨܘܿܪ: ܡܵܐ ܕܲܥܒܲܕ̇ܬܹܟ̣ܝ ܡܕܼܝܼܢ̄ܬܵܐ ܚܲܪܒ̇ܬ̣ܵܐ ܐܲܝܟ ܡܕܼܝܼ̈ܢܵܬ̣ܵܐ ܕܠܵܐ ܐܸܬ̣ܝܲܬܲܒ̣: ܡܲܣܸܩ ܐ̄ܢܵܐ ܥܠܲܝܟ̇ܝ ܬܗܘܿܡܵܐ: ܘܲܢܟܲܣܘܿܢܹܟ̣ܝ ܡܲـ̈ـܝܵܐ ܣܲܓ̇ܝܼ̈ܐܹܐ. |
[No book] |
| [20]ܘܐܲܚܬܹܟ̣ܝ ܥܲܡ ܢܵܚ̈ܬܲܝ ܓܘܼܒܵܐ ܠܘܵܬ̣ ܥܲܡܵܐ ܕܥܵܠܲܡ: ܘܐܵܘܬ̇ܒܹܟ̣ܝ ܒܐܲܪܥܵܐ ܬܲܚܬܵܝܬܵܐ: ܒܚܲܪ̈ܒ̣ܵܬ̣ܵܐ ܕܡ̣ܢ ܥܵܠܲܡ ܥܲܡ ܢܵܚ̈ܬܲܝ ܓܘܼܒܐ: ܘܠܵܐ ܬܸܬ̣ܝܲܬ̇ܒ̣ܝܼܢ: ܘܠܵܐ ܐܸܥܒܸ̇ܕܼ ܩܝܵܡܹܟ̣ܝ ܒܐܲܪܥܵܐ ܕܚܲܝܹ̈ܐ. |
[No book] |
| [21]ܠܐܲܒ̣ܕܵܢܵܐ ܐܸܬ̇ܠܹܟ̣ܝ: ܘܬܸܬ̣ܒ̇ܥܹܝܢ ܘܠܵܐ ܬܸܫܬܲܟ̣ܚܝܼܢ ܬܘܼܒ̣ ܠܥܵܠܲܡ: ܐܵܡܲܪ ܡܵܪܹܐ ܡܵܪܵܘܵܬ̣ܵܐ. |
[No book] |