Peshitta OT
Peshitta OT
➕
←
Ezra
Ezr
6
→
[
1
]
ܗܵܝܕܹ̇ܝܢ
ܕܵܪܝܵܘܵܫ ܡܲܠܟܵܐ ܦ̣ܩܲܕܼ: ܘܲܩ̣ܪܵܐ ܒܲܟ̣ܬ̣ܵܒܹ̈ܐ ܕܐܝܼܬ̣ ܒܹܝܬ̣ ܓܲܙܵܐ ܬܲܡܵܢ ܒܒ̣ܵܒܹܠ.
[
2
]
ܘܐܸܫ̣ܟܲܚ
ܒܐܲܚܡܵܬ̣ܵܢ ܡܕܼܝܼܢ̄ܬܵܐ ܕܐܝܼܬ̣ ܒܡܵܕܲܝ: ܡܓܲܠܬ̣ܵܐ ܚܕܼܵܐ. ܘܗܵܟܲܢܵܐ ܟܬ̣ܝܼܒ̣ ܒܓ̣ܵܘܹܗ ܕܟܸܪܟܵܐ.
[
3
]
ܒܲܫܢܲܬ̣
ܚܕܼܵܐ ܠܟ̣ܘܼܪܸܫ ܡܲܠܟܵܐ: ܟܘܼܪܸܫ ܡܲܠܟܵܐ ܣܵܡ̣ ܢܵܡܘܿܣܵܐ: ܘܲܦܩܲܕܼ ܕܒܲܝܬܵܐ ܕܐܲܠܵܗܵܐ ܕܐܝܼܬ̣ ܒܐܘܿܪܸܫܠܸܡ ܢܸܬ̣ܒ̇ܢܹܐ: ܐܲܬ̣ܪܵܐ ܕܕܸܒ̣ܚܹ̈ܐ ܕܵܒ̣ܚܝܼܢ. ܘܫܲܬ̣ܐ̱ܣܵܘ̈ܗܝ ܕܡ̣ܢ ܪܵܘܡܹܗ: ܐܲܡ̈ܝܼܢ ܫܬ̇ܝܼܢ. ܘܲܦܬ̣ܵܝܹܗ ܐܲܡܝܼ̈ܢ ܥܸܣܪܝܼܢ.
[
4
]
ܡܪܲܒ̇ܥܵܐ
ܕܟܹܐܦܹ̈ܐ ܬܠܵܬ̣ܵܐ. ܘܬܲܪܥܵܐ ܕܩܲܝܣܵܐ ܚܲܕܼܬ̣ܵܐ. ܘܐܵܦ ܢܦܲܩܬ̣ܵܐ ܡ̣ܢ ܒܹܝܬ̣ ܡܲܠܟܵܐ ܡܸܬ̣ܝܲܗ̄ܒܵܐ.
[
5
]
ܘܐܵܦ
ܡܵܐܢܹ̈ܐ ܕܒܹܝܬ̣ ܐܲܠܵܗܵܐ ܕܕܲܗܒ̣ܵܐ ܘܲܕܼܣܹܐܡܵܐ: ܕܐܲܦܸܩ̣ ܐܸܢܘܿܢ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܘܐܵܘܒܸ̇ܠ ܐܸܢܘܿܢ ܠܒ̣ܵܒܹܠ: ܐܸܬ̣̱ܝܼܗܸܒ̣ܘ ܘܐܸܬ̣ܵܘ ܠܕܼܘܼܟܲܬ̣ܗܘܿܢ ܠܗܲܝܟ̇ܠܵܐ ܕܒ̣ܐܘܿܪܸܫܠܸܡ ܠܐܲܬ̣ܪܗܘܿܢ ܘܐܸܬ̣ܚ̄ܡܸܠܘ ܒܒܲܝܬܵܐ ܕܐܲܠܵܗܵܐ.
[
6
]
ܡܸܟܹ̇ܝܠ
ܬܲܬ̣ܢܲܝ ܫܲܠܝܼܛܵܐ ܕܒܲܥܒܲܪ ܢܲܗܪܵܐ: ܘܐܸܫܬܲܢܒ̇ܘܼܙܵܢ ܘܚܲܒ̣ܪ̈ܵܘܗܝ ܫܲܠܝܼ̈ܛܹܐ ܕܒܲܥܒܲܪ ܢܲܗܪܵܐ: ܪܲܚܝܼܩܝܼܢ ܗ̄ܘܲܝܬ̇ܘܿܢ ܡ̣ܢ ܬܲܡܵܢ.
[
7
]
ܫܒ̣ܘܿܩܘ
ܠܲܥܒ̣ܝܼܕ̇ܬܵܐ ܕܒܹܝܬ̣ ܐܲܠܵܗܵܐ: ܕܢܸܥܒ̇ܕܼܘܼܢܵܗ̇ ܝܗ̄ܘܼܕܼܵܝܹ̈ܐ: ܘܠܫܒ̣ܝܼܬ̣ܵܐ ܕܲܝܗܘܼܕܼܵܝܹ̈ܐ. ܕܒܹܝܬ̣ ܐܲܠܵܗܵܐ ܢܸܬ̣ܒ̇ܢܸܐ ܥܲܠ ܐܲܬ̣ܪܹܗ.
[
8
]
ܘܡ̣ܢ
ܩܕܼܵܡܲܝ ܣܝܼܡ ܢܵܡܘܿܣܵܐ: ܠܡܵܐ ܕܹܝܢ ܬܲܗܪܘܼܢ ܥܲܡ ܫܒ̣ܝܼܬ̣ܵܐ ܕܲܝܗܘܼܕܼܵܝܹ̈ܐ: ܠܡܸܒ̣ܢܵܐ ܒܲܝܬܵܐ ܕܐܲܠܵܗܵܐ. ܗܵܘ̇ ܕܡ̣ܢ ܢܸܟ̣ܣܲܝ̈ ܡܲܠܟܵܐ: ܘܡܲܕܲܐܬ̣ܵܐ ܕܒܲܥܒܲܪ ܢܲܗܪܵܐ: ܬܸܗܘܹܐ ܢܦܲܩܵܐ: ܘܡܸܬ̣ܝܲܗ̄ܒ̣ܵܐ ܠܓܲܒ̣ܪܹ̈ܐ ܗܵܠܹܝܢ. ܘܲܥܒ̣ܵܕܼܵܐ ܠܵܐ ܢܸܗܘܘܿܢ ܡܒܲܛܠܝܼܢ.
[
9
]
ܘܡܸܕܸ̇ܡ
ܕܨܵܒ̇ܝܼܢ ܗܲܒ̣ܘ ܠܗܘܿܢ. ܘܡܸܕܸ̇ܡ ܠܵܐ ܬܚܲܣܪܘܼܢ ܠܗܘܿܢ. ܒܢܲܝ̈ ܬܵܘܪܹ̈ܐ ܘܕܸܟ̣ܪܹ̈ܐ ܘܐܸܡܪܹ̈ܐ: ܠܲܥܠܵܬ̣ ܐܲܠܵܗ ܫܡܲܝܵܐ. ܚܸܛܹ̈ܐ ܘܡܸܠܚܵܐ ܘܚܲܡܪܵܐ ܘܡܸܫܚܵܐ: ܐܲܝܟܲܢܵܐ ܕܦܵܩܕ̇ܝܼܢ ܟܘܼܡܪܹ̈ܐ ܕܒ̣ܐܘܿܪܸܫܠܸܡ: ܢܸܗܘܘܿܢ ܡܲܝܬܹ̇ܝܢ ܠܗܘܿܢ ܟܠܝܘܿܡ ܒܝܘܿܡ ܘܠܵܐ ܢܸܗܘܘܿܢ ܛܵܥܹ̇ܝܢ.
[
10
]
ܘܗܸܢܘܿܢ
ܢܸܗܘܘܿܢ ܡܩܲܪܒ̣ܝܼܢ ܩܘܼܪ̈ܒܵܢܹܐ ܠܐܲܠܵܗ ܫܡܲܝܵܐ. ܘܲܡܨܲܠܝܼܢ ܥܲܠ ܡܲܠܟܵܐ ܘܲܒ̣ܢܵܘ̈ܗܝ.
[
11
]
ܘܡ̣ܢ
ܩܕܼܵܡܲܝ ܣܝܼܡ ܢܵܡܘܿܣܵܐ: ܕܟ̣ܠܢܵܫ ܕܲܢܫܲܢܹܐ ܦܸܬ̣ܓ̣ܵܡܵܐ ܗܵܢܵܐ: ܢܸܫܬ̇ܡܸܛ ܩܲܝܣܵܐ ܡ̣ܢ ܒܲܝܬܹ̇ܗ. ܘܢܸܥܒ̇ܕܼܘܼܢ ܠܹܗ ܙܩܝܼܦܵܐ: ܘܢܸܙܩ̄ܦܘܼܢܵܝܗܝ ܥܠܵܘܗܝ. ܘܒܲܝܬܹ̇ܗ ܠܙܸܒ̣ܠܵܐ ܢܸܬ̣̱ܝܼܗܸܒ̣ ܡܸܛܠ ܗܵܕܹܐ.
[
12
]
ܘܐܲܠܵܗܵܐ
ܕܐܸܫܟܲܚ̄ܢ ܫܡܹܗ ܬܲܡܵܢ: ܬܲܡܵܢ ܢܸܥܡܲܪ. ܘܟ̣ܠ ܡܲܠܟܵܐ ܘܥܲܡܵܐ ܕܢܵܘܫܸܛ ܐܝܼܕܹܗ ܠܲܡܫܲܢܵܝܘܼ ܘܠܲܡܚܲܒܵܠܘܼ ܒܲܝܬܵܐ ܗܵܢܵܐ ܕܐܲܠܵܗܵܐ ܕܒ̣ܐܘܿܪܸܫܠܸܡ: ܐܸܢܵܐ ܕܵܪܝܵܘܵܫ ܣܵܡܹ̇ܬ̣ ܢܵܡܘܿܣܵܐ ܕܒܲܥܓܲܠ ܢܹܐܒܲܕܼ.
[
13
]
ܗܵܝܕܹ̇ܝܢ
ܬܲܬ̣ܢܲܝ ܫܲܠܝܼܛܵܐ ܕܒܲܥܒܲܪ ܢܲܗܪܵܐ. ܘܐܸܫܬܲܢܒ̇ܘܿܙܵܢ ܘܚܲܒ̣ܪ̈ܵܘܗܝ: ܡܸܕܸ̇ܡ ܕܲܫܠܲܚ̣ ܐܲܝܟ̣ ܢܵܡܘܿܣܵܐ: ܒܲܥܓܲܠ ܥ̣ܒܲܕܼܘ.
[
14
]
ܘܲܫܒ̣ܝܼܬ̣ܵܐ
ܕܲܝܗܘܼܕܼܵܐ ܥܵܒ̣ܕ̇ܝܼܢ ܘܡܲܣܩܝܼܢ ܠܪܹܫ: ܒܲܢܒ̣ܝܼܘܼܬܹܗ ܕܚܲܓܝܼ ܢܒ̣ܝܼܵܐ: ܘܲܙܟܲܪܝܵܐ ܒܲܪ ܥܲܕ̇ܘܿ. ܘܲܒ̣ܢܵܘ ܘܫܲܟ̣ܠܸܠ̣ܘ ܡ̣ܢ ܢܵܡܘܿܣܵܐ ܕܐܲܠܵܗܵܐ ܕܝܼܣܪܵܝܹܠ: ܘܡ̣ܢ ܢܵܡܘܿܣܵܐ ܕܟ̣ܘܼܪܸܫ ܘܲܕ̇ܕܼܵܪܝܵܘܵܫ: ܘܡ̣ܢ ܢܵܡܘܿܣܵܐ ܕܐܲܪܛܲܚܫܫܸܬ̇ ܡܲܠܟܵܐ ܕܦܵܪܹܣ.
[
15
]
ܘܲܓ̣ܡܲܪ
ܒܲܝܬܵܐ ܗܵܢܵܐ ܒܝܘܿܡ ܬܠܵܬ̣ܵܐ ܒܝܼܪܲܚ ܐܵܕܼܵܪ: ܗ̤ܝ ܗ̄ܝ̣ ܫܢܲܬ̣ ܫܸܬ̣ ܠܡܲܠܟ̇ܘܼܬܹܗ ܕܕܼܵܪܝܵܘܵܫ ܡܲܠܟܵܐ.
[
16
]
ܘܲܥܒܲܕܼܘ
ܒܢܲܝ̈ ܝܼܣܪܵܝܹܠ ܟܘܼܡܪܹ̈ܐ ܘܠܹܘܵܝܹ̈ܐ: ܘܫܲܪܟܵܐ ܕܲܒ̣ܢܲܝ̈ ܝܼܗܘܼܕܼܵܐ: ܥܹܐܕܼܵܐ ܠܒܲܝܬܵܐ ܗܵܢܵܐ ܕܒܹܝܬ̣ ܐܲܠܵܗܵܐ ܒܚܲܕܼܘܼܬ̣ܵܐ.
[
17
]
ܘܩܲܪܸܒ̣ܘ
ܠܥܹܐܕܼܵܐ ܕܒܲܝܬܵܐ ܕܐܲܠܵܗܵܐ: ܬܵܘܪܹ̈ܐ ܡܵܐܐ: ܘܕܸܟ̣ܪܹ̈ܐ ܡܲܐܬܹ̇ܝܢ: ܘܐܸܡܪܹ̈ܐ ܐܲܪܒܲܥ ܡܵܐܐ ܨܸܦܪ̈ܵܝܹܐ ܕܥܸܙܹ̈ܐ ܠܡܸܫܒܲܩ ܚܛܵܗܹ̈ܐ ܕܲܒ̣ܢܲܝ̈ ܝܼܣܪܵܝܹܠ: ܬܪܸܥܣܲܪ ܒܡܸܢܝܵܢܵܐ ܕܫܲܒ̣̈ܛܹܐ ܕܝܼܣܪܵܝܹܠ.
[
18
]
ܘܐܲܩܝܼܡ̣ܘ
ܠܟ̣ܘܼܡܪܹ̈ܐ ܒܬܸܫܡܸܫܬ̇ܗܘܿܢ: ܘܠܹܘܵܝܹ̈ܐ ܒܬܸܫܡܸܫܬ̇ܗܘܿܢ: ܥܲܠ ܥܒ̣ܝܼܕ̇ܬܵܐ ܕܒܲܝܬܵܐ ܕܐܲܠܵܗܵܐ ܕܒ̣ܐܘܿܪܸܫܠܸܡ: ܐܲܝܟ ܕܲܟ̣ܬ̣ܝܼܒ̣ ܒܲܟ̣ܬ̣ܵܒ̣ܵܐ ܕܢܵܡܘܿܣܵܐ ܕܡܘܼܫܹܐ.
[
19
]
ܘܲܥܒܲܕܼܘ
ܒܢܲܝ̈ ܫܒ̣ܝܼܬ̣ܵܐ ܦܨܲܚ ܒܐܲܪܒܲܥܸܣܪܵܐ ܒܝܲܪܚܵܐ ܩܲܕܼܡܵܝܵܐ.
[
20
]
ܡܸܛܠ
ܕܐܸܬ̇ܕܲܟ̇ܝܼܘ ܟܵܗ̈ܢܹܐ ܘܠܹܘܵܝܹ̈ܐ. ܐܲܟ̣ܚ̄ܕܼܵܐ ܟܠܗܘܿܢ ܐܸܬ̇ܕܲܟ̇ܝܼܘ. ܘܲܩ̣ܛܲܠܘ ܐܸܡܪܹ̈ܐ ܒܦܸܨܚܵܐ ܠܲܒ̣ܢܲܝ̈ ܫܒ̣ܝܼܬ̣ܵܐ: ܘܠܲܐܚܲܝ̈ܗܘܿܢ ܟܘܼܡܪܹ̈ܐ ܘܐܵܦ ܠܗܘܿܢ.
[
21
]
ܘܐܸܟܲܠܘ
ܒܢܲܝ̈ ܝܼܣܪܵܝܹܠ ܐܲܝܠܹܝܢ ܕܲܣܠܸܩ̣ܘ ܡ̣ܢ ܫܒ̣ܝܼܬ̣ܵܐ ܕܒ̣ܵܒܹܠ: ܟܠ ܕܲܦܪܲܫ̣ܘ ܡ̣ܢ ܛܲܡܐܘܼܬ̣ܵܐ ܕܥܲܡܡܹ̈ܐ ܕܐܲܪܥܵܐ: ܠܲܡܨܲܠܵܝܘܼ ܩܕܼܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.
[
22
]
ܘܲܥܒܲܕܼܘ
ܥܹܐܕܼܵܐ ܕܦܲܛܝܼܪܹ̈ܐ ܫܲܒ̣ܥܵܐ ܝܵܘ̈ܡܝܼܢ ܒܚܲܕܼܘܼܬ̣ܵܐ ܡܸܛܠ ܕܚܲܕ̇ܝܼ ܐܸܢܘܿܢ ܡܵܪܝܵܐ. ܘܐܲܗ̣ܦܲܟ ܠܸܒܵܐ ܕܡܲܠܟܵܐ ܕܐܵܬ̣ܘܿܪ ܠܘܵܬ̣ܗܘܿܢ: ܠܲܡܚܲܙܵܩܘܼ ܐܝܼܕܲܝ̈ܗܘܿܢ ܒܲܥܒ̣ܵܕܼܵܐ ܕܒܲܝܬܹ̇ܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.
Top