|
|
| [1]Jacob quoque abiit itinere quo cœperat: fueruntque ei obviam angeli Dei. |
[No book] |
| [2]Quos cum vidisset, ait: Castra Dei sunt hæc: et appellavit nomen loci illius Mahanaim, id est, Castra. |
[No book] |
| [3]Misit autem et nuntios ante se ad Esau fratrem suum in terram Seir, in regionem Edom: |
[No book] |
| [4]præcepitque eis, dicens: Sic loquimini domino meo Esau: Hæc dicit frater tuus Jacob: Apud Laban peregrinatus sum, et fui usque in præsentem diem. |
[No book] |
| [5]Habeo boves, et asinos, et oves, et servos, et ancillas: mittoque nunc legationem ad dominum meum, ut inveniam gratiam in conspectu tuo. |
[No book] |
| [6]Reversique sunt nuntii ad Jacob, dicentes: Venimus ad Esau fratrem tuum, et ecce properat tibi in occursum cum quadringentis viris. |
[No book] |
| [7]Timuit Jacob valde: et perterritus divisit populum qui secum erat, greges quoque et oves, et boves, et camelos, in duas turmas, |
[No book] |
| [8]dicens: Si venerit Esau ad unam turmam, et percusserit eam, alia turma, quæ relicta est, salvabitur. |
[No book] |
| [9]Dixitque Jacob: Deus patris mei Abraham, et Deus patris mei Isaac: Domine qui dixisti mihi: Revertere in terram tuam, et in locum nativitatis tuæ, et benefaciam tibi: |
[No book] |
| [10]minor sum cunctis miserationibus tuis, et veritate tua quam explevisti servo tuo. In baculo meo transivi Jordanem istum: et nunc cum duabus turmis regredior. |
[No book] |
| [11]Erue me de manu fratris mei Esau, quia valde eum timeo: ne forte veniens percutiat matrem cum filiis. |
[No book] |
| [12]Tu locutus es quod benefaceres mihi, et dilatares semen meum sicut arenam maris, quæ præ multitudine numerari non potest. |
[No book] |
| [13]Cumque dormisset ibi nocte illa, separavit de his quæ habebat, munera Esau fratri suo, |
[No book] |
| [14]capras ducentas, hircos viginti, oves ducentas, et arietes viginti, |
[No book] |
| [15]camelos fœtas cum pullis suis triginta, vaccas quadraginta, et tauros viginti, asinas viginti et pullos earum decem. |
[No book] |
| [16]Et misit per manus servorum suorum singulos seorsum greges, dixitque pueris suis: Antecedite me, et sit spatium inter gregem et gregem. |
[No book] |
| [17]Et præcepit priori, dicens: Si obvium habueris fratrem meum Esau, et interrogaverit te: Cujus es? aut, Quo vadis? aut, Cujus sunt ista quæ sequeris? |
[No book] |
| [18]respondebis: Servi tui Jacob, munera misit domino meo Esau, ipse quoque post nos venit. |
[No book] |
| [19]Similiter dedit mandata secundo, et tertio, et cunctis qui sequebantur greges, dicens: Iisdem verbis loquimini ad Esau cum inveneritis eum. |
[No book] |
| [20]Et addetis: Ipse quoque servus tuus Jacob iter nostrum insequitur. Dixit enim: Placabo illum muneribus quæ præcedunt, et postea videbo illum: forsitan propitiabitur mihi. |
[No book] |
| [21]Præcesserunt itaque munera ante eum, ipse vero mansit nocte illa in castris. |
[No book] |
| [22]Cumque mature surrexisset, tulit duas uxores suas, et totidem famulas cum undecim filiis, et transivit vadum Jaboc. |
[No book] |
| [23]Traductisque omnibus quæ ad se pertinebant, |
[No book] |
| [24]mansit solus: et ecce vir luctabatur cum eo usque mane. |
[No book] |
| [25]Qui cum videret quod eum superare non posset, tetigit nervum femoris ejus, et statim emarcuit. |
[No book] |
| [26]Dixitque ad eum: Dimitte me: jam enim ascendit aurora. Respondit: Non dimittam te, nisi benedixeris mihi. |
[No book] |
| [27]Ait ergo: Quod nomen est tibi? Respondit: Jacob. |
[No book] |
| [28]At ille: Nequaquam, inquit, Jacob appellabitur nomen tuum, sed Israël: quoniam si contra Deum fortis fuisti, quanto magis contra homines prævalebis? |
[No book] |
| [29]Interrogavit eum Jacob: Dic mihi, quo appellaris nomine? Respondit: Cur quæris nomen meum? Et benedixit ei in eodem loco. |
[No book] |
| [30]Vocavitque Jacob nomen loci illius Phanuel, dicens: Vidi Deum facie ad faciem, et salva facta est anima mea. |
[No book] |
| [31]Ortusque est ei statim sol, postquam transgressus est Phanuel: ipse vero claudicabat pede. |
[No book] |
| [32]Quam ob causam non comedunt nervum filii Israël, qui emarcuit in femore Jacob, usque in præsentem diem: eo quod tetigerit nervum femoris ejus, et obstupuerit. |
[No book] |