|
|
| [No book] |
[1]Ingressus ergo Joseph nuntiavit Pharaoni, dicens: Pater meus et fratres, oves eorum et armenta, et cuncta quæ possident, venerunt de terra Chanaan: et ecce consistunt in terra Gessen. |
| [No book] |
[2]Extremos quoque fratrum suorum quinque viros constituit coram rege: |
| [No book] |
[3]quos ille interrogavit: Quid habetis operis? Responderunt: Pastores ovium sumus servi tui, et nos et patres nostri. |
| [No book] |
[4]Ad peregrinandum in terra tua venimus: quoniam non est herba gregibus servorum tuorum, ingravescente fame in terra Chanaan: petimusque ut esse nos jubeas servos tuos in terra Gessen. |
| [No book] |
[5]Dixit itaque rex ad Joseph: Pater tuus et fratres tui venerunt ad te. |
| [No book] |
[6]Terra Ægypti in conspectu tuo est: in optimo loco fac eos habitare, et trade eis terram Gessen. Quod si nosti in eis esse viros industrios, constitue illos magistros pecorum meorum. |
| [No book] |
[7]Post hæc introduxit Joseph patrem suum ad regem, et statuit eum coram eo: qui benedicens illi, |
| [No book] |
[8]et interrogatus ab eo: Quot sunt dies annorum vitæ tuæ? |
| [No book] |
[9]respondit: Dies peregrinationis meæ centum triginta annorum sunt, parvi et mali, et non pervenerunt usque ad dies patrum meorum quibus peregrinati sunt. |
| [No book] |
[10]Et benedicto rege, egressus est foras. |
| [No book] |
[11]Joseph vero patri et fratribus suis dedit possessionem in Ægypto in optimo terræ loco, Ramesses, ut præceperat Pharao. |
| [No book] |
[12]Et alebat eos, omnemque domum patris sui, præbens cibaria singulis. |
| [No book] |
[13]In toto enim orbe panis deerat, et oppresserat fames terram, maxime Ægypti et Chanaan. |
| [No book] |
[14]E quibus omnem pecuniam congregavit pro venditione frumenti, et intulit eam in ærarium regis. |
| [No book] |
[15]Cumque defecisset emptoribus pretium, venit cuncta Ægyptus ad Joseph, dicens: Da nobis panes: quare morimur coram te, deficiente pecunia? |
| [No book] |
[16]Quibus ille respondit: Adducite pecora vestra, et dabo vobis pro eis cibos, si pretium non habetis. |
| [No book] |
[17]Quæ cum adduxissent, dedit eis alimenta pro equis, et ovibus, et bobus, et asinis: sustentavitque eos illo anno pro commutatione pecorum. |
| [No book] |
[18]Venerunt quoque anno secundo, et dixerunt ei: Non celabimus dominum nostrum quod deficiente pecunia, pecora simul defecerunt: nec clam te est, quod absque corporibus et terra nihil habeamus. |
| [No book] |
[19]Cur ergo moriemur te vidente? et nos et terra nostra tui erimus: eme nos in servitutem regiam, et præbe semina, ne pereunte cultore redigatur terra in solitudinem. |
| [No book] |
[20]Emit igitur Joseph omnem terram Ægypti, vendentibus singulis possessiones suas præ magnitudine famis. Subjecitque eam Pharaoni, |
| [No book] |
[21]et cunctos populos ejus a novissimis terminis Ægypti usque ad extremos fines ejus, |
| [No book] |
[22]præter terram sacerdotum, quæ a rege tradita fuerat eis: quibus et statuta cibaria ex horreis publicis præbebantur, et idcirco non sunt compulsi vendere possessiones suas. |
| [No book] |
[23]Dixit ergo Joseph ad populos: En ut cernitis, et vos et terram vestram Pharao possidet: accipite semina, et serite agros, |
| [No book] |
[24]ut fruges habere possitis. Quintam partem regi dabitis: quatuor reliquas permitto vobis in sementem, et in cibum familiis et liberis vestris. |
| [No book] |
[25]Qui responderunt: Salus nostra in manu tua est: respiciat nos tantum dominus noster, et læti serviemus regi. |
| [No book] |
[26]Ex eo tempore usque in præsentem diem, in universa terra Ægypti regibus quinta pars solvitur, et factum est quasi in legem, absque terra sacerdotali, quæ libera ab hac conditione fuit. |
| [No book] |
[27]Habitavit ergo Israël in Ægypto, id est, in terra Gessen, et possedit eam: auctusque est, et multiplicatus nimis. |
| [No book] |
[28]Et vixit in ea decem et septem annis: factique sunt omnes dies vitæ illius, centum quadraginta septem annorum. |
| [No book] |
[29]Cumque appropinquare cerneret diem mortis suæ, vocavit filium suum Joseph, et dixit ad eum: Si inveni gratiam in conspectu tuo, pone manum tuam sub femore meo: et facies mihi misericordiam et veritatem, ut non sepelias me in Ægypto: |
| [No book] |
[30]sed dormiam cum patribus meis, et auferas me de terra hac, condasque in sepulchro majorum meorum. Cui respondit Joseph: Ego faciam quod jussisti. |
| [No book] |
[31]Et ille: Jura ergo, inquit, mihi. Quo jurante, adoravit Israël Deum, conversus ad lectuli caput. |