➖ »
«
➖ ➕
Aleppo Codex (~920)
Alep
The Book of Jubilees
Jub(YWO)
←
Genesis
Gen
48
→
[1]ויהי אחרי הדברים האלה ויאמר ליוסף הנה אביך חלה ויקח את שני בניו עמו־את מנשה ואת אפרים [No book]
[2]ויגד ליעקב־ויאמר הנה בנך יוסף בא אליך ויתחזק ישראל וישב על המטה [No book]
[3]ויאמר יעקב אל יוסף אל שדי נראה אלי בלוז בארץ כנען ויברך אתי [No book]
[4]ויאמר אלי הנני מפרך והרביתך ונתתיך לקהל עמים ונתתי את הארץ הזאת לזרעך אחריך־אחזת עולם [No book]
[5]ועתה שני בניך הנולדים לך בארץ מצרים עד באי אליך מצרימה־לי הם אפרים ומנשה־כראובן ושמעון יהיו לי [No book]
[6]ומולדתך אשר הולדת אחריהם לך יהיו על שם אחיהם יקראו בנחלתם [No book]
[7]ואני בבאי מפדן מתה עלי רחל בארץ כנען בדרך בעוד כברת ארץ לבא אפרתה ואקברה שם בדרך אפרת הוא בית לחם [No book]
[8]וירא ישראל את בני יוסף ויאמר מי אלה [No book]
[9]ויאמר יוסף אל אביו בני הם אשר נתן לי אלהים בזה ויאמר קחם נא אלי ואברכם [No book]
[10]ועיני ישראל כבדו מזקן לא יוכל לראות ויגש אתם אליו וישק להם ויחבק להם [No book]
[11]ויאמר ישראל אל יוסף ראה פניך לא פללתי והנה הראה אתי אלהים גם את זרעך [No book]
[12]ויוצא יוסף אתם מעם ברכיו וישתחו לאפיו ארצה [No book]
[13]ויקח יוסף את שניהם־את אפרים בימינו משמאל ישראל ואת מנשה בשמאלו מימין ישראל ויגש אליו [No book]
[14]וישלח ישראל את ימינו וישת על ראש אפרים והוא הצעיר ואת שמאלו על ראש מנשה שכל את ידיו כי מנשה הבכור [No book]
[15]ויברך את יוסף ויאמר האלהים אשר התהלכו אבתי לפניו אברהם ויצחק־האלהים הרעה אתי מעודי עד היום הזה [No book]
[16]המלאך הגאל אתי מכל רע יברך את הנערים ויקרא בהם שמי ושם אבתי אברהם ויצחק וידגו לרב בקרב הארץ [No book]
[17]וירא יוסף כי ישית אביו יד ימינו על ראש אפרים־וירע בעיניו ויתמך יד אביו להסיר אתה מעל ראש אפרים־על ראש מנשה [No book]
[18]ויאמר יוסף אל אביו לא כן אבי כי זה הבכר שים ימינך על ראשו [No book]
[19]וימאן אביו ויאמר ידעתי בני ידעתי־גם הוא יהיה לעם וגם הוא יגדל ואולם אחיו הקטן יגדל ממנו וזרעו יהיה מלא הגוים [No book]
[20]ויברכם ביום ההוא לאמור בך יברך ישראל לאמר ישמך אלהים כאפרים וכמנשה וישם את אפרים לפני מנשה [No book]
[21]ויאמר ישראל אל יוסף הנה אנכי מת והיה אלהים עמכם והשיב אתכם אל ארץ אבתיכם [No book]
[22]ואני נתתי לך שכם אחד־על אחיך אשר לקחתי מיד האמרי בחרבי ובקשתי [No book]
Source: unbound.biola.edu
 Author: Enoch the Prophet
Source: www.YahwehsWord.org
Top