|
|
| [1]ܘܲܗܘ̤ܵܬ̣ ܒܲܫܢܲܬ̣ ܐܲܪܒܲܥܸܣܪܹ̈ܐ ܕܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܣܠܸܩ̣ ܣܲܢܚܸܪܝܼܒ̣ ܡܲܠܟܵܐ ܕܐܵܬ̣ܘܿܪ: ܥܲܠ ܟܠܗܹܝܢ ܡܕ݂ܝܼ̈ܢܵܬ̣ܵܐ ܥܲܫܝܼ̈ܢܵܬ̣ܵܐ ܕܲܝܗܘܼܕ݂ܵܐ. ܘܐܸܚܲܕ݂ ܐܸܢܹܝܢ. |
[No book] |
| [2]ܘܫܲܕܲܪ ܡܲܠܟܵܐ ܕܐܵܬ̣ܘܿܪ ܡ̣ܢ ܠܟ݂ܝܼܫ ܠܪܲܒ̇ ܫܵܩܹ̈ܐ: ܠܘܵܬ̣ ܚܹܙܲܩܝܵܐ ܡܲܠܟܵܐ ܠܐܘܿܪܸܫܠܸܡ: ܒܚܲܝܠܵܐ ܣܲܓ̇ܝܼܵܐܐ. ܘܩܵܡ̣ ܒܡܲܣܲܩܬ̣ܵܐ ܕܝܲܡܬ̣ܵܐ ܥܸܠܵܝܬܵܐ ܕܒ̣ܐܘܼܪܚܵܐ ܕܚܲܩܠܹܗ ܕܩܵܨܪܵܐ. |
[No book] |
| [3]ܘܲܢܦܲܩ̣ ܠܘܵܬܹܗ ܐܹܠܝܵܩܝܼܡ ܒܲܪ ܚܹܠܲܩܝܵܐ ܪܲܒ̇ܒܲܝܬܵܐ: ܘܫܲܒ̣ܢܵܐ ܣܵܦܪܵܐ: ܘܝܘܿܐܵܚ ܒܲܪ ܐܵܣܵܦ ܡܓܲܗܕ݂ܵܢܵܐ. |
[No book] |
| [4]ܘܐܸܡܲܪ ܠܗܘܿܢ ܪܲܒ̇ ܫܵܩܹ̈ܐ: ܐܸܡܲܪܘ ܠܚܹܙܲܩܝܵܐ: ܗܵܟܲܢܵܐ ܐܵܡܲܪ ܡܲܠܟܵܐ ܪܲܒܵܐ ܡܲܠܟܵܐ ܕܐܵܬ̣ܘܿܪ: ܡܵܢܵܐ ܗ̄ܘܼ ܬܘܼܟ݂ܠܵܢܵܐ ܗܵܢܵܐ ܕܐܸܬ̇ܬ̇ܟܸܠܬ̇. |
[No book] |
| [5]ܘܐܸܡܲܪܬ̇ ܕܐܝܼܬ̣ ܒܵܟ݂ ܡܲܡܠܠܵܐ ܕܣܸܦ̈ܘܵܬ̣ܵܐ: ܘܬܲܪܥܝܼܬ̣ܵܐ ܘܓܲܢ̄ܒܵܪܘܼܬ̣ܵܐ ܠܲܩܪܵܒ̣ܵܐ. ܗܵܫܵܐ ܥܲܠ ܡܲܢ̣ܘܼ ܐܸܬ̇ܬ̇ܟܸܠܬ̇: ܕܲܡ̣ܪܲܕ̇ܬ̇ ܥܠܲܝ. |
[No book] |
| [6]ܗܵܐ ܐܸܬ̇ܬ̇ܟܸܠܬ̇ ܥܲܠ ܣܵܡ̇ܟܵܐ ܕܩܲܢܝܵܐ ܪܥܝܼܥܵܐ: ܥܲܠ ܡܸܨܪܵܝܵܐ. ܕܡܵܐ ܕܐܸܣܬ̇ܡܸܟ݂ ܓܲܒ̣ܪܵܐ ܥܠܵܘܗܝ: ܥܵܐܹ̇ܠ ܒܐܝܼܕܹܗ ܘܒ̣ܵܙܲܥ ܠܵܗ̇. ܗܵܟܲܢܵܐ ܗ̄ܘܼ ܦܸܪܥܘܿܢ ܡܲܠܟܵܐ ܕܡܸܨܪܹܝܢ ܠܟ݂ܠ ܕܡܸܬ̇ܬܲܟ݂ܠܝܼܢ ܥܠܵܘܗܝ. |
[No book] |
| [7]ܘܐܸܢ ܬܹܐܡܲܪ ܠܝܼ ܕܥܲܠ ܡܵܪܝܵܐ ܐܲܠܵܗܲܢ ܐܸܬ̇ܬ̇ܟܸܠܢ: ܡܵܢܵܐ ܐܵܘܬܲܪ ܚܹܙܲܩܝܵܐ ܕܐܲܥܒܲܪ ܥܠܵـ̈ـܘܵܬ̣ܵܐ ܘܡܲܕ݂ܒ̇ܚܹ̈ܐ ܘܐܸܡܲܪ ܠܲܝܗܘܼܕ݂ܵܐ ܘܠܐܘܿܪܸܫܠܸܡ: ܕܲܩܕ݂ܵܡ ܡܲܕ݂ܒ̇ܚܵܐ ܚܲܕ݂ ܬܸܣܓ̇ܕ݂ܘܼܢ. |
[No book] |
| [8]ܘܗܵܫܵܐ ܐܸܬ̣ܚܲܠܲܛ ܥܲܡ ܡܵܪܝ ܡܲܠܟܵܐ ܐܵܬ̣ܘܿܪܵܝܵܐ. ܘܐܸܬܸ̇ܠ ܠܵܟ݂ ܬܪܹܝܢ ܐܲܠܦ̈ܝܼܢ ܪ̈ܲܟ݂ܫܵܐ: ܐܸܢ ܐܝܼܬ̣ ܠܵܟ݂ ܦܲܪ̈ܵܫܹܐ ܕܬܲܪܟܸ̇ܒ̣ ܥܠܲܝܗܘܿܢ. |
[No book] |
| [9]ܘܐܲܝܟܲܢܵܐ ܡܲܗܦܸܟ݂ ܐܲܢ̄ܬ̇ ܐܲܦܹ̈ܐ ܕܚܲܕ݂ ܡ̣ܢ ܥܲܒ̣ܕܵܘ̈ܗܝ ܙܥܘܿܪܹ̈ܐ ܕܡܵܪܝ. ܘܐܸܬ̇ܬ̇ܟܸܠܬ̇ ܠܵܟ݂ ܥܲܠ ܡܸܨܪܵܝܵܐ: ܕܢܸܬܸ̇ܠ ܠܵܟ݂ ܡܲܪ̈ܟ̇ܒ̣ܵܬ̣ܵܐ ܘܦܲܪ̈ܵܫܹܐ. |
[No book] |
| [10]ܗܵܫܵܐ ܓܹܝܪ ܒܠܥܵܕ݂ ܡ̣ܢ ܡܵܪܝܵܐ ܣܸܠܩܹ̇ܬ̣ ܠܐܲܪܥܵܐ ܗܵܕܹܐ ܠܡܲܚܪܵܒ̣ܘܼܬ̣ܵܗ̇. ܡܵܪܝܵܐ ܗ̄ܘܼ ܐܸܡܲܪ ܠܝܼ ܕܐܸܣܲܩ ܥܲܠ ܐܲܪܥܵܐ ܗܵܕܹܐ ܘܐܸܚ̱ܪܒ̣ܝܼܗ̇. |
[No book] |
| [11]ܘܐܸܡܲܪ ܐܸܠܝܵܩܝܼܡ ܘܫܲܒ̣ܢܵܐ ܘܝܘܿܐܵܚ ܠܪܲܒ̇ ܫܵܩܹ̈ܐ: ܡܲܠܸܠ ܥܲܡ ܥܲܒ̣ܕܲܝ̈ܟ ܐܲܪܡܵܐܝܼܬ̣ ܡܸܛܠ ܕܫܵܡ̇ܥܝܼܢ ܚ̄ܢܲܢ. ܘܠܵܐ ܬܡܲܠܸܠ ܥܲܡܲܢ ܝܗ̄ܘܼܕ݂ܵܐܝܼܬ̣ ܩܕ݂ܵܡ ܥܲܡܵܐ ܕܩܵܝ̇ܡܝܼܢ ܥܲܠ ܫܘܼܪܵܐ. |
[No book] |
| [12]ܘܐܸܡܲܪ ܠܗܘܿܢ ܪܲܒ̇ ܫܵܩܹ̈ܐ: ܠܵܐ ܗ̄ܘܼܵܐ ܠܘܵܬ̣ܟ݂ܘܿܢ ܘܲܠܘܵܬ̣ ܡܵܪܟ݂ܘܿܢ: ܫܲܕ̇ܪܲܢܝ ܡܵܪܝ ܠܡܹܐܡܲܪ ܡܸܠܹ̈ܐ ܗܵܠܹܝܢ: ܐܸܠܵܐ ܠܓܲܒ̣ܪܹ̈ܐ ܕܝܵܬ̣ܒ̇ܝܼܢ. ܥܲܠ ܫܘܼܪܵܐ: ܕܠܵܐ ܢܹܐܟ݂ܠܘܼܢ ܬܸܒ̣ܬ̇ܗܘܿܢ: ܘܢܸܫܬ̇ܘܿܢ ܬܝܼܢܲܝ̈ܗܘܿܢ ܥܲܡܟ݂ܘܿܢ. |
[No book] |
| [13]ܘܩܵܡ̣ ܪܲܒ̇ ܫܵܩܹ̈ܐ. ܘܲܩܪܵܐ ܒܩܵܠܵܐ ܪܵܡܵܐ ܝܗ̄ܘܼܕ݂ܵܐܝܼܬ̣: ܘܐܸܡܲܪ ܫܡܲܥܘ ܡܸܠܵܘ̈ܗܝ ܕܡܲܠܟܵܐ ܪܲܒܵܐ ܡܲܠܟܵܐ ܕܐܵܬ̣ܘܿܪ. |
[No book] |
| [14]ܗܵܟܲܢܵܐ ܐܵܡܲܪ ܡܲܠܟܵܐ ܕܐܵܬ̣ܘܿܪ: ܠܵܐ ܢܲܛܥܹܝܟ݂ܘܿܢ ܚܹܙܲܩܝܵܐ: ܡܸܛܠ ܕܠܵܐ ܡܸܫܟܲܚ ܠܲܡܦܲܨܵܝܘܼܬ̣ܟ݂ܘܿܢ. |
[No book] |
| [15]ܘܠܵܐ ܢܲܬ̣ܟܸ̇ܠܟ݂ܘܿܢ ܚܹܙܲܩܝܵܐ ܥܲܠ ܡܵܪܝܵܐ. ܘܢܹܐܡܲܪ ܕܲܡܦܲܨܵܝܘܼ ܡܦܲܨܹܐ ܠܲܢ ܡܵܪܝܵܐ: ܘܠܵܐ ܡܸܫܬܲܠܡܵܐ ܩܪܝܼܬ̣ܵܐ ܗܵܕܹܐ ܒܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ. |
[No book] |
| [16]ܠܵܐ ܬܸܫ̱ܡܥܘܼܢ ܠܚܹܙܲܩܝܵܐ. ܡܸܛܠ ܕܗܵܟܲܢܵܐ ܐܵܡܲܪ ܡܲܠܟܵܐ ܕܐܵܬ̣ܘܿܪ: ܥܒܸܕ݂ܘ ܥܲܡܝ ܒܘܼܪܟ̇ܬ̣ܵܐ: ܘܦܘܿܩܘ ܠܘܵܬ̣ܝ ܘܐܲܟ݂ܘܿܠܘ ܐ̄ܢܵܫ ܓܘܼܦܢܵܘ̈ܗܝ: ܘܐ̄ܢܵܫ ܬܹܐܢܵܘ̈ܗܝ ܘܐܸܫܬܵܘ ܐ̄ܢܵܫ ܡܲـ̈ـܝܵܐ ܕܓ̣ܘܼܒܹ̇ܗ. |
[No book] |
| [17]ܥܲܕ݂ ܐܹܬܹܐ ܘܐܸܕ݂ܒܲܪܟ݂ܘܿܢ ܠܐܲܪܥܵܐ ܕܐܲܝܟ݂ ܐܲܪܥ̱ܟ݂ܘܿܢ: ܐܲܪܥܵܐ ܕܲܥܒ̣ܘܼܪܵܐ ܘܲܕ݂ܡܸܫܚܵܐ: ܐܲܪܥܵܐ ܕܙܲܝ̈ܬܹ̇ܐ ܘܲܕ݂ܟܲܪ̈ܡܹܐ. |
[No book] |
| [18]ܠܵܐ ܢܲܛܥܹܝܟ݂ܘܿܢ ܚܹܙܲܩܝܵܐ ܘܢܹܐܡܲܪ ܕܡܵܪܝܵܐ ܡܦܲܨܹܐ ܠܲܢ. ܕܲܠܡܵܐ ܦܲܨܝܼܘ ܐܲܠܵܗܲܝ̈ܗܘܿܢ ܕܥܲܡܡܹ̈ܐ: ܐ̄ܢܵܫ ܐܲܪܥܹܗ ܡ̣ܢ ܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ. |
[No book] |
| [19]ܐܲܝܟܵܐ ܐܸܢܘܿܢ ܐܲܠܵܗܹ̈ܐ ܕܲܚܡܵܬ̣ ܘܕܲܪܦܵܕ݂ ܘܐܲܝܟܵܐ ܐܸܢܘܿܢ ܐܲܠܵܗܹ̈ܐ ܕܲܣܦܲܪܘܹܝܡ ܕܲܠܡܵܐ ܦܲܨܝܼܘ ܠܫܵܡܪܹܝܢ ܡ̣ܢ ܐܝܼܕܲܝ̈. |
[No book] |
| [20]ܡܲܢ ܡ̣ܢ ܟܠܗܘܿܢ ܐܲܠܵܗܹ̈ܐ ܕܐܲܪ̈ܥܵܬ̣ܵܐ ܗܵܠܹܝܢ ܦܲܨܝܼ ܐܲܪܥܹܗ ܡ̣ܢ ܐܝܼܕܲܝ̈: ܕܲܡܦܲܨܹܐ ܡܵܪܝܵܐ ܠܐܘܿܪܸܫܠܸܡ ܡ̣ܢ ܐܝܼ̈ܕܲܝ. |
[No book] |
| [21]ܘܲܫܬܸܒ̣ܩ ܠܗܘܿܢ: ܘܐ̄ܢܵܫ ܠܵܐ ܝܲܗ̄ܒ̣ ܠܹܗ ܦܸܬ̣ܓ̣ܵܡ. ܡܸܛܠ ܕܲܦ̣ܩܲܕ݂ ܡܲܠܟܵܐ ܘܐܸܡܲܪ: ܠܵܐ ܬܸܬ̇ܠܘܼܢ ܒܹܗ ܦܸܬ̣ܓ̣ܵܡܵܐ. |
[No book] |
| [22]ܘܐܸܬ̣ܵܐ ܐܹܠܝܵܩܝܼܡ ܒܲܪ ܚܹܠܲܩܝܵܐ ܪܲܒ̇ܒܲܝܬܵܐ: ܘܫܲܒ̣ܢܵܐ ܣܵܦܪܵܐ: ܘܝܘܿܐܵܚ ܒܲܪ ܐܵܣܵܦ ܡܥܲܗܕ݂ܵܢܵܐ: ܠܘܵܬ̣ ܚܹܙܲܩܝܵܐ ܟܲܕ݂ ܡܨܲܪܹܝܢ ܢܲܚܬܲܝ̈ܗܘܿܢ ܘܚܵܘܝܘܼܗܝ ܡܸܠܵܘ̈ܗܝ ܕܪܲܒ̇ ܫܵܩܹ̈ܐ. |
[No book] |