➖ »
«
➖ ➕
Peshitta OT
PesOT
The Second Book of Clement
2Clem
←
Isaiah
Isa
59
→
[1]ܗܵܐ ܠܵܐ ܙܥܘܿܪܝܵܐ ܐܝܼܕܹܗ ܕܡܵܪܝܵܐ ܠܡܸܦܪܲܩ ܘܠܵܐ ܝܲܩܝܼܪܵܐ ܐܸܕ݂ܢܹܗ ܠܡܸܫܡܲܥ. [No book]
[2]ܐܸܠܵܐ ܚܵܘ̈ܒܲܝܟ̇ܘܿܢ ܗ̄ܘܼ ܦܪܲܫ̣ܘ ܒܲܝܢܲܝܟ̇ܘܿܢ ܠܐܲܠܵܗܟ݂ܘܿܢ ܘܲܚܛܵܗܲܝ̈ܟ̇ܘܿܢ ܐܲܗܦܸܟ݂ܘ ܐܲܦܵܘ̈ܗܝ ܡܸܢܟ݂ܘܿܢ ܕܠܵܐ ܢܸܫܡܲܥ. [No book]
[3]ܡܸܛܠ ܕܐܝܼܕܲܝ̈ܟ̇ܘܿܢ ܡܛܲܢ̈ܦܵܢ ܒܲܕ݂ܡܵܐ: ܘܨܸܒ̣̈ܥܵܬ̣ܟ݂ܘܿܢ ܒܥܵܘܼܠܵܐ ܘܣܸܦ̈ܘܵܬ̣ܟ݂ܘܿܢ ܡܡܲܠ̈ܠܵܢ ܫܘܼܩܪܵܐ. ܘܠܸܫܵܢܟ݂ܘܿܢ ܪܵܢܹ̇ܐ ܒܥܵܘܼܠܵܐ. [No book]
[4]ܘܠܲܝܬ̇ ܕܩܵܪܹܐ ܒܙܲܕ̇ܝܼܩܘܼܬ̣ܵܐ ܘܠܲܝܬ̇ ܕܕ݂ܵܐܹ̇ܢ ܒܗܲܝܡܢܘܼܬ̣ܵܐ ܐܸܬ̇ܬ̇ܟܸܠܘ ܥܲܠ ܣܪܝܼܩܘܼܬ̣ܵܐ: ܘܡܲܠܸܠ̣ܘ ܪܲܝܩܵܢܘܼܬ̣ܵܐ ܒܛܸܢܘ ܥܸܬܵܐ: ܘܝܼܠܸܕ݂ ܟܹܐܒܹ̈ܐ. [No book]
[5]ܒ̈ܢܵܬ̣ܵܐ ܕܚܲܪܡܵܢܵܐ ܐܲܦܲܥܘ ܘܢܵܘܠܵܐ ܕܲܓ̣ܘܵܓܲܝ ܙܩܲܪܘ. ܕܐܵܟܸ̇ܠ ܡ̣ܢ ܒ̈ܢܵܬ̣ܗܘܿܢ: ܢܡܘܼܬ̣ ܘܲܕ̇ܬܲܒ̣ܪܵܗ̇: ܡܸܫܟܲܚ ܫܲܥܛܵܐ. [No book]
[6]ܢܵܘܠܗܘܿܢ ܠܵܐ ܢܸܗܘܹܐ ܠܲܠܒ̣ܘܼܫܵܐ. ܘܠܵܐ ܢܸܬ̣ܟܲܣܘܿܢ ܒܲܥܒ̣ܵܕܲܝ̈ܗܘܿܢ ܥܒ̣ܵܕܲܝ̈ܗܘܿܢ ܥܒ̣ܵܕܹ̈ܐ ܐܸܢܘܿܢ ܕܥܸܬܵܐ. ܘܲܥܒ̣ܵܕܹ̈ܐ ܕܥܵܘܼܠܵܐ ܒܐܝܼܕܲܝ̈ܗܘܿܢ. [No book]
[7]ܪܸ̈ܓ̣ܠܲܝܗܘܿܢ ܪ̈ܵܗܛܢ ܠܒ̣ܝܼܫܬܵܐ. ܘܡܸܣܬܲܪܗܒ̣ܝܼܢ ܠܡܹܐܫܲܕ݂ ܕܡܵܐ ܙܟܵܝܵܐ. ܬܲܪ̈ܥܝܵܬ̣ܗܘܿܢ ܬܲܪ̈ܥܝܵܬ̣ܵܐ ܐܸܢܹܝܢ ܕܥܸܬܵܐ. ܘܒܸܙܬ̣ܵܐ ܘܲܬ̣ܒ̣ܵܪܵܐ ܒܲܫܒ̣ܝܼ̈ܠܲܝܗܘܿܢ. [No book]
[8]ܐܘܼܪܚܵܐ ܕܲܫܠܵܡܵܐ ܠܵܐ ܝܼܕܲܥܘ ܘܠܲܝܬ̇ ܕܝܼܢܵܐ ܒܗܲܠ̈ܟ݂ܵܬ̣ܗܘܿܢ ܫܒ̣ܝܼ̈ܠܲܝܗܘܿܢ ܡܥܲܩܡܝܼܢ. ܘܟ݂ܠ ܕܲܡܗܲܠܸܟ݂ ܒܗܘܿܢ: ܠܵܐ ܝܵܕܲܥ ܫܠܵܡܵܐ. [No book]
[9]ܡܸܛܠ ܗܵܢܵܐ ܐܸܬ̣ܪܲܚܲܩ ܡܸܢܲܢ ܕܝܼܢܵܐ. ܘܙܲܕ̇ܝܼܩܘܼܬ̣ܵܐ ܠܵܐ ܬܸܕ݂ܪ̱ܟܲܢ ܣܲܟ̇ܝܼܢ ܠܢܘܼܗܪܵܐ: ܘܲܗܘ̤ܵܐ ܚܸܫܘܿܟ݂ܵܐ ܘܲܠܙܲܗܪܵܐ ܘܲܒ̣ܥܲܡܛܵܢܵܐ ܗܲܠܸܟ݂ܢ. [No book]
[10]ܡܵܫܢ ܐܸܣܬ̣ܵܐ ܐܲܝܟ݂ ܥܘܝܼܪܹ̈ܐ. ܘܡܵܫ̄ܢ ܐܲܝܟ݂ ܗܵܢ̇ܘܿܢ ܕܠܲܝܬ̇ ܠܗܘܿܢ ܥܲܝܢܹ̈ܐ ܐܸܬ̇ܬܲܩܲܠܢ ܒܛܲܗܪܵܐ ܐܲܝܟ݂ ܕܲܒ̣ܪܲܡܫܵܐ. ܘܐܸܬ̇ܬܲܢܲܚ̄ܢ ܐܲܝܟ݂ ܗܵܢ̇ܘܿܢ ܕܩܲܪܝܼܒ̣ܝܼܢ ܠܵܡܡܵܬ̣. [No book]
[11]ܢܲܗܸܡ̄ܢ ܟܠܲܢ ܐܲܝܟ݂ ܕܸܒܹ̇ܐ ܘܐܲܝܟ݂ ܝܵܘܢܹ̈ܐ ܢܲܗܸܡ̄ܢ ܣܲܟ̇ܝܼܢ ܠܕ݂ܝܼܢܵܐ: ܘܠܲܝܬ̇ ܘܲܠܦܘܼܪܩܵܢܵܐ: ܘܐܸܬ̣ܪܲܚܲܩ ܡܸܢܲܢ. [No book]
[12]ܡܸܛܠ ܕܲܣܓܝܼ ܥܵܘܼܠܲܢ ܩܕ݂ܵܡܲܝܟ: ܘܲܚܛܵܗܲܝ̈ܢ ܣܲܗܕ̇ܘܼܢ ܡܸܛܠ ܕܥܵܘܼܠܲܢ ܥܲܡܲܢ ܗ̄ܘܼ. ܘܲܚܛܵܗܲܝ̈ܢ ܝܼܕ݂ܝܼܥܝܼܢ ܐܸܢܘܿܢ. [No book]
[13]ܐܲܥܠܝܼܢ ܘܕܲܓܸ̇ܠܢ ܒܡܵܪܝܵܐ ܘܲܗܦܲܟ݂ܢ ܡ̣ܢ ܒܵܬ̣ܪܹܗ ܕܐܲܠܵܗܲܢ. ܡܲܠܸܠ̣ܢ ܛܠܘܼܡܝܵܐ ܘܲܡ̣ܪܲܕ݂ܢ. ܒܛܸܢ̄ܢ: ܘܲܪܢܲܝܢ ܡ̣ܢ ܠܸܒܲܢ ܡܸܠܹ̈ܐ ܕܫܘܼܩܪܵܐ. [No book]
[14]ܐܲܗ̣ܦܸܟ݂ܢ ܕܝܼܢܵܐ ܠܒܸܣܬܪܹܗ: ܘܙܲܕ̇ܝܼܩܘܼܬ̣ܵܐ ܐܲܩܝܼܡ̄ܢ ܒܪܘܼܚܩܵܐ ܡܸܛܠ ܕܐܸܬ̇ܬ̇ܩܸܠ ܩܘܼܫܬܵܐ ܒܲܪܘܲܚܬ̣ܵܐ. ܘܡܲܟ̇ܣܵܢܘܼܬ̣ܵܐ ܠܵܐ ܡܸܫܟ̇ܚܵܐ ܠܡܹܐܬ̣ܵܐ. [No book]
[15]ܘܲܗܘ̤ܵܐ ܩܘܼܫܬܵܐ ܒܟܸܣܝܵܐ. ܘܲܥܒܲܪ ܣܘܼܟܵܠܵܐ ܡ̣ܢ ܪܸܥܝܵܢܲܢ. ܘܲܚܙ̣ܵܐ ܡܵܪܝܵܐ ܕܠܲܝܬ̇ ܕܝܼܢܵܐ: ܘܐܸܬ̣ܒ̇ܐܸܫ ܒܥܲܝܢܵܘ̈ܗܝ. [No book]
[16]ܘܲܚܙ̣ܵܐ ܕܠܲܝܬ̇ ܐ̄ܢܵܫ. ܘܐܸܬ̇ܕܲܡܲܪ ܕܠܲܝܬ̇ ܕܲܡܥܲܕܲܪ. ܘܦܲܪܩܹܗ ܕܪܵܥܹܗ ܘܙܲܕ̇ܝܼܩܘܼܬܹܗ ܗ̤ܝ ܣܡܲܟ݂ܬܹܗ. [No book]
[17]ܠܒܸܫ ܙܲܕ̇ܝܼܩܘܼܬ̣ܵܐ ܐܲܝܟ݂ ܫܸܪܝܵܢܵܐ: ܘܣܲܢܘܲܪܬ̣ܵܐ ܕܦܘܼܪܩܵܢܵܐ ܒܪܹܫܹܗ. ܘܲܠܒܸܫ ܠܒ̣ܘܼܫܵܐ ܕܦܘܼܪܥܵܢܵܐ. [No book]
[18]ܕܢܸܬ̇ܬܲܒܲܥ ܡ̣ܢ ܣܵܢܐܵܘ̈ܗܝ: ܘܢܸܦܪܘܿܥ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ ܘܲܠܓ̣ܵܙܪ̈ܵܬ̣ܵܐ ܢܸܦܪܘܿܥ ܦܘܼܪܥܵܢܵܐ. [No book]
[19]ܢܸܕ݂ܚ̄ܠܘܼܢ ܡ̣ܢ ܡܲܥ̱ܪܒ̣ܵܐ ܠܲܫܡܹܗ ܕܡܵܪܝܵܐ. ܘܡ̣ܢ ܡܲܕ݂ܢܵܚܲܝ̈ ܫܸܡܫܵܐ ܠܐܝܼܩܵܪܹܗ. ܡܸܛܠ ܕܢܹܐܬܹܐ ܐܵܠܘܿܨܵܐ ܢܲܗܪܵܐ ܘܪܘܼܚܹܗ ܕܡܵܪܝܵܐ ܬܡܲܟ̇ܟ݂ܝܼܘܗܝ. [No book]
[20]ܘܢܹܐܬܹܐ ܠܨܸܗܝܘܿܢ ܦܵܪܘܿܩܵܐ: ܘܐܲܝܠܹܝܢ ܕܡܲܦܢܹܝܢ ܥܵܘܼܠܵܐ ܡ̣ܢ ܝܲܥܩܘܿܒ̣: ܐܵܡܲܪ ܡܵܪܝܵܐ. [No book]
[21]ܘܐܸܢܵܐ ܗܵܢܵܘ ܩܝܵܡܝ ܕܥܲܡܟ݂ܘܿܢ: ܐܵܡܲܪ ܡܵܪܝܵܐ: ܪܘܼܚܝ ܕܲܥܠܲܝܟ ܘܡܸܠܲܝ̈ ܕܣܵܡܹ̇ܬ̣ ܒܦܘܼܡܵܟ݂: ܠܵܐ ܢܸܥܢ̈ܕ݂ܵܢ ܡ̣ܢ ܦܘܼܡܵܟ݂ ܘܡ̣ܢ ܦܘܼܡܹܗ ܕܙܲܪܥܵܟ݂: ܘܡ̣ܢ ܦܘܼܡܵܐ ܕܙܲܪܥܵܐ ܕܙܲܪܥܵܟ݂: ܐܵܡܲܪ ܡܵܪܝܵܐ: ܡ̣ܢ ܗܵܫܵܐ ܘܲܥܕܲܡܵܐ ܠܥܵܠܲܡ. [No book]
Translation: Charles H. Hoole (1885)
Source: www.earlychristianwritings.com
Top