➖ »
«
➖ ➕
Aleppo Codex (~920)
Alep
The Epistle of Barnabas
EpiBar
←
Isaiah
Isa
66
   
[1]כה אמר יהוה השמים כסאי והארץ הדם רגלי אי זה בית אשר תבנו לי ואי זה מקום מנוחתי [No book]
[2]ואת כל אלה ידי עשתה ויהיו כל אלה נאם יהוה ואל זה אביט־אל עני ונכה רוח וחרד על דברי [No book]
[3]שוחט השור מכה איש זובח השה ערף כלב מעלה מנחה דם חזיר מזכיר לבנה מברך און־גם המה בחרו בדרכיהם ובשקוציהם נפשם חפצה [No book]
[4]גם אני אבחר בתעלליהם ומגורתם אביא להם־יען קראתי ואין עונה דברתי ולא שמעו ויעשו הרע בעיני ובאשר לא חפצתי בחרו [No book]
[5]שמעו דבר יהוה החרדים אל דברו אמרו אחיכם שנאיכם מנדיכם למען שמי יכבד יהוה־ונראה בשמחתכם והם יבשו [No book]
[6]קול שאון מעיר קול מהיכל קול יהוה משלם גמול לאיביו [No book]
[7]בטרם תחיל ילדה בטרם יבוא חבל לה והמליטה זכר [No book]
[8]מי שמע כזאת מי ראה כאלה־היוחל ארץ ביום אחד אם יולד גוי פעם אחת כי חלה גם ילדה ציון את בניה [No book]
[9]האני אשביר ולא אוליד יאמר יהוה אם אני המוליד ועצרתי אמר אלהיך [No book]
[10]שמחו את ירושלם וגילו בה כל אהביה שישו אתה משוש כל המתאבלים עליה [No book]
[11]למען תינקו ושבעתם משד תנחמיה למען תמצו והתענגתם מזיז כבודה [No book]
[12]כי כה אמר יהוה הנני נטה אליה כנהר שלום וכנחל שוטף כבוד גוים־וינקתם על צד תנשאו ועל ברכים תשעשעו [No book]
[13]כאיש אשר אמו תנחמנו־כן אנכי אנחמכם ובירושלם תנחמו [No book]
[14]וראיתם ושש לבכם ועצמותיכם כדשא תפרחנה ונודעה יד יהוה את עבדיו וזעם את איביו [No book]
[15]כי הנה יהוה באש יבוא וכסופה מרכבתיו־להשיב בחמה אפו וגערתו בלהבי אש [No book]
[16]כי באש יהוה נשפט ובחרבו את כל בשר ורבו חללי יהוה [No book]
[17]המתקדשים והמטהרים אל הגנות אחר אחד [Q: אחת] בתוך אכלי בשר החזיר והשקץ והעכבר־יחדו יספו נאם יהוה [No book]
[18]ואנכי מעשיהם ומחשבתיהם־באה לקבץ את כל הגוים והלשנות ובאו וראו את כבודי [No book]
[19]ושמתי בהם אות ושלחתי מהם פליטים אל הגוים תרשיש פול ולוד משכי קשת־תבל ויון האיים הרחקים אשר לא שמעו את שמעי ולא ראו את כבודי־והגידו את כבודי בגוים [No book]
[20]והביאו את כל אחיכם מכל הגוים מנחה ליהוה בסוסים וברכב ובצבים ובפרדים ובכרכרות על הר קדשי ירושלם־אמר יהוה כאשר יביאו בני ישראל את המנחה בכלי טהור בית יהוה [No book]
[21]וגם מהם אקח לכהנים ללוים אמר יהוה [No book]
[22]כי כאשר השמים החדשים והארץ החדשה אשר אני עשה עמדים לפני־נאם יהוה כן יעמד זרעכם ושמכם [No book]
[23]והיה מדי חדש בחדשו ומדי שבת בשבתו יבוא כל בשר להשתחות לפני אמר יהוה [No book]
[24]ויצאו וראו־בפגרי האנשים הפשעים בי כי תולעתם לא תמות ואשם לא תכבה והיו דראון לכל בשר [No book]
Source: unbound.biola.edu
 Translation: Charles H. Hoole (1885)
Source: www.earlychristianwritings.com
Top