➖ »
«
➖ ➕
Peshitta OT
PesOT
The First Book of Clement
1Clem
←
Judges
Jdg
10
→
[1]ܘܩܵܡ̣ ܡ̣ܢ ܒܵܬܲܪ ܐܲܒ̣ܝܼܡܲܠܟ ܠܡܸܦܪܲܩ ܠܝܼܣܪܵܝܹܠ: ܬܘܿܠܵܥ ܒܲܪ ܦܘܿܐܵܐ ܒܲܪ ܕܵܕܹܗ: ܓܲܒ̣ܪܵܐ ܡ̣ܢ ܐܝܼܣܵܟ̣ܵܪ: ܘܗ̤ܘ ܝܵܬܹܒ̣ ܗ̄ܘ̣ܵܐ ܒܫܵܡܝܼܪ ܛܘܼܪܵܐ ܕܐܲܦܪܹܝܡ. [No book]
[2]ܘܕܼܵܢ ܠܝܼܣܪܵܝܹܠ ܘܲܬ̣ܠܵܬ̣ ܫܢ̈ܝܼܢ: ܘܡܝܼܬ̣ ܘܐܸܬ̣ܩܒܲܪ ܒܫܵܡܝܼܪ. [No book]
[3]ܘܩܵܡ̣ ܡ̣ܢ ܒܵܬ̣ܪܹܗ ܝܵܐܝܼܪ ܓܸܠܥܵܕܼܵܝܵܐ: ܘܕܼܵܢ ܠܝܼܣܪܵܝܹܠ ܥܸܣܪܝܼܢ ܘܬܲܪܬܹ̇ܝܢ ܫܢ̈ܝܼܢ. [No book]
[4]ܘܲܗܘ̤ܵܘ ܠܹܗ ܬܠܵܬ̣ܝܼܢ ܒܢ̈ܝܼܢ: ܘܲܪܟ̣ܝܼܒ̣ܝܼܢ ܗ̄ܘ̣ܵܘ ܥܲܠ ܬܠܵܬ̣ܝܼܢ ܥܝܼ̈ܠܝܼܢ: ܘܲܬ̣ܠܵܬ̣ܝܼܢ ܩܘܼܪ̈ܝܵܐ ܐܝܼܬ̣ ܗ̄ܘܲܝ̈ ܠܗܘܿܢ: ܘܩܵܪܹܝܢ ܗ̄ܘ̣ܵܘ ܠܗܹܝܢ: ܟܲܦܪ̈ܘܿܢܹܐ ܕܝܵܐܝܼܪ ܥܕܲܡܵܐ ܠܝܵܘܡܵܢܵܐ: ܕܒܲܐܪܥܵܐ ܕܓܸܠܥܵܕܼ. [No book]
[5]ܘܡܝܼܬ̣ ܝܵܐܝܼܪ ܘܐܸܬ̣ܩܒܲܪ ܒܩܲܡܘܿܢ. [No book]
[6]ܘܐܵܘܣܸܦ̣ܘ ܒ̈ܢܲܝ ܝܼܣܪܵܝܹܠ ܠܡܸܥܒܲܕܼ ܕܒ̣ܝܼܫ ܩܕܼܵܡ ܡܵܪܝܵܐ: ܘܲܦܠܲܚ̣ܘ ܠܒܲܥܠܵܐ: ܘܠܐܸܣܬ̇ܪ̈ܵܬ̣ܵܐ: ܘܠܲܐܠܵܗܹ̈ܐ ܕܐܲܕܼܘܿܡ: ܘܠܲܐܠܵܗܹ̈ܐ ܕܨܲܝܕܵܢ: ܘܠܲܐܠܵܗܹ̈ܐ ܕܡܘܼܐܵܒ̣: ܘܠܲܐܠܵܗܹ̈ܐ ܕܲܒ̣̈ܢܲܝ ܥܲܡܘܿܢ: ܘܠܲܐܠܵܗܹ̈ܐ ܕܲܦܠܸܫܬܵܝܹ̈ܐ: ܘܠܲܐܠܵܗܹ̈ܐ ܕܫܲܪܟܵܐ ܕܥܲܡܡܹ̈ܐ: ܘܲܫܒܲܩ̣ܘ ܠܡܵܪܝܵܐ ܘܠܵܐ ܦܲܠܚܘܼܗܝ. [No book]
[7]ܘܐܸܬ̣ܚܲܡܲܬ̣ ܪܘܼܓ̣ܙܹܐ ܕܡܵܪܝܵܐ ܥܲܠ ܝܼܣܪܵܝܹܠ: ܘܐܲܫܠܸܡ ܐܸܢܘܿܢ ܒܐܝܼܕܼܵܐ ܕܲܦܠܸܫܬܵܝܹ̈ܐ: ܘܒ̣ܐܝܼܕܼܵܐ ܕܲܒ̣̈ܢܲܝ ܥܲܡܘܿܢ. [No book]
[8]ܘܲܥܨܵܘ ܘܐܲܠܲܨܘ ܠܲܒ̣̈ܢܲܝ ܝܼܣܪܵܝܹܠ: ܡ̣ܢ ܗܝ̇ ܫܲܢ̄ܬܵܐ ܬܡܵܢܲܥܸܣܪܹ̈ܐ ܫܢ̈ܝܼܢ: ܠܟ̣ܠܗܘܿܢ ܒ̈ܢܲܝ ܝܼܣܪܵܝܹܠ ܕܲܒ̣ܥܸܒ̣ܪܵܐ ܕܝܘܿܪܕ̇ܢܵܢ: ܒܐܲܪܥܵܐ ܕܐܵܡܘܿܪ̈ܵܝܹܐ ܕܲܒ̣ܓܸܠܥܵܕܼ. [No book]
[9]ܘܲܥ̣ܒܲܪܘ ܒ̈ܢܲܝ ܥܲܡܘܿܢ ܝܘܿܪܕ̇ܢܵܢ ܠܡܸܬ̣ܟܲܬܵܫܘܼ ܥܲܡ ܝܼܗܘܼܕܼܵܐ: ܘܐܵܦ ܥܲܡ ܒ̈ܢܲܝ ܐܲܦܪܹܝܡ: ܘܒܸܢܝܵܡܹܝܢ ܘܥܵܩܲܬ̤ ܠܝܼܣܪܵܝܹܠ ܛܵܒ̣. [No book]
[10]ܘܐܲܙܥܸܩܘ ܒ̈ܢܲܝ ܝܼܣܪܵܝܹܠ ܠܘܵܬ̣ ܡܵܪܝܵܐ: ܘܐܵܡ̇ܪܝܼܢ: ܚ̣ܛܲܝܢ ܠܵܟ̣ ܕܲܫܒܲܩ̄ܢ ܠܐܲܠܵܗܲܢ: ܘܲܦ̣ܠܲܚ̄ܢ ܠܒܲܥܠܵܐ. [No book]
[11]ܘܐܸܡܲܪ ܡܵܪܝܵܐ ܠܲܒ̣̈ܢܲܝ ܝܼܣܪܵܝܹܠ: ܠܵܐ ܡܸܨܪ̈ܵܝܹܐ: ܘܡܘܼܐܵܒ̣ܵܝܹ̈ܐ ܘܲܒ̣̈ܢܲܝ ܥܲܡܘܿܢ: ܘܲܦܠܸܫܬܵܝܹ̈ܐ. [No book]
[12]ܘܨܲܝ̈ܕ̇ܢܵܝܹܐ: ܘܲܥܡܵܠܹܝܩ: ܘܥܲܡܘܿܢ ܐܲܠܲܨܟ̣ܘܿܢ: ܘܲܓ̣ܥܲܝܬ̇ܘܿܢ ܠܘܵܬ̣ܝ ܘܲܦܪܲܩܬ̇ܟ̣ܘܿܢ ܡ̣ܢ ܐܝܼܕܲܝ̈ܗܘܿܢ. [No book]
[13]ܘܐܲܢ̄ܬ̇ܘܿܢ ܫܒܲܩ̣ܬ̇ܘܿܢܵܢܝ ܘܲܦܠܲܚܬ̇ܘܿܢ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܡܸܛܠ ܗܵܢܵܐ ܠܵܐ ܐܵܘܣܸܦ ܬܘܼܒ̣ ܕܐܸܦܪܘܿܩܟ̣ܘܿܢ. [No book]
[14]ܙܸܠܘ ܨܲܠܵܘ ܠܘܵܬ̣ ܐܲܠܵܗܹ̈ܐ ܕܲܨܒ̇ܝܼܬ̇ܘܿܢ ܒܗܘܿܢ: ܗܸܢܘܿܢ ܢܸܗܘܘܿܢ ܠܟ̣ܘܿܢ ܦܵܪ̈ܘܿܩܹܐ ܒܙܲܒ̣ܢܵܐ ܕܥܵܒ̣ܬ̣ܟ̣ܘܿܢ. [No book]
[15]ܘܐܸܡܲܪܘ ܒ̈ܢܲܝ ܝܼܣܪܵܝܹܠ ܠܡܵܪܝܵܐ: ܚܛܲܝܢ ܠܵܟ̣: ܐܲܢ̄ܬ̇ ܥܒܸܕܼ ܠܲܢ ܡܸܕܸ̇ܡ ܕܫܲܦܝܼܪ ܒܥܲܝ̈ܢܲܝܟ: ܒܲܠܚܘܿܕܼ ܦܲܨܵܢ ܝܵܘܡܵܢܵܐ. [No book]
[16]ܘܐܲܦܪܸܩ̣ܘ ܒ̈ܢܲܝ ܝܼܣܪܵܝܹܠ ܐܲܠܵܗܹ̈ܐ ܢܘܼܟ̣ܪ̈ܵܝܹܐ ܡ̣ܢ ܒܲܝܢܵܬ̣ܗܘܿܢ: ܘܲܦܠܲܚܘ ܠܡܵܪܝܵܐ: ܡܸܛܠ ܕܐܸܬ̇ܬ̇ܥܝܼܩܲܬ̤ ܢܲܦ̮ܫܹܗ ܕܝܼܣܪܵܝܹܠ. [No book]
[17]ܘܐܸܬ̣ܟܲܢܲܫܘ ܒ̈ܢܲܝ ܥܲܡܘܿܢ ܘܲܫܪܵܘ ܒܓܸܠܥܵܕܼ: ܘܐܸܬ̣ܟܲܢܲܫ̣ܘ ܒ̈ܢܲܝ ܝܼܣܪܵܝܹܠ ܘܲܫܪܵܘ ܒܡܲܨܦܝܵܐ. [No book]
[18]ܘܐܸܡܲܪܘ ܥܲܡܵܐ ܪܵܘ̱ܪ̈ܒ̣ܵܢܲܝ ܓܸܠܥܵܕܼ ܐ̄ܢܵܫ ܠܚܲܒ̣ܪܹܗ: ܐܲܝܢܵܐ ܓܲܒ̣ܪܵܐ ܕܲܢܫܲܪܸܐ ܠܡܸܬ̣ܟܲܬܵܫܘܼ ܥܲܡ ܒ̈ܢܲܝ ܥܲܡܘܿܢ: ܗ̤ܘ ܢܸܗܘܹܐ ܪܹܫܵܐ ܠܟ̣ܠ ܝܵܬ̣ܒܲܝ̈ ܓܸܠܥܵܕܼ. [No book]
Translation: Charles H. Hoole (1885)
Source: www.earlychristianwritings.com
Top