|
|
| [1]וירד שמשון תמנתה וירא אשה בתמנתה מבנות פלשתים |
[No book] |
| [2]ויעל ויגד לאביו ולאמו ויאמר אשה ראיתי בתמנתה מבנות פלשתים ועתה קחו אותה לי לאשה |
[No book] |
| [3]ויאמר לו אביו ואמו האין בבנות אחיך ובכל עמי אשה־כי אתה הולך לקחת אשה מפלשתים הערלים ויאמר שמשון אל אביו אותה קח לי כי היא ישרה בעיני |
[No book] |
| [4]ואביו ואמו לא ידעו כי מיהוה היא־כי תאנה הוא מבקש מפלשתים ובעת ההיא פלשתים משלים בישראל |
[No book] |
| [5]וירד שמשון ואביו ואמו תמנתה ויבאו עד כרמי תמנתה והנה כפיר אריות שאג לקראתו |
[No book] |
| [6]ותצלח עליו רוח יהוה וישסעהו כשסע הגדי ומאומה אין בידו ולא הגיד לאביו ולאמו את אשר עשה |
[No book] |
| [7]וירד וידבר לאשה ותישר בעיני שמשון |
[No book] |
| [8]וישב מימים לקחתה ויסר לראות את מפלת האריה והנה עדת דבורים בגוית האריה ודבש |
[No book] |
| [9]וירדהו אל כפיו וילך הלוך ואכל וילך אל אביו ואל אמו ויתן להם ויאכלו ולא הגיד להם כי מגוית האריה רדה הדבש |
[No book] |
| [10]וירד אביהו אל האשה ויעש שם שמשון משתה כי כן יעשו הבחורים |
[No book] |
| [11]ויהי כראותם אותו ויקחו שלשים מרעים ויהיו אתו |
[No book] |
| [12]ויאמר להם שמשון אחודה נא לכם חידה אם הגד תגידו אותה לי שבעת ימי המשתה ומצאתם־ונתתי לכם שלשים סדינים ושלשים חלפת בגדים |
[No book] |
| [13]ואם לא תוכלו להגיד לי־ונתתם אתם לי שלשים סדינים ושלשים חליפות בגדים ויאמרו לו־חודה חידתך ונשמענה |
[No book] |
| [14]ויאמר להם מהאכל יצא מאכל ומעז יצא מתוק ולא יכלו להגיד החידה שלשת ימים |
[No book] |
| [15]ויהי ביום השביעי ויאמרו לאשת שמשון פתי את אישך ויגד לנו את החידה־פן נשרף אותך ואת בית אביך באש הלירשנו קראתם לנו הלא |
[No book] |
| [16]ותבך אשת שמשון עליו ותאמר רק שנאתני ולא אהבתני־החידה חדת לבני עמי ולי לא הגדתה ויאמר לה הנה לאבי ולאמי לא הגדתי־ולך אגיד |
[No book] |
| [17]ותבך עליו שבעת הימים אשר היה להם המשתה ויהי ביום השביעי ויגד לה כי הציקתהו ותגד החידה לבני עמה |
[No book] |
| [18]ויאמרו לו אנשי העיר ביום השביעי בטרם יבא החרסה מה מתוק מדבש ומה עז מארי ויאמר להם־לולא חרשתם בעגלתי לא מצאתם חידתי |
[No book] |
| [19]ותצלח עליו רוח יהוה וירד אשקלון ויך מהם שלשים איש ויקח את חליצותם ויתן החליפות למגידי החידה ויחר אפו ויעל בית אביהו |
[No book] |
| [20]ותהי אשת שמשון למרעהו אשר רעה לו |
[No book] |