➖ »
«
➖ ➕
Peshitta OT
PesOT
The Second Book of Clement
2Clem
←
Judges
Jdg
17
→
[1]ܘܲܗܘ̤ܵܐ ܓܲܒ̣ܪܵܐ ܚܲܕܼ ܡ̣ܢ ܛܘܼܪܵܐ ܕܐܲܦܪܹܝܡ: ܘܲܫܡܹܗ ܡܝܼܟ̣ܵܐ. [No book]
[2]ܘܐܸܡܲܪ ܠܐܸܡܹܗ: ܐܵܠܹܦ ܘܲܡܵܐܐ ܕܟܸܣܦܵܐ ܕܐܸܬ̣̱ܢܣܸܒ̣ ܠܹܟ̣ܝ. ܘܐܲܢ̄ܬܝ ܝܲܡܝܼܬ̇ܝ ܘܐܵܦ ܐܸܡܲܪܬ̇ܝ ܒܐܸܕܼܢܲܝ̈: ܗܵܘ̇ ܟܸܣܦܵܐ ܐܸܢܵܐ ܢܣܲܒ̣ܬܹܗ ܘܐܸܡܪܲܬ̤ ܐܸܡܹܗ: ܒܪܝܼܟ̣ ܒܹܪܝ ܠܡܵܪܝܵܐ. [No book]
[3]ܘܦܲܢܝܼ ܐܵܠܹܦ ܘܲܡܵܐܐ ܕܟܸܣܦܵܐ ܠܐܸܡܹܗ. ܘܐܸܡܪܲܬ̤ ܐܸܡܹܗ: ܡܩܲܕܵܫܘܼ ܩܲܕ̇ܫܹܬ̣ ܟܸܣܦܵܐ ܠܡܵܪܝܵܐ ܡ̣ܢ ܐܝܼܕܲܝ̈ ܒܹܪܝ: ܕܐܸܥܒܸ̇ܕܼ ܨܲܠܡܵܐ ܓܠܝܼܦܵܐ ܘܲܢܣܝܼܟ̣ܵܐ ܘܗܵܫܵܐ ܦܲܢܵܝܗܝ ܠܝܼ. [No book]
[4]ܘܦܲܢܝܼ ܟܸܣܦܵܐ ܠܐܸܡܹܗ. ܘܢܸܣܒܲܬ̤ ܐܸܡܹܗ ܡܲܐܬܹ̇ܝܢ ܕܟܸܣܦܵܐ ܘܝܸܗ̄ܒܲܬ̤ ܠܩܲܢܝܵܢܵܐ. ܘܲܥܒܲܕܼ ܨܲܠܡܵܐ ܓܠܝܼܦܵܐ ܘܲܢܣܝܼܟ̣ܵܐ: ܘܲܗܘ̤ܵܐ ܒܒܹܝܬ̣ ܡܝܼܟ̣ܵܐ. [No book]
[5]ܘܓܲܒ̣ܪܵܐ ܡܝܼܟ̣ܵܐ ܐܝܼܬ̣ ܗ̄ܘ̣ܵܐ ܠܹܗ ܒܹܝܬ̣ ܐܲܠܵܗܹ̈ܐ: ܘܲܥܒܲܕܼ ܦܕܲܬܵܐ ܘܲܦܪܝܼܣܵܐ: ܘܫܲܡܠܝܼ ܐܝܼܕܼܵܐ ܕܚܲܕܼ ܡ̣ܢ ܒܢܵܘ̈ܗܝ: ܘܲܗܘ̤ܵܐ ܠܹܗ ܟܘܼܡܪܵܐ. [No book]
[6]ܒܝܵܘ̈ܡܵܬ̣ܵܐ ܗܵܢܘܿܢ: ܠܲܝܬ̇ ܗ̄ܘ̣ܵܐ ܡܲܠܟܵܐ ܒܹܝܬ̣ ܝܼܣܪܵܝܹܠ: ܘܟ̣ܠ ܐ̄ܢܵܫ ܡܸܕܸ̇ܡ ܕܫܲܦܝܼܪ ܒܥܲܝܢܵܘ̈ܗܝ ܥܵܒܹܕܼ ܗ̄ܘ̣ܵܐ. [No book]
[7]ܘܲܗܘ̤ܵܐ ܥܠܲܝܡܵܐ ܚܲܕܼ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ: ܘܲܫܡܹܗ ܠܹܘܝܼ: ܘܥܵܡܲܪ ܗ̄ܘ̣ܵܐ ܬܲܡܵܢ. [No book]
[8]ܘܐܸܙܲܠ ܓܲܒ̣ܪܵܐ ܡ̣ܢ ܩܪܝܼܬ̣ܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ: ܠܡܸܥܡܲܪ ܐܲܝܟܵܐ ܕܡܸܫܟܲܚ. ܘܲܡܛ̣ܵܐ ܠܛܘܼܪܵܐ ܕܐܲܦܪܹܝܡ ܥܕܲܡܵܐ ܠܒܹܝܬ̣ ܡܝܼܟ̣ܵܐ: ܠܡܸܣܥܲܪ ܐܘܼܪܚܹܗ. [No book]
[9]ܘܐܸܡܲܪ ܠܹܗ ܡܝܼܟ̣ܵܐ ܐܲܝܡܸܟܵܐ ܐܵܬܹܐ ܐܲܢ̄ܬ̇ ܐܵܡܲܪ ܠܹܗ: ܠܹܘܵܝܵܐ ܐ̄ܢܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ: ܘܐܵܙܹ̇ܠ ܐ̄ܢܵܐ ܠܡܸܥܡܲܪ ܐܲܝܟܵܐ ܕܡܸܫܟܲܚ ܐ̄ܢܵܐ. [No book]
[10]ܐܵܡܲܪ ܠܹܗ ܡܝܼܟ̣ܵܐ: ܬܸܒ̣ ܠܘܵܬ̣ܝ: ܘܲܗ̤ܘܝܼ ܠܝܼ ܐܲܝܟ̣ ܐܲܒ̣ܵܐ ܘܟ̣ܘܼܡܪܵܐ. ܘܐܸܢܵܐ ܐܸܬܸ̇ܠ ܠܵܟ̣ ܥܸܣܪܵܐ ܕܟܸܣܦܵܐ ܠܝܵܘ̈ܡܵܬ̣ܵܐ: ܘܡܵܐܢܲܝ̈ܟ: ܘܬ̣ܘܼܪܣܵܝܵܟ̣. [No book]
[11]ܘܐܸܙܲܠ ܠܹܘܝܼ ܘܐܸܬ̇ܛܦܝܼܣ ܠܡܸܬܲܒ̣ ܥܲܡ ܓܲܒ̣ܪܵܐ: ܘܲܗܘ̤ܵܐ ܠܹܗ ܥܠܲܝܡܵܐ ܐܲܝܟ̣ ܚܲܕܼ ܡ̣ܢ ܒܢܵܘ̈ܗܝ. [No book]
[12]ܘܫܲܡܠܝܼ ܡܝܼܟ̣ܵܐ ܐܝܼܕܹܗ ܕܠܹܘܵܝܵܐ. ܘܲܗܘ̤ܵܐ ܠܹܗ ܟܘܼܡܪܵܐ: ܘܲܗܘ̤ܵܐ ܠܹܗ ܒܒܹܝܬ̣ ܡܝܼܟ̣ܵܐ. [No book]
[13]ܘܐܸܡܲܪ ܡܝܼܟ̣ܵܐ: ܗܵܫܵܐ ܝܸܕܼܥܹ̇ܬ̣ ܕܡܲܛܐܸܒ̣ ܠܝܼ ܡܵܪܝܵܐ: ܕܲܗܘ̤ܵܐ ܠܝܼ ܠܹܘܵܝܵܐ ܟܘܼܡܪܵܐ. [No book]
Translation: Charles H. Hoole (1885)
Source: www.earlychristianwritings.com
Top