➖ »
«
➖ ➕
Peshitta OT
PesOT
The Epistle of Barnabas
EpiBar
←
Judges
Jdg
20
→
[1]ܘܲܢܦܲܩ̣ܘ ܟܠܗܘܿܢ ܒ̈ܢܲܝ ܝܼܣܪܵܝܹܠ: ܘܐܸܬ̣ܟܲܢܲܫ̣ܘ ܟܢܘܼܫܬܵܐ ܐܲܝܟ̣ ܚܲܕܼ ܓܒܲܪ: ܡ̣ܢ ܕܵܢ ܘܲܥܕܲܡܵܐ ܠܒܲܪ ܫܒܲܥ: ܠܐܲܪܥܵܐ ܕܓܸܠܥܵܕܼ ܩܕܼܵܡ ܡܵܪܝܵܐ: ܒܡܲܨܦܝܵܐ. [No book]
[2]ܘܩܵܡ̣ ܫܲܪ̈ܒ̣ܵܬ̣ܵܐ ܕܟ̣ܠܹܗ ܥܲܡܵܐ: ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܒܲܟ̣ܢܘܼܫܬܵܐ ܥܲܡܹܗ ܕܐܲܠܵܗܵܐ: ܐܲܪܒܲܥܡܵܐܐ ܐܲܠܦ̈ܝܼܢ ܪܸ̈ܓ̣ܠܵܝܝܼܢ ܫܵܡ̇ܛܲܝ̈ ܣܲܝܦܵܐ. [No book]
[3]ܘܲܫ̣ܡܲܥܘ ܒ̈ܢܲܝ ܒܸܢܝܵܡܹܝܢ ܕܲܣܠܸܩ̣ܘ ܒ̈ܢܲܝ ܝܼܣܪܵܝܹܠ ܠܡܲܨܦܝܵܐ: ܘܐܸܡܲܪܘ ܒ̈ܢܲܝ ܝܼܣܪܵܝܹܠ: ܐܸܡܲܪܘ ܠܲܢ ܐܲܝܟܲܢܵܐ ܗܘ̤ܵܬ̣ ܒܝܼܫܬܵܐ ܗܵܕܹܐ. [No book]
[4]ܥܢ̣ܵܐ ܠܹܘܝܼ ܒܲܥܠܵܗ̇ ܕܐܲܢ̄ܬ̇ܬ̣ܵܐ ܕܐܸܬ̣ܩܲܛܠܲܬ̤ ܘܐܸܡܲܪ ܠܗܘܿܢ: ܠܲܓܒܲܥ ܕܒܸܢܝܵܡܹܝܢ ܥܸܠܹ̇ܬ̣ ܐܸܢܵܐ ܘܲܕܼܪܘܼܟ̣ܬ̇ܝ ܠܲܡܒ̣ܵܬ̣. [No book]
[5]ܘܩܵܡ̣ܘ ܥܠܲܝ ܡܵܪܹ̈ܝܗ̇ ܕܲܓ̣ܒܲܥ: ܘܐܸܬ̣ܟܲܪܟ̇ܘܼܗܝ ܥܠܲܝ ܒܲܝܬܵܐ ܒܠܸܠܝܵܐ. ܠܝܼ ܒܥܵܘ ܠܡܸܩܛܲܠ: ܘܠܲܕܼܪܘܼܟ̣ܬ̇ܝ ܨܲܥܲܪܘ ܘܡܝܼܬܲܬ̤. [No book]
[6]ܘܐܸܚܲܕ̇ܬܵܗ̇ ܠܲܕܼܪܘܼܟ̣ܬ̇ܝ: ܘܲܦܫܲܚܬܵܗ̇: ܘܲܫܕܹܝܬ̣ܵܗ̇ ܒܟ̣ܠܗܹܝܢ ܚܲܩ̈ܠܵܬ̣ܵܐ ܕܝܵܪܬ̇ܘܼܬ̣ܵܐ ܕܝܼܣܪܵܝܹܠ: ܥܲܠ ܕܲܥ̣ܒܲܕܼܘ ܚܛܝܼܬ̣ܵܐ ܘܥܵܘܼܠܵܐ ܒܝܼܣܪܵܝܹܠ. [No book]
[7]ܗܵܐ ܟܠܟ̣ܘܿܢ ܒ̈ܢܲܝ ܝܼܣܪܵܝܹܠ: ܗܲܒ̣ܘ ܦܸܬ̣ܓ̣ܵܡܵܐ ܘܡܸܠܟܵܐ ܥܲܠ ܗܵܕܹܐ. [No book]
[8]ܘܩܵܡ̣ܘ ܟܠܹܗ ܥܲܡܵܐ ܐܲܝܟ̣ ܓܲܒ̣ܪܵܐ ܚܲܕܼ: ܘܐܵܡ̇ܪܝܼܢ: ܠܵܐ ܐ̄ܢܵܫ ܢܹܐܙܲܠ ܠܡܲܫܟ̇ܢܹܗ: ܘܠܵܐ ܢܸܣܛܹܐ ܐ̄ܢܵܫ ܠܒܲܝܬܹ̇ܗ. [No book]
[9]ܗܵܫܵܐ ܗܵܟܲܢܵܐ ܢܸܥܒܸ̇ܕܼ ܠܵܗ̇ ܠܲܓܒܲܥ: ܢܲܪܡܸܐ ܥܠܹܝܗ̇ ܦܸـ̈ـܨܹܐ. [No book]
[10]ܢܸܕܼܒܲܪ ܥܸܣܪܵܐ ܓܲܒ̣ܪ̈ܝܼܢ ܠܲܡܵܐܐ: ܠܟ̣ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܘܲܡܵܐܐ ܠܐܵܠܹܦ: ܘܐܵܠܹܦ ܠܪܸܒ̇ܘܿ: ܕܢܸܣܒ̣ܘܿܢ ܙܘܵܕܹ̈ܐ ܠܥܲܡܵܐ ܕܥܵܒ̣ܪܝܼܢ: ܕܢܹܐܙܠ̄ܘܿܢ ܥܲܠ ܓܒܲܥ ܕܒܸܢܝܵܡܹܝܢ: ܐܲܝܟ̣ ܟܠܹܗ ܥܵܘܼܠܵܐ ܕܲܥܒܲܕܘ ܒܝܼܣܪܵܝܹܠ. [No book]
[11]ܘܐܸܬ̣ܟܲܢܲܫ̣ܘ ܟܠܗܘܿܢ ܐ̄ܢܵܫܵܐ ܕܝܼܣܪܵܝܹܠ ܥܲܠ ܩܪܝܼܬ̣ܵܐ: ܐܲܝܟ̣ ܓܲܒ̣ܪܵܐ ܚܲܕܼ ܟܲܕܼ ܫܘܹܝܢ. [No book]
[12]ܘܫܲܕܲܪܘ ܟܠܗܘܿܢ ܫܲܒ̣̈ܛܹܐ ܕܲܒ̣̈ܢܲܝ ܝܼܣܪܵܝܹܠ: ܓܲܒ̣ܪܹ̈ܐ ܠܘܵܬ̣ ܟܠܗܘܿܢ ܕܒܹܝܬ̣ ܒܸܢܝܵܡܹܝܢ: ܠܡܹܐܡܲܪ: ܡܲܢܵܐ ܗ̄ܝ̣ ܒܝܼܫܬܵܐ ܗܵܕܹܐ ܕܲܗܘ̤ܵܬ̣ ܠܟ̣ܘܿܢ. [No book]
[13]ܗܵܫܵܐ ܗܲܒ̣ܘ ܓܲܒ̣ܪܹ̈ܐ ܒ̈ܢܲܝ ܥܵܘܼܠܵܐ ܕܐܝܼܬ̣ ܒܲܓܒܲܥ ܢܩܲܛܸܠ ܐܸܢܘܿܢ: ܘܢܲܦܪܸܩ ܒܝܼܫܬܵܐ ܡ̣ܢ ܝܼܣܪܵܝܹܠ. ܘܠܵܐ ܨܒ̣ܵܘ ܒ̈ܢܲܝ ܒܸܢܝܵܡܹܝܢ ܕܢܸܫ̱ܡܥܘܼܢ ܒܩܵܠܵܐ ܕܐܲܚܲܝ̈ܗܘܿܢ: ܒ̈ܢܲܝ ܝܼܣܪܵܝܹܠ. [No book]
[14]ܘܐܸܬ̣ܟܲܢܲܫ̣ܘ ܟܠܗܘܿܢ ܒ̈ܢܲܝ ܒܸܢܝܵܡܹܝܢ ܡ̣ܢ ܩܘܼܪ̈ܝܼܗܘܿܢ ܠܲܓܒܲܥ: ܠܡܸܦܲܩ ܘܲܠܡܸܬ̣ܟܲܬܵܫܘܼ ܥܲܡ ܒ̈ܢܲܝ ܝܼܣܪܵܝܹܠ. [No book]
[15]ܘܐܸܬ̣ܡ̱ܢܝܼܘ ܒ̈ܢܲܝ ܒܸܢܝܵܡܹܝܢ ܒܝܵܘܡܵܐ ܗܵܘ̇ ܡ̣ܢ ܩܘܼܪ̈ܝܵܐ: ܥܸܣܪܝܼܢ ܘܸܫܬܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡ̇ܛܲܝ̈ ܣܲܝܦܵܐ: ܣܛܲܪ ܡ̣ܢ ܝܵܬ̣ܒܲܝ̈ ܓܒܲܥ ܕܐܸܬ̣ܡ̱ܢܝܼܘ ܫܒܲܥܡܵܐܐ ܓܲܒ̣ܪ̈ܝܼܢ. [No book]
[16]ܕܲܦܫܝܼ̈ܠܵܢ ܐܝܼܕܲܝ̈ܗܘܿܢ ܕܝܲܡܝܼܢܵܐ: ܟܠ ܕܫܵܕܹܐ ܒܩܸܠܥܵܐ ܠܥܲܠܥܵܠܵܐ ܘܠܵܐ ܡܦܝܼܫ. [No book]
[17]ܘܓܲܒ̣ܪܹ̈ܐ ܕܝܼܣܪܵܝܹܠ ܐܸܬ̣ܡ̱ܢܝܼܘ ܣܛܲܪ ܡ̣ܢ ܒ̈ܢܲܝ ܒܸܢܝܵܡܹܝܢ: ܐܲܪܒܲܥܡܵܐܐ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡ̇ܛܲܝ̈ ܣܲܝܦܵܐ: ܟܠܗܘܿܢ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ. [No book]
[18]ܘܩܵܡ̣ܘ ܘܲܣܠܸܩܘ ܠܒܹܝܬ̣ ܐܹܝܠ: ܘܲܫܐܸܠ̣ܘ ܒܐܲܠܵܗܵܐ: ܘܐܵܡ̇ܪܝܼܢ ܒ̈ܢܲܝ ܝܼܣܪܵܝܹܠ: ܡܲܢܘܼ ܢܸܣܲܩ ܠܲܢ ܒܪܹܫܵܐ ܠܡܸܬ̣ܟܲܬܵܫܘܼ ܥܲܡ ܒ̈ܢܲܝ ܒܸܢܝܵܡܹܝܢ. ܘܐܸܡܲܪ ܡܵܪܝܵܐ: ܝܼܗܘܼܕܼܵܐ ܒܩܲܕܼܡܵܝܬܵܐ. [No book]
[19]ܘܩܵܡ̣ܘ ܒ̈ܢܲܝ ܝܼܣܪܵܝܹܠ ܒܨܲܦܪܵܐ: ܘܲܫܪܵܘ ܥܲܠ ܓܒܲܥ. [No book]
[20]ܘܲܢܦܲܩ̣ܘ ܒ̈ܢܲܝ ܝܼܣܪܵܝܹܠ ܠܡܸܬ̣ܟܲܬܵܫܘܼ ܥܲܡ ܒ̈ܢܲܝ ܒܸܢܝܵܡܹܝܢ: ܘܲܣܕܲܪܘ ܒ̈ܢܲܝ ܝܼܣܪܵܝܹܠ ܩܪܵܒ̣ܵܐ ܥܲܡܗܘܿܢ ܥܲܠ ܓܒܲܥ. [No book]
[21]ܘܲܢܦܲܩ̣ܘ ܒ̈ܢܲܝ ܒܸܢܝܵܡܹܝܢ ܡ̣ܢ ܓܒܲܥ: ܘܐܸܣܬ̇ܕܲܪܘ ܠܘܼܩܒܲܠ ܝܼܣܪܵܝܹܠ. ܘܐܲܪܡܝܼܘ ܡ̣ܢ ܝܼܣܪܵܝܹܠ ܒܝܵܘܡܵܐ ܗܵܘ̇ ܕܐܲܩ̣ܪܸܒ̣ܘ: ܥܸܣܪܝܼܢ ܘܲܬ̣ܪܹܝܢ ܐܲܠܦ̈ܝܼܢ ܓܲܒ̣ܪ̈ܝܼܢ ܥܲܠ ܐܲܪܥܵܐ. [No book]
[22]ܘܐܸܬ̣ܚܲܝܲܠܘ ܬܘܼܒ̣ ܒ̈ܢܲܝ ܝܼܣܪܵܝܹܠ: ܘܐܵܘܣܸܦ̣ܘ ܠܡܸܣܲܕܲܪ ܩܪܵܒ̣ܵܐ ܒܕܼܘܼܟ̇ܬ̣ܵܐ ܕܲܣܕܲܪܘ ܒܝܵܘܡܵܐ ܩܲܕܼܡܵܝܵܐ. [No book]
[23]ܘܲܣܠܸܩܘ ܒ̈ܢܲܝ ܝܼܣܪܵܝܹܠ: ܘܲܒ̣ܟ̣ܵܘ ܩܕܼܵܡ ܡܵܪܝܵܐ ܥܕܲܡܵܐ ܠܪܲܡܫܵܐ: ܘܲܫܐܸܠ̣ܘ ܒܡܵܪܝܵܐ: ܘܐܵܡ̇ܪܝܼܢ: ܢܵܘܣܸܦ ܬܘܼܒ̣ ܠܡܲܩܪܵܒ̣ܘ ܩܪܵܒ̣ܵܐ ܥܲܡ ܒ̈ܢܲܝ ܒܸܢܝܵܡܹܝܢ ܐܲܚܘܼܢ. ܘܐܸܡܲܪ ܡܵܪܝܵܐ ܣܲܩܘ ܥܠܵܘܗܝ. [No book]
[24]ܘܐܲܩܪܸܒ̣ܘ ܒ̈ܢܲܝ ܝܼܣܪܵܝܹܠ ܥܲܡ ܒ̈ܢܲܝ ܒܸܢܝܵܡܹܝܢ ܠܝܵܘܡܵܐ ܐ̄ܚܪܹܢܵܐ. [No book]
[25]ܘܲܢܦܲܩ̣ܘ ܒ̈ܢܲܝ ܒܸܢܝܵܡܹܝܢ ܠܘܼܩܒܲܠܗܘܿܢ ܡ̣ܢ ܓܒܲܥ ܒܝܵܘܡܵܐ ܕܲܬ̣ܪܹܝܢ. ܘܐܲܪܡܝܼܘ ܬܘܼܒ̣ ܒ̈ܢܲܝ ܒܸܢܝܵܡܹܝܢ ܡ̣ܢ ܝܼܣܪܵܝܹܠ: ܬܡܵܢܬܲܥܣܲܪ ܐܲܠܦ̈ܝܼܢ ܓܲܒ̣ܪ̈ܝܼܢ ܥܲܠ ܐܲܪܥܵܐ: ܟܠܗܘܿܢ ܗܵܠܹܝܢ ܫܵܡ̇ܛܲܝ̈ ܣܲܝܦܵܐ. [No book]
[26]ܘܲܣܠܸܩ̣ܘ ܟܠܗܘܿܢ ܒ̈ܢܲܝ ܝܼܣܪܵܝܹܠ: ܘܟ̣ܠܹܗ ܥܲܡܵܐ. ܘܐܸܬ̣ܵܘ ܠܒܹܝܬ̣ ܐܹܝܠ: ܘܲܒ̣ܟ̣ܵܘ: ܘܝܼܬܸܒ̣ܘ ܬܲܡܵܢ ܩܕܼܵܡ ܡܵܪܝܵܐ: ܘܨܵܡ̣ܘ ܒܝܵܘܡܵܐ ܗܵܘ̇ ܥܕܲܡܵܐ ܠܪܲܡܫܵܐ: ܘܐܲܣܸܩ̣ܘ ܥܠܵـ̈ـܘܵܬ̣ܵܐ ܘܫܲܠܡܹ̈ܐ ܩܕܼܵܡ ܡܵܪܝܵܐ. [No book]
[27]ܘܲܫܐܸܠ̣ܘ ܒ̈ܢܲܝ ܝܼܣܪܵܝܹܠ ܒܡܵܪܝܵܐ: ܘܬܲܡܵܢ ܗܘ̤ܵܬ̣ ܩܹܒ̣ܘܿܬܹܗ ܕܡܵܪܝܵܐ ܒܝܵܘ̈ܡܵܬ̣ܵܐ ܗܵܢܘܿܢ. [No book]
[28]ܘܦܝܼܢܚܸܣ ܒܲܪ ܐܹܠܝܼܥܵܙܲܪ ܒܲܪ ܐܲܗܪܘܿܢ ܟܵܗܢܵܐ: ܩܵܐܹ̇ܡ ܗ̄ܘ̣ܵܐ ܩܕܼܵܡܵܘܗܝ ܒܝܵܘ̈ܡܵܬ̣ܵܐ ܗܵܢܘܿܢ. ܘܐܵܡ̇ܪܝܼܢ ܢܵܘܣܸܦ ܬܘܼܒ̣ ܠܡܸܦܲܩ ܠܲܩܪܵܒ̣ܵܐ ܥܲܠ ܒ̈ܢܲܝ ܒܸܢܝܵܡܹܝܢ ܐܲܚܘܼܢ: ܐܵܘ ܢܸܫܠܸܐ. ܘܐܸܡܲܪ ܡܵܪܝܵܐ ܣܲܩܘ: ܡܸܛܠ ܕܲܡܚܵܪ ܡܲܫܠܸܡ ܐ̄ܢܵܐ ܠܹܗ ܒܐܝܼܕܲܝ̈ܟ̇ܘܿܢ. [No book]
[29]ܘܐܲܟ̣ܡܸܢܘ ܒ̈ܢܲܝ ܝܼܣܪܵܝܹܠ ܟܡܹܐܢܵܐ ܥܲܠ ܓܒܲܥ: ܘܚܲܕܼܪܘܼܗ̇. [No book]
[30]ܘܲܣܠܸܩܘ ܒ̈ܢܲܝ ܝܼܣܪܵܝܹܠ ܥܲܠ ܒ̈ܢܲܝ ܒܸܢܝܵܡܹܝܢ ܒܝܵܘܡܵܐ ܬܠܝܼܬ̣ܵܝܵܐ: ܘܐܸܣܬ̇ܕܲܪܘ ܥܲܠ ܓܒܲܥ ܐܲܝܟ̣ ܕܲܒ̣ܟ̣ܠܙܒܲܢ. [No book]
[31]ܘܲܢܦܲܩ̣ܘ ܒ̈ܢܲܝ ܒܸܢܝܵܡܹܝܢ ܠܐܘܼܪܥܹܗ ܕܥܲܡܵܐ: ܘܐܸܬ̣ܢܲܦܲܨܘ ܡ̣ܢ ܩܪܝܼܬ̣ܵܐ. ܘܫܲܪܝܼܘ ܕܢܲܪܡܘܿܢ ܡ̣ܢ ܥܲܡܵܐ ܩܛ̈ܝܼܠܹܐ: ܐܲܝܟ̣ ܕܲܒ̣ܟ̣ܠܙܒܲܢ: ܒܲܫܒ̣ܝܼܠܵܐ: ܚܲܕܼ ܕܣܵܠܹܩ ܠܲܓܒܲܥ: ܘܚܲܕܼ ܠܒܹܝܬ̣ ܐܹܝܠ ܒܚܲܩܠܵܐ: ܐܲܝܟ̣ ܬܠܵܬ̣ܝܼܢ ܓܲܒ̣ܪ̈ܝܼܢ ܡ̣ܢ ܝܼܣܪܵܝܹܠ. [No book]
[32]ܘܐܸܡܲܪܘ ܒ̈ܢܲܝ ܒܸܢܝܵܡܹܝܢ ܡܸܬ̇ܬܲܒ̣ܪܝܼܢ ܐܸܢܘܿܢ ܡ̣ܢ ܩܕܼܵܡܲܝܢ ܐܲܝܟ̣ ܕܲܒ̣ܩܲܕܼܡܵܝܬܵܐ. ܘܲܒ̣̈ܢܲܝ ܝܼܣܪܵܝܹܠ ܐܸܡܲܪܘ: ܢܸܥܪܘܿܩ ܘܢܲܦܩ ܐܸܢܘܿܢ ܡ̣ܢ ܩܪܝܼܬ̣ܵܐ ܠܲܫܒ̣ܝܼܠܵܐ. [No book]
[33]ܘܟ̣ܠܗܘܿܢ ܒ̈ܢܲܝ ܝܼܣܪܵܝܹܠ ܩܵܡ̣ܘ ܡ̣ܢ ܕܘܼܟ̇ܝܵܬ̣̈ܗܘܿܢ: ܘܐܸܣܬ̇ܕܲܪܘ ܒܲܒ̣ܥܸܠ ܬܵܡܵܪ: ܘܲܟ̣ܡܹܐܢܵܐ ܕܝܼܣܪܵܝܹܠ ܡܕܼܝܼܩ ܗ̄ܘ̣ܵܐ ܡ̣ܢ ܕܘܼܟ̇ܬܹܗ ܡ̣ܢ ܡܥܲܪܬ̣ܵܐ ܕܒܲܓܒܲܥ. [No book]
[34]ܘܐܸܬ̣ܵܘ ܡ̣ܢ ܠܘܼܩܒܲܠ ܓܒܲܥ: ܥܸܣܪܵܐ ܐܲܠܦ̈ܝܼܢ ܓܲܒ̣ܪܹ̈ܐ ܓܒܲـ̈ـܝܵܐ ܡ̣ܢ ܟܠܹܗ ܝܼܣܪܵܝܹܠ: ܘܲܩܪܵܒ̣ܵܐ ܥܫܝܼܢ: ܘܗܸܢܘܿܢ ܠܵܐ ܝܼܕܲܥ̣ܘ ܕܲܡܛܵܬ̤ ܥܠܲܝܗܘܿܢ ܒܝܼܫܬܵܐ. [No book]
[35]ܘܬܲܒ̣ܪܹܗ ܡܵܪܝܵܐ ܠܒܸܢܝܵܡܹܝܢ ܩܕܼܵܡ ܝܼܣܪܵܝܹܠ. ܘܐܲܪܡܝܼܘ ܕܒܹܝܬ̣ ܝܼܣܪܵܝܹܠ ܡ̣ܢ ܕܒܹܝܬ̣ ܒܸܢܝܵܡܹܝܢ ܒܝܵܘܡܵܐ ܗܵܘ̇: ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܡܵܐܐ ܓܲܒ̣ܪ̈ܝܼܢ: ܟܠܗܘܿܢ ܗܵܠܹܝܢ ܫܵܡܛܲܝ̈ ܣܲܝܦܵܐ. [No book]
[36]ܘܲܚܙܵܘ ܒ̈ܢܲܝ ܒܸܢܝܵܡܹܝܢ ܕܐܸܬ̇ܬܲܒܲܪܘ: ܘܝܲܗ̄ܒ̣ܘ ܒ̈ܢܲܝ ܝܼܣܪܵܝܹܠ ܐܲܬ̣ܪܵܐ ܠܓܲܒ̣ܪܹ̈ܐ ܕܒܸܢܝܵܡܹܝܢ: ܡܸܛܠ ܕܐܸܬ̇ܬ̇ܟ̣ܠܘ ܥܲܠ ܡܟܹܐܢܵܐ ܕܐܲܟ̣ܡܸܢ̣ܘ ܥܲܠ ܓܒܲܥ. [No book]
[37]ܘܲܟ̣ܡܹܐܢܵܐ ܪܲܟ̇ܝܼܟ̣ܵܐܝܼܬ̣ ܢܦܲܠ̣ ܥܲܠ ܓܒܲܥ: ܘܗܲܠܸܟ̣ ܟܡܹܐܢܵܐ: ܘܲܡ̣ܚܵܐ ܠܟ̣ܠܵܗ̇ ܩܪܝܼܬ̣ܵܐ ܒܦܘܼܡܵܐ ܕܚܲܪܒܵܐ. [No book]
[38]ܘܘܲܥܕܵܐ ܗܘ̤ܵܐ ܠܓܲܒ̣ܪܹ̈ܐ ܕܝܼܣܪܵܝܹܠ ܥܲܡ ܟܡܹܐܢܵܐ: ܠܡܲܣܵܩܘܼ ܐܸܢܘܿܢ ܐܲܝܟ̣ ܡܲܣܲܩ ܬܸܢܵܢܵܐ ܡ̣ܢ ܩܪܝܼܬ̣ܵܐ. [No book]
[39]ܘܲܗܦܲܟ̣ܘ ܓܲܒ̣ܪܹ̈ܐ ܕܝܼܣܪܵܝܹܠ ܡ̣ܢ ܩܪܵܒ̣ܵܐ: ܘܒܸܢܝܵܡܹܝܢ ܫܲܪܝܼ ܕܢܲܪܡܸܐ ܩܛܝܼܠܹ̈ܐ ܡ̣ܢ ܝܼܣܪܵܝܹܠ ܬܠܵܬ̣ܝܼܢ ܓܲܒ̣ܪ̈ܝܼܢ: ܡܸܛܠ ܕܐܵܡ̇ܪܝܼܢ: ܡܸܬ̇ܬ̇ܒ̣ܵܪܘܿ ܡܸܬ̇ܬܲܒ̣ܪܝܼܢ ܡ̣ܢ ܩܕܼܵܡܲܝܢ ܐܲܝܟ̣ ܕܒܲܩܪܵܒܹܐ ܩܲܕܼܡܵܝܹ̈ܐ. [No book]
[40]ܘܬܸܢܵܢܵܐ ܫܲܪܝܼ ܕܢܸܣܲܩ ܡ̣ܢ ܩܪܝܼܬ̣ܵܐ ܐܲܝܟ̣ ܥܲܡܘܼܕܼܵܐ. ܘܐܸܬ̣ܦܢܝܼܘ ܒ̈ܢܲܝ ܒܸܢܝܵܡܹܝܢ ܠܒܸܣܬܲܪܗܘܿܢ: ܘܗܵܐ ܣܵܠܹܩ ܚܲܝܒ̇ܘܼܪܵܗ̇ ܕܲܩܪܝܼܬ̣ܵܐ ܥܕܲܡܵܐ ܠܲܫܡܲܝܵܐ. [No book]
[41]ܘܓܲܒ̣ܪܹ̈ܐ ܕܝܼܣܪܵܝܹܠ ܗ̣ܦܲܟ̣ܘ ܥܠܲܝܗܘܿܢ. ܘܲܕܼܚܸܠ̣ܘ ܓܲܒ̣ܪܹ̈ܐ ܕܒܸܢܝܵܡܹܝܢ: ܡܸܛܠ ܕܲܚܙ̣ܵܘ ܕܩܸܪܒܲܬ̤ ܥܠܲܝܗܘܿܢ ܒܝܼܫܬܵܐ. [No book]
[42]ܘܲܥܪܲܩ̣ܘ ܡܢ ܩܕܼܵܡ ܒ̈ܢܲܝ ܝܼܣܪܵܝܹܠ ܠܐܘܼܪܚܵܐ ܕܡܲܕܼܒ̇ܪܵܐ: ܘܲܩܪܵܒ̣ܵܐ ܐܲܕܼܪܸܟ̣ ܐܸܢܘܿܢ: ܘܕܲܒ̣ܩܲܕܼܡܵܝܬܵܐ ܥܒܲܕܼܘ ܐܸܢܘܿܢ ܒܲܡܨܲܥܬ̣ܵܐ. [No book]
[43]ܘܪܲܕܦܘܼܗܝ ܠܒܸܢܝܵܡܹܝܢ: ܘܛܲܪܕ̇ܘܼܗܝ: ܘܒܲܢܝܵܚܵܐ ܚܲܪܒ̇ܘܼܗܝ: ܥܕܲܡܵܐ ܠܘܼܩܒܲܠ ܓܒܲܥ ܡ̣ܢ ܡܲܕܼܢܵܚܲܝ̈ ܫܸܡܫܵܐ. [No book]
[44]ܘܲܢܦܲܠ̣ܘ ܡ̣ܢ ܒܸܢܝܵܡܹܝܢ: ܬܡܵܢܬܲܥܣܲܪ ܐܲܠܦ̈ܝܼܢ ܓܲܒ̣ܪ̈ܝܼܢ: ܟܠܗܘܿܢ ܗܵܠܹܝܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ. [No book]
[45]ܘܐܸܬ̣ܦܢܝܼܘ ܘܲܥܪܲܩ̣ܘ ܠܡܲܕܼܒ̇ܪܵܐ ܠܲܫܩܝܼܦܵܐ ܕܪܲܡܘܿܢ: ܘܲܢܦܲܠ̣ܘ ܒܲܫܒ̣̈ܝܼܠܹܐ ܚܲܡܫܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡܛܲܝ̈ ܣܲܝܦܵܐ: ܘܲܪܕܲܦ̣ܘ ܒܵܬܲܪܗܘܿܢ ܥܕܲܡܵܐ ܠܓܸܒ̣ܥܘܿܢ: ܘܲܚܪܲܒ̣ܘ ܡܸܢܗܘܢ ܬܪܹܝܢ ܐܲܠܦ̈ܝܼܢ ܓܲܒ̣ܪ̈ܝܼܢ. [No book]
[46]ܘܟ̣ܠ ܕܲܢܦܲܠ̣ܘ ܡ̣ܢ ܒܸܢܝܵܡܹܝܢ: ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡܛܲܝ̈ ܣܲܝܦܵܐ ܒܝܵܘܡܵܐ ܗܵܘ̇: ܟܠܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ. [No book]
[47]ܘܐܸܬ̣ܦܢܝܼܘ ܘܲܥܪܲܩ̣ܘ ܠܡܲܕܼܒ̇ܪܵܐ ܠܲܫܩܝܼܦܵܐ ܕܪܲܡܘܿܢ ܫܸܬ̣ܡܵܐܐ ܓܲܒ̣ܪ̈ܝܼܢ: ܘܝܼܬܸܒ̣ܘ ܒܲܫܩܝܼܦܵܐ ܕܪܲܡܘܿܢ ܐܲܪܒ̇ܥܵܐ ܝܲܪ̈ܚܝܼܢ. [No book]
[48]ܘܲܒ̣̈ܢܲܝ ܝܼܣܪܵܝܹܠ ܗܲܦܲܟ̣ܘ ܥܲܠ ܒ̈ܢܲܝ ܒܸܢܝܵܡܹܝܢ: ܘܲܡ̣ܚܵܘ ܐܸܢܘܿܢ ܒܦܘܼܡܵܐ ܕܚܲܪܒܵܐ: ܘܓܲܡܲܪܘ ܐܸܢܘܿܢ ܡ̣ܢ ܩܘܼܪ̈ܝܵܐ: ܡ̣ܢ ܒܢܲܝ̈ܢܵܫܵܐ ܘܲܥܕܲܡܵܐ ܠܲܒ̣ܥܝܼܪܵܐ: ܘܲܥܕܲܡܵܐ ܠܟ̣ܠ ܕܐܸܫܬ̇ܟܲܚ ܘܐܵܦ ܟܠܗܹܝܢ ܩܘܼܪ̈ܝܵܐ ܕܐܸܫܬ̇ܟܲܚ: ܐܵܘܩܸܕܼܘ ܐܸܢܹܝܢ ܒܢܘܼܪܵܐ. [No book]
Translation: Charles H. Hoole (1885)
Source: www.earlychristianwritings.com
Top