➖ »
«
➖ ➕
Peshitta OT
PesOT
The Acts of Thomas
ActThom
←
Judges
Jdg
9
→
[1]ܘܐܸܙܲܠ ܐܲܒ̣ܝܼܡܲܠܟ ܒܲܪ ܢܕܼܘܼܒ̣ܥܹܝܠ ܠܲܫܟܹܝܡ ܠܘܵܬ̣ ܐܲܚܹ̈ܐ ܕܐܸܡܹܗ: ܘܐܸܡܲܪ ܠܗܘܿܢ: ܘܲܠܟ̣ܠܵܗ̇ ܫܲܪܒ̇ܬ̣ܵܐ ܕܒܹܝܬ̣ ܐܲܒ̣ܘܼܗ̇ ܕܐܸܡܹܗ. [No book]
[2]ܐܸܡܲܪܘ ܩܕܼܵܡ ܟܠܗܘܿܢ ܡܵܪ̈ܝܗ̇ ܕܲܫܟܹܝܡ: ܡܵܢܵܐ ܦܲܩܵܚ ܠܟ̣ܘܿܢ: ܕܢܸܫܬܲܠܛܘܿܢ ܒܟ̣ܘܿܢ ܫܲܒ̣ܥܝܼܢ ܓܲܒ̣ܪ̈ܝܼܢ ܒܢܵܘ̈ܗܝ ܕܲܢܕܼܘܼܒ̣ܥܹܝܠ: ܐܵܘ ܕܢܸܫܬܲܠܲܛ ܒܟ̣ܘܿܢ ܚܲܕܼ ܓܒܲܪ: ܘܐܸܬ̇ܕܲܟ̣̄ܪܘ ܕܓܲܪܡ̱ܟ̣ܘܿܢ ܐ̄ܢܵܐ ܘܒܸܣ̱ܪܟ̣ܘܿܢ. [No book]
[3]ܘܐܸܡܲܪܘ ܐܲܚܹ̈ܐ ܕܐܸܡܹܗ ܩܕܼܵܡ ܟܠܗܘܿܢ ܡܵܪܹ̈ܝܗ̇ ܕܲܫܟܹܝܡ ܥܠܵܘܗܝ ܟܠܗܹܝܢ ܡܸܠܹ̈ܐ ܗܵܠܹܝܢ: ܘܐܸܨܛܒ̣ܝܼ ܠܸܒ̇ܗܘܿܢ ܒܵܬܲܪ ܐܲܒ̣ܝܼܡܲܠܟ: ܘܐܵܡܪܝܼܢ ܐܲܚܘܼܢ ܗ̄ܘ̣. [No book]
[4]ܘܝܲܗ̄ܒ̣ܘ ܠܹܗ ܫܲܒ̣ܥܝܼܢ ܕܟܸܣܦܵܐ ܡ̣ܢ ܒܹܝܬ̣ ܒܥܸܠ ܩܝܵܡܵܐ: ܘܐܸܓܲܪ ܒܗܘܿܢ ܐܲܒ̣ܝܼܡܲܠܟ ܐ̄ܢܵܫܵܐ ܣܪ̈ܝܼܩܹܐ: ܘܦܲܚ̈ܙܹܐ: ܘܐܸܙܲܠ̣ܘ ܒܵܬ̣ܪܹܗ. [No book]
[5]ܘܥܲܠ ܠܒܹܝܬ̣ ܐܲܒ̣ܘܼܗܝ ܠܥܘܼܦܪܵܐ: ܘܩܲܛܸܠ ܠܐܲܚܵܘ̈ܗܝ ܒܢܵܘ̈ܗܝ ܕܲܢܕܼܘܼܒ̣ܥܹܝܠ ܫܲܒ̣ܥܝܼܢ ܓܲܒ̣ܪ̈ܝܼܢ ܥܲܠ ܟܹܐܦܵܐ ܚܕܼܵܐ: ܘܐܸܫܬܲܚܲܪܘ ܝܘܿܬ̣ܵܡ ܒܲܪ ܢܕܼܘܼܒ̣ܥܹܝܠ ܙܥܘܿܪܵܐ ܡܸܛܠ ܕܐܸܬ̇ܛܲܫܝܼ. [No book]
[6]ܘܐܸܬ̣ܟܲܢܲܫܘ ܟܠܗܘܿܢ ܡܵܪܹ̈ܝܗ̇ ܕܲܫܟܹܝܡ ܘܟ̣ܠܹܗ ܥܲܡܵܐ ܕܒܹܝܬ̣ ܡܵܠܘܿ: ܘܐܸܙܲܠ ܘܐܲܩܝܼܡܘ ܠܐܲܒ̣ܝܼܡܲܠܟ ܕܢܸܗܘܹܐ ܥܠܲܝܗܘܿܢ ܡܲܠܟܵܐ: ܥܲܠ ܓܹܢ̄ܒ̣ ܒܲܠܘܼܛܵܐ ܕܡܲܨܦܝܵܐ ܕܐܝܼܬ̣ ܒܲܫܟܹܝܡ. [No book]
[7]ܘܚܵܘܝܼܘ ܠܝܘܿܬ̣ܵܡ: ܘܲܣܠܸܩ ܘܩܵܡ̣ ܒܪܹܫ ܛܘܼܪܵܐ ܕܓܲܪܙܝܼܡ: ܘܐܲܪܝܼܡ ܩܵܠܹܗ: ܘܐܸܡܲܪ: ܫܘܼܡܥܘܼܢܝ ܡܵܪܹ̈ܝܗ̇ ܕܲܫܟܹܝܡ: ܕܢܸܫܡܲܥܟ̣ܘܿܢ ܐܲܠܵܗܵܐ. [No book]
[8]ܡܑܹܙܲܠ ܐܝܼܠܵܢܹ̈ܐ ܕܢܸܡܫ̄ܚܘܼܢ ܥܠܲܝܗܘܿܢ ܡܲܠܟܵܐ: ܐܵܡ̇ܪܝܼܢ ܠܙܲܝܬܵܐ ܐܲܡܠܸܟ̣ ܥܠܲܝܢ. [No book]
[9]ܐܵܡܲܪ ܠܗܘܿܢ ܙܲܝܬܵܐ: ܠܵܐ ܫܵܒܹܩ ܐ̄ܢܵܐ ܕܘܼܗܵܢܝ: ܕܒ̣ܝ ܡܸܬ̣ܝܲܩܪܝܼܢ ܐܲܠܵܗܹ̈ܐ ܘܐ̄ܢܵܫܵܐ: ܘܐܵܙܹ̇ܠ ܐ̄ܢܵܐ ܠܲܡܢܵܕܼ ܐܝܼܠܵܢܹ̈ܐ. [No book]
[10]ܐܵܡ̇ܪܝܼܢ ܐܝܼܠܵܢܹ̈ܐ ܠܬܹܬܵܐ: ܬܵܝ ܐܲܢ̄ܬܝ ܐܲܡܠܸܟ̣ܝ ܥܠܲܝܢ. [No book]
[11]ܐܵܡܪܵܐ ܠܗܘܿܢ ܬܹܬܵܐ: ܠܵܐ ܫܵܒ̣ܩܵܐ ܐ̄ܢܵܐ ܚܲܠܝܘܼܬ̣ܝ: ܘܐܸܒ̇ܝ ܛܵܒ̣ܵܐ: ܘܐܵܙܵܠ̄ܐ ܐ̄ܢܵܐ ܠܲܡܢܵܕܼ ܥܲܠ ܐܝܼܠܵܢܹ̈ܐ. [No book]
[12]ܐܵܡ̇ܪܝܼܢ ܐܝܼܠܵܢܹ̈ܐ ܠܲܓܦܸܬܵܐ: ܬܵܝ ܐܲܢ̄ܬܝ ܐܲܡܠܸܟ̣ܝ ܥܠܲܝܢ. [No book]
[13]ܐܵܡܪܵܐ ܠܗܘܿܢ ܓܦܸܬܵܐ: ܠܵܐ ܫܵܒ̣ܩܵܐ ܐ̄ܢܵܐ ܐܲܕܼܫܝ ܕܲܡܚܲܕܼܵܐ ܠܸܒܵܐ ܕܐܲܠܵܗܹ̈ܐ ܘܲܕܼܐ̄ܢܵܫܵܐ: ܘܐܵܙܠ̄ܐ ܐ̄ܢܵܐ ܠܲܡܢܵܕܼ ܥܲܠ ܐܝܼܠܵܢܹ̈ܐ. [No book]
[14]ܐܵܡܪܝܼܢ ܐܝܼܠܵܢܹ̈ܐ ܟܠܗܘܿܢ ܠܗܲܛܛܵܐ: ܐܲܢ̄ܬ̇ ܐܲܡܠܸܟ̣ ܥܠܲܝܢ. [No book]
[15]ܐܵܡܲܪ ܗܲܛܛܵܐ ܠܐܝܼܠܵܢܹ̈ܐ: ܐܸܢ ܒܲܫܪܵܪܵܐ ܡܵܫܚܝܼܢ ܐ̄ܢܬ̇ܘܿܢ ܠܝܼ ܕܐܲܡܠܸܟ̣ ܥܠܲܝܟ̇ܘܿܢ: ܬܵܘ ܐܸܣܬܲܬܲܪܘ ܒܛܸܠܵܠܝ. ܘܐܸܢ ܠܵܐ: ܬܸܦܘܿܩ ܢܘܼܪܵܐ ܡ̣ܢ ܗܲܛܛܵܐ: ܘܬܹܐܟ̣ܘܿܠ ܠܐܲܪ̈ܙܹܐ ܕܲܒ̣ܠܸܒ̣ܢܵܢ. [No book]
[16]ܘܗܵܫܵܐ ܐܸܢ ܒܩܘܼܫܬܵܐ ܘܒܲܫܪܵܪܵܐ ܥܒܲܕ̇ܬ̇ܘܿܢ: ܕܐܲܡܠܟ̣ܬ̇ܘܿܢ ܠܐܲܒ̣ܝܼܡܲܠܟ: ܘܐܸܢ ܛܵܒ̣ܬ̣ܵܐ ܥܒܸ̇ܕ̇ܬ̇ܘܿܢ ܥܲܡ ܢܕܼܘܼܒ̣ܥܹܝܠ ܘܥܲܡ ܒܲܝܬܹ̇ܗ: ܐܵܘ ܐܲܝܟ̣ ܥܲܡܠܵܐ ܕܐܝܼܕܼܵܘ̈ܗܝ ܦܪܲܥܬ̇ܘܿܢܵܝܗܝ. [No book]
[17]ܕܐܸܬ̣ܟܲܬܲܫ ܐܵܒ̣ܝ ܥܲܠ ܐܲܦܲܝ̈ܟ̇ܘܿܢ: ܘܲܫܕܼܵܐ ܢܲܦ̮ܫܹܗ ܡ̣ܢ ܩܒ̣ܘܿܠ: ܘܦܲܨܝܼܟ̣ܘܿܢ ܡ̣ܢ ܐܝܼܕܼܵܐ ܕܡܸܕܝܲܢ. [No book]
[18]ܘܐܲܢ̄ܬ̇ܘܿܢ ܩܵܡܬ̇ܘܿܢ ܥܲܠ ܒܹܝܬ̣ ܐܵܒ̣ܝ ܝܵܘܡܵܢܵܐ: ܘܩܲܛܠܬ̇ܘܿܢ ܠܲܒ̣ܢܵܘ̈ܗܝ ܫܲܒ̣ܥܝܼܢ ܓܲܒ̣ܪ̈ܝܼܢ ܥܲܠ ܟܹܐܦܵܐ ܚܕܼܵܐ: ܘܐܲܡܠܸܟ̣ܬ̇ܘܿܢ ܠܐܒ̣ܝܼܡܲܠܟ ܒܲܪ ܐܲܡܬܹܗ ܥܲܠ ܡܪܹ̈ܝܗ̇ ܕܲܫܟ̣ܝܼܡ: ܡܸܛܠ ܕܐܲܚܘܼܟ̣ܘܿܢ ܗ̄ܘ̣. [No book]
[19]ܘܐܸܢ ܒܩܘܼܫܬܵܐ ܘܒܲܫܪܵܪܵܐ ܥܒܲܕ̇ܬ̇ܘܿܢ ܥܲܡ ܢܕܼܘܼܒ̣ܥܹܝܠ ܘܥܲܡ ܒܲܝܬܹ̇ܗ ܝܵܘܡܵܢܵܐ: ܚܕܼܵܘ ܒܐܲܒ̣ܝܼܡܲܠܟ: ܘܐܵܦ ܗ̤ܘ ܢܸܚܕܸ̇ܐ ܒܟ̣ܘܿܢ. [No book]
[20]ܘܐܸܢ ܠܵܐ: ܬܸܦܘܿܩ ܢܘܼܪܵܐ ܡ̣ܢ ܐܲܒ̣ܝܼܡܲܠܟ: ܘܬܹܐܟ̣ܘܿܠ ܠܡܵܪܹ̈ܝܗ̇ ܕܲܫܟܹܝܡ ܘܲܠܡܵܪܹ̈ܝܗ̇ ܕܡܲܠܘܿ. ܘܬܸܦܘܿܩ ܢܘܼܪܵܐ ܡ̣ܢ ܡܵܪܹ̈ܝܗ̇ ܕܲܫܟܹܝܡ: ܘܡܵܪܹ̈ܝܗ̇ ܕܡܲܠܘܿ: ܘܬܹܐܟ̣ܠܝܼܘܗܝ ܠܐܲܒ̣ܝܼܡܲܠܟ. [No book]
[21]ܘܲܥܪܲܩ ܝܘܿܬ̣ܵܡ ܘܐܸܬ̣ܦܲܠܲܛ: ܘܐܸܙܲܠ ܠܕܼܵܒ̣ܝܼܪ ܘܝܼܬܸܒ̣ ܬܲܡܵܢ: ܐܲܝܟܵܐ ܕܝܵܬܹܒ̣ ܗ̄ܘ̣ܵܐ ܐܲܒ̣ܝܼܡܲܠܟ ܡ̣ܢ ܩܕܼܝܼܡ. [No book]
[22]ܘܐܸܫܬܲܠܲܛ ܐܲܒ̣ܝܼܡܲܠܟ ܥܲܠ ܝܼܣܪܵܝܹܠ ܬܠܵܬ̣ ܫܢ̈ܝܼܢ. [No book]
[23]ܘܫܲܕܲܪ ܐܲܠܵܗܵܐ ܪܘܼܚܵܐ ܒܝܼܫܬܵܐ ܥܲܠ ܐܲܒ̣ܝܼܡܲܠܟ: ܘܥܲܠ ܡܵܪܹ̈ܝܗ̇ ܕܲܫܟܹܝܡ: ܘܕܲܓܸ̇ܠܘ ܡܵܪܹ̈ܝܗ̇ ܕܲܫܟܹܝܡ ܒܐܲܒ̣ܝܼܡܲܠܟ. [No book]
[24]ܡܸܛܠ ܕܢܹܐܬܹܐ ܥܵܘܼܠܵܐ ܕܫܲܒ̣ܥܝܼܢ ܒܢܵܘ̈ܗܝ ܕܲܢܕܼܘܼܒ̣ܥܹܝܠ: ܘܕܸܡܗܘܿܢ ܠܲܡܣܵܡ ܥܲܠ ܐܲܒ̣ܝܼܡܲܠܟ ܐܲܚܘܼܗܘܿܢ ܕܩܲܛܸܠ ܐܸܢܘܿܢ: ܘܥܲܠ ܡܵܪܹ̈ܝܗ̇ ܕܲܫܟܹܝܡ ܕܚܲܝܸܠܘ ܐܝܼܕܼܵܘ̈ܗܝ ܕܲܢܩܲܛܸܠ ܠܐܲܚܵܘ̈ܗܝ. [No book]
[25]ܘܐܲܟ̣ܡܸܢܘ ܠܹܗ ܟܡܹܐܢܹ̈ܐ ܥܲܠ ܪܹܫ ܛܘܼܪܵܐ: ܘܲܚܛܲܦܘ ܟܠ ܕܥܵܒܲܪ ܥܠܲܝܗܘܿܢ ܒܐܘܼܪܚܵܐ: ܘܐܸܬ̣ܚܵܘܝܼ ܠܐܲܒ̣ܝܼܡܲܠܟ. [No book]
[26]ܘܐܸܬ̣ܵܐ ܓܵܥܵܠ ܒܲܪ ܥܵܦܵܪ: ܗ̤ܘ ܘܐܲܚܵܘ̈ܗܝ: ܘܲܥܒܲܪܘ ܒܲܫܟܹܝܡ: ܘܐܸܬ̇ܬ̇ܟܸܠܘ ܥܠܵܘܗܝ ܡܵܪܹ̈ܝܗ̇ ܕܲܫܟܹܝܡ. [No book]
[27]ܘܲܢܦܲܩܘ ܠܕܲܒ̣ܪܵܐ: ܘܲܩܛܲܦܘ ܟܲܪ̈ܡܲܝܗܘܿܢ ܘܲܥܨܲܪܘ: ܘܲܥܒܲܕܼܘ ܚܠܘܿܠܵܐ: ܘܥܲܠ̣ܘ ܠܒܹܝܬ̣ ܐܲܠܵܗܲܝ̈ܗܘܿܢ: ܘܲܠܥܣܘ: ܘܐܸܣܬ̇ܝܼܘ: ܘܨܲܚܝܼܘ ܠܐܲܒ̣ܝܼܡܲܠܟ. [No book]
[28]ܘܐܵܡܲܪ ܓܵܥܵܠ ܒܲܪ ܥܵܦܵܪ: ܡܲܢܘܼ ܐܲܒ̣ܝܼܡܲܠܟ ܘܡܲܢܘܼ ܫܟܹܝܡ ܕܢܸܦ̱ܠܚܝܼܘܗܝ: ܠܵܐ ܗ̄ܘ̣ܵܐ ܒܲܪ ܢܕܼܘܼܒ̣ܥܹܝܠ. ܘܙܵܒ̣ܵܠ ܕܫܲܢܝܼ ܦܘܼܩܕܵܢܹܗ: ܦܠܲܚ̣ ܠܐ̄ܢܵܫܲܝ̈ ܚܡܘܿܪ ܐܲܒ̣ܘܼܗܝ ܕܲܫܟܹܝܡ: ܡܸܛܠ ܡܵܢܵܐ ܢܸܦ̱ܠܚܝܼܘܗܝ ܚܢܲܢ. [No book]
[29]ܡ̇ܢ ܕܹܝܢ ܐܲܫ̱ܠܡܹܗ ܠܥܲܡܵܐ ܗܵܢܵܐ ܒܐܝܼܕܲܝ̈: ܘܐܲܥܒܲܪܬܹ̇ܗ ܠܐܲܒ̣ܝܼܡܲܠܟ. ܘܐܸܡܲܪ ܠܐܲܒ̣ܝܼܡܲܠܟ: ܐܲܣܓܵܐ ܚܲܝܠܵܟ̣: ܘܦܘܿܩ. [No book]
[30]ܘܲܫܡܲܥ ܙܵܒ̣ܵܠ ܫܲܠܝܼܛܵܐ ܕܲܩܪܝܼܬ̣ܵܐ ܡܸܠܵܘ̈ܗܝ ܕܓ̣ܵܥܵܠ ܒܲܪ ܥܵܦܵܪ: ܘܐܸܬ̣ܚܲܡܲܬ̣ ܪܘܼܓ̣ܙܹܗ. [No book]
[31]ܘܫܲܕܲܪ ܐܝܼܙ̈ܓܲܕܹܐ ܠܘܵܬ̣ ܐܲܒ̣ܝܼܡܲܠܟ ܒܢܸܟ̣ܠܵܐ: ܘܐܸܡܲܪ: ܗܵܐ ܓܵܥܵܠ ܒܲܪ ܥܵܦܪ ܗ̤ܘ ܘܐܲܚܵܘ̈ܗܝ ܐܸܬ̣ܵܘ ܠܲܫܟܹܝܡ: ܘܗܵܐ ܚܕܼܝܼܪܝܼܢ ܠܲܩܪܝܼܬ̣ܵܐ ܥܠܲܝܟ. [No book]
[32]ܗܵܫܵܐ ܩܘܼܡ ܒܠܸܠܝܵܐ ܐܲܢ̄ܬ̇ ܘܥܲܡܵܐ ܕܥܲܡܵܟ̣: ܘܐܸܬ̣ܟܲܡ̄ܢ ܒܕܲܒ̣ܪܵܐ. [No book]
[33]ܘܲܒ̣ܨܲܦܪܵܐ ܡܵܐ ܕܕܸܢܚܲܬ̤ ܫܸܡܫܵܐ: ܩܘܼܡ ܘܗܲܠܸܟ̣ ܥܲܠ ܩܪܝܼܬ̣ܵܐ: ܘܗܵܐ ܗ̤ܘ ܘܥܲܡܵܐ ܕܥܲܡܹܗ ܢܵܦܩܝܼܢ ܠܘܵܬ̣ܵܟ̣: ܥܒܸܕܼ ܠܗܘܿܢ ܐܲܟ̣ܡܵܐ ܕܣܵܦܩܵܐ ܒܐܝܼܕܲܝ̈ܟ. [No book]
[34]ܘܩܵܡ ܐܲܒ̣ܝܼܡܲܠܟ ܘܥܲܡܵܐ ܟܠܹܗ ܕܥܲܡܹܗ ܒܠܸܠܝܵܐ: ܘܐܸܬ̣ܟ̇ܡܸܢܘ ܥܲܠ ܫܟܹܝܡ ܐܲܪܒ̇ܥܵܐ ܪܹ̈ܫܝܼܢ. [No book]
[35]ܘܲܢܦܲܩ ܓܵܥܵܠ ܒܲܪ ܥܵܦܵܪ: ܘܩܵܡ ܒܡܲܥܠܵܢܵܐ ܕܬܲܪܥܵܐ ܕܲܩܪܝܼܬ̣ܵܐ: ܘܩܵܡ̣ ܐܲܒ̣ܝܼܡܲܠܟ ܘܥܲܡܵܐ ܕܥܲܡܹܗ ܡ̣ܢ ܟܡܹܐܢܵܐ. [No book]
[36]ܘܲܚܙܵܐ ܓܵܥܵܠ ܠܥܲܡܵܐ ܘܐܸܡܲܪ ܠܙܵܒ̣ܵܠ: ܗܵܐ ܥܲܡܵܐ ܢܵܚܬ̇ܝܼܢ ܡ̣ܢ ܪܹ̈ܫܲܝ ܛܘܼܪܹ̈ܐ. ܘܐܸܡܲܪ ܠܹܗ ܙܵܒ̣ܵܠ: ܛܸܠܵܠܵܐ ܗ̄ܘ̣ ܕܛܘܼܪܹ̈ܐ ܚܵܙܹ̇ܐ ܐܲܢ̄ܬ̇ ܐܲܝܟ̣ ܐ̄ܢܵܫܵܐ. [No book]
[37]ܘܐܵܘܣܸܦ ܓܵܥܵܠ ܘܐܸܡܲܪ ܠܙܵܒ̣ܵܠ: ܗܵܐ ܥܲܡܵܐ ܢܵܚܬ̇ܝܼܢ ܡ̣ܢ ܬܘܼܩ̄ܢܵܗ̇ ܕܐܲܪܥܵܐ: ܘܪܹܫܵܐ ܚܲܕܼ ܐܵܬܹܐ ܡ̣ܢ ܐܘܼܪܚܵܐ ܕܒܹܝܬ̣ ܒܲܠܘܼܛܵܐ ܕܲܡܥܘܿܢܝܼܢ. [No book]
[38]ܐܵܡܲܪ ܠܹܗ ܙܵܒ̣ܵܠ: ܐܲܝܟܵܘ ܦܘܼܡܵܟ̣ ܗܵܘ̇ ܕܐܵܡܲܪ ܗ̄ܘ̣ܵܐ: ܕܡܲܢܘܼ ܐܲܒ̣ܝܼܡܲܠܟ ܕܢܸܦ̱ܠܚܝܼܘܗܝ: ܠܵܐ ܗ̄ܘ̣ܵܐ ܗܵܢܵܐ ܥܲܡܵܐ ܕܐܲܣܠܝܼܬ̇: ܦܘܿܩ ܗܵܫܵܐ ܘܐܸܬ̣ܟܲܬܲܫ ܥܲܡܹܗ. [No book]
[39]ܘܲܢܦܲܩ ܓܵܥܵܠ ܩܕܼܵܡ ܡܵܪܹ̈ܝܗ̇ ܕܲܫܟܹܝܡ: ܘܐܸܬ̣ܟܲܬܲܫ ܥܲܡ ܐܲܒ̣ܝܼܡܲܠܟ. [No book]
[40]ܘܪܲܕܼܦܹܗ ܐܲܒ̣ܝܼܡܲܠܟ ܘܲܥܪܲܩ ܡ̣ܢ ܩܕܼܵܡܵܘܗܝ: ܘܲܢܦܲܠ̣ܘ ܩܛܝܼ̈ܠܹܐ ܣܲܓ̇ܝܼ̈ܐܹܐ: ܥܕܲܡܵܐ ܠܡܲܥܠܵܢܵܐ ܕܬܲܪܥܵܐ. [No book]
[41]ܘܝܼܬܸܒ̣ ܐܲܒ̣ܝܼܡܲܠܟ ܒܐܲܕܼܘܿܡܵܐ: ܘܲܛܪܲܕܼ ܙܵܒ̣ܵܠ ܠܓܵܥܵܠ ܘܠܲܐܚܵܘ̈ܗܝ ܕܠܵܐ ܢܸܬ̇ܒ̣ܘܼܢ ܒܲܫܟܹܝܡ. [No book]
[42]ܘܲܗܘ̤ܵܐ ܡ̣ܢ ܒܵܬܲܪ ܝܵܘܡܵܐ: ܘܲܢܦܲܩ̣ܘ ܥܲܡܵܐ ܠܕܲܒ̣ܪܵܐ: ܘܚܵܘܝܼܘ ܠܐܲܒ̣ܝܼܡܲܠܟ. [No book]
[43]ܘܲܕܼܒܲܪ ܠܥܲܡܵܐ: ܘܦܲܠܸܓ̣ ܐܸܢܘܿܢ ܠܲܬ̣ܠܵܬ̣ܵܐ ܪܹ̈ܫܝܼܢ: ܘܐܸܬ̣ܟ̇ܡܸܢ ܒܕܲܒ̣ܪܵܐ: ܘܲܚܙܵܐ ܘܗܵܐ ܥܲܡܵܐ ܢܵܦܹ̇ܩ ܡ̣ܢ ܩܪܝܼܬ̣ܵܐ: ܘܩܵܡ ܥܠܲܝܗܘܿܢ: ܘܩܲܛܸܠ ܐܸܢܘܿܢ. [No book]
[44]ܘܐܲܒ̣ܝܼܡܲܠܟ ܘܪܹ̈ܫܹܐ ܕܥܲܡܹܗ: ܗܲܠܸܟ̣ܘ ܘܩܵܡ̣ܘ ܒܡܲܥܠܵܢܵܐ ܕܬܲܪܥܵܐ ܕܲܩܪܝܼܬ̣ܵܐ: ܘܲܬ̣ܪܹܝܢ ܪܹ̈ܫܝܼܢ ܗܲܠܸܟ̣ܘ ܥܲܠ ܟܠ ܕܲܒ̣ܡܲܕܼܒ̇ܪܵܐ ܘܩܲܛܸܠܘ ܐܸܢܘܿܢ. [No book]
[45]ܘܐܲܒ̣ܝܼܡܲܠܟ ܐܸܬ̣ܟܲܬܲܫ ܒܲܩܪܝܼܬ̣ܵܐ ܟܠܹܗ ܝܵܘܡܵܐ ܗܵܘ̇: ܘܟܲܒ̣ܫܵܗ̇ ܠܲܩܪܝܼܬ̣ܵܐ ܘܲܠܟ̣ܠܹܗ ܥܲܡܵܐ ܕܐܝܼܬ̣ ܒܵܗ̇ ܩܲܛܸܠ: ܘܥܲܩܪܵܗ̇ ܠܲܩܪܝܼܬ̣ܵܐ ܘܙܲܪܥܵܗ̇ ܡܲܠܘܼܚܵܐ. [No book]
[46]ܘܲܫܡܲܥܘ ܟܠܗܘܿܢ ܡܵܪܹ̈ܝܗ̇ ܕܡܲܓܕܲܠ ܫܟܹܝܡ: ܘܐܸܬ̣ܵܘ ܠܡܸܦܣܲܩ ܒܒܹܝܬ̣ ܐܹܝܠ ܩܝܵܡܵܐ. [No book]
[47]ܘܚܵܘܝܼܘ ܠܐܲܒ̣ܝܼܡܲܠܟ ܕܐܸܬ̣ܟܲܢܲܫܘ ܟܠܗܘܿܢ ܡܵܪܹ̈ܝܗ̇ ܕܡܲܓܕܲܠ ܫܟܹܝܡ. [No book]
[48]ܘܲܣܠܸܩ ܐܲܒ̣ܝܼܡܲܠܟ ܠܛܘܼܪܵܐ ܕܨܲܠܡܘܿܢ: ܘܟ̣ܠܹܗ ܥܲܡܵܐ ܕܥܲܡܹܗ: ܘܲܢܣܲܒ̣ ܐܲܒ̣ܝܼܡܲܠܟ ܢܵܪܓܵܐ ܒܐܝܼܕܹܗ: ܘܲܦܣܲܩ ܣܵܘܟ̇ܬ̣ܵܐ ܕܩܲܝܣܹ̈ܐ: ܘܫܲܩܠܵܗ̇ ܘܣܵܡܵܗ̇ ܥܲܠ ܟܲܬ̣ܦܹܗ: ܘܐܸܡܲܪ ܠܥܲܡܵܐ ܕܥܲܡܹܗ: ܡܵܐ ܕܲܚܙܲܝܬ̇ܘܿܢ ܕܥܸܒ̣ܕܹܬ̣: ܥܒܸܕܼܘ ܐܵܦ ܐܲܢ̄ܬ̇ܘܿܢ ܒܲܥܓܲܠ ܐܲܟ̣ܘܵܬ̣ܝ. [No book]
[49]ܘܲܦܣܲܩܘ ܓܒܲܪ ܣܵܘܟ̇ܬܹܗ: ܘܐܸܙܲܠ ܒܵܬܲܪ ܐܲܒ̣ܝܼܡܲܠܟ: ܘܣܵܡ ܟܵܫܝܼܬ̣ܵܐ ܘܐܵܘܩܕܼܵܗ̇ ܠܲܩܪܝܼܬ̣ܵܐ ܒܢܘܼܪܵܐ: ܘܡܝܼܬ̣ܘ ܟܠܗܘܿܢ ܐ̄ܢܵܫܵܐ ܕܐܝܼܬ̣ ܒܡܲܓܕܲܠ ܫܟܹܝܡ ܒܢܘܼܪܵܐ: ܐܲܝܟ ܐܵܠܹܦ: ܒܹܝܬ̣ ܓܲܒ̣ܪܹ̈ܐ ܠܢܸܫܹ̈ܐ. [No book]
[50]ܘܐܸܙܲܠ ܐܲܒ̣ܝܼܡܲܠܟ ܠܬ̣ܵܒ̣ܵܨ: ܘܲܫܪܵܐ ܒܬ̣ܵܒ̣ܵܨ ܘܐܲܚܕܵܗ̇. [No book]
[51]ܘܡܲܓܕ̇ܠܵܐ ܥܲܫܝܼܢܵܐ ܗܘ̤ܵܐ ܒܓ̣ܵܘܵܗ̇ ܕܲܩܪܝܼܬ̣ܵܐ: ܘܲܥܪܲܩ̣ܘ ܠܬܲܡܵܢ ܟܠܗܘܿܢ ܓܲܒ̣ܪܹ̈ܐ ܘܢܸܫܹ̈ܐ: ܘܟ̣ܠܗܘܿܢ ܡܵܪܹ̈ܝܗ̇ ܕܲܩܪܝܼܬ̣ܵܐ: ܘܐܸܚܲܕܼܘ ܒܐܲܦܲܝ̈ܗܘܿܢ: ܘܲܣܠܲܩܘ ܠܐܸܓܵܪܵܐ ܕܡܲܓ̣ܕ̇ܠܵܐ. [No book]
[52]ܘܡܲܛܝܼ ܐܲܒ̣ܝܼܡܲܠܟ ܥܕܲܡܵܐ ܠܡܲܓܕ̇ܠܵܐ ܘܡܸܬ̣ܟܲܬܲܫ ܒܹܗ: ܘܲܩܪܲܒ̣ ܥܕܲܡܵܐ ܠܬܲܪܥܵܐ ܕܡܲܓܕ̇ܠܵܐ ܕܢܵܘܩܕܼܝܼܘܗܝ ܒܢܘܼܪܵܐ. [No book]
[53]ܘܲܫܕܼܵܬ̤ ܐܲܢ̄ܬ̇ܬ̣ܵܐ ܚܕܼܵܐ ܬܸܒ̣ܪܵܐ ܕܪܲܟ̣ܫܵܐ ܕܪܲܚܝܵܐ ܥܲܠ ܪܹܫܹܗ ܕܐܲܒ̣ܝܼܡܲܠܟ: ܘܲܬ̣ܒܲܪܬܹܗ ܠܪܹܫܹܗ. [No book]
[54]ܘܲܩܪܵܐ ܡܣܲܪܗ̱ܒ̣ܵܐܝܼܬ̣ ܠܛܵܠܝܵܐ ܫܵܩܹܠ ܡܵܐܢܵܘ̈ܗܝ: ܘܐܸܡܲܪ ܠܹܗ: ܫܡܘܿܛ ܣܲܝܦܵܟ ܘܲܩܛܘܿܠܲܝܢܝ ܒܹܗ: ܕܠܵܐ ܢܹܐܡܪܘܿܢ ܥܠܲܝ ܕܐܲܢ̄ܬ̇ܬ̣ܵܐ ܩܛܲܠܬܹܗ. ܘܕܲܩܪܹܗ ܥܠܲܝܡܵܐ ܘܡܝܼܬ̣. [No book]
[55]ܘܲܚܙܵܘ ܒ̈ܢܲܝ ܝܼܣܪܵܝܹܠ ܕܡܝܼܬ̣ ܠܹܗ ܐܲܒ̣ܝܼܡܲܠܟ: ܘܐܸܙܲܠܘ ܐ̄ܢܵܫ ܠܐܲܬ̣ܪܹܗ. [No book]
[56]ܘܦܲܪܥܹܗ ܐܲܠܵܗܵܐ ܒܝܼܫܬܵܐ ܠܐܲܒ̣ܡܲܠܟ ܕܲܥܒܲܕܼ ܠܐܲܒ̣ܘܼܗܝ: ܘܩܲܛܸܠ ܠܫܲܒ̣ܥܝܼܢ ܐܲܚܵܘ̈ܗܝ. [No book]
[57]ܘܟ̣ܠܵܗ̇ ܒܝܼܫܬܵܐ ܕܲܥܒܲܕܼܘ ܐ̄ܢܵܫܲܝ̈ ܫܟܹܝܡ: ܐܲܗܦܸܟ ܐܲܠܵܗܵܐ ܒܪܹܫܗܘܿܢ: ܘܐܸܬ̣ܵܬ̤ ܥܠܲܝܗܘܿܢ ܟܠܵܗ̇ ܠܵܘܛܬܹܗ ܕܝܘܿܬ̣ܵܡ ܒܲܪ ܢܕܼܘܼܒ̣ܥܹܝܠ. [No book]
 
Top